Matthew 17

1La qātl kukla pun whas lā Jesus as Peter glu James, glū John ḵīs zāya, kās lēs lāḵā īkyāla nagē hīgama.

2La ogwaḵ‐īd kā doqitl dāḵws: la kūqamā‐yas qakātla hī qīx ī da klīsila, gla wīs qītlqēla malā hī qīx a nāqātla.

3Lāk dāḵw doqilāḵ nītlī dī Moses glū Elijah yaēkuntāla gla wī.

4Lī Peter nānāḵmī, kās nīkīḵ Jesus, Gīkumī, ekya āḵ gints yū wēh lūḵ: kāsū hītl‐kālā lāḵ, lā klin gūqīlā kluḵ yūdūh sumā yāwāpsum gūqa; num kās, glū numā kā Moses, hīmīs numā kā Elijah

5Kīs mīs qātl yākuntālāḵs, lā ī doqilā ḵā qakātla unwā‐yā hatluḵ sum dik dāḵwuk: lāk dāḵw wudklilā ḵī da nīk‐ukaula‐kyālē lāḵā unwā‐yī, yiḵā nīkī, ga mun tlāwhilā ḵwanūqik, yiḵun ēkīkātlā yūḵ; hūklīlāk dāḵw lāq.

6Gil mī sī da disciples wudklilā ḵīk, lāk dāḵw hāqum‐gālīs, aulas kitlilā.

7Gāḵī Jesus lāk dāḵwuk pāga‐āklilāk, nīkya, glāḵ‐wī daga, qātl las kitlil.

8Gilk dāḵw mīs dokūstau sīs kī‐kayākus, kīyos dāḵw tā numūq doqitls, hīgāmī Jesus.

9Yiḵs lāk dāḵwā ī banū‐tlila lāḵā nagē la Jesus tlōqālāk nīkya qanū nītlā sū nūq lāḵo sīs doqītl‐ūs ātl‐um‐kl la kō lā klī da Kwanūqa sa baqānum qilak‐īdi‐kl lāḵā tlilī.

10Lī disciples as wudklāk, nīkya, māzī nīkītla sa scribes yiḵs hī ma wīs glī klī Elijah gil gāḵ‐kl?

11La nānāḵmī kās nīk dāḵwīk, aula‐um klī gāḵ klī Elijah, kās īdīsī kluḵ nāwhā.

12Lā tin nīk yūtl yiḵ Elijah‐ḵs gāḵī da ma ā kīs dāḵw tā mātl‐tēlāk, au‐um hī qīgīlīs qayūk dāḵw kās qīgīlas uk; hī um ḵa ā wīs tlālā‐wotlilās klis Kwanūqa sa baqānum lāk dāḵwuk.

13Lā wīs glī da disciples āyūs‐āklilā kīḵs hē ī qayū wī John ḵā Baptist.

14¶ Gilk dāḵw mīs gāḵ‐āklil lāḵā kīnum baqānum, gāḵī da numūk baqānum lāḵ, klāḵwālīs lāk nīkya,

15Gīkumī wōs‐lazin ḵwanūqik: kā gāḵs nūtlumā‐tlīk, glūḵs tlālā‐wotlilīk: kāḵs qātlqinālīk quk‐klāla lāḵā luk‐qītl, glūḵs qātl‐qinālīk quk‐stā lāḵā wāp

16Gāk tāk tin klasik lāḵōs disciples ā kus, kīs tūḵ ēk‐īdā mas kik.

17Lī Jesus nānāḵmī nīkya, ā ḵīyōs oqizā‐lazī hātalilq līlqalā‐klī, wīzin wāwusdum kla kapētla‐kl glūs? wīzin wāwusdum kla tlālā‐wotlilā klū‐kl? kīlāgā tsūḵ gāḵun lāḵ ga.

18Lī Jesus kilta gātluk, lī da demon lāwē lāk: hī mīs ēk‐īdik dum sa ginānum.

19Gāḵī da disciples lāk Jesus hīgā ma, kās nīkī, māzau‐nūh kīsītla lāwē masuk?

20La nīk lāk dāḵwuk, kēgl kā īs oqizā‐lazī ūs‐āḵs hūlatla ī; lin aul nīk yūtl, gilk dāḵw mī lāḵā kūs uḵnū‐gwāda lāḵs oqizā‐lazī hī qīx ī da mustard zimza‐īmas, lā klis nīk kluḵ gada nagēg, klīqilīs las lāḵā da awīnāqīs; la mī sik klīqilīs‐kl; kīyōs tā‐kl tlā‐whātlā‐kl kās.

21Kīsīk lāwē gada hīgā mī da hawāḵ‐ula gla wa fasting lāwē gītl‐ts.

22¶ Yiḵ hīk dumk dāḵwas lī Galilee, nīk tī Jesus lāk dāḵwuk, la‐mī da Kwanūqa sa baqānum ulāk zawē lāḵ āyasau sa bī‐baqānum:

23Lāk dāḵw klī kīlākyā kluk kā tlilīs, lā klī qilāk‐īdā mazū‐kl ḵā lā kla yūdūh pun whas‐kl nālā‐kl: lāk dāḵw aul ziyhalāqā.

24¶ Gilk dāḵw mīs gāḵ lāk Capernaum, yiḵ dāḵwī da dādālē ḵā hatlākum kā ī da temple gāḵ lāḵ Peter, nīkya, kīsa ōs gīkumā‐yā kūs hatlākā ā?

25La nīkya kēgl: gil mīs gāḵ‐ītl lāḵā gūq, gil zāqā tā Jesus āk, nīkya, māzūs naukā‐yā kūs, Simon? ungwā zī dālūklilasa sa gī‐gukumā‐yāḵ sa awīnāqīs īḵ? hī mā īs sāsumā, glū hī mī da ātl‐ogwila.

26La Peter nīk yuk lāḵā ātl‐ogwila: la nīkī Jesus āk, kīs ḵō glā hatlāḵī da sāsum.

27A klints ōzagīlāk dāḵwuk, halāga lāḵā zalātl, kās uḵ‐stinda ūsāḵ kāglā‐yau, las uḵ‐īda ḵā māmā‐īmas gālūstā; gil mī sis uk‐uḵ‐stin duḵ simps‐as, la klis khā‐kl ḵā dālā kla, uḵ‐īdā ḵīk, kās zaw ūs‐as lāk dāḵwuk, kā un glū kās.

Currently Selected:

Matthew 17: Kwak

Highlight

Copy