Yahwana 13

Yesu Ku Kəcimta Səla Mjirthlipərni

1Vir laga akəmata Kucalər Fəlɓəla Kəi ahara ni, Yesu ku sənda abbər sakarni ku hara tə tsa zhar duniya ni, ka tsa mwari adzə Tədda. Kamnyar tə tsa hir mjirni na akwa duniya, antə tsa ncanta ala ɗa hirkurərni har ba kurari.

2Tun akəmata da abaɗitə susəmər tahaku ni, shatan ku kurtə vu akwa ɗəffa Yahuda Iskariyoti na ɓzər Siman, abbər ka tsa ndzi mdər ɓəli Yesu. 3Yesu ku sənda abbər Təddarni ku hamta shanga su akwa tsiyari, ka səndə tsuwa abbər tsa thlata adzə Hyel, antə tsa ata jaktə ngka tsu adzə Hyel. 4Antə tsa thlata akwa sakar susəmər tahaku ni, ka ntsui ləptərni na ola ka pwi, ka fatə tawal ka mbwi kusarari kəgari. 5Antə tsa pu yimi akwa tasa ka baɗitə kəcimta səla mjirthlipərni, ka fwavumta ka tawal tə tsa mbwi ata kusarari ni. 6Amma sakatə tsa si adzə Siman Bitrəs, antə Siman Bitrəs pəla alari, “Mthlaku, ga ata kəcimta səli ya?”

7Antə Yesu shinau alari ka pəla, “Su tə I akwa harari ni ga asəndə kulini wa, amma akəmazi ga ata sə nggaɓəlari.”

8Antə Bitrəs pəla alari, “Awa, shang ga aɗi ata kəca ali səli wa.”

Antə Yesu pəla alari, “Ma I aɗi kəcimta ala gə səla gə wa, su aɗi na ata paktə ra ka gə wa.”

9Antə Siman Bitrəs pəla, “Mthlaku, ma ku ndzi apani, aɗi səli daci wa, amma purəm kəga tsi ka kəri tsuwa!”

10Antə Yesu pəla alari, “Mdə na ku kurtə kuri pəra, shanga dzari ku kurtə ndzi kəcəkəcari. Antə tsa aɗiya tur pəra kəra wa, tar ka tsa kəcimta səlari daci. Kamnyar giri kəcəkəcari, amma aɗi shanga giri wa.” 11Kamnyar Yesu ku kurtə səndə mdə na ata sə ɓəli ni, an su na hara tə tsa pəla abbər, “Aɗi shanga giri an kəcəkəcari wa ni.”

12Sakatə Yesu ku kuri kəcimta səla ɗa, antə tsa fatə ləptərni na ol ni ka hata, ka jaktə ndzəndzi akwa vəi ndzəndziyirni, ka pəla ala ɗa, “Giri ku nggaɓəla su tə I hara ala giri ni ya? #Luk 22:27 13Giri ana kəga ra Maləm ka Mthlaku, tsuwa giri ku pəla kalkal, kamnyar I apani. 14Antə ma I na Mthlakər giri ka Maləmər giri, ku kəcimta səla giri, giri ma tar ka giri kəcimta səla nvwa giri tsuwa. 15Kamnyar I ku ncanta ala giri lakwari, kamnyar ka giri hara tsu apatə I ku hara ala giri. 16Jiri, I akwa pəla ala giri, mafa aɗi ana təramta mthlakərni ka olkur wa, tsuwa mdər thlenta aɗi ana təramta mdə na thlentə ni ni ka olkur wa. #Mat 10:24; Luk 6:40; Yah 15:20 17Kulini tə giri ku səndə suayeri ngəni ni, Hyel ata vədza ala giri barka, ma giri akwa hara ɗa.

18 “I aɗi akwa gari ata kəra shanga giri wa, kamnyar I asəndə mji tə I ku carɓəla. Amma tar ka su tə mdə pəla akwa kakaɗər Hyel ni nghyaɓəladzi abbər, ‘Mdə na ku səm susəmərna, ku ntsari ra ka matədukwari.’ 19I akwa pəla ala giri kulini, akəmata suari ahara, kamnyar ma sakatə su ni ku hara ka giri hamta jiri abbər I an tsa. 20I akwa pəla ala giri jirkur, kəlara mdə na ku dlu mdə tə I thlenta, tsa ku dlu ra. Tsuwa kəlara mdə na ku dlu ra, tsa ku dlu mdə na thlentə ra.” #Mat 10:40; Mar 9:37; Luk 9:48; 10:16

Yesu Pəla Mda Ata Sə Ɓəli Ni

(Mat 26:20-25; Mar 14:17-21; Luk 22:21-23)

21Sakatə Yesu pəla gari ngəni, təng su ni damitə ni ka duna akwa ɗəffari. Antə tsa pəlaɓəla ata bəbal abbər, “I akwa pəla ala giri jirkur, pal akwa nca giri ata sə ɓəli ra.”

22Antə mjirthlipərni wulhə nvwa ɗa, kamnyar da aɗi səndə mdə tə tsa akwa gari ata kərari nə wa. 23Pal akwa nca mjirthlipərni natə tsa hir ni, andzəndzi kudzəhə ka Yesu. 24Antə Siman Bitrəs hara seɗa alari ka pəla, “Yu ni, ka tsa pəla ala mburu mdə tə tsa akwa gari ata kərari ni.”

25Antə mdərthlipə ngəni shinardzi abwar Yesu ka yu ni abbər, “Mthlaku, wa ri?”

26Antə Yesu shinau ka pəla, “Tsa an mdə tə I ata ɓəli buradi, kəi hau akwa yimər səkwar, kəi na alari.”

Antə Yesu ɓəli buradi ni, ka hau akwa yimər səkwar ni, ka na aka Yahuda na ɓzər Siman Iskariyoti. 27Təkəma tə Yahuda dlu buradi ni, təng Shatan ləkwa ɗəffa ri. Antə Yesu pəla alari, “Su tə ga akwa bara harari ni, hara taktar.” 28Amma akwa nca ɗa na ndzəndzi akwa vəi susəm ni, mda aɗi na nggaɓəla su na hara tə Yesu pəla ndər ngəni aka Yahuda Iskariyoti wa. 29Mji laga akwa dzama abbər təng tə Yahuda an ka thləvur kəs kwaba ni, nuhum Yesu akwa pəla alari ka tsa ra mastə ala ɗa su tə da akwa turari kamnyar sakar kucali ni, wala tsuwa ka tsa hamta su laga aka mjir bwani. 30Sakatə Yahuda ku dlu buradi ni, antə tsa ləɓəla təkəma. Tsuwa saka nda viri ku hara.

Tsawa Na Bilən

31Sakatə Yahuda ku ləɓəla ka təra, antə Yesu pəla, “Kulini antə mda ata haptə səliyir Ɓzər Mda, tsuwa atar ni antə mda ata haptə səliyir Hyel. 32Ma mdə ku haptə səliyir Hyel atar ni, Hyel ka kərari ata haptə səliyir Ɓzər Mda tsuwa, tsa ata harari təkəma. 33Maɗana, I aɗi ata jaktə fəi adzə giri wa. Antə giri ata sə bara ra. Amma tsu apatə I pəla aka mjir Yahudi ni, antə I akwa pəla ala giri kulini abbər, ‘Vəi tə I akwa mwari ata ni, giri aɗi ata mzhi mwari wa.’ #Yah 7:34 34Tsawu na bilən antə I akwa na ala giri, abbər ka giri hir nvwa giri. Tsu apatə I ku hir giri, antə ka giri hir nvwa giri tsuwa. #Yah 15:12,17; 1 Yah 3:23; 2 Yah 5 35Atar apani antə shanga mji ata sənda abbər giri an mjirthlipərna, ma giri hir nvwa giri.”

Yesu Pəla Bitrəs Ata Sə Kampikər Ni Ka Makər

(Mat 26:31-36; Mar 14:27-31; Luk 22:31-34)

36Antə Siman Bitrəs yu ni ka pəla, “Mthlaku ga ata ləma ri?”

Antə Yesu pəla, “Vəi tə I ata mwari ata ni, ga aɗi ata mzhi nu ra kulini wa, amma akəmazi ga ata sə nu ra.”

37Antə Bitrəs pəla alari, “Mthlaku, kamnyar mi tə I amzhi nu nga kulini wa ri? I ata hamta mpikəi kamnyar nga.”

38Antə Yesu pəla, “Ga ata mzhi hamta mpika ga kamnyar na? Jiri, I akwa pəla ala ga abbər akwabə fugəm atuwa, ga ata sə kampiku ka makər abbər ga aɗi səndə ra wa.”

Currently Selected:

Yahwana 13: KNB

Highlight

Copy