Maafiù 27

Wo Jisɛ̀ yaà wo Paalè ko fɛɛ̀feìŋ

(Mài 15.1; Luù 23.1, 2; Jɔ̀ɔŋ 18.28-32)

1Maŋ nyiìŋ tɛ̀tɛ̀ aŋ kànà sìèfèìŋ zòòlo nyàŋ gbiŋ yèè aŋ màmànkùmɛ̀ŋ fuɔɔ̀ŋ, naŋ nyɛ̀nɛ̀ŋ e ɗèwe nyiŋ nɛ̀ wèè aŋ jìwà wo Jisɛ̀. 2Àŋ naŋ sìè wo Jisɛ̀ maŋ jɔ̀ɔɔ, auŋ koà, yèè àŋ nauŋ tùlìè wo Paalè, wo kànà anyùùŋ ko Luùm nyaŋ.

Wo Juɗà fà

(Nyɛ̀nɛ̀ŋ 1.18, 19)

3Nààŋ wo Juɗà, wo yèɔ nauŋ wa maàŋ wɔ naŋ yɛmɛ̀ kɛ̀ àŋ hàà e kìtì fàa wo Jisɛ̀ diɛŋ, ke nyowo nauŋ nyɛ̀nɛ̀ŋ wèè e keì naanààaŋ wò naŋ nyɛ̀nɛ̀ŋ lɛ, yèè wò naŋ kɛ̀lɛ̀ɛ̀ e kaiŋ fua nɛɛnɛŋ kpɛ̀ɛ̀ùŋ guùŋ jɛ̀wɛ̀ zììyàa koɓɛ̀ aŋ kànà sìèfèìŋ zòòlo nyàŋ yaà aŋ màmànkùmɛ̀ŋ fuɔɔ̀ŋ. 4Wò naŋ woò wààŋ, “Ka nyɛ̀nɛ̀ŋ e kèì jùumù nààŋ mìŋ mààŋ wo felaaà gò nyɛ̀nɛ̀ŋ è keì naanààŋ gbiŋ wɔ̀, wèè auŋ jìwà yèè wèè aŋ wùàŋ maŋ sɛnùuŋ màŋ.”

Kpeiŋ anyùùŋ nyaŋ nauŋ fasàì nyààŋ, “Kiìŋ è kuwa e tii nyiniàŋ? E kpàtaum tii.”

5Yèè wo Juɗà naŋ gbìɛ̀ŋ e nɛɛnɛɛ̀ŋ ko Saaŋ Zòòlò Dayài wò naŋ kɔ̀. Kpeiŋ wò naŋ kɔ̀ yèè wò naŋ sɛ̀ɛ̀ wuŋ bi.

6Aŋ kànà sìèfèìŋ zòòlo Gbee nyàŋ naŋ ɓèmè e nɛɛnɛɛ̀ŋ yèè àŋ naŋ woò wààŋ, “Tɛɛ̀ è yaà e nɛ̀ɛ̀nɛ̀ŋ maŋ sɛ̀ìŋ, ke sàwà wiɛ̀ gò wi gè nyààŋ diɛŋ wèè eiŋ niŋ gbìàŋ kò sùlò nɛɛnɛìŋ kò Saaŋ Zòòlò Dayài.” 7Àŋ naŋ deenè yèè àŋ naŋ ɗewè wèè aŋ dìnìàŋ e nɛɛnɛɛ̀ŋ e dìì e yìwìà wo kɛ̀ɛ̀nɛɔ̀ŋ sìwè, e yèɛ anyùùŋ tomo wa e ɓoo pɔɔ wèè maŋ kpoò bàne lɛ̀, wèè ko nɔ̀ŋ ko sììyè anyùùŋ fuɔŋ joo sèè àŋ fɔɔyɛ̀ ko Jùlusɛ̀làm. 8Esaɓùɛ lii anyùùŋ nyaŋ nyaaŋ e dìì bi “E dìì maŋ sɛ̀ìŋ.”

9Kpeiŋ kɛ̀ e yèɛ wo wɛ̀ijìɔ Jɛ̀lèmaayà naŋ wa woò lɛ naŋ hɛɛnɛ̀ŋ nààŋ wò naŋ woò wààŋ, “Àŋ naŋ wa ɓèmè e kaiŋ fua kpɛ̀ùŋ guùŋ jɛ̀wɛ̀ zììyàa anyùùŋ Ezɔ̀ɛ̀ nyaŋ naŋ wa nyimèè wèè aŋ kiɛ̀ŋ wèè e sɔ̀ngɔuŋ nɛ̀, 10yèè àŋ naŋ dìnìè e nɛɛnɛŋ bi e dììɛ àŋ nyaaŋ e dìì ɓoo pɔɔɛ̀ lɛ, nààŋ wo Kanaà Dayà naim wa woò wèè ka nyɛ̀nɛ̀ŋ lɛ.”

Wo Paalè naŋ dàwè wo Jisɛ̀

(Mài 15.2-5; Luù 23.3-5; Jɔ̀ɔŋ 18.33-38)

11Wo Jisɛ̀ naŋ sìè wo kànà anyùùŋ ko Luùm nyaŋ ko fɛɛ̀feìŋ yèè wo Paalè nauŋ dawè wààŋ, “Muàŋ nàŋ yaà wo kànà aŋ Juùù nyaŋ?”

Wo Jisɛ̀ naŋ fasàì wààŋ, “Nyɛ̀iŋ naŋ yɛi woò.” 12Kɛɛ wo Jisɛ̀ gò wa wòò è keì gbiŋ è nyaàiŋ dè màŋ keì maŋ aŋ kànà sìèfèìŋ zòòlo nyàŋ yèè aŋ màmànkùmɛ̀ŋ fuɔŋ nyàŋ nauŋ wa gbùwò ɗì maŋ.

13Yèè wo Paalè nauŋ woò wààŋ, “Muŋ gò kòmàŋ màŋ keì mɛɛ̀ŋ kinɛiŋ àŋ naum yaà jàà ɗì maŋ?” 14Kɛɛ wo Jisɛ̀ naŋ wa gè maŋhɛɛ wèè wo wòò kè mìè guùŋ pɛɛ, yèè è naŋ wa kaikpɔ fòònò wo kanaà Paalè.

Àŋ jèè wo Jisɛ̀ e keì wèè auŋ jìwà

(Mài 15.6-15; Luù 23.13-25; Jɔ̀ɔŋ 18.39–19.16)

15Wɔŋ doa gbiŋ e tèèngà wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ, è yaà wa e langi wèè wo Paalè wo gè wo nyùùŋ guùŋ ko sààŋ nyìwì wo yèɔ anyùùŋ nyaŋ manaŋ wa wɔ̀. 16E teenga lii wo felaa bà yao wa àŋ nyaaŋ wo Jisɛ̀ Bàlaɓà wò yèɔ yaà wa ko sààŋ nyìwì. 17Kpeiŋ nààŋ anyùùŋ nyaŋ naŋ gbònò koɓɛ̀ guùŋ, wo Paalè naŋ nyiŋ dawè wààŋ, “Ɓòò nìŋ manaŋ wèè ka dangè weèiŋ? Wo Jisɛ̀ Bàlaɓà ɔ̀ɔ̀ wo Jisɛ̀ wo yèɔ àŋ nyaaŋ wo Kulaìɔ?” 18Wo Paalè wa nyìmàŋ kɛ̀ aŋ màmànkùmɛ̀ŋ aŋ Juùù nyaŋ naŋ wa kìɛ̀ŋ wo Jisɛ̀ ko nɛ̀ɛ̀uŋ niìŋ esaɓù kɛ̀ e kooɛ̀ yaà nyiìŋ wa.

19Nààŋ wo Paalè jaa wa ko sààŋ sàwài, wo jawèuŋ nɔɔ̀ŋ nauŋ tùɔ̀ŋ ke miè gbìaŋ wààŋ, “Ɓɔ̀ mùŋ nyiniàŋ wò fèlàà tɔ̀ɔ̀nyaàŋ wii è nɛ̀ŋ gbiŋ, esaɓù kɛ̀ mìŋ naŋ nàaŋ kɔ̀ e mɔ̀ɔ̀nɛŋ dìì wɔŋ dùùm wɛɛ̀ŋ e weèuŋ e gɔagòo sùà.”

20Kpeiŋ aŋ kànà sìèfèìŋ zòòlo gbee nyàŋ yèè aŋ màmànkùmɛ̀ŋ fuɔɔ̀ŋ naŋ pɔ̀wɔ̀ anyùùŋ nyaŋ wèè aŋ dawè wèè wo Bàlaɓà kɛɛ aŋ jìwà wo Jisɛ̀. 21Wo kanaà Paalè naŋ ɓɛìŋ dàwè anyùùŋ nyaŋ wààŋ, “Ɓòò nìŋ manaŋ wèè ka dangè weèiŋ anyùùŋ tìyèe nyɛɛ̀ŋ fèemàŋ?”

Yèè anyùùŋ nyaŋ naŋ fasàì nyààŋ, “Dàngè wo Bàlaɓà weè wi.”

22Kpeiŋ wo Paalè naŋ nyiŋ dawè wààŋ, “Kɛ̀ kiìŋ nìŋ manaŋ wèè ka nyìnìàŋ wo Jisɛ̀ wo yèɔ àŋ nyaaŋ wo Kulaìɔ wɔ̀?”

Yèè àŋ naŋ kpààŋ sɛiŋ nyààŋ, “Kpùùnyaàuŋ wɔŋ vànèkpaaà diɛŋ.”

23Wo Paalè naŋ nyiŋ ɓɛìŋ dawè wààŋ, “Kiìŋ kè sàwà wò naŋ pɔɔ̀?”

Yèè e faaàŋ naŋ ngèè ɓɛìŋ kpààŋ sɛiŋ nyààŋ, “Kpùùnyaàuŋ wɔŋ vànèkpaaà diɛŋ!”

24Kpeiŋ nààŋ wo Paalè naŋ wa yɛmɛ̀ kɛ̀ anyùùŋ nyaŋ fè wa wòò è keì kɛnɛ gbiŋ, kɛɛ àŋ manaŋ wa aŋ dàà ke kpùùnɛɛ̀, wò naŋ wa ɓèmè e wùìyè yèè wò naŋ gùò le sìwè ko fɛ̀ɛ̀fèìŋ e faaàŋ, wò yaà woo wààŋ, “Miŋ nyimààŋ è kèè màŋ sɛ̀ìŋ wò felaa wɛɛ̀, weètii nyɛ̀nɛìŋ niŋ nyɛ̀iŋ bi.”

25Anyùùŋ nyaŋ gbiŋ naŋ fasàì nyààŋ, “Tɔ̀ e nɔ̀ŋ e kpààŋ kɔɔ wi yàwi nààŋ jɔ̀à wi nyàŋ wèè fàauŋ nɛ̀!”

26Yèè wò Paalè naŋ dàngè wo Bàlaɓà weè nyiŋ. Kpeiŋ wò naŋ gè wo Jisɛ̀ nyààŋ diɛŋ auŋ ɓùlà yèè wò naŋ nyiŋ wuŋ kiɛ̀ŋ wèè aŋ jiwìàuŋ wɔŋ vènèkpaaà diɛŋ.

Aŋ kààlòòɗùà nyaŋ naŋ hììlè wo Jisɛ̀

(Mài 15.16-20; Jɔ̀ɔŋ 19.2, 3)

27Kpeiŋ aŋ kààlòòɗùà Paalè nyaŋ naŋ kɔ̀ɔ̀ wo Jisɛ̀ ko sààŋ gbèè kanaà, yèè àŋ kààlòòɗùà gbànaŋ nyàŋ gbiŋ nauŋ gbònò kɔɔ. 28Àŋ naŋ gè wo Jisɛ̀ maŋ deèuŋ màŋ yèè àŋ nauŋ gɔ̀àì wɔŋ kùmà maŋ sɛ̀ìŋ tɔɔ. 29Kpeiŋ àŋ naŋ bàànè ke ɓɔ̀ɗì kana e jèì maŋ dɛiŋ, àŋ nauŋ nyiŋ jàà ɗì, yèè àŋ nauŋ hɔ̀ɔ̀ ke sèìŋ ko sìwè wɔŋ kùàŋ jìkauŋ nɔɔ̀ŋ. Àŋ naŋ dè maŋ gɛ̀ɛ̀nìŋ nyiŋ màŋ dììnaŋ ko fɛɛ̀fenùuŋ, yèè àŋ nauŋ tɔ̀ɔ̀tù hììle àŋ yaà woo nyààŋ, “Jòòwò wiìŋ, wo Kànà aŋ Juùù nyaŋ!” 30Àŋ nauŋ tùlìè maŋ sɔlɔ, yèè àŋ nauŋ ɓùlìè ke kùù e ɗì. 31Kpeiŋ nààŋ àŋ nauŋ naàŋ kpɛ̀ɛ̀yɛ̀ hììle, àŋ nauŋ gè wɔŋ kùmà e fɛ̀ɛ̀ maŋ sɛ̀ìŋ tɔɔɔ̀ yèè àŋ nauŋ gɔ̀àì maŋ dèè wɔŋ bi màŋ. Yèè àŋ nauŋ fulìè wèè aŋ kauŋ noò jìwìè wɔŋ vànèkpaaà diɛŋ.

Àŋ jìwà wo Jisɛ̀

(Mài 15.21-32; Luù 23.26-43; Jɔ̀ɔŋ 19.17-27)

32Nààŋ àŋ yaà wa kɔɔyɛ, àŋ naŋ mɛ̀ɛ̀ŋ wo felaa bà àŋ nyaaŋ Saimɔ̀ŋ e yìwìà ko Sàlinìŋ, yèè aŋ kààlòòɗùà nyaŋ nauŋ kùwò wèè wo koà wɔŋ vànèkpàà Jisɛ̀ɔ. 33Yèè àŋ naŋ hnè koɓɛ̀i àŋ nyaaŋ Gɔ̀ɔ̀gatɔ̀ lɛ, e fàsàì ke mìè yɛɛ̀ nàŋ yaà “Koɓɛ̀ maŋ ɗì kòkòi.” 34Kuii àŋ naŋ wa kàmè ɗewe wèè auŋ kìɛ̀ŋ maŋ juumuaŋ kàànè e gòò, kɛɛ nààŋ wo Jisɛ̀ naŋ miŋ wa wɔ̀ɔ̀, wo gò wa nyimèè wèè wo miŋ tìà.

35Kpeiŋ àŋ nauŋ kpùùnyɛ̀ŋ wɔŋ vànèkpaaà diɛŋ wèè auŋ jìwà, yèè àŋ naŋ gòònò maŋ deèuŋ màŋ e fèemàŋ nyiŋ nɛ̀. Àŋ naŋ dàà ke kpɔlɔ wèè aŋ yɛmɛ̀ sèè mààŋ kɛ̀ ɓòò nàŋ do wa nàŋ kɔ̀ɔ̀ maŋ dèè kɔɔuŋ màŋ. 36Eɓìèmàŋjɛ̀wɛ̀ tii, àŋ naŋ wa naàŋ jɛi wèè auŋ tuniàŋ. 37Àŋ naŋ wa kpùùnyɛ̀ŋ wɔŋ fɛ̀ì e tɔ̀ɔ̀màŋsèì ke sɔ̀ŋ yɛɛ̀ wɔŋ vànèkpaaà wo Jisɛ̀ diɛŋ nyààŋ, “Wo Jisɛ̀ wɛɛ̀, wo Kànà aŋ Juùù nyaŋ.” 38Ke ɗɔ̀ɔ̀ guùŋ yii, àŋ naŋ wa jìwìè aŋ nyùùŋ wùà tìyèe maŋ je nyiŋ vànèkpaa màŋ diɛŋ wo Jisɛ̀ kɔɔ. Wò guùŋ yàaùŋ wa wɔŋ kùàŋ jìka yèè wo bàa yàaùŋ wɔŋ kùàŋ gbɔnɔŋ.

39Anyuùŋ mààŋ dòmaŋ nyàŋ yɛmɛ̀ wa wo Jisɛ̀ aŋ mɛɛmɛ̀ɛ̀ŋ ɗì e kìlà auŋ wòò maŋ mìè ɓɛ̀ɛ̀pɔ̀ɔ nyààŋ, 40“Muàŋ mààŋ mɛ̀iŋ mùŋ do nàŋ gɔ̀ɛ̀ɛ̀ ke Saaŋ Zòòlò Dayàa yèè maŋ nyiŋ nyɛ̀lɛ̀ e gɔ̀ɛ̀ɛ̀ taai diɛŋ! Dè naàŋ muŋ fòlà wɔŋ vànèkpaaà diɛŋ muŋ joeyè muàŋ bi sèè mààŋ muàŋ nàŋ yaà wo Jɔ̀àfèlàà Dayàa!”

41Yɛi nɔŋ aŋ kànà sìèfèìŋ zòòlo nyàŋ yèè aŋ kààmɔ̀ɔ̀ŋ maŋ Sàwà Dayà nyaŋ yaà aŋ màmànkùmɛ̀ŋ fuɔɔ̀ŋ naŋ hììlè wo Jisɛ̀ nyààŋ, 42“Wò naŋ jòèyè anyuùŋ joo, kɛɛ wo fè ɓɛ̀nɛ̀ŋ wuŋ bi jòèye! Wuŋ nààŋ fè wò kànà Ezɔ̀ɛ̀ɔ? Sèè wò dè naàŋ sààmɛ e yìwìà wɔŋ vànèkpaaà diɛŋ, kɛ̀ èuŋ haawè! 43Wò naŋ tùlìè wo Dayà jii yèè wò naŋ ɓèmè wuŋ bi wèè wo nɔ̀ŋ wo Jɔ̀àfèlàà Dayàa. Weètii, yɛ̀mɛ̀ wiìŋ weè sèè mààŋ wò dò nàŋ mɔ̀nɔ̀ŋ wèè wouŋ joeyè.”

44Yèè anyùùŋ wùà tìyèe nyàŋ àŋ naŋ wa jìwìè maŋ vànèkpaa nyiŋ màŋ diɛŋ wo Jisɛ̀ kɔɔ nyàŋ nauŋ wòò maŋ mìè ɓɛ̀ɛ̀pɔ̀ɔ nyiŋ pɛɛ.

Wo Jisɛ̀ fɔ̀ɔ̀yɛ̀ wɔŋ vànèkpaaà diɛŋ

(Mài 15.33-41; Luù 23.44-49; Jɔ̀ɔŋ 19.28-30)

45E gɔɛɛ hàì ɗìò tɛɛ, e dììɛ wɔŋ fuɔɔ̀ŋ gbiŋ naŋ wa kùwò nyìwì. Ke nyìwìɛ nao wa nɔ̀ŋ wèè e hààwà taai. 46E tèèngà e gɔɛɛ gbòà taaà diɛŋ wo Jisɛ̀ naŋ kpààŋ sɛiŋ yèè wò naŋ wòò wɔŋ kanùuŋ nɔɔ̀ŋ sùà wààŋ, “Ìlɔì, Ìlɔì, làmaŋ sàɓàtanìŋ?” E fàsàì tɛɛ̀ nàŋ yaà, “Dayà miɔ̀ŋ, Dayà miɔ̀ŋ, wèè kiìŋ mùŋ naim gììyè kɛ̀ɛ?”

47Yèè anyùùŋ nyaŋ bà nyiŋ nao wa gbɛ̀ɛ̀ nyaŋ naŋ tɛɛ̀ kòmò, àŋ gò niŋ wa kòmàŋ tɛ̀ɛ̀ yèè àŋ naŋ woò nyààŋ, “Kùmiaŋ nùuŋ weè, wò yaà nyììnyɛ̀ŋ wo Ìlaajà!” 48Kpeiŋ wo bà guùŋ naŋ dùɔ̀ŋ wo ɓèmè ebɛì yɔuyɔ̀ù fàà, wo niŋ hòà maŋ muàŋ keekèè sùà, yèè wò naŋ niŋ hɔ̀ɔ̀ ke kùù. Wò naŋ niŋ jòòwò fùùŋ wo niŋ jàà wo Jisɛ̀ nyaàŋ kɔɔ wèè wo nyɛ̀nɛ̀ŋ wo tìà niŋ.

49Kɛɛ aŋ bà nyiŋ naŋ wa woò nyààŋ, “Dànge nùuŋ weè! Yɛ̀mɛ wììŋ sèè mààŋ wò Ìlaajà yaà hinie wèè wouŋ joeyè.”

50Wo Jisɛ̀ naŋ ɓɛìŋ kpààŋ sɛiŋ, yèè wò naŋ mìè wɔŋ nyiiuŋ nɔɔ̀ŋ.

51Tɛɛ̀ naŋ nɔŋ kaaìŋ fa, wɔŋ dèè saaŋ yɛmgbɛ̀ gbeeɔ̀ sɛ̀ɛ̀ wa ko Saaŋ Zòòlò Dayài wɔ̀ŋ naŋ sɛ̀ɛ̀ tɛɛ fàà tìyèe, e yìwìà ko diɛìŋ e hàì ko dìlìi. E dììɛ naŋ gbiinè, yèè maŋ dùò maŋ naŋ sɛ̀ɛ̀sɛ̀ɛ̀ maŋ fàà. 52Maŋ hùaŋ màŋ naŋ wa yilè, yèè maŋ kpùnàŋ anyùùŋ nɛɛmaŋ nyàŋ zimgbe nyiŋ naŋ wa fɔ̀ nyaŋ naŋ yèwè e fàaà dìì maŋ nyiiŋ gèe sùà. 53Nààŋ àŋ naŋ wa fòlò maŋ hùaŋ nyiŋ màŋ sùà, e teengaà wo Jisɛ̀ naŋ wa yèwè e fàaà dìì wɔŋ nyiiŋ gèeo sùà lɛ, àŋ naŋ wa kɔ̀ ko Jùlusɛ̀làm, ko Jàwà Nɛɛmaŋ Gbeeì, ko yèi anyuùŋ zimgbe naŋ nyiŋ wa yɛmɛ̀ lɛ.

54Nààŋ wo kànà aŋ kààlòòɗùà nyaŋ yaà aŋ kààlòòɗùàuŋ nyàŋ siao wa ko tùnìè Jisɛ̀ nyaŋ naŋ yɛ̀mɛ̀ e dììɛ naŋ kìlè yèè maŋ keì maŋ gbiŋ yaà wa kaaiŋ màŋ, e jùù naŋ nyiŋ wa nyɛ̀nɛ̀ŋ yèè àŋ naŋ woò nyààŋ, “E tɔɔɓaa le, wo felaa wɛɛ̀ nàŋ yaà mɛ̀iŋ wo Jɔ̀àfèlàà Dayàa!”

55Aŋ jɔùŋ nyùùŋ zimgbe bà sia wa fauŋ àŋ yaào yɛɛmɛ. Aŋ jɔùŋ bi naŋ wa dè wo Jisɛ̀ maŋjɛ̀wɛ̀ e yìwìà ko Galaliì yèè àŋ yàùŋ wa kpuumo. 56Aŋ jɔùŋ bi tɛɛ wo Mèèle e yìwìà ko jawaì àŋ nyaaŋ Màŋdalà, wo Mèèle wo nààŋ Jìiiɔ̀ŋ yèè wo Jòòsɛ, yaà wo nààŋ aŋ jɔ̀àfèlàà Zɛɓɛdiì nyaŋ yaào wa.

Àŋ sìà wo Jisɛ̀

(Mài 15.42-47; Luù 23.50-56; Jɔ̀ɔŋ 19.38-42)

57E koya lii wo kenàŋ bàne bà àŋ nyaaŋ wo Jòòsɛ e yìwìà ko jawaì àŋ nyaaŋ Àlòmatià, wo nyùùŋ maŋjɛ̀wɛ̀ Jisɛ̀ɔ bà guùŋ, 58naŋ kɔ̀ ko fɛ̀ɛ̀fèìŋ wo kanaà Paalè yèè wò nauŋ hùmò e dìè Jisɛ̀ɛ. Wo Paalè naŋ nyimèè yèè wò naŋ wòò wo kànà aŋ kààlòòɗùà nyaŋ wèè wo fè wo Jòòsɛ e dieɛ̀. 59Kpeiŋ wo Jòòsɛ naŋ dèèyè e dieɛ̀ e yìwìà wɔŋ vànèkpaaà diɛŋ, wo niŋ kpènèkpènè wɔŋ kasange jɛi zɛ̀nɛŋ sùà, 60yèè wò naiŋ hèè ke dùòɛ sùà ke yèɛ àŋ naŋ tòmò sùà wèè ke nɔ̀ŋ ke hùaàŋ wèè wuŋ bi lɛ̀. Kpeiŋ wò naŋ ngèèngèè wɔŋ duò fàà gbee ke hùaàŋ nyɛmgbɛ̀ yèè wò naŋ kɔ̀. 61Wo Mèèle e yìwìà ko jawaì àŋ nyaaŋ Màŋdalà yaà wo Mèèle wo nààŋ Jòòsɛɔ̀ jaa wa àŋ yaà yɛ̀ɛ̀mɛ̀ koɓɛ̀ ke hùaàŋ àŋ naŋ wa hèè wo Jisɛ̀ sùà lɛ.

Àŋ sèèlè aŋ kààlòòɗùà ke hùàŋ Jisɛ̀ɛ kɔɔ

62Wɔŋ niìsìaà bàa ke Ɗɔ̀ɔ̀ Zòòlò aŋ Juùù nyaŋ diɛŋ, aŋ kànà sìèfèìŋ zòòlo nyàŋ yèè aŋ Fɛlosiì nyaŋ naŋ kɔ̀ wo Paalè ko fɛɛ̀feìŋ 63àŋ nauŋ woò nyààŋ, “Kanaà, èiŋ jààejii kɛ̀ wo felaa tòa wii naŋ mɛ̀iŋ woò e teengaà wò yaà wɔŋ nyiiŋ gèeɔ̀ sùà lɛ wààŋ, ‘Mìŋ do nàŋ yèwè e fàaà dìì wɔŋ nyiiŋ gèe sùà sèè e gɔ̀ɛ̀ɛ̀ taai è maaŋ.’ 64Weètii, gè wi nyààŋ diɛŋ wèè e yɛmɛ̀ ke hùauŋ nɛɛ̀ŋ diɛŋ e jeesùà e gɔ̀ɛ̀ɛ̀ taaà e mààŋ, wèè kɛ̀ anyùùŋ màŋjɛ̀wɛ̀uŋ nyàŋ go nàŋ hnè aŋ wùà e dieuŋ nɛ̀, kpeiŋ aŋ wòò anyùùŋ nyaŋ nyààŋ wò yèwà e fàa dìì. E tòaà e yè tɛɛ̀ do ngèè nàŋ dɛ̀ɛ̀ sùà e nìàŋ e jiɛ̀jiɛ̀ɛ.” 65Wo Paalè naŋ nyiŋ woò wààŋ, “Ɓèmeìŋ aŋ kààlòòɗùà nyaŋ bà, niŋ ka niŋ yɛmɛ̀ nyiŋ diɛŋ màànààŋ è kanaŋ lɛ̀.”

66Kpeiŋ àŋ naŋ kɔ̀ aŋ jìà ke hùaàŋ kùàŋ fee nyiŋ, wèè kɛ̀ sèè wo nyùùŋ mɛnlɛ̀ɛ̀ŋ nyiìŋ aŋ nyìmàŋ, yèè àŋ nao jòò aŋ kààlòòɗùà wèè aŋ tuniàŋ nyiŋ.

Currently Selected:

Maafiù 27: WFESD

Highlight

Copy