MARKA 8
8
Mipui sângli hrai
(Mt 15.32-39)
1Chûng nîahte chuan mipui tam tak an lo awm leh a, ei tûr eng mah an neih loh lai chuan ani chuan a zirtîrte chu a ko va, an hnênah, 2“Mipuiho hi tûnah ni thum ka hnênah an awm tawh a, ei tûr eng mah an neih loh avângin ka khawngaih êm êm a ni; 3chaw ngheia an ina ka hâwntîr chuan kawng lakah an chau dâwn si a; ṭhenkhatte phei chu an lo kalna a hla hle si a,” a ti a. 4Tin, a zirtîrte chuan, “Miin he thlalêrah hian khawia chhangin nge hêngho hi an tihtlai theih ang?” tiin amah an chhâng a. 5Tin, ani chuan, “Chhangpêr eng zât nge in neih?” tiin anni chu a zâwt a. Tin, anni chuan, “Pêr sarih,” an ti a. 6Tin, mipuiho chu leia ṭhu tûrin thu a pe a; tin, chhangpêr pasarih chu a la a, lâwmthu a sawi zawhin a phel a, an hmaa hlui tûrin a zirtîrte hnênah a pe a; tin, mipuihote hmaah chuan an hlui ta a. 7Nghate tlêm tê an nei bawk a; tin, ani chuan mal a sâwmsak a, chûngte pawh chu an hmaa hlui tûrin thu a pe a. 8Tichuan, an ei a, an puar ta hlawm a; an ei bâng nawi pawh chu bâwm sarih an rût khat a. 9Anni chu sângli lai an ni a; tin, ani chuan anni chu a ṭîntîr ta a.
Pharisaiten chhinchhiahna an phût
(Mt 16.1-4)
10Tin, ani chu a zirtîrte hnênah lawngah chuan a chuang ta nghâl a, Dalmanutha ram chu a thleng ta a. 11Tin, Pharisaite an lo chhuak a, amah fiah nân a lakah vân ata chhinchhiahna zawngin ani chu an hnial ta a. #Mt 12.38; Lk 11.16 12Tin, ani chu a rilruin nasa takin a rûm a, “Engati nge tûnlai chhuante hian chhinchhiahna an zawn? Tihtak meuhvin ka hrilh a che u, tûnlai chhuante hnênah hian chhinchhiahna rêng rêng pêk a ni lo vang,” a ti a. #Mt 12.39; Lk 11.29 13Tin, anni chu a kalsan a, lawngah chuan a chuang leh a, râl lehlamah a kal ta a.
Pharisaite leh Heroda dawidim
(Mt 16.5-12)
14Tin, a zirtîrte chuan chhang an ken theihnghilh a, chhang tlang khat chauh lo chu lawngah chuan chhang dang rêng an nei si lo va. 15Tin, ani chuan an hnênah, “Pharisaite dawidim leh Heroda dawidim lakah chuan invêng ula, fîmkhur rawh u,” a ti tlat a. #Lk 12.1 16Tin, anni chuan, “Chhang kan nei hauh lo,” tiin an inngaihtuah a. 17Tin, Isuan chu chu a lo hria a, an hnênah, “Engati nge chhang in neih loh avânga in inngaihtuah ni? Tûnah pawh in rilruin in la hre lo fo maw? A ngaihna pawh in la hre lo maw? In thinlung chu in tisak ta em ni? 18Mit nei siin in hmu lo vem ni? Beng nei siin in hre lo vem ni? In hre reng lo vem ni? #Jer 5.21; Ezek 12.2; Mk 4.12 19Sângnga zînga chhangpêr panga ka phel lai khân a nawi kha bâwmrâng eng zât nge in ruh khah?” a ti a. Tin, anni chuan a hnênah, “Sâwm leh pahnih,” an ti a. 20“Tin, sângli zînga pasarih ka phel lai khân, a nawi kha bâwm eng zât nge in ruh khah?” a ti a. Tin, anni chuan a hnênah, “Bâwm sarih,” an ti a. 21Tin, ani chuan an hnênah, “Tûnah pawh a ngaihna in la hre lo fo maw?” a ti a.
Bethsaida-a mitdel tihdam
22Tin, Bethsaida khua chu an lo thleng a. Tin, a hnênah mitdel an rawn hruai a, amah dek tûrin an ngên a. 23Tin, ani chuan mitdel kut chu a chelh a, khua ata a kai chhuak a; tin, a mitah chil a chhâk a, a chunga a kut a nghah zawhin, “Khua i hmu thei em?” tiin a zâwt a. 24Tin, a han dâk chhuak a, “Mihring ka hmu a, thing kal ang maiin ka hmu si,” a ti a. 25Tin, a mitah chuan a kut a nghat leh a; tin, ani chuan a en reng a, a lo dam ta mai a, engkim fiah takin a hmu thei ta a. 26Tin, Isua chuan, “Khuaah pawh hian lût suh ang che,” tiin a inah a hâwntîr ta a.
Isua nihna Peteran a sawi
(Mt 16.13-20; Lk 9.18-21)
27Tin, Isua leh a zirtîrte chu an kal chhuak a, Philipa Kaisari khawperahte chuan an kal a; tin, kal pahin a zirtîrte hnênah, “Miten tu nge a ni mi tih?” tiin a zâwt a. 28Tin, anni chuan, “ ‘Baptistu Johana a ni,’ an ti chia; mi dangin ‘Elija a ni,’ an ti chia; ṭhenkhat erawh chuan, ‘Zâwlnei tua emaw a ni,’ an ti che,” tiin an hrilh a. #Mk 6.14-15; Lk 9.7-8 29Tin, ani chuan an hnênah, “A nih leh, nangnin tu nge a ni mi tih?” tiin a zâwt a. Petera chuan a hnênah, “Krista chu i ni,” tiin a chhâng a. #Joh 6.68-69 30Tin, ani chuan a chanchin tu mah hrilh loh tûr a ti tlat a.
A tuar leh thih tûr Isuan a puang
(Mt 16.21-28; Lk 9.22-27)
31Tin, Mihring Fapa chuan thil tam tak a tuar tûr te, upate, puithiam lalte, lehkhaziaktute duh loh va a awm tûr te, tihhluma a awm tûr te, ni thum china a thawhleh tûr te chu anmahni a zirtîr ṭan ta a. 32Chûng thu chu chiang takin a sawi a ni. Tin, Petera chuan ani chu a hruai hrang a, a zilh ta a. 33Ani erawh chu a lehhawi a, a zirtîrte chu a en a, “Setan, ka hnungah kal rawh, Pathian thilte ngaihtuah lovin mihring thilte i ngaihtuah zâwk a nih hi,” tiin Petera chu a zilh ta a.
34Tin, mipuiho chu a zirtîrte nên a ko va, an hnênah, “Tu pawhin mi zui a duh chuan, mahni hrehawm pawisa lovin, a kraws puin mi zui rawh se. #Mt 10.38; Lk 14.27 35Tu pawh a nun humhim duh apiangin a chân ang a; tu pawh keimah avâng leh Chanchin Ṭha avânga a nun chân apiangin a humhim ang. #Mt 10.39; Lk 17.33; Joh 12.25 36Miin khawvêl hi a pumin nei sela, a nun chân si sela, a tân eng nge sâwt ang? 37Miin a nun aiah eng nge a pêk theih ang? 38Tu pawh tûnlai chhuan uire leh thil tihsual hmangte zînga keimah leh ka thu zahpui apiang, Mihring Fapa hian, vântirhkoh thianghlimte nêna a Pa ropuinaa inthuama a lo kal hunah chuan, chu mi chu a rawn zahpui ve thung ang,” a ti a.
Currently Selected:
MARKA 8: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
