Maafiù 26

Anyùùŋ gbèègbèè aŋ Juùù nyaŋ naŋ ɗewè wèè aŋ jìwà wo Jisɛ̀

(Mài 14.1, 2; Luù 22.1, 2; Jɔ̀ɔŋ 11.45-53)

1Nààŋ wo Jisɛ̀ naŋ wa kpɛ̀ɛ̀yɛ̀ maŋ keì mɛɛ̀ŋ gbiŋ kàa, wò naŋ wòò anyùùŋ màŋjɛ̀wɛ̀uŋ nyàŋ wààŋ, 2“Nàŋ nyìmàŋ kɛ̀ maŋ ɗɔ̀ɔ̀ tìyèe naŋ joo wèè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ wɔŋ haì,#26.2 Ɗaa Gèe Hɔ̀ɛ̀ɛ̀ŋ Diɛɔ̀ŋ Wɔŋ ɗàà zɔ̀lɔ̀ gè aŋ Hiɓulù nyaŋ e nyaàiŋ dè ke ɗɔɔɛ̀ wo màikàa naŋ wa nììnyè maŋ saaŋ màŋ àŋ naŋ wa jìè maŋ sɛ̀ìŋ maŋ aŋ Hiɓulù nyaŋ yaà wa dìì maŋ wèè wo nyiŋ joeyè, yèè wò naŋ wa jìwè aŋ jɔ̀à kòmàŋ jìɛ̀jìɛ̀ aŋ nyùùŋ Ijè nyaŋ maŋ saaŋ nyiŋ màŋ dìì. e kìlà àŋ do nàŋ kìlè miàim wo Jɔ̀àfèlàà Nyuùŋ Kpùnɔɔ̀ŋ koɓɛ̀ anyùùŋ nyaŋ wèè aim jìwà.”

3Kpeiŋ aŋ kànà sìèfèìŋ zòòlo nyàŋ yaà aŋ màmànkùmɛ̀ŋ fuɔɔ̀ŋ naŋ dèènè koɓɛ̀ guùŋ ko jɔ̀ɔ̀lègbèè ko gbòò Kaifɔ̀, wo Kànà Sìèfeìŋ Zòòlo Gbeeɔ̀. 4Kuŋ àŋ naŋ wa ɗewè wèè aŋ kùwà wo Jisɛ̀ mɔ̀ɔ̀ŋ wèè auŋ jìwà. 5Kɛɛ àŋ naŋ wa wòo nyààŋ, “Ɓɔ̀ è nyinìàiŋ niŋ è tèèngà wɔŋ ɗaa geɔ̀ sùà, sèè è nyɛnɛŋ yɛi, anyùùŋ nyaŋ do nàŋ dàà ke gùuŋ.”

Wo nìe bà naŋ gɔ̀àà wo Jisɛ̀ maŋ kuùmàì ɗì ko Bɛfenè

(Mài 14.3-9; Jɔ̀ɔŋ 12.1-8)

6Wo Jisɛ̀ yaà wa ko Bɛfenè ko gbòò Saimɔ̀ŋ, wo kenàŋ bà wo yèɔ kuwa wa weè e sààŋ maŋkùnù wɔ. 7E teengaà wo Jisɛ̀ yaà wa jììyè nɛ̀ŋ lɛ, wo nìe bà naŋ hnè ko nɛ̀ɛ̀uŋ niìŋ wo hìnyàŋ e sàiŋ bàànè e dùò bà àŋ nyaaŋ àlàbasità è naŋ dìè maŋ kuùmàì. E ɓàà maŋ kuùmàì mɛɛ̀ŋ naŋ wa gàŋ zimgbe. Wo nìeɔ̀ naŋ yìlè e sàiŋ nɛ̀ yèè wò naŋ gɔ̀àì maŋ kuùmàì maŋ wo Jisɛ̀ e ɗì. 8Anyùùŋ màŋjɛ̀wɛ̀ Jisɛ̀ nyaŋ naŋ wa tɛɛ̀ yɛmɛ̀ yèè àŋ naŋ tùù wo nìeɔ̀ sìwè. Yèè àŋ naŋ dawè nyààŋ, “Kiìŋ naŋ gè maŋ kuùmàì maŋ pɔ̀ɔ̀pɔɔ? 9Wò miŋ weè ɓɛ̀nɛ̀ŋ màaŋ wo yɛ̀mɛ̀ e nɛɛnɛŋ sɛmɛ yèè wo niŋ kìɛ̀ŋ koɓɛ̀ anyuùŋ pɔ̀ɔ nyàŋ!”

10Wo Jisɛ̀ wa nyìmàŋ kɛ̀ kiìŋ àŋ yaà wa woo, kpeiŋ wò naŋ nyiŋ woò wààŋ, “Wèè kiìŋ nìŋ yaà mɔ̀ɔ̀nɛŋ sùà wo nìe wɛɛ̀? Wò naŋ nyɛ̀nɛ̀ŋ e keì siaŋ sìàŋ e weèim. 11Anyuùŋ pɔ̀ɔ nyàŋ doiŋ nàŋ nɔ̀ŋ e tɛɛ e teengaà gbiŋ, kɛɛ miàŋ mìŋ naìŋ nɔ̀ŋ è tɛɛ è teengaà gbio sùà. 12E nɛ̀ɛŋ wo nìeɔ̀ naŋ nyɛ̀nɛ̀ŋ lɛ nàŋ yaà kɛ̀, wò naŋ gɔ̀àì maŋ kuùmàì mɛɛ̀ŋ ke kpùnaŋ miɛ̀ŋ wèè woim banebànè pangàà e tèèngà sìa mɛ̀ e haì. 13Mìŋ woòiŋ e tɔɔɓaaà, kɛ̀ koɓɛ̀i gbiŋ àŋ do nàŋ wòò ke mìè gbìàŋ Ebò Siaŋ lɛɛ̀ e ɗuunyaŋ lɛɛ̀ dìì lɛ, ebò wo nìe wɛɛ̀ doo nàŋ haì wèè e nɛ̀ɛŋ wò naŋ nyɛ̀nɛ̀ŋ lɛ wèè auŋ jààèjii.”

Wo Juɗà nyimèè wèè wo maàŋ Jisɛ̀

(Mài 14.10, 11; Luù 22.3-6)

14Kpeiŋ wo Juɗà Àkaaliɔ̀, anyùùŋ màŋjɛ̀wɛ̀ zììyà jɛ̀wɛ̀ tìyèe nyàŋ bà guùŋ, naŋ kɔ̀ koɓɛ̀ aŋ kànà sìèfèìŋ zòòlo gbee nyàŋ, 15yèè wò naŋ nyiŋ dawè wààŋ, “Kiìŋ nìŋ doim nàŋ kiɛ̀ŋ sèè mìŋ maàŋ wo Jisɛ̀ ko nɛ̀ɛ̀iŋ niìŋ?” Àŋ naŋ kpɛ̀nɛ̀ŋ e kaiŋ fua nɛɛnɛŋ kpɛ̀ɛ̀ùŋ guùŋ jɛ̀wɛ̀ zììyà yèè àŋ naŋ niŋ kìɛ̀ŋ wo Juɗà. 16Yèè e yìwìà e teenga lii sùà wo Juɗà naŋ wa tɔ̀ɔ̀tù e ɗewe kàme wèè wo kìlà wo Jisɛ̀ ko nɛ̀ɛ̀ŋ nyiŋ niìŋ.

Wo Jisɛ̀ yèè anyùùŋ màŋjɛ̀wɛ̀uŋ nyàŋ jè e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ

(Mài 14.12-21; Luù 22.7-13, 21-23; Jɔ̀ɔŋ 13.21-30)

17Ke ɗɔɔ jiɛ̀jiɛ̀ɛ wèè wɔŋ Ɗàà Gè Gbɔ̀u Gò Jòwàa, anyùùŋ màŋjɛ̀wɛ̀ Jisɛ̀ nyaŋ naŋ hnè ko nɛ̀ɛ̀uŋ niìŋ yèè àŋ nauŋ dawè nyààŋ, “Kòò mùŋ manaŋ wèè eiŋ ka eiŋ bànèbànè e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ weèum?”

18Kpeiŋ wo Jisɛ̀ naŋ tùɔ̀ŋ anyùùŋ màŋjɛ̀wɛ̀uŋ nyàŋ koɓɛ̀ wo felaa bà ko jawa gbeeì wèè aŋ woòuŋ nyààŋ, “Wo Kààmɔɔŋ wààŋ, ‘E teenga mɛ̀ è haì! Mìŋ manaŋ miàŋ yèè anyùùŋ màŋjɛ̀wɛ̀im nyàŋ eiŋ jììyè e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ ko gboo moo.’ ”

19Anyùùŋ màŋjɛ̀wɛ̀ nyaŋ naŋ yèwè dìì, aŋ kà ko jawaì, yèè àŋ naŋ nyɛ̀nɛ̀ŋ e yèɛ wo Jisɛ̀ naŋ nyiŋ woò lɛ, yèè àŋ nao bàànè e nɛ̀ŋjè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ.

20Nààŋ e koya naŋ wa haì, wo Jisɛ̀ yèè anyùùŋ màŋjɛ̀wɛ̀ zììyà Jɛ̀wɛ̀ tìyèeuŋ nyàŋ naŋ jɛi wèè aŋ jènɛ̀ŋ. 21E teengaà àŋ yaà wa jììyè nɛ̀ŋ lɛ, wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Miŋ woòiŋ e tɔɔɓaaà kɛ̀ nyɛ̀iŋ nyɛɛ̀ŋ bà guùŋ doim nàŋ maàŋ.”

22Anyùùŋ màŋjɛ̀wɛ̀uŋ nyàŋ naŋ wa nɔ̀ŋ ɗoomɛɛŋ, yèè àŋ nauŋ kùùnò dàwe, guùŋ guùŋ nyààŋ, “Tɔɔɓaa Kanaà muŋ sɔ̀ɔ̀ìm kàai?”

23Wo Jisɛ̀ naŋ nyiŋ woò wààŋ, “È do nàŋ nɔ̀ŋ nyɛ̀iŋ nyɛɛ̀ŋ bà guùŋ. Yàwiuŋ tìyèe kòò è yaà jììyè nɛ̀ŋ ko gɛ̀ì gunìiŋ. 24Miàim wo Jɔ̀àfèlàà Nyuùŋ Kpùnɔɔ̀ŋ do nàŋ fɔ̀ màànààŋ nɔŋ è yaà sìnga niŋ wɔŋ fɛ̀ì Dayàa sùà e nyaàiŋ eim dè. Kɛɛ diè e keì nyìnga do yɛi nàŋ nɔ̀ŋ wèè wo nyùnɔ̀ɔŋ do nàŋ mààŋ miàim wo Jɔ̀àfèlàà Nyuùŋ Kpùnɔɔ̀ŋ le! È hewa weè nàŋ nɔŋ tɛ̀ɛ̀ weèuŋ sèè wo nààŋ gouŋ wa weè komàŋ gbiŋ!”

25Yèè wo Juɗà, wo yèɔ naŋ wa mààŋ wo Jisɛ̀ wɔ naŋ woò wààŋ “Tɔɔɓaa Kààmɔɔŋ muŋ sɔ̀ɔ̀ìm kàai?”

Yèè wo Jisɛ̀ naŋ fasàì wààŋ, “Yɛi mùŋ naŋ woò!”

E nɛ̀ŋje dìàmaàŋ wèè wo Kanaà

(Mài 14.22-26; Luù 22.14-20; 1Kɔ 11.23-25)

26E teengaà àŋ yaà wa jììyè nɛ̀ŋ lɛ, wo Jisɛ̀ naŋ ɓèmè ke gbɔ̀u. Wò naŋ kìɛ̀ŋ e zòòlò ke sɛ̀ gèe weè nyiŋ. Kpeiŋ wò naŋ nyiŋ nyime nyìmè nyɛ̀ɛ̀nyɛ̀ɛ̀, yèè wò naŋ nyiŋ kìɛ̀ŋ anyùùŋ màŋjɛ̀wɛ̀uŋ nyàŋ. Wò naŋ woò wààŋ, “Kùwaìŋ nyiŋ yèè niŋ gbìlà, kɛɛ̀ nàŋ yaà ke kpùnaŋ miɛ̀ŋ.”

27E kìlà wò naŋ ɓèmè wɔŋ kpòò dìà maŋ tala muaŋ, wò naŋ gè wo Dayà sɛ̀, yèè wò naŋ nyiŋ wuŋ kiɛ̀ŋ. Wò naŋ nyiŋ woò wààŋ, “Tìaìŋ miŋ nyɛ̀iŋ nààŋ gbiŋ. 28Maŋ sɛnìim màŋ mɛɛ̀ŋ, maŋ yè maŋ naŋ hèè e fèè e ɗààhìì e mìèsùàguùŋ, maŋ yè maŋ naŋ nɔ̀ŋ wùaŋ miŋ wèè wo Dayà juuyà maŋ jùumùiŋ màŋ hakɛ̀. 29Miŋ woòiŋ e tɔɔɓaaà, e yìwìà nàaŋ, julɔfɔ miŋ naàŋ ɓɛìŋ tìè màŋ tala muaŋ gbiŋ e jèèsùà e hàì ke ɗɔɔɛ̀ mìŋ do nàŋ tìè maŋ tala muaŋ jɛi màŋ e Kànà Dèda miɔ̀ŋ sùà lɛ.”

30Kpeiŋ àŋ naŋ dàà wɔŋ nùŋ guùŋ yèè àŋ naŋ kɔ̀ koɓɛ̀ wɔŋ tòò maŋ Ɔlè Kùùɔ.

Wo Jisɛ̀ wààŋ wo Pììlɛ douŋ nàŋ gììyè maŋhɛɛ ko dòmàŋfeìŋ

(Mài 14.27-31; Luù 22.31-34; Jɔ̀ɔŋ 13.36-38)

31Kpeiŋ wo Jisɛ̀ naŋ nyiŋ woò wààŋ, “Nyɛ̀iŋ nààŋ gbiŋ nìŋ do nàŋ dùɔ̀ŋ naim jòà wɔŋ dùùm guùŋ wɛɛ̀ŋ, esaɓù è yaà sìnga niŋ wɔŋ fɛ̀ì Dayàa sùà kɛ̀, ‘Wo Dayà do nàŋ jìwè wo nyuùŋ tùnìàŋ aŋ ɓaawaa nyàŋ, yèè ke gbòò aŋ ɓaawaa nyàŋ gbiŋ do nàŋ ɓaayè.’ 32Kɛɛ e teengaà mìŋ do nàŋ yèwè e fàaà dìì wɔŋ nyiiŋ gèe sùà lɛ, mìŋ doiŋ nàŋ kɔ̀ feìŋ ko Galaliì.”

33Wo Pììlɛ naŋ gbòò yèè wò nauŋ woò wààŋ, “Julɔfɔ miŋ naùm kɛ̀ɛ̀ màŋjɛ̀wɛ, sèè pɛɛ anyuùŋ gbànaŋ nyàŋ aum jòà!”

34Wo Jisɛ̀ naŋ wòò wo Pììlɛ wààŋ, “Miŋ woòum e tɔɔɓaaà kɛ̀ wèè paŋ wo tɔɔ wowoɔ̀ kolèè wɔŋ dùùm wɛɛ̀ŋ, mùŋ do nàŋ gè maŋhɛɛ sùà taai kɛ̀ muŋ nyimààìm.”

35Kɛɛ wo Pììlɛ naŋ ɓɛìŋ fasàì wààŋ, “Miŋ naàŋ tii woò julɔfɔ, sèè è tɛɛwɛ̀ pɛɛ wèè yàwuum e fɔ̀ɔ̀yɛ̀ koɓɛ̀ guùŋ!”

Yèè anyùùŋ màŋjɛ̀wɛ̀ gbànaŋ nyàŋ gbiŋ naŋ wòò e kèì guùŋ bi.

Wo Jisɛ̀ naŋ zoolò koɓɛ̀i àŋ nyaaŋ Gɛ̀sɛmɛ̀nìŋ lɛ

(Mài 14.32-42; Luù 22.39-46)

36Kpeiŋ wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ kɔ̀ koɓɛ̀ bà àŋ nyaaŋ ko Gɛ̀sɛmɛ̀nìŋ, yèè wò naŋ nyiŋ woò wààŋ, “Jɛ̀ìyiìŋ kià miŋ ka miŋ zoolò.” 37Wò naŋ kɔ̀ɔ̀ wo Pììlɛ, yèè aŋ jɔ̀àfèlàà Zɛɓɛdiì nyaŋ àŋ tìyèe maŋjɛ̀wɛuŋ. Ke jìì sɛ̀ɛ̀ e keì nyìnga yèè e gòngo gbee nauŋ sɛ̀ɛ̀ sùà, 38yèè wò naŋ nyiŋ woò wààŋ, “Ke nyowoɛ̀ wɔŋ nyììŋ jinàŋ miɔ̀ŋ sùà naŋ dɛɛ̀ zimgbe e sɔ̀ngɔ̀ kèim ɓɛ̀nɛ̀ŋ jìwa. Jòoìŋ kià yèè niŋ nɔ̀ŋ e fɛɛ̀ wòwò.”

39Wò naŋ ɓɛìŋ bɔ̀mɔ̀ŋ ko fènòo tòloò, wo dè maŋ gɛ̀ɛ̀ŋ nùuŋ màŋ dììnaŋ wo gbùwà wɔŋ feìŋ ko dììnaŋ, yèè wò naŋ zoolò wààŋ, “Dèda miɔ̀ŋ, sèè è naŋ ɓɛ̀nɛ̀ŋ hɛ̀ɛ̀nɛŋ, kɛ̀ gìim wɔŋ kpòò è keì nyìnga wɛɛ̀ŋ diɛŋ. Kɛɛ miŋ sɔ̀ɔ̀ è yèɛ mìŋ manaŋ lɛ̀, kɛɛ è yèɛ muàŋ mùŋ manaŋ lɛ̀.”

40Yèè wò naŋ kɛ̀ɛ̀ koɓɛ̀ anyùùŋ màŋjɛ̀wɛ̀ taai nyàŋ, kɛɛ wò naŋ nyiŋ mɛɛ̀ŋ àŋ yaà maŋ jàwè. Kpeiŋ wò naŋ wòò wo Pììlɛ, wààŋ, “Niŋ fè weè pɛɛ ɓɛ̀nɛ̀ŋ nɔ̀ŋ è fɛɛ̀ wòwò yàwiiŋ wèè è teenga kpuu? 41Yɛ̀mɛìŋ nyɛ̀iŋ bi diɛŋ, yèè niŋ zoolò wèè e wàà e keì nyìnga goiŋ nàŋ hnè feìŋ. Kà nyìmàŋ kɛ̀ nìŋ manaŋ naŋ nyɛ̀nɛ̀ŋ e yèɛ yaà tɛ̀ɛ̀ lɛ, kɛɛ niŋ fè niŋ ɓɛ̀nɛ̀ŋ nyɛ̀nɛŋ è gààŋ è kèìŋ nyuùŋkpùuŋ nɛ̀ sùà.”

42Wo Jisɛ̀ naŋ ɓɛìŋ kɔ̀ wo zoolò wààŋ, “Dèda miɔ̀ŋ, sèè mààŋ wɔŋ kpòò e keì nyìnga wɛɛ̀ŋ wɔŋ fèim ɓɛ̀nɛ̀ŋ kɔ̀ɛ̀ɛ̀ diɛŋ sɔɔ̀ nɔŋ ka wɔŋ tììyà sùà, kɛ̀ tɔ̀ e yèɛ mùŋ manaŋ lɛ̀ e hɛɛnɛ̀ŋ.” 43Wò naŋ ɓɛìŋ kɛ̀ɛ̀ maŋjɛ̀wɛ koɓɛ̀ anyùùŋ màŋjɛ̀wɛ̀ nyaŋ yèè wò naŋ nyiŋ mɛɛ̀ŋ àŋ yaà maŋ jàwè. Aŋ fè wa ɓɛ̀nɛ̀ŋ nɔ̀ŋ è fɛɛ̀ wòwò.

44Wo Jisɛ̀ naŋ ɓɛìŋ kɔ̀ e dìà taaà wo zoolò, wò yaà nɔŋ wòò maŋ mìè guùŋ maŋ. 45Kpeiŋ wò naŋ kɛ̀ɛ̀ koɓɛ̀ anyùùŋ màŋjɛ̀wɛ̀uŋ nyàŋ yèè wò naŋ nyiŋ dawè wààŋ, “Kòò nìŋ yaà nɔŋ maŋ jàwè yèè ko gììyè nyiiŋ kpɛ? Yɛ̀mɛìŋ! E teengaà è haì wèè miàim wo Jɔ̀àfèlàà Nyuùŋ Kpùnɔɔ̀ŋ, naàŋ nɔ̀ŋ kìɛim koɓɛ̀ e gààŋ anyùùŋ maŋ jùumù nyaŋ. 46Yèwaìŋ dìì, e kaiŋ. Yɛ̀mɛìŋ, wo nyùnɔ̀ɔŋ naim maàŋ wɔ wuŋ nàŋ yaà hnè wɔ!”

Àŋ kùwà wo Jisɛ̀

(Mài 14.43-50; Luù 22.47-53; Jɔ̀ɔŋ 18.3-12)

47E gò wa pɛɛ jùà wo Jisɛ̀ nyààŋ nààŋ wo Juɗà, wo nyùùŋ màŋjɛ̀wɛ̀ zììyà jɛ̀wɛ̀ tìyèeɔ̀ bà guùŋ, nao haì. Wò naŋ hìɛ̀ŋ anyuùŋ zimgbe àŋ kuwa maŋ kòyà ɗùà yèè maŋ kuù kpuu kpùù. Aŋ kànà sìèfèìŋ zòòlo gbee nyàŋ, yèè aŋ màmànkùmɛ̀ŋ nyàŋ naŋ nyiŋ wa tùɔ̀ŋ. 48Wo Juɗà naŋ wa tɔ̀ɔ̀ anyùùŋ nyaŋ e tɔ̀ɔ̀màŋsèì e keì wèè aŋ kùwà wo Jisɛ̀, “Wo felaaà mìŋ do nàŋ kpuuwò wɔ wuŋ wo. Kùwa nùuŋ!”

49Kpeiŋ nààŋ wo Juɗà nao nɔŋ haì fa, wò naŋ kɔ̀ koɓɛ̀ Jisɛ̀i yèè wò naŋ woò wààŋ, “Ke jii fàa nɔ̀ŋ ko nɛ̀ɛ̀ŋ muìŋ, Kààmɔɔŋ!” Yèè wò nauŋ kpuuwò.

50Yèè wo Jisɛ̀ nauŋ woò wààŋ, “Dàwi miɔ̀ŋ, nyɛnɛ̀ŋ e nɛ̀ɛŋ mùŋ naŋ hnè ko nyinie lɛ̀ fiò.”

Kpeiŋ anyùùŋ nyaŋ naŋ kùwò wo Jisɛ̀, auŋ kùwà kpaŋ. 51Anyùùŋ nyaŋ kuwa wo Jisɛ̀ maŋjɛ̀wɛ nyàŋ bà guùŋ koɓɛ̀ bi naŋ gè e kòyà ɗùàuŋ nɛ̀ yèè wò naŋ nyɛ̀mɛ̀ŋ wo ɓɔ̀ìjɔ̀à wo Kànà Sìèfèìŋ Zòòlo Gbeeɔ̀, wouŋ kɛ̀ɛ̀ ke nùŋ kpo. 52Yèè wo Jisɛ̀ naŋ wòò wo nyùùŋ bi wààŋ, “Hoà e koya mɔ̀ɛ̀ wɔŋ ɓuùiŋ nɔɔ̀ŋ sùà. Wo nyùnɔ̀ɔŋ gbiŋ ɓemàŋ e koya wèè wo dàwiuŋ nɔɔ̀ŋ wɔ wò do nàŋ fɔ̀ɔ̀yɛ̀ e koya dìì. 53Niŋ nyimààŋ kɛ̀ kà weè ɓɛ̀nɛ̀ŋ dàwè wò Dèda miɔ̀ŋ wèè è kpùùmaŋ, yèè wò do nàŋ tùɔ̀ŋ aŋ màikà taasùùŋ jika ko nɛ̀ɛ̀ŋ miìŋ? 54Kɛɛ sèè tii kaaìŋ yɛi weè, kɛ̀ dièsɔa e yèɛ wɔŋ fɛ̀ì Dayàa naŋ woò lɛ do nàŋ hɛɛnɛ̀ŋ, tiŋ zà tɛɛ̀ kuwa e kaaìŋ?”

55Wo Jisɛ̀ naŋ gbòò koɓɛ̀ anyùùŋ nyaŋ wààŋ, “Wèè kiìŋ nìŋ naŋ hìɛ̀ŋ maŋ kòyà ɗùà yèè maŋ kuù kpuu kpùù ko kuwieim, e teenè mààŋ mìŋ yaà wo nyuùŋ dàà ke kpùùnɛɛ̀? Maŋ ɗɔɔ màŋ gbiŋ mìŋ jaà wa ko kàà anyùùŋ nyaŋ ke mìè Dayàa ko Saaŋ Zòòlò Dayài, yèè niŋ gòim wa kùwà. 56Kɛɛ e nɛ̀ɛŋ wɔŋ fɛ̀ì Dayàa naŋ woò lɛ kuwa e hɛɛnɛ̀ŋ nààŋ aŋ wɛ̀ijì nyaŋ naŋ niŋ wa sìngè lɛ.”

Kpeiŋ anyùùŋ màŋjɛ̀wɛ̀uŋ nyàŋ gbiŋ nauŋ ɓàà e kɔɔ aŋ dùàŋ auŋ jòà.

Wo Jisɛ̀ yaà naàŋ anyuùŋ gbèègbèè aŋ Juùù nyaŋ fɛɛ̀feìŋ

(Mài 14.53-65; Luù 22.54, 55, 63-71; Jɔ̀ɔŋ 18.13, 14, 19-24)

57Kpeiŋ anyùùŋ nyaŋ naŋ wa kùwò wo Jisɛ̀ nyaŋ nauŋ kɔ̀ɔ̀ ko gbòò Kaifɔ̀, wo Kànà Sìèfèìŋ Zòòlo Gbeeɔ̀, ko yèi aŋ kààmɔ̀ɔ̀ŋ maŋ Sàwà Dayà nyaŋ yèè aŋ màmànkùmɛ̀ŋ fuɔɔ̀ŋ, yaà wa dèènè sùà lɛ. 58Wo Pììlɛ yaà wa wo Jisɛ̀ maŋjɛ̀wɛ e fèemàŋ mùnlaŋ sùà, yèè wò naŋ kɔ̀ ko jɔ̀ɔ̀lègbèè wɔŋ gbòòkùàŋ wo Kànà Sìèfèìŋ Zòòlo Gbeeɔ̀. Kuii wò naŋ wa jɛi yaà anyuùŋ tùnìàŋ ke Saaŋ Zòòlò Dayàa, wèè wo yɛmɛ̀ kɛ̀ kiìŋ nàŋ do wa nàŋ nɔ̀ŋ e jìwààjɛ̀wɛ̀ e nɛ̀ɛŋ hewa nàŋ kààìŋ wo Jisɛ̀ lɛ. 59Aŋ kànà sìèfèìŋ zòòlo nyàŋ e kpùlìà anyùùŋ gbèègbèè aŋ Juùù nyaŋ naŋ wa kàmè aŋ seì wèè aŋ jeèè wo Jisɛ̀ e keì wèè kàìsa aŋ jìwàuŋ. 60Kɛɛ aŋ gò wa yɛ̀mɛ̀ wò bà gbiŋ. Jòòpɛɛ Anyuùŋ zimgbe naŋ wa hnè yèè àŋ naŋ gbòò maŋ mìè sèì kàaɓì e nyaàiŋ dè wo Jisɛ̀. Kpeiŋ ko diemeì àŋ tìyèe naŋ sie yèè àŋ naŋ wòò e tòa lɛɛ̀ e nyaàiŋ dè wo Jisɛ̀ nyààŋ, 61“È naiŋ wa kòmò wò naŋ woò wààŋ, ‘Kà ɓɛ̀nɛ̀ŋ gɔ̀ɛ̀ɛ̀ ke Saaŋ Zòòlò Dayàa, yèè ka ɓèmè e gɔ̀ɛ̀ɛ̀ taai ka nyiŋ nyɛ̀lɛ̀.’ ”

62Wo Kànà Sìèfèìŋ Zòòlo Gbeeɔ̀ naŋ sie yèè wò naŋ dàwè wo Jisɛ̀ wààŋ, “Muŋ kuwà è fàsai gbiŋ wèè è keìɛ àŋ naum gbùwò ɗì lɛ?” 63Kɛɛ wo Jisɛ̀ naŋ wa nɔ̀ŋ gìli e kìlà wo gò wa wòò kè mìè guùŋ pɛɛ. Wo Kànà Sìèfèìŋ Zòòlo Gbeeɔ̀ nauŋ ɓɛìŋ woò wààŋ, “Mìŋ yààùm daawe wèè maŋ wi wòò e tɔ̀ɔ̀nyaàaŋ, wo Dayà nyiiŋ gèeɔ̀ kòò wò yààùm kumie. Wòò wi sèè mààŋ muàŋ nàŋ yaà wo Kulaìɔ, wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, wo Jɔ̀àfèlàà Dayàa.”

64Wo Jisɛ̀ naŋ nyiŋ fasàì wààŋ, “Yɛi nìŋ naŋ woò. Kɛɛ tɔ̀ miŋ woòiŋ e tɔɔɓaaà, yèè nyɛ̀iŋ nààŋ gbiŋ nìŋ do nàŋ yɛ̀mɛ̀ miàim wo Jɔ̀àfèlàà Nyuùŋ Kpùnɔɔ̀ŋ mìŋ jaa wɔŋ kùàŋ jìkà wo Dayà Gaàŋ Gbeeɔ̀ yèè mìŋ yaà hìnìè wɔŋ ɗùkpù ke nyiliɛ̀ diɛŋ!”

65Wo Kànà Sìèfèìŋ Zòòlo Gbeeɔ̀ naŋ sɛ̀ɛ̀ wɔŋ kùmà wuŋ biɔ̀ yèè wò naŋ woò wààŋ, “Wo felaa wɛɛ̀ pɔ̀ɔ̀ wo Dayà ɓɛ̀ɛ! Wò naŋ ɓèmè wuŋ bi wèè yaà wo Dayà aŋ seenè. E manàìŋ ɓɛìŋ aŋ seì joo bà gbiŋ! Nàŋ kòmàŋ maŋ mìè ɓɛ̀ɛ̀ pɔ̀ɔuŋ màŋ koɓɛ̀ Dayài. 66Kiìŋ nàŋ yaà e kitiiŋ nɛ̀?”

Aŋ gbiŋ nauŋ hèè e kiti diɛŋ nyààŋ, “E keìɛ èuŋ jeeè weètii aŋ jìwàuŋ.”

67Kpeiŋ aŋ bà nyiŋ naŋ tɔ̀ɔ̀tù wo Jisɛ̀ tùlìà maŋ sɔlɔ, àŋ jùoùŋ. Yèè aŋ yè nyaŋ nauŋ wa hèèfɛ̀ɛ̀ nyaŋ naŋ woò nyààŋ, 68“Sèè mààŋ muàŋ nàŋ yaà wo Kulaìɔ, kɛ̀ wòò wi kɛ̀ ɓòò naum jùò!”

Wo Pììlɛ gè maŋhɛɛ kɛ̀ wo nyimààŋ wo Jisɛ̀

(Mài 14.66-72; Luù 22.56-62; Jɔ̀ɔŋ 18.15-18, 25-27)

69Wo Pììlɛ jaa wa ko jɔ̀ɔ̀lègbèè wɔŋ gbòòkùàŋ wo Kànà Sìèfèìŋ Zòòlo Gbeeɔ̀ e ɓula, yèè wo ɓɔì jɔùŋ jɔa bà naŋ hnè koɓɛ̀ wo Pììlɛì wò nauŋ woò wààŋ, “Muàŋ pɛɛ mùŋ yaà wo nyùùŋ màŋjɛ̀wɛ̀ Jisɛ̀ɔ bà, wo nyùùŋ ko Galaliì wii.”

70Kɛɛ wo Pììlɛ naŋ niŋ gè maŋhɛɛ nyiŋ gbiŋ ko fɛɛ̀feìŋ yèè wò naŋ woò wààŋ, “Miŋ nyimààŋ kɛ̀ kiìŋ nìŋ yaà woo.” 71Kpeiŋ nààŋ wò naŋ fòlò wò naŋ kɔ̀ ekàmààŋ wɔŋ gbàngiɔ̀ yɛmgbɛ̀, wo jɔùŋ ɓɔìjɔ̀àa bà guùŋ nauŋ noo yɛmɛ̀ wò siao yèè wò naŋ tɔ̀ɔ̀tù anyùùŋ nyaŋ siao nyàŋ wòo wààŋ, “Wo felaa wɛɛ̀ yaà wo Jisɛ̀ e yìwìà ko Naazɔ̀ɛ̀ yaà weè koɓɛ̀ guùŋ!”

72Wo Pììlɛ naŋ niŋ ɓɛìŋ gè maŋhɛɛ yèè wò naŋ woò wààŋ, “Kà gboonò kpo kɛ̀ miŋ nyimààŋ kɛ̀ kiìŋ nìŋ yaà woo!”

73E teenga kpàa bà naŋ ɓɛìŋ mààŋ yèè anyùùŋ nyaŋ siao nyàŋ naŋ ɓɛìŋ tɔ̀ɔ̀ wo Pììlɛ kiiyò nyààŋ, “Muŋ fè ɓɛ̀nɛ̀ŋ gè maŋhɛɛ kɛ̀ tɔɔɓaa muŋ fè wò bà guùŋ, esaɓù kɛ̀, e ɗewe kiiɛ̀ mùŋ gboo lɛ̀ tiŋ naum tɔɔ̀ kɛ̀ mùŋ yaà wo nyùnòò ko Galaliì.”

74Kpeiŋ wo Pììlɛ naŋ woò wààŋ, “Kà gboonò kpo kɛ̀ mìŋ yaà wòò sùà e tɔɔɓaaà! Tɔ̀ wo Dayà nimìlàim sèè mìŋ goò nɔ̀ŋ wòò e tɔɔɓaaà! Miŋ nyimààŋ wò felaaà nìŋ yaà wòò è kiiuŋ wɔ̀!”

Ko fɛɛ̀feìŋ wo tɔɔ wowoɔ̀ naŋ kolèè, 75yèè wo Pììlɛ e ɗìuŋ naŋ dè koɓɛ̀ e yèɛ wo Jisɛ̀ nauŋ wa woò lɛ wààŋ, “Wèè paŋ wo tɔɔ wowoɔ̀ kolèè, mùŋ do nàŋ gè maŋhɛɛ sùà taai kɛ̀ muŋ nyimààìm.” Yèè wò naŋ fòlò wo ka wo ɓàà ɗì gòla.

Currently Selected:

Maafiù 26: WFESD

Highlight

Copy