Matthaia 16

Chhinchhiahna phût

(Mk 8.11-13; Lk 12.54-56)

1Tin, Pharisaite leh Saddukaite an lo kal a, amah fiah nân vân ata chhinchhiahna anmahni entîr tûrin an dîl a. #Mt 12.38; Lk 11.16 2Nimahsela, ani chuan an hnênah, “Tlai lam a lo nihin, ‘Khua a ṭha dâwn a ni ang, kâwl a sen êm mai,’ in ti ṭhîn a. 3Tin, zîngah chuan, ‘Vawiin chu khua a chhe dâwn a ni ang, kâwl a sen a, khua a dûr êm mai,’ in ti ṭhîn a. Vân awmzia in hre fiah thiam si a; nimahsela, hun chhinchhiahnate hi in hre fiah thei lo. 4Chhuan sual tak leh uire hmang takte chuan chhinchhiahna an zawng a; nimahsela, Jona chhinchhiahna chauh lo chu an hnênah chhinchhiahna rêng rêng pêk a ni lo vang,” a ti a, a chhâng a. Tin, anmahni chu a kalsan a, a kal ta daih a. #Mt 12.39; Lk 11.29

Pharisai leh Saddukai dawidim

(Mk 8.14-21)

5Tin, zirtîrte chu râl lehlam an thlen chuan chhang an lo ken theihnghilh a. 6Tin, Isuan an hnênah, “Pharisaite leh Saddukaite dawidim lakah chuan invêng ula, fîmkhur rawh u,” a ti a. #Lk 12.1 7Tin, anni chu, “Chhang kan keng hauh lo,” tiin an inngaihtuah a. 8Tin, Isuan chu chu a hria a, “Rin tlêmte u, engati nge chhang in neih loh avânga in inngaihtuah ni? 9Tûnah pawh in rilruin in la hre lo fo maw? Mi sângnga chhangpêr pangaa hrai leh, in bâwmrâng ruh khah zât kha in hre reng lâwm ni? #Mt 14.17-21 10Mi sângli chhangpêr pasariha hraia in bâwm ruh khah zât pawh kha? #Mt 15.34-38 11Chhang thu in hnênah ka sawi lo tih eng tizia nge in hriat loh? Pharisaite leh Saddukaite dawidim lakah erawh chuan fîmkhur rawh u,” a ti a. 12Chu veleh chhang dawidim lakah fîmkhur tûrin a tîr lo va, Pharisaite leh Saddukaite zirtîrna laka fîmkhur tûrin anmahni a tîr zâwk tih an lo hre ta a.

Peteran Isua nihna a sawi

(Mk 8.27-30; Lk 9.18-21)

13Tin, Isua chu Kaisara Philippi bial a lo thlen chuan, a zirtîrte hnênah, “Miten Mihring Fapa hi tu nge a ni an tih?” tiin a zâwt a. 14Tin, anni chuan, “Ṭhenkhatin, ‘Baptistu Johana a ni,’ an ti a; ṭhenkhatin, ‘Elija a ni,’ an ti; ṭhenkhatin ‘Jeremia emaw, zâwlnei tua emaw a ni,’ an ti,” an ti a. #Mt 14.1-2; Mk 6.14-15; Lk 9.7-8 15Ani chuan an hnênah, “A nih leh, nangnin tu nge a ni mi tih?” a ti a. 16Tin, Simon Peteran, “Krista, Pathian nung Fapa chu i ni,” a ti a, a chhâng a. #Joh 6.68-69 17Tin, Isuan a hnênah, “Simon Bar-jona, i eng a thâwl e; tisa leh thisenin a hriattîr che a ni si lo va, ka Pa vâna miin a hriattîr zâwk che a ni. 18Tin, nang Petera i ni tih ka hrilh bawk a che; he lungpui chungah hian ka kohhranho ka rem chho vang a, Mitthi Khaw kulh kawngkhârte chuan chu chu an ngam lo vang. 19Vânram chabite ka pe ang chia, lei chungah eng pawh i phuar apiang vânah phuar a ni ang a; lei chungah eng pawh i phelh apiang vânah phelh a ni ang,” a ti a, a chhâng a. #Mt 18.18; Joh 20.23 20Chumi zawhah Krista a ni tih tu mah hrilh lo tûrin zirtîrte chu a ti tlat a.

A tuar leh thih tûr thu Isuan a sawi

(Mk 8.31—9.1; Lk 9.22-27)

21Chumi achinah chuan Isuan Jerusalem khuaa a kal tûrzia te, upate, puithiam lalte, lehkhaziaktute laka thil tam tak a tuar tûrzia te, tihhluma a awm tûrzia te, ni thum nia kaihthawha a awm tûrzia te chu a zirtîrte a hriattîr ṭan ta a. 22Tin, Petera chuan ani chu a hruai hrang a, “Lalpa, Pathianin khawngaih che rawh se; chûng chu i chungah a thleng tawp lo vang,” tiin a zilh ta a. 23Ani erawh chu a hawi a, Petera hnênah chuan, “Setan, ka hnungah kal rawh; ka tân tlûkna i ni e; Pathian thilte ngaihtuah lovin, mihring thilte i ngaihtuah zâwk a nih hi,” a ti a.

24Tin, Isuan a zirtîrte hnênah, “Tu pawhin mi zui a duh chuan, mahni hrehawm pawisa lovin, a kraws puin mi zui rawh se. #Mt 10.38; Lk 14.27 25Tu pawh a nun humhim duh apiangin a chân ang a; tu pawh keimah avânga a nun chân apiangin a humhim ang. #Mt 10.39; Lk 17.33; Joh 12.25 26Miin khawvêl hi a pumin nei sela, a nun chân si sela, a tân eng nge sâwt ang? A nih loh leh, miin a nun aiah eng nge a pêk ang? 27Mihring Fapa hi a vântirhkohte nên, a Pa ropuinaa inthuamin a lo kal dâwn si a; chumi hunah chuan mi tin an thiltih ang zêlin a rûl ṭheuh vang. #Sam 62.12; Mt 25.31; Rom 2.6 28Tihtak meuhvin ka ti a che u, heta dingho a ṭhente hi, Mihring Fapa a rama lo kal an hmuh hma loh chuan, thihna tem tawp lo tûr an awm,” a ti a.

Currently Selected:

Matthaia 16: MIZOVBSI

Highlight

Copy