Maafiù 28

Wo Jisɛ̀ yèwà fàa dìì wɔŋ nyiiŋ gèeo sùà

(Mài 16.1-10; Luù 24.1-12; Jɔ̀ɔŋ 20.1-10)

1Nààŋ ke Ɗɔ̀ɔ̀ Zòòlò aŋ Juùù nyaŋ naŋ mààŋ, ke ɗɔɔ jiɛ̀jiɛ̀ɛ ke wikìɛ sùà ebɛ̀ŋ wɔŋ niìsìaà maŋ nyiìŋ tɛ̀tɛ̀, wo Mèèle e yìwìà ko jawaì àŋ nyaaŋ Màŋdalà yèè wo Mèèleɔ̀ bàa naŋ kɔ̀ koɓɛ̀ ke hùaàŋ wèè aŋ yɛmɛ̀o. 2E bìao sùà e dììɛ naŋ kìlè. Yèè wo màìkà Kanaà Dayà naŋ dèyè e yìwìà ko àìjɛnɛ̀ŋ wò naŋ dùlò ke dùòɛ wo nyiŋ gè ke hùaàŋ yɛmgbɛ̀ yèè wò naŋ nyiŋ jɛ̀ì diɛŋ. 3Wɔŋ dèwà màikàa mɛɛŋ wa mààŋ ko fuùŋ gɛ̀ɛ, maŋ dèè kɔɔuŋ màŋ foo wa pepe e nìàŋ wɔŋ fɛmgbɛ. 4E jùù naŋ wa nyɛ̀nɛ̀ŋ aŋ kààlòòɗùà nyaŋ yaà wa tùniaŋ sùà ke hùaàŋ nyaŋ, àŋ gè jèla kpàkpà nààŋ àŋ naŋ wa yɛ̀mɛ̀ e nɛ̀ɛŋ naŋ wa kaaìŋ lɛ yèè àŋ naŋ guùŋ nɔ̀ŋ mààŋ anyùùŋ naŋ fɔ̀.

5Kpeiŋ wo màikàa naŋ wòò aŋ jɔùŋ nyaŋ wààŋ, “E jùù ɓɔ̀ è nyɛ̀nɛ̀iŋ. Kà nyìmàŋ kɛ̀ nìŋ yaà kààmè wo Jisɛ̀, wo yèɔ àŋ naŋ daai jìwìyè wɔŋ vànèkpaaà diɛŋ wɔ̀. 6Wo fè kià. Wo Dayà wòuŋ gè e fàaà dìì wɔŋ nyiiŋ gèeɔ̀ sùà, màànààŋ nɔŋ wò naiŋ wa woò lɛ. Hnàaìŋ niŋ yɛmɛ̀, kià àŋ nauŋ daai heè. 7Kɛɛ kɔ̀aìŋ naàŋ fiò niŋ gbaì anyùùŋ màŋjɛ̀wɛ̀uŋ nyàŋ jii kɛ̀, wo Dayà wòuŋ gè e fàaà dìì, kòò wò yààìŋ kɔ̀ɔ̀yɛ̀ ko feìŋ ko Galaliì. Kuŋ nìŋ douŋ nàŋ yɛmɛ̀! Jàaìŋ e yèɛ mìŋ naiŋ woò lɛ jii.”

8Yèè àŋ naŋ kɔ̀ maŋ dùaŋ dùaŋ e yìwìà koɓɛ̀ ke hùaàŋ. Jòòpɛɛ e jùù yaà nyiìŋ wa, kɛɛ maŋ jii nyiŋ màŋ naŋ wa dìè e zɔlɔ̀, àŋ naŋ dùɔ̀ŋ wèè aŋ ka aŋ woò ebò lɛɛ̀ koɓɛ̀ anyùùŋ màŋjɛ̀wɛ̀uŋ nyàŋ.

9E bìao sùà wo Jisɛ̀ naŋ nyiŋ mɛɛ̀ŋ yèè wò naŋ nyiŋ zuumò. Àŋ naŋ hnè ko nɛ̀ɛ̀uŋ niìŋ auŋ gbùwò gòlò dìì, yèè àŋ nauŋ zoolò. 10Wo Jisɛ̀ naŋ nyiŋ woò wààŋ, “E jùù ɓɔ̀ è nyɛ̀nɛ̀iŋ. Kɔ̀aìŋ niŋ woò aŋ wùìyaim nyàŋ kɛ̀ aŋ ka ko Galaliì, kuŋ àŋ doim nàŋ yɛmɛ̀.”

Ke jìì gbàì aŋ kààlòòɗùà nyaŋ

11Nààŋ aŋ jɔùŋ nyaŋ yaà wa naàŋ kɔɔyɛ, aŋ kààlòòɗùà nyaŋ bà aŋ yè nyaŋ yaà wa tùnìè ke hùaàŋ nyaŋ naŋ kɛ̀ɛ̀ maŋjɛ̀wɛ ko jawa gbeeì yèè àŋ naŋ niŋ gbàì aŋ kànà sìèfèìŋ zòòlo nyàŋ jii e nyaàiŋ dè e yèɛ gbiŋ naŋ kaaìŋ lɛ. 12Aŋ kànà sìèfèìŋ zòòlo nyàŋ naŋ mɛ̀ɛ̀ŋ aŋ màmànkùmɛ̀ŋ fuɔɔ̀ŋ e dèène sùà yèè àŋ naŋ kɛ̀ɛ̀nɛ̀ŋ e ɗèwe, e kìlà àŋ naŋ kìɛ̀ŋ aŋ kààlòòɗùà nyaŋ e nɛɛnɛŋ kpɔɔ̀ ke gòò dùùm sùà 13yèè àŋ naŋ nyiŋ woò nyààŋ, “Wòoìŋ anyùùŋ nyaŋ nààŋ, ‘Anyùùŋ màŋjɛ̀wɛ̀uŋ nyàŋ naŋ hnè e dùùm àŋ naŋ wùò e dieɛ̀ e teengaà è yààìŋ maŋ jàwè lɛ.’ 14Yèè sèè wo kànà fuɔɔ̀ŋ kòmò niìŋ, è do niŋ nàŋ kìlè e nɔ̀ŋ tɔ̀ɔ̀nyaàŋ ko nɛ̀ɛ̀uŋ niìŋ wèè niŋ gò nàŋ kɔ̀ è mɔ̀ɔ̀nɛŋ gbiŋ dìì.”

15Aŋ kààlòòɗùà nyaŋ naŋ ɓèmè e nɛɛnɛɛ̀ŋ yèè àŋ naŋ nyɛ̀nɛ̀ŋ e yèɛ àŋ naŋ nyiŋ woò wèè aŋ nyɛ̀nɛ̀ŋ lɛ. Ke kàɓanè yɛɛ̀ naŋ nɔ̀ŋ ɓààye nyiŋ aŋ Juùù nyaŋ gbiŋ tɛɛ e teenga lii e hàì ke ɗɔɔ yɛɛ̀ nàaŋ.

Wo Jisɛ̀ fòlà anyùùŋ màŋjɛ̀wɛ̀uŋ nyàŋ feìŋ

(Mài 16.14-18; Luù 24.36-49; Jɔ̀ɔŋ 20.19-23; Nyɛ̀nɛ̀ŋ 1.6-8)

16Anyùùŋ màŋjɛ̀wɛ̀ zììyà jɛ̀wɛ̀ guùŋ nyaŋ naŋ kɔ̀ ko Galaliì, koɓɛ̀ wɔŋ toò gbeeɔ̀ wo Jisɛ̀ naŋ nyiŋ tɔɔ̀ kɛ̀ àŋ douŋ nàŋ mɛɛ̀ŋ lɛ. 17Yèè nààŋ àŋ nauŋ yɛmɛ̀, àŋ nauŋ gbùwò gòlòò dìì yèè àŋ nauŋ zoolò, jòòpɛɛ aŋ bà nyiŋ gò niŋ wa haawè kɛ̀ wò Jisɛ̀ wuŋ bi wo. 18Wo Jisɛ̀ naŋ nyiŋ bɔ̀mɔ̀ŋ kɔɔ wò naŋ nyiŋ woò wààŋ, “E gààaŋ gbiŋ ko àìjɛnɛ̀ŋ yèè e ɗuunyaàŋ è nɔ̀ŋ kìɛŋ niŋ ko nɛ̀ɛ̀ŋ miìŋ. 19Weètii, kɔ̀àaìŋ koɓɛ̀ anyùùŋ nyaŋ gbiŋ e ɗuunyaàŋ niŋ nyɛ̀nɛ̀ŋ nyiŋ aŋ nɔ̀ŋ anyùùŋ màŋjɛ̀wɛ̀im. Gùaìŋ nyiŋ e dèè Dèdaà diɛŋ, wo Jɔ̀àfelaaà, yèè wo Jìnàŋ Nɛɛmaàŋ, 20e kìlà niŋ kaà nyiŋ wèè aŋ jɔɔlɔ̀ e yèɛ gbiŋ mìŋ naiŋ kaà lɛ dìì. Yèè mìŋ doiŋ nàŋ nɔ̀ŋ maŋjɛ̀wɛ e teenga gbiŋ, e jèesùà e hàì ko dìà e ɗuunyaàŋ.”

Currently Selected:

Maafiù 28: WFESD

Highlight

Copy