ROM 14

I unau sawisêl suh

1Tin, rinnaa chak lo mi chu a rinhlelhnate sawisêl lovin lâwm rawh u. #Kol 2.16

2Mi pakhatin thil engkim ei theiin a inring a, mi chak lo erawh chuan thlai chauh a ei ṭhîn. 3Engkim ei mi chuan a ei lo mi hmusit suh se; ei lo mi pawhin a ei mi chu sawisêl suh se; Pathianin ani chu a lâwm tawh alâwm. 4Mi dang chhiahhlawh sawisêltu chu tu nge maw i nih le? A din leh a tlûk chu ama hotu tân a ni. Nimahsela, ani zawng dintîrin a awm ang, Lalpa chuan a dintîr thei si a.

5Mi pakhatin ni khat hi ni dang aiin a ngaihlu bîk ṭhîn a, mi dangin ni zawng zawng hi inang ṭheuhvin a ngai ṭhîn a ni. Mi tin mahni rilruah inhre chiang rawh se. 6Ni serhtu chuan Lalpa chawimawi nân a serh ṭhîn a ni. Tin, engkim eitu chuan Pathian hnênah lâwmthu a sawi avângin, Lalpa chawimawi nân a ei ṭhîn; a ei lotu pawh chuan Pathian hnênah lâwmthu a sawi a, Lalpa chawimawi nân a ei lo ṭhîn a ni. 7Tu mah mahni tâna nung kan ni lo va, tu mah mahni tâna thi kan ni hek lo. 8Kan nun chuan Lalpa tân kan nung a, kan thih pawhin Lalpa tân kan thi a ni si; chuvângin, kan nun pawhin, kan thih pawhin, Lalpa ta kan ni. 9Krista thihna leh a lo nun lehna chhan chu, mi nung leh mitthi Lalpa a nih theihna hi a ni si.

10Nimahsela, nangin engati nge i unau i sawisêl ni? A ni loh leh, nangin engati nge i unau i hmuhsit ni? Pathian rorêlna ṭhutphah hmaah kan vaiin kan la ding dâwn si a; #2 Kor 5.10

11“Lalpa chuan, ‘Mi tinrêng

Ka hmaah an kûn ang a,

Lei tinrêng pawh Pathian

hnênah a inpuang ang,

Tiin, chhia ka chham a ni,’ a ti a,”

tih ziak a ni si a. #Is 45.23

12Chutichuan, kan zain Pathian hnênah mahni chanchin kan sawi ṭheuh tûr a ni.

I unau titlu suh

13Chuvângin, i insawisêl tawh suh ang u, tu pawhin mahni unau dâlna emaw, tlûkna emaw siam loh tum zâwk rawh u.

14Amah ngawtah chuan thiang lo eng mah rêng a awm lo tih, Lalpa Isuaah chuan ka hre êm êm mai; englo thiang lova ngaitu tân erawh chuan, ama tân chuan a thiang lo a ni. 15I englo ei vânga i unau rilru a nat chuan, hmangaih dân ang i zâwm tawh lo a ni. A thih ai Kristan a thihsaka chu i englo eiin tiboral suh.

16Chutichuan, in tâna ṭhatna chu sual lama sawiin awm suh se; 17Pathian ram chu ei leh in lam thu a ni si lo va, felna te, remna te, Thlarau Thianghlima lâwmna te a ni zâwk e. 18Tu pawh chûng thûa Krista rawng bâwl chu, Pathian lawm zâwng leh mihring fakin a awm ṭhîn a ni. 19Chutichuan, inremna tûr leh intihsâwt tawnna tûr thilte chu i ûm ang u. 20I englo ei vângin Pathian hnathawh tichhe suh. Thil zawng zawng a thianghlim ngei mai; nimahsela, a englo eiin mi a tihtlûk chuan a eitu tân sualna a ni. 21I unau tlûkna tûr a nih chuan sa ei loh te, uain in loh te, thil eng pawh tih loh a ṭha a ni. 22Rinna i neih chu Pathian hmaah nangmah chauhva hriatin nei mai rawh. Mahni ṭha tih kawnga thiam loh inchantîr lo chu a eng a thâwl e. 23Amaherawhchu, ringhleltuin a ei chuan, rinnaa a ei loh avângin thiam loh a chang a ni; eng pawh rinna lova tih chu sual a ni si a.

Currently Selected:

ROM 14: MIZOVBSI

Highlight

Copy