KOLOSSA 4

1Hotute u, nangni pawhin vânah Hotu in nei tih hriain, in bâwihte chungah a fel leh a mawi tâwk chu ti rawh u. #Eph 6.9

Fuihna

2Ṭawngṭai fan fan ula, chumiah chuan lâwmthu hril chungin ngaihven rawh u. 3Mi phuarna chhan Krista thurûk chu hril tûrin, Pathianin thu atân kawng min tihkuaksak theih nân keini pawh min ṭawngṭaisak rawh u, 4ka sawi tûr ang taka ka puan theihna tûrin. 5Remchânna lei zêlin, pâwn lama mite lakah chuan fing takin awm rawh u. #Eph 5.16 6Mi tin engtia chhân ṭheuh tûr nge ni tih in hriat theih nân in ṭawngka chhuak chu chia al, khawngaihna tel ni fo rawh se.

Chibai bûkna

7Lalpaa unau duh tak, rawngbâwltu rinawm, kan bâwihpui Tukika hian ka chanchin zawng zawng a hriattîr ang che u. #Tirh 20.4; 2 Tim 4.12 8Hemi avâng ngei hian ani chu in hnênah ka rawn tîr a ni, ka chanchin in hriat theihna tûr leh in thinlung a tihthlamuan theihna tûrin; #Eph 6.21-22 9Onesima, unau rinawm leh duh tak, nangmahni zînga mi nên hian. Anni chuan hêng lama thil awmzia zawng zawng hi an hriattîr ang che u. #Philm 10-12

10Aristarka, ka tânpuipa hian chibai a bûk a che u; Marka, Barnaba tupa pawhin chibai a bûk a che u (ama chungchâng thûah thupêkte in hmuh kha; in hnêna a lo kal chuan lo lâwm rawh u); #Tirh 19.29; 27.2; Philm 24; Tirh 12.12,25; 13.13; 15.37-39 11Isua, Justa an tiha hian chibai a bûk bawk a che u. Chûng chu serhtan mi an ni a; chûng chauh chu Pathian ram thu lamah chuan ka thawhpui, mi thlamuantute an ni.

12Epaphra, nangmahni zînga mi, Krista Isua bâwihpa hian chibai a bûk a che u; ani chuan Pathian duh zâwng apianga puitling leh rin tlatna neia in din theihna tûrin, a ṭawngṭainaahte chuan nangmahni tân a bei fo ṭhîn a ni. #Kol 1.7; Philm 23 13Nangmahni tân te, Laodikei khuaa awmho tân te, Hierapoli khuaa awmho tân te ṭhahnem a ngai êm êm tih ka hriatpui asin.

14Luka, dâktawr duh tak leh Dema hian chibai an bûk a che u. #2 Tim 4.10,11; Philm 24

15Laodikei khuaa unau awmte kha chibai mi bûksak ang che u; Numphi leh a ina kohhranho kha chibai mi bûksak bawk ang che u. 16Tin, he lehkhathawn hi in zînga in chhiar hnuin Laodikei kohhranho zingah pawh chhiartîr ve rawh u; nangni pawhin Laodikei khuaa mi kha lo chhiar ve bawk ang che u. 17Tin, Arkippa hnênah khân, “Rawngbâwlna Lalpaa i hmuh kha hlen tûrin fîmkhur rawh,” ti ang che u. #Philm 2

18Kei Paulan keima kut ngeia chibai ka bûkna che u a nih hi. Ka kawlbunte hi hre reng rawh u. Khawngaihna in hnênah awm rawh se.

Currently Selected:

KOLOSSA 4: MIZOVBSI

Highlight

Copy