Matthaia 17

Hmêl danglam

(Mk 9.2-13; Lk 9.28-36)

1Tin, ni ruk achinah chuan Isuan Petera te, Jakoba te, a unau Johana te a hruai a, a hrangin tlâng sâng takah a kal chhohpui a; #2 Pet 1.17-18 2an hmaah chuan a hmêl awmzia chu a lo danglam ta a; a hmai chu ni angin a lo êng a, a silhfênte chu êng angin a lo vâr ta a. 3Tin, ngai teh, Mosia leh Elija chu amah nên inbiain an hnênah an inlâr a. 4Tin, Peteran Isua a bia a, “Lalpa, kan tân heta awm hi a ṭha; i duh chuan hetah hian bâwktê pathum ka khawh ang; i tân pakhat, Mosia tân pakhat, Elija tân pakhat,” a ti a.

5A la sawi lai mêkin, ngai teh, chhûm vâr takin anmahni a rawn hliah ta a; tin, ngai teh, chhûm aṭang chuan awin, “Hei hi ka Fapa duh tak, ka lawm êm êma chu a ni; ama thu ngai rawh u,” a rawn ti a. #Gen 22.2; Deut 18.15; Sam 2.7; Is 42.1; Mt 3.17; 12.18; Mk 1.11; Lk 3.22 6Tin, zirtîrte chuan chu chu an hriatin an tlu bawkkhup a, an hlau ta êm êm a. 7Tin, Isuan anni chu a rawn dek a, “Tho ula, hlau suh u,” a ti a. 8Tin, an dâk chhuak a, Isua chauh lo chu tu mah an hmu ta lo va.

9Tin, tlâng ata chu an chhuk laiin, Isuan an hnênah, “Mihring Fapa hi mitthi zîng ata a thawhleh hma loh zawng, in thil hmuh kha tu mah hrilh suh u,” tiin thu a pe ta a. 10Tin, a zirtîrte chuan a hnênah, “Lehkhaziaktuten, ‘Elija a lo kal hmasa tûr a ni,’ engtiziaa ti nge an nih le?” tiin an zâwt a. #Mal 4.5 11Tin, ani chuan, “Elija chu a lo kal dâwn rêng a ni, engkim a siam ṭha bawk ang. 12Nimahsela, ka hrilh a che u, Elija chu a lo kal tawh reng a ni, amah chu an hre lo va, a chungah an duh duhin an ti ta zâwk a. Chutiang bawkin Mihring Fapa pawh hian an lakah a tuar ve dâwn a ni,” a ti a, a chhâng a. #Mt 11.14 13Chu veleh, zirtîrte chuan Baptistu Johana thu an hnênah a sawi a ni tih an lo hre ta a.

Ramhuai pai naupang tihdam

(Mk 9.14-29; Lk 9.37-43)

14Tin, mipui hnên an lo thlenin, mi pakhat a hnênah a lo kal a, a hmaah ṭhingṭhiin, 15“Lalpa, ka fapa saw khawngaih ang che, thlaemât a ni a, a tuar nasa êm mai; vawi tam tak meiah a tlu ṭhîn a, vawi tam tak tuiah a tlu bawk ṭhîn a ni. 16Tin, i zirtîrte hnênah ka rawn hruai a, an tidam thei si lo va,” a ti a.

17Tin, Isuan, “Chhuan rinna nei lova tihmawhte u, eng chen nge in hnênah ka awm ang a, eng chen nge ka ngaihtheih ang che u? Amah chu ka hnênah hian rawn hruai rawh u,” a ti a, a chhâng a. 18Tin, Isuan ramhuai chu a hau va, a chhûng ata a chhuak ta a; chumi dâr achinah chuan naupang chu a lo dam ta a. 19Chumi hnuah chuan zirtîrte chu a hrangin Isua hnênah an lo kal a, “Engati nge keinin kan hnawh chhuah theih loh?” an ti a. 20Tin, ani chuan an hnênah, “In rin tlêm avângin. Tihtak meuhin ka hrilh a che u, anṭam mu fang khat ang rinna in neih chuan, he tlâng hnênah hian, ‘Heta ṭangin sawtah sâwn va insawn rawh,’ in ti ang a, a insawn mai ang; in tân tih theih loh rêng eng mah a awm lo vang,” a ti a. #17.20: Kutziak bu ṭhenkhatah chuan châng, 21 “Nimahsela, hetiang hi ṭawngṭai leh chaw nghei chauh lo chuan a chhuak ṭhîn lo,” tih a tel. #Mt 21.21; Mk 11.23; 1 Kor 13.2

A thih tûr thu Isuan a sawi leh

(Mk 9.30-32; Lk 9.43-45)

22Tin, Galili rama an rawn inkhâwm laiin, Isuan an hnênah, “Mihring Fapa hi mihringte kutah mantîrin a awm dâwn a ni; 23tin, an tihlum ang a, ni thum nî-ah kaihthawhin a awm ang,” a ti a. Tichuan, an lungngai ta êm êm a.

Temple chhiah pêk thu

24Tin, Kapernaum khua chu an thlenin, Pathian biak in tangka khawntute chu Petera hnênah an lo kal a, “In zirtîrtuin biak in tangka chu a pe ve ṭhîn lâwm ni?” an ti a. #Ex 30.13; 38.26 25Ani chuan, “Pe ve ṭhîn e,” a ti a. Tin, ina a va luh chuan Isuan a hnênah, “Simon, engtin nge i ngaih? Leia lalten chhiah emaw, sum neih man emaw, tu lakah nge an lâk ṭhin? An fate lakah nge mi hrang lakah?” tiin a lo sawi khalh a. 26Tin, Peteran, “Mi hrang lakah,” a tih veleh, Isuan a hnênah, “Chuti a nih si chuan fate chu an âwl a ni ang chu. 27Nimahsela, nang, dîlah va kal la, nghakuai chiah la, sangha lo chhuak hmasa chu man rawh; tin, a kâ i keu veleh chêng hnih i hmu mai ang; chu chu la la, kei leh nanga tân an hnênah pe rawh; chuti lo chuan, anni chu kan tilungni lo dah ang e,” a ti a.

Currently Selected:

Matthaia 17: MIZOVBSI

Highlight

Copy