MARKA 13
13
Temple chhiat tûr thu sawi lâwkna
(Mt 24.1-2; Lk 21.5-6)
1Tin, Pathian biak in ata chu a kal chhuah laiin a zirtîrte zînga mi pakhatin a hnênah, “Zirtîrtu, en teh, a lung leh a inte hi a ropui teh a nia!” a ti a. 2Tin, Isuan a hnênah, “Hêng in ropui tak hi i hmu maw? Tihchim loh va lung intiang rêng rêng hetah a awm lo vang,” a ti a.
Harsatna leh tihduhdahna
(Mt 24.3-14; Lk 21.7-19)
3Tin, Olive tlânga Pathian biak in zâwna a ṭhut laiin Petera te, Jakoba te, Johana te, Andria te chuan a hnênah, 4“Chûng chu eng tikah nge a lo awm ang? Chûng zawng zawng chu a thlen dâwn hunah chhinchhiahna eng nge awm ang, min hrilh rawh,” tiin an zâwt ru a. 5Tin, Isuan an hnênah, “Tu mân an tihder loh nân che u fîmkhur rawh u. 6Mi tam tak, ‘Krista chu ka ni,’ tiin keima hming chhâlin an lo kal ang a, mi tam tak an tihder ang. 7Tin, indo thu leh indo thu thangte in hriat hunin mangang suh ang che u; chûng chu a lo thleng tûr rêng a ni; nimahsela, tâwpna chu a la ni rih lo vang. 8Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah lîrte a nghîng ang a, ṭâmte a tla ang; chûng chu nau vei ṭantirhna a ni.
9Nimahsela, fîmkhur rawh u; rorêltute an mantîr dâwn che u a; inkhâwmna inahte an vua ang che u a; keimah avângin hotute leh lalte hmaah anmahni hriattîrna tûrin in la ding bawk ang. #Mt 10.17-20; Lk 12.11-12 10Tin, Chanchin Ṭha hi hnam zawng zawng hnêna hril hmasak tûr a ni. 11Tin, an hruai che ua, an mantîr hunah che u chuan, ‘Eng nge ka sawi ang?’ tiin ngaihtuah lâwk suh u; a hun takah chuan a hriattîr che u apiang, chu ngei chu sawi zâwk rawh u; a sawitu chu nangni in ni dâwn si lo va, Thlarau Thianghlim a ni zâwk ang. 12Tin, tihhlum tûrin unaupa leh unaupa an inmantîr ang a, pa pawhin a fa a mantîr bawk ang; fate pawhin an nu leh an pate an do vang a, an tihhlumtîr bawk ang. 13Keima hming avângin mi zawng zawng huat in ni ang; nimahsela, a tâwp thlenga tuar peih apiang, chu mi ngei chu chhandamin a awm ang. #Mt 10.22
Râpthlâk eltiang
(Mt 24.15-28; Lk 21.20-24)
14Nimahsela, tiṭiautu tenawm chu a din lohna tûra ding in hmuh hunah (a chhiar apiangin a awmzia hre rawh se), chumi hunah chuan Judai rama awmte chu tlângahte tlân bo rawh se; #Dan 9.27; 11.31; 12.11 15tin, in chunga awm chu chhuk suh se, a ina englo chuh tûrin lût hek suh se; #Lk 17.31 16tin, lova awm chu a puan chuh tûrin kîr leh suh se. 17Chûng ni chuan raite leh nau no pawmte chung chu a pik ang. 18Tin, chûng chu thlasika a lo thlen loh nân ṭawngṭai rawh u. 19Chûng ni chu hrehawmna ni a ni dâwn si a, chutianga nasa rêng rêng chu, Pathian siam leilung pian tirh ata tûn thlengin a la awm ngai lo va, eng tikah mah a awm leh tawh hek lo vang. #Dan 12.1; Thup 7.14 20Tin, Lalpan chûng nite chu titawi suh sela, mihring rêng rêng damin an chhuak lo vang; nimahsela, mi thlan, a ruatate avâng chuan nite chu a titawi a ni.
21Tin, chutih hunah chuan tu pawhin in hnênah, ‘En teh u! Krista chu heta hi a awm,’ emaw, ‘En teh u, sawta saw!’ emaw an tih chuan âwih suh ang che u; 22Krista derte leh zâwlnei derte an lo chhuak dâwn si a, chûng chuan chhinchhiahna leh thilmakte an ti ang, thei ang sela, thlante meuh pawh an tihder theih nân. 23Nangni erawh chu fîmkhur rawh u, ngai teh u, engkim ka hrilh lâwk tawh che u hi.
Mihring Fapa lo kal tûr thu
(Mt 24.29-31; Lk 21.25-28)
24Nimahsela, chûng nia, chûng hrehawmna hnuah chuan, nî tih thimin a awm ang a, thla a êng tawh lo vang a, #Is 13.10; Ezek 32.7; Joel 2.10,31; 3.15; Thup 6.12 25vân aṭangin arsite a lo tla ang a, vâna thiltihtheihna awmte chu tihnghîn a ni ang. #Is 34.4; Joel 2.10; Thup 6.13 26Chutih hunah chuan Mihring Fapa hi, thiltihtheihna nasa tak leh ropuina nasa tak nên, chhûm zînga lo kal an hmu ang. #Dan 7.13; Thup 1.7 27Chumi hunah chuan vântirhkohte chu a tîr chhuak ang a, a thlante chu kâwlkil li ata - lei tâwp aṭanga vân tâwp thlengin - a lâwr khâwm ang.
Theipui kûng aṭanga zir tûr
(Mt 24.32-35; Lk 21.29-33)
28Tichuan, theipui kûngah hian a tehkhin thu zir rawh u: a ṭang a lo nova, a hnah a lo chawr chuan nipui a thaw dâwn tih in hre ṭhîn; 29chutiang bawkin nangni pawhin chûng chu a lo thleng in hmuh hun chuan, amah chu a lo hnai tawh a, kawngka bul ngeiah a awm tih hria ang che u. 30Tihtak meuhvin ka hrilh a che u, chûng zawng zawng chu a thlen hma loh zawng tûnlai chhuante hi an ral lo vang. 31Lei leh vân a ral ang a, ka thu erawh chu a ral lo vang.
A hun leh dâr tu ma hriat loh
(Mt 24.36-44)
32Nimahsela, chumi ni leh a dâr thu chu Pa chauh lo chuan tu mân, vâna vântirhkohte pawhin, Fapa pawhin an hre lo. #Mt 24.36
33Fîmkhur ula, inring renga awmin ṭawngṭai rawh u; a hun chu in hre si lo va. 34Mi, a in kalsana, a bâwihte chu thuneihtîra, an hnathawh tûr pe ṭheuhva, kawngkhâr vêngtu pawh inrin tûr thu pe zeta, ram hla taka zin ta daih ang a ni. #Lk 12.36-38 35Chutichuan, inring rengin awm rawh u; in neitupa lo haw hun tûr chu tlai lamah nge, zânah nge, ârkhuanah nge, zîngah nge a nih dâwn in hre si lo; 36chuti lo chuan, a lo haw phutin, muhîlin a rawn hmu hlauh dah ang che u. 37Tin, in hnêna ka sawi hi mi zawng zawng hnêna sawi ka ni. Inring rengin awm rawh u,” a ti ta a.
Currently Selected:
MARKA 13: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.