ROM 13

Rorêltute thu âwih tûr

1Mi tin an chunga rorêltute thû thûin awm rawh se. Pathian thu lovin tu mah rorêltu an awm si lo; rorêltua awmte hi Pathian ruat an ni. 2Chuvângin, tu pawh rorêltu hnial chu Pathian ruat dodâl an ni a; a dodâltute chuan anmahni chungah rorêlna an hmu ang. 3Rorêltute chu thil ṭha titu tân chuan hlauhawm an ni lo va; thil ṭha lo titu tân erawh chuan hlauhawm an ni. A nih leh, rorêltu hlau lova awm i duh em? Thil ṭha ti la, a fak i hlawh ang chu; 4ani chu i ṭhatna tûra Pathian rawngbâwltu a ni si a. Nimahsela, thil sual i tih chuan hlau rawh, khandaih chu a keng mai mai si lo va; ani chu Pathian rawngbâwltu, thil tisualtu chunga thinura phuba latu a ni si. 5Chuvângin, thinur hlauh vâng chauh ni lovin, i chhia leh ṭha hriatna avâng pawhin rorêltu thû thûin i awm tûr rêng a ni. 6Hemi avâng hian chhiah pawh in chawi ṭhîn alâwm; chutiang thil ngei ti fan fan tûrin Pathian rawngbâwltute an ni si a. #Mt 22.21; Mk 12.17; Lk 20.25 7Mi zawng zawng hnênah pêk tûr apiang pe rawh u; lei man pêkna tûra hnênah chuan lei man pe ula; chhiah chawina tûra hnênah chuan chhiah chawi ula; ṭih tûra chu ṭih ula; pawisak tûra chu pawisa rawh u.

Unau inhmangaihna

8Inhmangaih tawnna ngawt lo chu tu ma eng mah ba suh u; mahni mihringpui hmangaihtu chuan dân chu a zawh famkim tawh si a. 9Hêng, “Uire suh, tual that suh, ru suh, awt suh,” tih leh thupêk dang la awm rêng rêngte hi, “Nangmah i inhmangaih angin i vêngte i hmangaih tûr a ni,” tih hian a khai khâwm vek si a. #Ex 20.12-15,17; Deut 5.17—19.21; Lev 19.18 10Hmangaihnain vêngte a tikhawlo ngai lo va; chuvângin, hmangaihna hi dân zawh famkimna a ni.

Krista lo kal lehna a hnai

11Tûnlai thil awmzia in hriat avâng leh, muhîl thawhharh a hun tawh tak zet tih in hriat avângin chu chu ka sawi a ni; tûnah chuan kan rin tirh lai ai khân kan chhandamna chu a hnai ta zâwk si a. 12Zân hi a ral lek lek tawh a, khua a vâr dâwn ta e; chuvângin, thima thiltih chu paih ila, êng thuamin i inthuam ang u. 13Chhûna awm angin mawi takin i awm ang u, zu in buai leh zu ruia awm lovin, hur leh inngaih hmanga awm lovin, insual leh inîtsîka awm lovin. 14Lal Isua Krista chuan inthuam zâwk ulang, in tisa châkna puitlin tûrin eng mah insiam suh u.

Currently Selected:

ROM 13: MIZOVBSI

Highlight

Copy