Yahwana 12

Mdə Ku Kəkərtə Səla Yesu Ka Mal Shiwura Na Msəra

(Mat 26:6-13; Mar 14:3-9)

1Sakatə mbil vir ngkwa akwabə mda abaɗitə Kucalər Fəlɓəla Kəi, antə Yesu mwari ahar Bethlani, akwa kəi tə Lezəru natə Yesu thlentə ni akwa mtəmtə ni akwa. 2Antə da namta alari susəmər tahaku. Marthla an mwanta ala ɗa susəm ni, tsuwa Lezəru an pal akwa nca mji na səm susəm ni kəga Yesu. 3Antə Maryamu kətə kwalɓar mal shiwura na msəra tə mdə nam ka nard shini, na ka masari ɓəɓal, ka kəkərtə səla Yesu kəgari, ka fwavumta səlari ni ka shishir kərari. Antə shiwur mal na msəra ni ndlətə shanga kutakəi ni. #Luk 7:37-38 4Amma pal akwa nca mjirthlipər Yesu na ka thləmari Yahuda Iskariyoti ni, watau mdə na ata sə ɓəli ni ni, pəla, 5“Kamnyar mi tə mda aɗələmta mal na ngəni, ka mdə hamta kwabari aka mjir bwani wa ri? Ai kwabar mal ngəni ata mzhi ntəmta mdər kəthlər ar vir aru makər.” 6Yahuda aɗi pəla ngəni kamnyar abbər tsa hir mjir bwani wa, amma kamnyar tə tsa mdər həla. Kamnyar tsa an mdər kəs thləvur kwaba, antə tsa ana kəli ka kəli su tə mdə ku pu akwa thləvu ni.

7Antə Yesu pəla, “Zhar ni! Tsa vəi mal shiwur na msəra ngəni dzak kamnyar vir tə mda ata sə harəmta ra. 8Giri ka mjir bwani akwa nca giri tədəku, amma aɗi tədəku antə giri ata wutə ra adzə giri wa.”

Mdə Ku Ɗəmhə Ɗimikur Ata Kəra Lezəru

9Sakatə dlamar mjir Yahudi nggata abbər Yesu ahar Bethlani, antə da mwari anda tsuwa, aɗi kamnyar Yesu daci wa, amma kamnyar ka da wutə Lezəru tə Yesu thlentə akwa mtəmtə ni. 10Antə pristayeri na ol'ola ɗəmhədzi abbər ka da si tsi Lezəru tsuwa, 11kamnyar tə atar ni mjir Yahudi hang akwa zhar ɗa ka hamta jiri aka Yesu.

Yesu Ku Mwari Akwa Urushalima

(Mat 21:1-11; Mar 11:1-11; Luk 19:28-40)

12Səɓəla ɗəpari antə dlamar mji na si akwa susəmər Kucalər Fəlɓəla Kəi ni nggata abbər Yesu akwa si ahar Urushalima. 13Antə da fatə thlaliyir dipənau ka ləɓəla kamnyar thla kəmari akwa pəla ka kuraku abbər,

“Hu gir Hyel!

Ka Hyel vədzə barka aka mdə na akwa si

akwa thləma Mthlaku!

Ka Hyel vədzə barka aka Kuthlir Israila!”

14Antə Yesu wutə ɓzər kwara ka fəlta, tsu apatə mdə ku rəbuta akwa kakaɗə ni abbər,

15“Giri aɗiya thlivər wa,

giri na mjir Sihiyona!

Nggədza Kuthlir giri akwa si,

andzəndzi ata ɓzər kwara.”

16Ntangkəma mjirthlipərni aɗi nggaɓəla su ngəni wa, amma sakatə mji ku haptə səliyir Yesu apani, antə da ɗangta abbər shanga suayeri ngəni na akwa hara alari ni, mdə ku rəbuta abbər da ata sə hara alari.

17Antə mji na ndzi adzə Yesu akwa sakatə tsa kəgaɓəla Lezəru akwa kula, ka thlentə ni akwa mtəmtə ni, ləkwa ngkər aka mji su tə Yesu hara ni. 18Su na hara tə mji hang ra thlakəmari ni an kamnyar tə da nggata abbər tsa an hara sur ndatə ngəni ni. 19Antə mjir Farisi pəla aka nvwa ɗa abbər, “Wul giri ja! Su aɗi tə mburu ata mzhi harari wala raka wa! Wul giri laku tə duniya shang akwa nu ni bu!”

Mjir Helleni Laga Ku Pakə Yesu

20Mjir Helleni laga aɗi akwa nca mji na mwari ahar Urushalima kamnyar vəngkər səli akwa sakar kucali ngəni ni. 21Antə da mwari adzə Filibus na mdər Bethsaida na akwa tsəɗi Galili ni, ka pəla alari, “Zanuwa, yeru akwa bara ka yeru wutə Yesu.”

22Antə Filibus mwari ka pəla aka Andrawus. Antə Andrawus ka Filibus mwari ka pəla aka Yesu. 23Antə Yesu shinau ala ɗa ka pəla, “Kulini saka ku hara kamnyar ka Ɓzər Mdə wutə səli. 24I akwa pəla ala giri jirkur, ma munya alkama aɗi təri akwa həi ka hiɗa wa, tsa ata ndzi tsu duku shini ni. Tar ma tsa ku hiɗa, antə tsa ata ya hang. 25Kəlara mdə na akwa hir mpikari, tsa ata ni ka mpikari ni. Amma kəlara mdə na akwa nggəlar mpikari akwa duniya ngəni, tsa akwa ɓəlatə ni har ba aka mpikə na akur wa. #Mat 10:39; 16:25; Mar 8:35; Luk 9:24; 17:33 26Kəlara mdə na ata hir hara kəthlər ali, tar ka tsa nu ra. Kamnyar kəlara vəi tə I akwa, tar ka mdər hara kəthlər ali ndzi anda tsuwa, ka tsa ndzi ata vəi duku ka iya akwa vəi natə I akwa. Kəlara mdə na akwa hara kəthlər ali, Təddarna ata haptə səliyirni.”

Yesu Ku Gari Ata Kəra Mtərni

27 “Kulini ɗəffi ɓzəɓzari. Ka man tə kəi pəla ri? Kəi pəla, ‘Tədda, kələmta ali saka ngəni ya?’ Awa! Ai shang kamnyar saka ngəni antə I si ni.” 28Tədda ka gə kətə səliyir thləma ga.

Antə kuraku laga səghəi akwar amtazi akwa pəla abbər, “I ku kətə səliyirni, antə I ata jaktə kətə səliyirni ka damwa.”

29Sakatə mji na athləthlata ata vəi nda nggatə kurakə ni, antə da pəla, “Hyel akwa dləra.” Mji laga tsuwa pəla, “Mdərthlentərhyel laga an gari alari.”

30Amma Yesu pəla ala ɗa, “Kurakə ngəni si kamnyar giri, aɗi kamnyar na wa. 31Kulini antə mda ata hara shariya aka duniya ngəni, tsuwa kulini antə mda ata kədləɓəla kuthlir duniya ngəni. 32Ma sakatə mdə ku haptə ra amta ta di, antə I ata ndəkərtə shanga mji adzə ra.” 33Sakatə tsa pəla gari ngəni, antə tsa ncaɓəla jili mtə na ata sə wutə ni.

34Antə mji shinau alari ka pəla, “Yeru ku nggata akwa Kakaɗər Hyel abbər Kristi ni ata sə ndzi har ba saka madi. Ka, apa madi tə ga akwa pəla abbər dwali ka mdə haptə Ɓzər Mda amta nə ri? Wan Ɓzər Mdə nə ri?”

35Antə Yesu pəla ala ɗa, “Parakərna ni ata mbəla kamnyar giri ar saka laga raka daci. Antə mwa giri akwa parakə ni, akəmata kuthlu asə kəli giri. Kamnyar mdər mwa akwa kuthlu aɗi ana səndə vəi tə tsa akwa mwari ata wa. 36Sakatə giri tsu ka parakə ni adzə giri, ka giri hamta mbərsa ka parakə ni, kamnyar ka giri ndzi maɗa' parakəu.”

Mjir Yahudi Aɗi Mbərsa Ka Yesu Wa

Aghəla tə Yesu pəla gari ngəni, antə tsa təra ka ra ɗuwamtadzi ala ɗa. 37Kamnyar wala tə tsa ku hara surndatayeri hang ata nca ɗa, da aɗi hamta jiri alari wa. 38Ngəni an kamnyar ka ndər tə Naɓi Ishaya pəla ni nghyaɓəladzi, abbər,

“Mthlaku, wan ata mbərsa ka gari tə yeru ngkər nə ri?

Tsuwa aka wa antə Mthlaku ncantə dunarni nə ri?”

39Kamnyar ngəni da aɗi mzhi hamta jiri wa, kamnyar Ishaya ku pəla akwa vəi damwa abbər,

40“Tsa ku hartə nca ɗa,

ka vu tə ɗəffa ɗa ndzi ɓəɓal,

kamnyar ta da asə wutə su ka nca ɗa,

wala nggaɓəla su akwa ɗəffa ɗa,

har ka da ngka adzə ra kəi mbantə ɗa.”

41Ishaya pəla apani ni kamnyar tə tsa ku wutə səliyir Yesu, ka gari ata kərari.

42Wala tə mjir Yahudi hang, ata kəma duku kəga mji na ol'olər ɗa, ku hamta jiri aka Yesu ni, da aɗi hir pəlaɓəlari ata bəbal wa, kamnyar da akwa thlivər mjir Farisi, abbər nuhum da asə kədləɓəla ɗa akwa mbwar vəngkər səli ni. 43Kamnyar da hir ka mji an hu ɗa, ta ka Hyel an hu ɗa.

Ndərər Yesu An Ata Sə Hara Shariya Aka Mda

44Antə Yesu haptə kurakari ka pəla, “Kəlara mdə na ku hamta jiri ali, tsa aɗi hamta jiri ali daci wa, amma tsa ku hamta jiri aka mdə na thlentə ra tsuwa. 45Tsuwa kəlara mdə na ata wutə ra, tsa ata wutə mdə na ku thlentə ra. 46Kamnyar I si akwa duniya ni apa parakəu, kamnyar ka kəlara mdə na ku hamta jiri ali, aɗiya ndzi akwa kuthlu wa. 47Kəlara mdə na ku nggatə ndərərna, amma tsa aɗi kələngkər akari wa, I aɗi an ata hara alari shariya wa. Kamnyar I aɗi si kəi hara shariya aka duniya wa, amma kamnyar kəi mbantə duniya. 48Kamnyar kəlara mdə na ku nggəlar ra, tə tsa aɗi dlu ndərərna wa, tsa ka mdər sə hara alari shariya, ndər tə I pəla an ata sə hara alari shariya ni akwa kurər duniya. 49Kamnyar I aɗi akwa gari ka dunar kəri wa, Tədda na thlentə ra ni ka kərari an pəla ali su tə kəi pəla, ka su tə kəi ngkəra. 50Antə I ku sənda abbər tsawurni ana səntə mpikə na akur wa. Kamnyar shanga su tə I pəla, I pəla kalkal apatə Tədda ku pəla ali.”

Currently Selected:

Yahwana 12: KNB

Highlight

Copy