KOLOSSA 2

1Nangmahni leh Laodikei khuaa awmte leh, tisaa ka hmêl hmu lo apiangte tân, eng ti kauva nasain nge ka beihsak ṭâlh ṭâlh che u hi in hriat ka duh si a; 2,3chutichuan, Pathian thurûk (finna leh hriatna ro zawng zawng thuhrûkna Krista chu) an hriat theih nân, hriata rin tlatna lukhâwng zawng zawng chu dawng tûra hmangaihnaa insuih khâwmin, an thinlungte chu thlamuangin a awm thei ang. 4Tu mân ṭawngkam thiamin an bum loh nân che u, chûng chu ka ti a ni. 5Tisain in hnênah awm mah suh ila, lâwm taka awmin, in felzia leh Krista in rin nghehzia enin, thlarauvah chuan in hnênah ka awm si a.

Kristaa nun famkim

6,7Chuvângin, Krista Isua, Lalpa chu in lâwm ang khân, amaha zung kai leh rem chhoh deuh deuhva awmin, an zirtîr che u ang khân in rinnaah chuan nghet taka awmin, lâwmthu sawi lo uarin, amahah chuan awm rawh u.

8Fîmkhur rawh u; chuti lo chuan, tu pawhin Krista thu ang ni lovin, mihring thurochhiah leh khawvêl A AW B ang zâwkin, an thufing leh bumna mai maiin râllâkin an la dah ang che u. 9Amahah chuan Pathian famkimna tinrêng chu taksa neiin a awm reng si a. 10Amahah chuan in famkim ta bawk a; ani chu lalna leh thuneihna zawng zawng lû a ni. 11Krista serh tannaah chuan tisa taksa hlîp vekin, amah vêkah chuan kuta serhtan ni lova serhtan in nih kha; 12baptisma-ah chuan a hnêna phûm in lo ni ve tawh si a, chumi vêkah chuan mitthi zîng ata amah kaithotu Pathian hnathawh rin avânga a hnêna kaihthawh in nih ve kha. #Rom 6.4 13Tin, nangni in bawhchhiatnate leh in tisaa serhtan lohna avângin thi in lo ni a, nangmahni ngei chu amah nên a tinung che u a nih kha; kan bawhchhiatna zawng zawngte min ngaidam a, #Eph 2.1-5 14batna lehkha thupêka ziak, kan chunga awm, min dodâl ṭhîna chu a thai bo tawh si a: chu ngei chu kraws-a khêng betin a la kiang ta a; #Eph 2.15 15tin, lalna leh thuneihnate chu hlîp thlain, chu kraws-ah chuan chûngte chu hnehin, a langin hriattîr nân a hmang ta a.

16Chutichuan, ei thûah emaw, in thûah emaw, kût ni thûah emaw, thla thar thûah emaw, Chawlhni thûah emaw tu mân sawisêl che u suh se; #Rom 14.1-6 17chûng chu thil lo thleng tûrte hlim a ni, a tak erawh chu Krista ta a ni. 18Taksa hi ngaihnêp tûr, vântirhkohte pawh biak tûr, tia inlârna danglam bîk hmua insawi, eng mah ni si lova chapohote chuan thiam loh chantîr che u suh se. Chûnghote chuan Lû, Krista chu an vuan tawh lo a ni. 19Lû aṭang chuan taksa pum pui bung hrang hrang inzawm khawm chu a chawm a ni a, Pathian duh zâwng ang zêlin a ṭhang lian ṭhîn a ni. #Eph 4.16

Kristaa thih leh nun

20Khawvêla zirtîrna dik lote chu Kristaah in thihsan tawh si chuan, eng tizia nge khawvêl dâna nung ang maia, mihringte zirtîrna, “Tawk suh la, tem hek suh la, deh pawh dek suh,” 21tih thupêk lakah in intukluh leh tâk mai? 22Chûng zawng zawng chu hmana ral mai tur an ni. 23Hêng - vântirhkoh biak tûr tih te, taksa ngaihnêp tih te, taksa tihhrehawm tih te hi ṭha âwm tak chuan a lang a; mahse, tisa duh zâwng hneh nân a ṭangkai si lo.

Currently Selected:

KOLOSSA 2: MIZOVBSI

Highlight

Copy