Matthaia 10

Zirtîr sâwm leh pahnih

(Mk 3.13-19; Lk 6.12-16)

1Tin, a zirtîr sâwm leh pahnihte chu a ko va, anmahni hnawh chhuah theihna tûrin ramhuai bawlhhlawhte chunga thuneihna a pe a; damlohna tinrêng leh natna tinrêng tihdam theihna tûrin thuneihna a pe bawk a.

2Tin, tirhkoh sâwm leh pahnihte hming chu hêng hi a ni: a hmasa berah chuan Simona (Petera an tih) leh a unau Andria te; Zebedaia fapa Jakoba leh a unau Johana te; 3Philipa leh Bartholomaia te; Thoma leh chhiahkhawntu Matthaia te; Alphaia fapa Jakoba leh Thaddaia te; 4Kanaan-a mi Simona leh a mantîrtu Juda Iskariota te hi.

Sâwm leh pahnih tirh chhuah

(Mk 6.7-13; Lk 9.1-6)

5Chûng sâwm leh pahnihte chu Isuan a tîr chhuak a, an hnênah heti hian thu a pe a: “Jentail-te kawngah kal suh ula, Samari mite khua rêng rêngah pawh lût suh ang che u; 6amaherawhchu, Israel hnam berâm bote hnênah chuan kal zâwk ang che u. 7Tin, in kalin, ‘Vânram chu a lo hnai ta,’ tiin hril zêl ang che u. #Lk 10.4-12 8Damlote tidam ula, mitthite kai tho ula, phârte tithianghlim ula, ramhuaite hnawt chhuak ang che u; a thlâwnin in hmu a, a thlâwnin pe ang che u. 9In kâwnghrênahte chuan rangkachak emaw, tangkarua emaw, dâr emaw keng suh ula; 10zinna atân iptê emaw, kawr pahnih emaw, pheikhawk emaw, tiang emaw keng hek suh u; hnathawktu chu a ei tûr hmu tlâk a ni si a. #1 Kor 9.14; 1 Tim 5.18

11Tin, khaw lianah emaw, khaw têah emaw in luhna apiangah, a thleng tlâk mi tûr che u zawng chhuak ula, in chhuah leh hma loh chuan chutah chuan thleng reng ang che u. 12Tin, inah chuan in luh dâwnin chibai bûk ang che u. 13Tin, ina mite chu chibai bûk tlâk an nih chuan, in thlamuanna thu chu an chungah lo thleng rawh se; an tlâk loh erawh chuan, in thlamuanna thu chu in chungah lo kîr leh rawh se. 14Tin, tu pawh lâwm lo che ua, in thu pawh ngaithla lo apiang, chu in ata emaw, chu khua ata emaw in chhuah hun chuan, in kephaha vaivut chu thing thla ang che u.#Tirh 13.51 15Tihtak meuhvin ka hrilh a che u, ngaihtuah nîah chuan, chumi khuate ai chuan Sodom leh Gomorra ram tuar tûr chu a ziaawm zâwk ang.#Gen 19.24-28; Mt 11.24

Tihduhdahna lo awm tûr

(Mk 13.9-13; Lk 21.12-17)

16Ngai teh u, chinghne zînga berâm awm angin ka tirh che u hi; chutichuan, rûl anga finga, ṭhuro anga pawi khawih lovin awm ang che u. #Lk 10.3 17Nimahsela, mihring lakah chuan fîmkhur rawh u; rorêltuhote an mantîr dâwn si che u a, inkhâwmna inahte an vua ang che u a; #Mk 13.9-11; Lk 12.11-12; 21.12-15 18a ni, keimah avângin hotute leh lalte hmaah, anmahni leh Jentail-te hriattîrna tûrin an la hruai ang che u. 19Nimahsela, an mantîr hunah che u chuan, ‘Engtin nge, eng thu nge ka sawi ang?’ tiin lungkham suh ang che u; in sawi tûr chu a hun takah chuan a hriattîr dâwn si che u a. 20A sawitu chu nangni in ni dâwn si lo va, in Pa Thlarauvin nangmahniah a sawi zâwk dâwn a ni.

21Tin, tihhlum tûrin unaupa leh unaupa an inmantîr ang a, pa pawhin a fa a mantîr bawk ang; fate pawhin an nu leh an pate an do vang a, an tihhlumtîr bawk ang. #Mk 13.12; Lk 21.16 22Keima hming avângin mi zawng zawng huat in ni ang; nimahsela, a tâwp thlenga tuar peih apiang, chu mi ngei chu chhandamin a awm ang. #Mt 24.9,13; Mk 13.13; Lk 21.17

23Chutichuan, he khuaah hian an tihduhdah hunah che u, khaw dangah tlânsan ang che u; tihtak meuhvin ka hrilh a che u, Mihring Fapa a lo kal hmain Israel khuate chu in fang chhuak lo vang.

24Zirtîr a zirtîrtu chungah a awm lo; bâwih pawh a pu chungah a awm hek lo. #Lk 6.40; Joh 13.16; 15.20 25Zirtîr chu a zirtîrtu anga lo awm leh, bâwih chu a pu anga lo awm chu a tâwk e. In neitupa mah ‘Beelzebula’ an tih chuan, a chhûngte chu an va ti nasa dâwn êm! #Mt 9.34; 12.24; Mk 3.22; Lk 11.15

Tu nge hlauh tûr

(Lk 12.2-7)

26Chutichuan, anmahni chu hlau suh ang che u; lang lo tûra thuhrûk eng mah a awm si lo, hriat loh tûra zêp pawh eng mah a awm hek lo. #Mk 4.22; Lk 8.17 27Thima ka hrilh che u hi êngah sawi ang che u; beng bula in hriat hi in chunga chuangin tlângaupui ang che u.

28Tin, taksa tihluma thlarau tihlum thei lotute chu hlau suh ula; Gehenna-a thlarau leh taksa tiboral theitu chu hlau zâwk ang che u. 29Chawngzawng pahnih dâr tangka pakhatah an hralh ṭhîn lo vem ni? Nimahsela, an zînga pakhat mah in Pa lovin leiah a tla lo vang. 30In samzaite lam pawh hi chhiar vek a ni asin. 31Chuvângin, hlau suh u; chawngzawng tam tak aiin in hlu zâwk si a.

Isua ṭan leh phat

(Lk 12.8-9)

32Chutichuan, mite hmaa mi ṭan apiang, ka Pa vâna mi hmaah ka ṭan ve ang. 33Nimahsela, tu pawh mite hmaa mi phat apiang, ka Pa vâna mi hmaah ka phat ve ang. #2 Tim 2.12

Remna aiah khandaih lên tûr thu

(Lk 12.51-53; 14.26-27)

34Khawvêlah hian rem lêntîr tûra lo kal emaw min ti suh u; rem lêntîr tûra lo kal ka ni lo va, khandaih lêntîr tûra lo kal ka ni zâwk. 35Mi a pa dotîr tûrin, fanu a nu dotîr tûrin, mo a pi dotîr tûrin lo kal ka ni asin. #Mik 7.6 36Mi a hmêlmate chu ama chhûngte zînga mi ngei an ni ang. 37Tu pawh a nu emaw, a pa emaw keimah aia hmangaih zâwk chu ka mi ni tlâk a ni lo; tu pawh a fanu emaw, a fapa emaw keimah aia hmangaih zâwk pawh ka mi ni tlâk a ni lo. 38Tu pawh a kraws pua mi zui lo chu ka mi ni tlâk a ni lo. #Mt 16.24; Mk 8.34; Lk 9.23 39Tu pawh a nunna hmu chuan a chân ang a; keimah avânga a nunna chân chuan a hmu ang. #Mt 16.25; Mk 8.35; Lk 9.24; 17.33; Joh 12.25

Lâwmman hmuh tûr

(Mk 9.41)

40Tu pawh a lâwm che u chu mi lâwm a ni a, tu pawh mi lâwm chu mi tîrtu lâwm a ni. #Lk 10.16; Joh 13.20; Mk 9.37; Lk 9.48 41Tu pawh zâwlnei chu zâwlnei a nih avânga lâwm chuan zâwlnei lâwmman a hmu ang a; tu pawh mi fel chu mi fel a nih avânga lâwm chuan mi fel lâwmman a hmu ang. 42Tin, tu pawh hêng mi tê tak zînga pakhat hnênah hian, zirtîr a nih avânga tui vâwt no khat chauh pawh pe apiang chuan, tihtak meuhvin ka hrilh a che u, an lâwmman chu an chân tawp lo vang,” a ti a.

Currently Selected:

Matthaia 10: MIZOVBSI

Highlight

Copy