Matthew 14

1Hī mīs lāk dums Herod ḵā hānā‐gāzī wudklilāḵ tsītlwak‐klinas Jesus,

2La nīk ḵīs gin‐ginānum, hī um John ḵā Baptist; la‐mī qilāh‐īdā māzawā; hī mīs lā‐gītl tsī da kīs aūmps qaīnī yawīyhā lākī.

3Kā Herod tāḵs uḵ‐ī da‐āḵ John, kās yitlīdīk, kās lēs lāḵā wālazī kā Herodias, kunum‐a sīs zāya.

4Kā īḵs nīkya‐ī John‐āk, kīsa ā kūs hītl‐kolum kagād sūḵ,

5La wātlā‐kīl kās tlilā mas‐īḵ, lā tā kitlilā sa kīnum baqānum, kāḵs nīk dāḵwā āk prophet.

6Gil mī sī māyū‐glumk dum otlas Herod āḵī‐lāqā, lī ḵwanūq‐as Herodias yaḵwa‐mēk, lā ēkīkulā mas‐uḵ Herod.

7Hī mīs lāgītl‐ts nīk kās zawēs qayū lāḵās kās uḵ‐kyāla sū lāk.

8Lī da zāzādākum qātlila um glīḵs‐ālāq sīs abump, nīkya, zaw laga gāḵun lāq, lāḵ ḵulqē yis yhūmsās John ḵā Baptist.

9Lī da gīkumā‐yī, wāk ma ā glatl zih‐alāqā, wa kā īs lā wātldum, glū kā ī da qazītl wut‐as hamūt‐ts, wēḵā kā zaw‐yīs lāk.

10La yālāḵ‐īd, kā kāh‐īd tsa‐wīs John lāḵā wālazī.

11Gāḵ gāḵ ya wī ḵawīq‐as ḵulqā‐zaula, lā zawē lāḵā zāzādākum: lēs lāḵīs abump.

12Gāḵī disciples‐as, uḵīduk baqs‐au‐yas, kās wunum‐tēdīk, lāk dāḵw nītlāḵ Jesus.

13Lī Jesus yiḵs lā ī wud‐klilāk, la gīḵsāl lāḵā sakilīs kās lē lāḵā lūbīs awīnāqīs, kās hīga ēs mī gla wīs disciples; lī da kīnum baqānum wud‐klilāk, lāk dāḵw lāskum‐īk kāsa gāyā‐nāqil lāḵīs tī‐town.

14La mīs kākā‐yālāk, la dōḵ‐wāklilā ḵā kīnum bī‐baqānum, la wōs‐ts, la ēkīdā‐masuḵ zī‐zih‐kēs.

15¶ La zāqā‐ḵs, gāḵā ī disciples‐as lāk, nīkya, lūbīsa ūḵ da awīnāqīs‐īḵ, la‐mīs‐ūḵ la kētlūḵ da nālāḵ; yālākā lagā ḵwā kīnumḵ baqānum, kā lālāgī sūḵ kā lāk dāḵw mī lāḵsūḵ lāḵā gūq gagwīs, kās kilh‐wāk daḵwīḵ hīmāūmasa.

16Lī Jesus nīk dāḵwuk qātl‐las‐ūḵ wūtl‐um lā; zawk dāḵw lāq kā hamēs‐ūḵ.

17Auk dāḵw mīs nīk yuk, kīyōs‐ints hamē lāq hīyhā‐um gada sikyā‐skumk qāquhw‐sumā, glū gwā da mātlik māmā‐īmas.

18Lā nīkya, gāḵ latsū gāḵun.

19Lā uḵ‐kya‐gātl ḵā kīnum baqānum kā qasim‐gālīsīs lākā kītum, lā uḵ‐īd ḵā sikyā‐skum qāquhw‐sumā, gla wī da mātl māmā‐īmas, kās dōkūs‐taulī ḵā īkī, kīlā‐kyas ḵī, la wa‐ōxunduk, kās zawēsā qāquhw‐sum lāḵīs disciples, lī da disciples zaws lāḵā kīnum bī‐baqānum.

20Nāwhāk dāḵw mīs humh‐īda lāk dāḵw pūklilā lāk dāḵw uḵ‐īd lāḵā humgīsā‐wā‐yī ḵā humxau‐yī la mātl tsimā gī‐yū laḵē koqatā.

21Yiḵī dā hāmāp tī sikyā punā lūḵsumh‐īd baqānum, ogwil lāḵā zīdāk gla wa gin‐ginānum.

22¶ Hēh‐īda‐mīs lāḵsā‐mas ḵīs disciples lāḵā ship, kā lēs gāgā latl gīwīs lāḵā upsūt, yiḵs lā ī yālākā ḵā kīnum baqānum kā lālā‐gīs.

23Gil mīs yālāḵ‐īd ḵā kīnum baqānum, la lāgūstau lāḵā nagē kās numū‐gwīsmī hawāḵ‐ulā: gil mīs kānūtl, numū‐gwīs mīs lā lāk.

24Hī mīs ātlī‐sī da ship nakau klī ḵā zalātl, kalā layū sā kalā‐yī: kā ī da yaulēḵs yūqumā ya‐āk.

25Hī tā lā nā‐nāqilāḵs lā ī lāk dāḵwuk, kāza‐klayī ḵā kalā‐yī.

26Gil mī sī da disciples doqilā kīḵs kāza‐klayā ya ā ḵā kalā‐yī, lāk dāḵw kitl‐īd, nīkya, baqānum sta‐āq; lāk dāḵw qāqa‐klaula.

27Hēh‐īdā mīsī Jesus yāka‐gātluk, nīkya, ek‐zau; nūgwā zau um, qālas kītlil.

28La Peter nānāḵmīk, nīkya, Gī, kāsū sū‐um lāḵ, klīlālāla gāḵun kun gāḵī lūtl, kāza‐klayī ḵwā wāpēḵ.

29La nīkya, kīlāgā: lī Peter lā ḵā lāḵā ship, kās kāza‐klayā‐yī ḵā kalā‐yī, lā la ā lāk Jesus.

30La doqilā ḵā yaulēḵs awīlā‐ī, la kitlilā; la wunza nāqila, la qākla‐gātl, nīkya Gī, qāqilāla gāḵun.

31Hēh‐īda mī sī Jesus sāh‐īd tsīs āyasū, kās dāh‐īdīk, la nīk yuk, yūtl hūlatl‐ts oqizā‐lazī, māsīs wī‐oqisītla ūs?

32Gilk dāḵw mīs gāḵ āklil lāḵā ship, la qātlī da yaula.

33Yik dāḵw ḵī da gīḵs‐āle ḵā ship gāḵ umyāḵāk nīkya aula ums sū‐um Ḵwanūqs God.

34¶ Lāk dāḵw lāwītlā, gāḵ lāḵ awīnāqīs‐as Gennesaret.

35Lī da bī‐baqānuma sa awīnāqīs mātl‐tēlāk, la yālākā lāḵā nāwhā awīnāqīs, kās gāḵ yau ī da nāwhāk dī zī‐zihkōlum nūqā:

36Lāk dāḵw hawāḵ‐ulāk kās auk dāḵw mī lāḵ pāgā‐āklilāḵ īwun‐ḵayas koḵ‐zau yās: hī mīs wāḵī da lā ēk‐īdā mazawa, wāḵā ā sā sī da pāgā‐āklilēḵ qītl‐qēlēs.

Currently Selected:

Matthew 14: Kwak

Highlight

Copy