KOLOSSA 3

1Chutichuan, Krista hnênah kaihthawha in awm ve tawh chuan chung lam, Pathian ding lama ṭhu Krista awmnaa thil awmte chu zawng rawh u. #Sam 110.1 2Chung lama thil awmahte chuan in rilru nghat tlat rawh u, leia thil awmahte chuan nghat lovin. 3In thi tawh a, in nunna chu Pathianah chuan Krista hnênah thuhrûkin a awm si a. 4Krista, kan nunna chu a lo inlâr hunah chuan, nangni pawh ama hnênah ropui zîngah in inlâr ve ang.

Nun hlui leh nun thar

5Chutichuan, in taksa pêng leia awmte hi tihlum rawh u, inngaihna te, bawlhhlawhna te, hurna te, châkna sual te, duhâmna te hi (duhâmna chu milem biakna a ni si a); 6chûng thil avâng chuan a ni, Pathian thinur chu âwih lo fate chunga a thlen ṭhin ni; 7nangni pawh hmânah chûng thilahte chuan in nun lai khân, chûngahte chuan in awm ṭhin kha. 8Tûnah erawh chuan nangni pawhin hêng zawng zawng - tauhna te, thinurna te, huatna te, sawichhiatna te, in kâa chhuak ṭawng zahmawh te hi tibo rawh u. 9Dâwt inhrilh tawn suh u; mihring hlui chu a thiltihte chawpin in hlîp thla tawh a, #Eph 4.22 10mihring thar chuan in inthuam tawh si a, chu mihring thar chu hriat famkimna nei tûrin, a siamtu anpui anga siam tharin a awm mêk a ni; #Gen 1.26; Eph 4.24 11chumiah chuan Grik mi leh Juda mi, serhtan leh tan loh, awze mite, Skuthia mi te, bâwih te, bâwih lote pawh a awm theih loh; Krista chu engkim ni zâwkin, engkimah a awm bawk a ni.

12Chutichuan, Pathian mi thlan, mi thianghlim leh duh takte angin, lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u, #Eph 4.2 13tu pawhin tu chungah pawh thupawi nei ang ula, indawh tawnin inngaidam tawn ula; Lalpan a ngaidam che u ang tak khân ngaidam ve rawh u. #Eph 4.32 14Tin, chûng zawng zawng chungah chuan hmangaihna inbel rawh u, chu chu phuar famkimna a ni. 15Tin, Krista thlamuanna chuan in thinlungah ro rêl rawh se, chutiang ni tûrin taksa pumkhata koh in ni rêng asin; lâwm nachâng hre bawk rawh u. 16Krista thu chu finna tinrêngin nangmahniah awm ṭeuh rawh se; fakna hla te, Pathian hla te, thlarau lam hla tea inzirtîrin inzilh tawn ula, thinlungah khawngaihna neiin Pathian chu hla saksak rawh u. #Eph 5.19-20 17Tin, in tih apiang chu thusawiah emaw, thiltihah emaw, ama zârah Pa Pathian hnêna lâwmthu hril chungin, Lalpa Isua hmingin ti vek rawh u.

Nun thara inlaichîn dân tûr

18Nupuite u, Lalpaa a âwm tâwk ang zêlin in pasalte hnênah intulût rawh u. #Eph 5.22; 1 Pet 3.1

19Pasalte u, in nupuite hmangaih ula, an lakah vîn suh u. #Eph 5.25; 1 Pet 3.7

20Naupangte u, engkimah in nu leh in pate thu zâwm rawh u, chu chu Lalpaah chuan a lâwmawm si a. #Eph 6.1

21Pate u, in fate tinuar suh u; chuti lo chuan, an bei a dawng dah ang e. #Eph 6.4

22Bawihte u, tisaa in hotute thu hi engkimah zâwm rawh u, mihring tilâwmtute mai anga mit rawng bâwl lovin, thinlung sakhat pû-a Lalpa ṭih dêk chungin zâwm zâwk rawh u. #Eph 6.5-8 23,24A rulhna roluah tûr chu Lalpa hnên ata in hmu dâwn tih hriain, in tih apiang chu mihring tân anga ti lovin, Lalpa tân anga ti zâwkin, châk takin ti rawh u; Lalpa Krista rawng in bâwl a nih hi. 25Thil dik lo titu chuan a thil dik lo tih man chu a hmu leh ang; mi thlei bîkna rêng a awm si lo va.#Deut 10.17; Eph 6.9.

Currently Selected:

KOLOSSA 3: MIZOVBSI

Highlight

Copy