MARKA 9
9
1Tin, amah vêkin an hnênah, “Tihtak meuhvin ka ti a che u, heta dingho a ṭhente hi, Pathian ram, thiltihtheihna nêna lo thleng an hmuh hma loh chuan thihna tem tawp lo tûr an awm,” a ti a.
Hmêl danglam
(Mt 17.1-13; Lk 9.28-36)
2Tin, ni ruk achinah chuan Isuan Petera te, Jakoba te, Johana te chu a hruai a, a hrangin tlâng sâng takah anmahni chauh a kal chhohpui a; an hmaah chuan a hmêl awmzia chu a lo danglam ta a. #2 Pet 1.17-18 3Tichuan, a silhfênte chu leia puan sutu rêng rêngin an sûk vâr theih loh khawp hiala vâr hlakin a lo tle ta sur a. 4Tin, Elija leh Mosia chu an hnênah an rawn inlâr a, Isua nên an inbe ho va. 5Tin, Petera chuan Isua a bia a, “Rabbi, kan tân heta awm hi a ṭha e; bâwktê pathum kan khawh ang e, i tân pakhat, Mosia tân pakhat, Elija tân pakhat,” a ti a. 6(An hlauh êm avângin sawi tûr ahleih pawh an hre si lo va.) 7Tin, anmahni hliahin chhûm a lo zîng ta a; tin, chhûmah chuan aw a lo chhuak a, “Hei hi ka Fapa duh tak a ni, ama thu ngai rawh u,” a ti a. #Mt 3.17; Mk 1.11; Lk 3.22 8Tin, an han en vêl thuai a, anmahni hnêna Isua chauh lo chu tu mah an hmu ta lo va.
9Tin, tlâng ata chu an chhuk laiin, Mihring Fapa mitthi zîng ata a thawhleh hnuah chauh lo chuan, an thil hmuhte chu tu mah hrilh loh tûr a ti tlat a. 10Tichuan, chu thu chu an vawng reng a, “Mitthi zîng ata thawhleh chu eng tihna nge ni ang?” tiin an inzâwt ṭhîn a. 11Tin, annin a hnênah, “Engtiziaa lehkhaziaktuten, ‘Elija a lo kal hmasa tûr a ni,’ ti nge an nih?” tiin an zâwt a. #Mal 4.5; Mt 11.14 12Tin, ani chuan an hnênah, “Elija chu a lo kal hmasa dâwn rêng a, engkim a siam ṭha dâwn a ni; thil tam tak tuarin mi hmuhsitin a awm tûr a ni tih, Mihring Fapa chanchin engtiziaa ziak nge an nih? 13Nimahsela, ka hrilh a che u, Elija chu a lo kal tawh reng a ni; tin, a chanchin an ziak ang ngei khân, a chungah an duh duhin an ti tawh rêng bawk a,” a ti a.
Ramhuai pai naupang tihdam
(Mt 17.14-21; Lk 9.37-43)
14Tin, zirtîrte hnên a zuk thlenin, an vêla mipui tam tak leh lehkhaziaktuten an lo hnial lai a zuk hmu a. 15Tin, mipui zawng zawng chuan amah an hmuh veleh chuan mak an ti hle a, a hnênah an tlân nghâl a, chibai an va bûk hlawm a.
16Tin, ani chuan an hnênah, “Anniho nên hian eng thûah nge in inhnial?” tiin a zâwt a. 17Tin, mipui zînga mi pakhatin a hnênah, “Zirtîrtu, ka fapa, ramhuai ṭawngtheilo pai chu i hnênah ka rawn hruai a; 18a manna apiangah a titlu vak ṭhîn a; tichuan, a chilphuante a tla a, a hate a ṭhial a, a chêr telh telh ṭhîn a; tichuan, i zirtîrte hi hnawt chhuak tûrin ka ti a, an thei si lo va,” tiin a chhâng a. 19Tin, ani chuan an hnênah, “Chhuan rinna nei lote u, eng chen nge in hnêna ka awm anga, eng chen nge ka ngaihtheih ang che u? Amah chu ka hnênah rawn hruai rawh u,” tiin a chhâng a.
20Tin, amah chu Isua hnênah an rawn hruai a; tin, ramhuai chuan ani chu a hmuh veleh naupang chu nasa takin a sawisa ta nghâl a; tichuan, leiah a tlu a, chilphuan tla zawih zawihin a tâl ta âwrh âwrh a. 21Tin, ani chuan a pa hnênah, “Hetianga a lo awm ṭanna hi eng chen nge ni tawh?” tiin a zâwt a. Ani chuan, “A naupan lai ata tawh a ni; 22tichuan, amah tiboral tûrin vawi tam tak meiah te, tuiah te pawh a nam thlu tawh a; nimahsela, nangin eng emaw ti tala i tih theih chuan mi khawngaih la, mi pui ang che,” a ti a.
23Tin, Isuan a hnênah, “I theih chuan â maw! Ringtu tân chuan engkim tih theih a ni asin,” a ti a. 24Tichuan, naupang pa chuan, “Ka ring e, ka rinhlelhnaah hian mi pui ang che,” tiin a au chhuak ta nghâl a. 25Tin, Isuan mipui lo tlân khâwm mêk a hmuhin ramhuai bawlhhlawh chu a hau va, a hnênah, “Nang ramhuai ṭawngtheilo leh bengngawng, thu ka pe a che, a chhûng ata lo chhuak la, lût leh tawh suh,” a ti a. 26Tichuan, a au chhuak a, nasa taka a sawisak zawhin a lo chhuak ta a; tin, naupang chu thi ang maiin a lo awm ta a; chutichuan, mi tam zâwk chuan, “A thi a ni,” an ti a. 27Isua erawh chuan a kut a chelh a, a kai tho va; tin, a lo tho ta mai a. 28Tin, Isua chu ina a va luh chuan a zirtîrten, “Engati nge keinin kan hnawh chhuah theih loh le?” tiin fianrialah an zâwt a. 29Tin, ani chuan an hnênah, “Hetiang hi ṭawngṭai chauh lo chuan engtin mah a chhuak thei lo,” a ti a.
A thih tûr thu Isuan a sawi nawn
(Mt 17.22-23; Lk 9.43-45)
30Tin, chuta ta chu an kal chhuak a, Galili ram chu an kal tlang a, tu ma hriat a duh lo va. 31A zirtîrte hnênah, “Mihring Fapa hi mihringte kuta mantîrin a awm tûr a ni a, an tihlum bawk ang a; tin, an tihhlum hnu ni thum achinah a tho leh ang,” tiin a lo sawi tawh si a. 32Nimahsela, a thusawi chu a ngaihna an hre lo va, amah lah chu an zâwt ngam si lo va.
Tu nge ropui ber
(Mt 18.1-5; Lk 9.46-48)
33Tin, Kapernaum khua chu an lo thleng a; tin, in chhûngah chuan an awm laiin an hnênah, “Kawngah khân eng thûah nge in inhnial le?” tiin a zâwt a. 34Nimahsela, kawngah chuan, “Kan zîngah tu nge ropui ber ang?” tia an lo inhnial tawh avângin an ngawi ta reng a. #Lk 22.24 35Tin, ani chu a ṭhu a, sâwm leh pahnihte chu a ko va, an hnênah, “Tu pawhin hmasa ber nih a duh chuan, mi zawng zawng aia hnuhnûng berah a awm tûr a ni a, mi zawng zawng rawngbâwltuah a awm bawk tûr a ni,” a ti a. #Mt 20.26-27; 23.11; Mk 10.43-44; Lk 22.26 36Tin, naupang tê a kai a, an zîngah a dintîr a; tin, a lo kuah a, an hnênah, 37“Tu pawh ka hming avânga hetiang naupang tê pakhat pawh lâwm apiang chu, keimah mi lâwm an ni ang; tu pawh kei mi lâwm apiang chu, kei mi lâwm an ni lo vang a, mi tîrtu lâwm an ni zâwk ang,” a ti a. #Mt 10.40; Lk 10.16; Joh 13.20
Mi dodâl lo chu ka lama ṭang a ni
(Lk 9.49-50)
38Johana chuan a hnênah, “Zirtîrtu, tu emaw i hminga ramhuaite hnawt chhuak kan hmu a; min zui ve loh avângin kan khap ta asin le,” a ti a. 39Isua erawh chuan, “Khap tawh suh u; tu mah ka hminga thilmak ti sia mi sawi chhe nghâl thei an awm lo a ni. 40Tu pawh min dodâl lo chu kan lama ṭang an ni si a. #Mt 12.30; Lk 11.23 41Tu pawh Krista mi in nih avânga tui no khat in tûr pe apiang che u chu, tihtak meuhvin ka hrilh a che u, a lâwmman tûr chu a chân tawp lo vang. #Mt 10.42.
Sual ti tûra thlêmna
(Mt 18.7-9; Lk 17.1-2)
42“Tin, tu pawh hêng mi ringtu mi tête zînga pakhat pawh titlu apiang chu, an nghâwngah buh râwt sawmna lung lian pui awrhtîrin tuifinriatah thlâk sela, an tân a ṭha zâwk tûr a ni. 43Tin, i kutin a tihtlûk che chuan tan mai rawh; kut pahnih neia Gehenna-a mei mit thei lova kal ai chuan, piangsuala nunnaa luh i tân a ṭha zâwk e. #9.43: Kutziak bu ṭhenkhatah chuan châng 44 thu, “Chutah chuan an lungte chu a thiin, an mei chu tihmihin a awm ngai lo,” hi a chuang. #Mt 5.30 45Tin, i kein a tihtlûk che chuan tan mai rawh; ke pahnih neia Gehenna-a paih ai chuan, kebaia nunnaa luh i tân a ṭha zâwk e. #9.45: Kutziak bu ṭhenkhatah chuan châng 46 thu, “Chutah chuan an lungte chu a thiin, an mei chu tihmihin a awm ngai lo,” hi a chuang. 47,48Tin, i mitin a tihtlûk che chuan kher chhuak mai rawh; mit khing hnih neia Gehenna, an lung thih ngai lohna leh mei mih ngai lohnaa paih ai chuan, mit khing khat neia Pathian rama luh i tân a ṭha zâwk e.#Mt 5.29#Is 66.24 49Mi tin meia alin an awm dâwn si a. 50Chi hi a ṭha e; nimahsela, chi pawh hi a dâk tawh chuan engin nge an tihal leh ang? Nangmahni ngeiah chi nei ula, inngeih rawh u,” a ti a. #Mt 5.13; Lk 14.34-35
Currently Selected:
MARKA 9: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.