Yahwana 16

1 “I pəla ala giri shanga su ngəni, kamnyar ta giri asə ngka ka bwahili akwa hamta jirər giri. 2Kamnyar da ata sə kədləɓəla giri akwa mbwayeri ar vəngkər səli. Jiri saka akwa si tə kəlara mdə na tsi giri ata dzama abbər tsa akwa hara kəthlər aka Hyel. 3Da ata hara suayeri ngəni kamnyar tə da aɗi səndə Tədda wa, wala səndə ra wa. 4Amma I ku pəla ala giri suayeri ngəni, kamnyar ma sakatə sakari ku hara, ka giri ɗangta abbər I ku pəla ala giri.”

Kəthlər Ar Mambəl Na Ɓɗakkarkara

“I aɗi pəla ala giri suayeri ngəni akwa baɗitari wa, kamnyar tə I ata vəi duku ka giri. 5Amma kulini I akwa mwari adzə mdə na thlentə ra, amma ba kulini mda aɗi akwa nca giri na yu ra abbər, ‘Ga ata ləmari wa.’ 6Amma kamnyar tə I pəla ala giri suayeri ngəni, ɗəffa giri ku ɓzi. 7Amma I akwa pəla ala giri jirkur, tərarna ni ata ndzi ala giri ka ampani. Kamnyar ma I aɗi təra wa Mdər Dlara ni aɗi ata si wa. Amma ma I ku təra, I ata thlentə ni ala giri. 8Antə ma sakatə tsa ku si, tsa ata ncanta aka mjir duniya abbər dzamər ɗa ata kəra biku, ka jirkur, ka shariya ni, aɗi kalkal wa. 9Dzamər ɗa ata kəra biku aɗi kalkal wa kamnyar da aɗi hamta jiri ali wa. 10Dzamər ɗa ata kəra jirkur ar Hyel aɗi kalkal wa, kamnyar I akwa mwari adzə Tədda, antə giri aɗi ata wutə ra kəra wa. 11Tsuwa dzamər ɗa ata kəra shariya aɗi kalkal wa, kamnyar mdə ku kurtə thlamta shariya aka mdə na ka kuthlikur ata kəra duniya ngəni ni.

12 “I tsu ka suayeri hang damwa tə kəi pəla ala giri, amma giri amzhi kətari kulini wa. 13Amma ma sakatə Mambələr jirkur ni ku si, tsa ata pwar giri akwa shanga jirkur. Kamnyar tsa aɗi ata gari akwa dunar kərari wa, amma kəlara su tə tsa nggata, tsa ata pəlari, tsuwa tsa ata pəla ala giri suayeri na ata sə hara akəmazi. 14Tsa ata haptə səliyirna, kamnyar tsa ata kətə su tə I pəla ka tsa sə ngkərɓəla ala giri. 15Shanga su tə Təddarna kəgari an arna. An su na hara tə I pəla abbər Mambəl ni ata dlu su akəli ka tsa ngkərɓəla ala giri.”

Ɗəffu Ɓzəɓza Ata Sə Shin Ka Ɗəffu Mwapu

16 “Aghəla saka laga raka, giri aɗi ata wutə ra kəra wa. Tsuwa azi ka saka laga raka giri ata jaktə wutə ra.”

17Antə mji laga akwa nca mjirthlipərni yu nvwa ɗa abbər, “Man tə tsa akwa bara pəla ala mburu nə ri, tə tsa pəla, ‘Aghəla saka laga raka, giri aɗi ata wutə ra kəra wa, ka tsuwa azi ka saka laga raka giri ata jaktə wutə ra’ ni? Tsuwa man tə tsa akwa bara pəlari ri, tə tsa pəla, ‘Kamnyar I akwa mwari adzə Tədda’ ni?” 18Da ləkəma akwa pəla abbər, “Man karapur, ‘Aghəla saka laga raka’ nə ri? Yeru aɗi səndə su tə tsa akwa gari ata kər wa!”

19Yesu ku sənda abbər da akwa bara yu ni, antə tsa pəla ala ɗa, “Giri akwa yu nvwa giri ata kəra karapur su tə I pəla abbər, ‘Aghəla saka laga raka giri aɗi ata wutə ra kəra wa,’ ka tsuwa ‘Aghəla saka laga raka giri ata jaktə wutə ra’ ni ya? 20I akwa pəla ala giri jirkur, giri ata sə tuwa, ka jikatuwa, amma ar duniya tsa ata hara kucali. Giri ata sə ndzi ka ɗəffə ɓzəɓza, amma ɗəffə ɓzəɓzəkurər giri ata sə shin ka kucali. 21Sakatə mwala akwa kutərya, tsa ana ɗar bwani ka duna, kamnyar sakar yarni ku hara. Amma ma sakatə tsa ku yaɓəla ɓzər ni, tsa aɗi ana ɗangtə bwaniyirni ni kəra wa, kamnyar tsa nghyinghyari ka kucali kamnyar yaɓəla ɓzər bilən akwa duniya. 22Apani tsuwa giri ka ɗəffə ɓzəɓza kulini, amma I ata jaktə wutə giri, antə ɗəffa giri ata nghyi ka kucali, tsuwa mdər mzhi dlutsə kucali ngəni akəla giri aɗi wa.

23 “Vir nda, su aɗi tə giri ata jaktə yuwari akəli wa. I akwa pəla ala giri jirkur, ma giri ku kiɗə kəlara su akəla Tədda, tsa ata na ala giri suari akwa thləmi. 24Amma har ba kulini giri aɗi kiɗə su akwa thləmi wa. Yu giri, antə giri ata dluwari, kamnyar ka giri ndzi ka kucali na nghyinghyari.”

Yesu Ku Nggyari Duniya

25 “Suayeri ngəni I ku pəla ala giri akwa karapu. Amma saka akwa si tə I aɗi ata jaktə gari ala giri akwa karapu kəra wa, I ata sə gari ala giri ata bəbal ata kəra Tədda. 26Vir nda giri ata sə kiɗə su akwa thləmi. I aɗi akwa pəla I ata sə kiɗə kəra Tədda ata vəya giri wa, 27kamnyar Tədda ka kərari hir giri, kamnyar giri ku hir ra, ka hamta jiri abbər I thlata adzə Tədda. 28I thlata adzə Tədda ka si akwa duniya. Antə kulini I akwa zhar duniya kəi jaktə ngka adzə Tədda ni.”

29Antə mjirthlipərni pəla alari, “Yauwa, kulini ja ga akwa gari ata bəbal, aɗi akwa karapu wa. 30Kulini yeru ku sənda abbər ga ku səndə shanga su. Ga aɗi akwa bara ka mdə laga yu ala gə su wa. Atar ngəni, yeru ku hamta jiri abbər ga ku thlata adzə Hyel.”

31Antə Yesu pəla ala ɗa, “Kulini giri ku hamta jiri ya? 32Saka akwa si, har ma ku kurtə si, tə shanga giri ata sə titiləmtadzi, ka waskəi mwari aharngkiɗa, ka giri zhar ra shira. Amma wala apani I aɗi shira wa, kamnyar Təddarna adzə ra. 33I ku pəla ala giri su ngəni ni, kamnyar ka giri ndzi ka kucali akwa ɗəffa giri. Akwa duniya ni giri akwa sa bwani. Amma ka giri ntsətədzi, kamnyar I ku kurtə nggyari duniya.”

Currently Selected:

Yahwana 16: KNB

Highlight

Copy