MARKA 12
12
Grep huan thlawh hlawhtute tehkhin thu
(Mt 21.33-46; Lk 20.9-19)
1Tin, tehkhin thuin an hnênah a sawi ta a: “Tuin emaw grêp huan a siam a, palin a hung vêl a, grêp sâwrna tûr khur a lai a, in sâng a sa a, lo enkawltute hnênah thlawh hlawh tûrin a pe a, ram dangah a kal ta a. #Is 5.1-2 2Tin, a lawh hun chuan huana rah chu a chan ai lo enkawltute hnên ata la tûrin lo enkawltute hnênah chuan bâwih pakhat a tîr a. 3Tin, chu mi chu an lo man a, an vêl a, kutruakin an kaltîr leh ta a. 4Tin, bâwih dang an hnênah a tîr leh a; chu pawh chu lungin an dêng a, a lûah an lo tipem a, zahthlâk takin an lo sawisa a. 5Tin, bâwih dang a tîr leh pek a; chu mi chu an lo tihlum a. Bâwih dang tam tak pawh - ṭhenkhat an vêl a, ṭhenkhat an lo tihlum a. 6Tin, pakhat, fapa duh tak a la nei a; ‘Ka fapa hi chu an zah ang,’ tiin ani chu a hnuhnûng berah an hnênah a tîr a. 7Nimahsela, chûng lo enkawltute chuan, ‘He mi hi roluahtu tûr a ni; i that ang u khai! Tichuan, a roluah tûr hi kan ta a ni mai ang,’ an ti a. 8Tichuan, ani chu an lo man a, an tihlum a, grêp huan ata chu an theh chhuak ta a. 9Chutichuan, huan neitupa chuan engtin nge a rawn tih ang? Lo enkawltute chu a rawn tiboral ang a, huan chu mi dangte a pe ang. 10He Pathian Lehkha thu hi in chhiar lâwm ni?
‘In satute lung duh loh kha,
Chu ngei chu a kila lung
ṭangkai ber a lo ni ta.
11Chu chu Lalpa tih a ni a,
Kan mit hmuhah a mak a ni,’
tih hi,” a ti a. #Sam 118.22-23
12Tin, amah chu man an tum ta a; nimahsela, mipui chu an hlau va; chu tehkhin thu chu anmahni demin a sawi tih an hre si a. Tichuan, amah chu an kalsan a, an kal bo ta a.
Chhiah pêk thu
(Mt 22.15-22; Lk 20.20-26)
13Tin, a thusawia man tûrin Pharisaite leh Heroda pâwla mi tute emaw a hnênah an tîr a. 14Tichuan, anni chu an lo thlen chuan a hnênah, “Zirtîrtu, mi dik tak i ni a, pawisak chuan tu mah i nei lo tih kan hria, tu mah thlei bîk lovin, tihtak zetin Pathian kawng thu i zirtîr ṭhîn a ni: Kaisara hnêna chhiah chawi hi a thiang nge thiang lo? 15Kan pe ang nge pe lo vang?” an ti a. Ani erawh chuan an vêrvêkzia chu hriain, an hnênah, “Engah nge mi fiah? Duli mi han lâk ula, ka lo en ang e,” a ti a. 16Tin, an rawn la a. Tin, ani chuan an hnênah, “Hei hi tu lem leh tu hming nge ni?” a ti a. Tin, anni chuan, “Kaisara,” an ti a. 17Tin, Isuan an hnênah, “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. Tichuan, mak an ti nasa êm êm a.
Mitthi thawhleh thu
(Mt 22.23-33; Lk 20.27-40)
18Tin, Suddukaiho, thawhlehna a awm lo tite chu a hnênah an lo kal a; a hnênah, #Tirh 23.8 19“Zirtîrtu, Mosian, ‘Tu pawh a unaupain fa nei lovin a nupui thihsan sela, a unaupa chuan a nupui chu a rochungin a unaupa tân chi a thlahsak tûr a ni,’ tiin min ziaksak a ni. #Deut 25.5 20Aw le, sal sarih an awm a; a upa berin nupui a nei a, chi thlah lovin a thi a. 21Tichuan, a pahnihna chuan a rochung a, chi thlah lovin a thi leh bawk a; a pathumna chuan chutiang bawkin. 22Tichuan, sal sarihte chu chi rêng rêng thlah lovin an thi zêl a. A hnuhnûng berah hmeichhia pawh chu a thi ta a. 23Thawhleh hunah chuan a tu bera nupui nge ni ang? An pasarih chuan nupuiah an nei ṭheuh si a,” tiin an zâwt a. 24Isuan an hnênah, “Hemi avâng hian a ni lâwm ni in ngaih sual ṭhin, Pathian Lehkha Thu leh Pathian thiltihtheihna in hriat loh avâng hian? 25Mitthi zîng ata an thawhlehin nupui pasal an innei dâwn tawh lo va, vâna vântirhkohte ang an ni dâwn tawh zâwk a ni. 26Tin, mitthite kaihthawha an awm tûr thu chu, Mosia lehkhabua hnim buk thûah khân, Pathianin, ‘Kei Abrahama Pathian, Isaaka Pathian, Jakoba Pathian ka ni,’ tia a biakzia kha in chhiar lo vem ni? #Ex 3.6 27Ani chu mitthi Pathian a ni lo va, mi nung Pathian a ni zâwk; in ngai sual nasa hle a ni,” a ti a.
Thupêk ropui ber
(Mt 22.34-40; Lk 10.25-28)
28Tin, lehkhaziaktute zînga mi pakhat a lo kal a, an inhnial chu a lo ngaithla a, Isuan anniho chu ṭha takin a chhâng tih a hria a, a hnênah, “Thupêk zawng zawngah eng hi nge ropui ber?” tiin a zâwt a. #Lk 10.25-28 29Isuan, “A ropui ber chu hei hi a ni: ‘Israel-hote u, ngai teh u, Lalpa kan Pathian chu Lalpa pakhat chauh a ni a; #Deut 6.4-5 30Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,’ tih hi. 31A dawttu chu hei hi a ni: ‘Nangmah i inhmangaih angin i vêngte pawh i hmangaih tûr a ni,’ tih hi. Hêng aia thupêk ropui zâwk rêng rêng hi a awm lo,” tiin a chhâng a. #Lev 19.18 32Tin, lehkhaziaktu chuan a hnênah, “A ni tak e, zirtîrtu, amah chu pakhat chauh a ni a, amah lo chu tu mah dang an awm lo va, #Deut 4.35 33amah chu thinlung zawng zawnga, hriatna zawng zawnga, chakna zawng zawnga hmangaiha, mahni inhmangaih anga vêngte hmangaih hi pumhâl thilpêk leh inthawina zawng zawng aiin a ṭha zâwk êm êm tih hi i sawi dik zet mai,” a ti a. #Hos 6.6 34Tin, fing takin a chhâng tih Isuan a hriatin, a hnênah chuan, “Pathian ram i hlat lo ve,” a ti a. Chumi chinah chuan tu mân thu rêng rêng an zâwt ngam ta lo va.
Messia chungchâng an zâwt fiah
(Mt 22.41-46; Lk 20.41-44)
35Tin, Isuan Pathian biak inah chuan a zirtîr laiin anmahni a bia a, “Krista chu Davida fapa a ni tih lehkhaziaktuten engtiziaa sawi ṭhîn nge an nih? 36Davida ngeiin, Thlarau Thianghlimin,
Lalpa chuan ka Lalpa hnênah,
‘I hmêlmate i ke nghahchhana
ka siam hma loh zawng
Ka ding lamah ṭhu rawh,’ a ti, #Sam 110.1
a ti a. 37Davida ngei chuan ani chu ‘Lalpa’ a ti si a, khawiah nge a fapa a nih ang?” a ti a.
Lehkhaziaktute laka fîmkhur tûr
(Mt 23.1-36; Lk 20.45-47)
Tin, vântlângho chuan lâwm takin a thu an ngaithla a. 38Tin, a zirtîrnaah chuan, “Lehkhaziaktute lakah fîmkhur rawh u; anni chuan kawrfual haa lên an duh ṭhîn a, dâwr hmunah chibai bûk te, 39inkhâwmna inah ṭhutphah ṭha ber te, ruaiṭhehnaah hmun ṭha ber te an ngiat ṭhîn a; 40hmeithai sum an ei a, tlâng bum nân rei tak an ṭawngṭai ṭhîn; chûngho chuan thiam loh an chang nasa lehzual ang,” a ti a.
Hmeithai rethei thawhlâwm
(Lk 21.1-4)
41Tin, thawhlâwm bâwm zâwnah chuan a ṭhu a, thawhlâwm bâwma mipuiho tangka thlâk dân chu a en a; mi hausa tam takin tam tak tak an thlâk a. 42Tin, hmeithai rethei tê a lo kal a, dâr tangka dere pahnih a thlâk a (chu chu pawisa pakhat hu a ni.) 43Tin, Isua chuan a zirtîrte chu a ko va, an hnênah, “Tihtak meuhvin ka hrilh a che u, thawhlâwm bâwma thlâktu zawng zawng ai hian he hmeithai rethei tê hian a thlâk tam zâwk. 44Hêng zawng zawng hian an neih liama mi an thlâk a ni; ani erawh hi chuan a duh lai tak, a neih chhun tak, a intunnunna tûr zawng zawng chu a thlâk vek a ni,” a ti a.
Currently Selected:
MARKA 12: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.