Matthaia 11

Baptistu Johana mi tirhte

(Lk 7.18-35)

1Tin, heti hi a ni a, Isuan a zirtîr sâwm leh pahnihte chu thu a pêk zawh veleh, chuta ṭang chuan an khuaahte zirtîr leh thu hril tûrin a kal ta a.

2-3Tin, Johanan Krista thiltihte chu tân inah chuan a lo hriatin, a hnênah, “Lo kal tûra chu i ni nge, mi dang kan la ngai ang?” tiin a zirtîrte a palaitîr a.

4Tin, Isuan an hnênah, “Kal leh ta ulang, thil in hmuh leh in hriat hi Johana hnênah va hrilh rawh u; 5mitdelte an mit a lo vâr ta, kebaite kein an lo kal ta, phârte an lo thianghlim ta, bengngawngte pawh an beng a lo vâr ta, mitthite pawh kaihthawhin an awm ta, pachhiate pawhin Chanchin ṭha hril an dawng ta. #Is 35.5-6; 61.1 6Tin, tu pawh ka chunga lungnih lohna hmu lo chu an eng a thâwl e,” tiin a lo chhâng a.

7Chûng mite chu an hâwn veleh, Isuan mipui hnênah chuan Johana thu a sawi ta a, “Eng en tûrin nge thlalêra in kal chhuah kha? Luang, thli chhêm nghîn maw? 8A nih loh leh, eng en tûr berin nge in kal chhuah kha? Puan nêm sin maw? Ngai rawh u, puan nêm sinte chu lal inahte asin an awm. 9A nih loh leh eng vâng berin nge in kal chhuah kha? Zâwlnei en tûrin maw? A nih ngei kha, ka ti a che u, zâwlnei ai pawha ropui zâwk,

10‘En teh, ka tirhkoh i hmaan

ka tîr a ni, ani chuan i hmaah

i kawng a siam ang!’

tia a chanchin an ziak kha he mi hi a ni. #Mal 3.1 11Tihtak meuhvin ka ti a che u, hmeichhe hrin zîngah Baptistu Johana aia ropui zâwk an la chhuak ngai lo; nimahsela, vânrama mi tê deuh pawh ani ai chuan an ropui zâwk si a. 12Baptistu Johana awm achin tûn thlengin vânram chuan beih vakna a tâwk ṭhîn a, a bei vakte chuan an pâwng lâk ṭhîn. #Lk 16.16 13Zâwlneite zawng zawng leh dân thu chuan, Johana a lo awm thleng khân an hril lâwk ṭhîn a ni. 14In âwih duh zawngin, chu chu Elija, lo kal tûra chu a ni. #Mal 4.5; Mt 17.10-13; Mk 9.11-13 15Tu pawh hriatna tûra beng nei chuan hre rawh se.

16Nimahsela, tûnlai chhuante hi eng nên nge ka tehkhin ang? Naupang, dâwr hmunahte ṭhua, an ṭhiante auva,

17‘Phênglâwng kan tumsak

che u a, in lâm si lo va;

Kan ṭap vak a, âwm in

inchûm si lo,’

tiate ang hi an ni.

18Johana chu a lo kal a, a eiin a in lo va, ‘Ramhuai a zâwl a nih hi,’ an ti a. 19Mihring Fapa a lo kal a, a eiin a in a, ‘En teh u, chaw heh mi, uain heh mi, chhiahkhawntute leh mi sualte ṭhian saw!’ an ti si a. Nimahsela, Finna chu a thiltih aṭangin a dikzia a lang a ni.”

Ring duh lo khuate

(Lk 10.13-15)

20Tin, an sim loh avângin, a thilmak tih tamna ber khuate chu a hau ta a: 21“Korazin, i chung a pik e! Bethsaida, i chung a pik e! Nangmahnia thilmak tak tihte kha Tura leh Sidon khuaa tih ni sela, saiip puan sina vut zînga ṭhuin an sim tawh ang. #Is 23.1-18; Ezek 26.1—28.26; Joel 3.4-8; Amos 1.9-10; Zak 9.2-4 22Nimahsela, ka ti a che u, ngaihtuah nîah chuan nangni tuar ai chuan Tura leh Sidon khaw tuar tûr chu a ziaawm zâwk ang. 23Tin, nang Kapernaum, vân thlengin chawimawi i ni dâwn em ni? Mitthi khaw thlengin i zuk kal dâwn asin; nangmaha thilmak tak tihte kha Sodom khuaa tih ni sela, tûn thlengin a la awm reng ang. #Gen 19.24-28; Is 14.13-15 24Nimahsela, ka ti a che u, ngaihtuah nîah chuan, i tuar ai chuan Sodom ram tuar tûr chu a ziaawm zâwk ang,” a ti a. #Mt 10.15; Lk 10.12

Lo kal ula, ka chawlhtîr ang che u

(Lk 10.21-22)

25Chumi lai chuan Isuan a bia a, “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêpa, nausênte hnêna i puan avâng hian ka fak a che. 26A ni, ka Pa, chutiang tih chu i ngaihin a ṭha a ni. 27Ka Pain thil engkim mi kawltîr tawh; Pa lo chuan tu mahin Fapa hi an hre lo; Fapa leh an hnêna Fapain a puan duhnate chauh lo chuan tu mân Pa chu an hre hek lo. #Joh 1.18; 3.35; 10.15

28Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. 29Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tân chawlhna in hmu ang. #Jer 6.16 30Ka nghâwngkawl chu a nuam a, ka phur pawh a zâng a ni,” a ti a.

Currently Selected:

Matthaia 11: MIZOVBSI

Highlight

Copy