Maafiù 25

Ke kàɓànè aŋ jɔ̀ùŋ jɔ̀à bɛ̀ɛ̀ zììyà nyaŋ

1Wo Jisɛ̀ naŋ woò wààŋ, “E Kànà àìjɛnɛ̀ɛŋ è yaà mààŋ e yèɛ naŋ wa kaaìŋ e dùùm lɛ, e teengaà aŋ jɔ̀ùŋ jɔ̀à bɛ̀ɛ̀ zììyà naŋ wa ɓèmè maŋ laumpò nyiŋ màŋ yèè àŋ naŋ kɔ̀ e kèè ke yɛɛ̀ gbìaàŋ sùà wèè aŋ yɛmɛ̀ wo kɛ̀ɛ̀nɛ̀ŋ jɔunɔ̀ɔŋ. 2Àŋ nɔɔnɔŋ yaà wa anyùùŋ ɓàaɓàa, yèè àŋ nɔɔnɔŋ kuwa wa jiikɛ̀ɛ. 3Aŋ jè ɓààɓàà nɔɔnɔŋ nyàŋ naŋ wa kɔ̀ɔ̀ maŋ laumpò nyiŋ màŋ kɛɛ aŋ gò wa kòà e bù joo wèè màŋ laumpò nyiŋ màŋ. 4Aŋ kɛ̀ɛ̀jii nyàŋ naŋ wa kɔ̀ɔ̀ maŋ sàìŋ bù joo wèè maŋ laumpò nyiŋ màŋ. 5Wo kɛ̀ɛ̀nɛ̀ŋ jɔunɔ̀ɔŋ gò wa zùmò hnàaŋ, kpeiŋ maŋ jàwè maŋ naŋ nyiŋ kùwò yèè àŋ naŋ sɛ̀ɛ̀ maŋ jàwè.

6“Wɔŋ dùmɔ̀ɔŋ wa naàŋ hàì tɛɛ, yèè wo nyùùŋ bà naŋ kpààŋ wò naŋ woò wààŋ, ‘Wo kɛ̀ɛ̀nɛ̀ŋ jɔunɔ̀ɔŋ wɛɛ̀! Hnàaìŋ niŋ mɛɛ̀uŋ!’ 7Aŋ jɔ̀ùŋ jɔ̀à bɛ̀ɛ̀ zììyà nyaŋ naŋ kɛɛyɛ̀ yèè àŋ naŋ jòòwò maŋ laumpò nyiŋ màŋ. 8Kpeiŋ aŋ jè ɓàaɓàa nyàŋ naŋ wòò aŋ kɛ̀ɛ̀nɛ̀ŋ jiikɛ̀ɛ nyàŋ nyààŋ, ‘Kìɛ̀ŋ wi e bùiŋ nɛ̀ bà, esaɓù kɛ̀ maŋ laumpò wi màŋ kùùnò nyìme.’ 9Aŋ kɛ̀ɛ̀jii nyàŋ naŋ fasàì nyààŋ, ‘E bù lɛ gò gàŋ wèè yàwi nààŋ gbiŋ! Kɔ̀aìŋ ko jawaì niŋ dènàŋ e bà wèè nyìŋ bi.’ 10Nààŋ aŋ jɔ̀ùŋ jɔ̀à ɓàaɓàa nyàŋ yaà wa kɔɔyɛ wèè aŋ dènàŋ e bù nyiŋ nɛ̀, wo kɛ̀ɛ̀nɛ̀ŋ jɔunɔ̀ɔŋ naŋ jòwò ko jawaì. Aŋ jɔùŋ jɔa kɛ̀ɛ̀jii nyàŋ naŋ wa banebànè yèè àŋ naŋ kɔ̀ aŋ jɔ̀à ko sààŋ wɔŋ ɗàà gè ke yɛɛ̀ gbìaàŋ, yèè anyùùŋ nyaŋ naŋ yìlè maŋ gbemgbee màŋ kpaŋ.

11“Eɓìèmàŋjɛ̀wɛ̀ tii, aŋ jɔ̀ùŋ jɔ̀à bɛ̀ɛ̀ ɓàaɓàa nyàŋ naŋ ngàà kɛ̀ɛ̀ maŋjɛ̀wɛ yèè àŋ naŋ kùùnò kpàaŋ nyààŋ, ‘Kanaà, kanaà, yìlè wɔŋ gbemgbeeɔ̀ weè wi!’ 12Kɛɛ wo kɛ̀ɛ̀nɛ̀ŋ jɔunɔ̀ɔŋ naŋ nyiŋ woò wààŋ, ‘Kpele! Miŋ woòiŋ e tɔɔɓaaà, miŋ nyimàìŋ.’ ”

13Yèè wo Jisɛ̀ naŋ wòò anyùùŋ màŋjɛ̀wɛ̀uŋ ko dìèmè e gbòauŋ nɛ̀ wààŋ, “Nɔ̀iŋ e fɛɛ̀ wòwò, esaɓù kɛ̀ niŋ nyimààŋ kè ɗɔɔɛ̀ ɔ̀ɔ̀ è teengaà tɛɛ̀ do nàŋ kaaìŋ lɛ.”

Ke kàɓànè aŋ ɓɔ̀ìjɔ̀à taai nyàŋ

(Luù 19.11-27)

14Wo Jisɛ̀ naŋ ɓɛìŋ woò wààŋ, “E Kànà àìjɛnɛ̀ɛŋ è yaà mààŋ e yèɛ naŋ wa kaaìŋ lɛ, e teengaà wo kenàŋ bà yaà wa kɔ̀ɔ̀yɛ̀ wɔŋ fuɔŋ bà. Wò naŋ nyààŋ aŋ ɓɔìjɔ̀àuŋ nyàŋ koɓɛ̀ guùŋ yèè wò naŋ nyiŋ jùùyè e bàneuŋ gbiŋ wò kuwa lɛ̀, wèè aŋ toomò niŋ aŋ yɛmɛ̀ geenìŋ. 15Wò naŋ wa kìɛ̀ŋ wo bà guùŋ gbiŋ e nɛɛnɛŋ jika, nààŋ wò naŋ wa nyìmè e ɗèwè e nɛ̀ŋ nyɛ̀nɛŋ kiiuŋ nɛ̀ lɛ. Wò naŋ kìɛ̀ŋ wò guùŋ e pàtaà tààsùùŋ nɔɔnɔŋ (5,000), wò naŋ ɓɛìŋ kìɛ̀ŋ wò guùŋ e pàtaà tààsùùŋ tìyèe (2,000), yèè wò naŋ kìɛ̀ŋ wò guùŋ e pàtaà tààsùùŋ guùŋ (1,000). Kpeiŋ wò naŋ kɔ̀ wɔŋ fuɔŋ joo bà sùà. 16Wo yèɔ naŋ wa yɛ̀mɛ̀ e pàtaà tààsùùŋ nɔɔnɔɛ̀ŋ wɔ, naŋ kɔ̀ yèè wò naŋ niŋ nyìnìè ebòli, yèè wò naŋ ɓɛìŋ yɛ̀mɛ̀ e tààsùùŋ nɔɔnɔŋ e nɛɛnɛuŋ nɛ̀ diɛŋ. 17Wo ɓɔìjɔ̀àa naŋ wa yɛ̀mɛ̀ e tààsùùŋ tìyèeɛ̀ wɔ naŋ nyɛ̀nɛ̀ŋ e kèì guùŋ nɛ, yèè wò naŋ yɛ̀mɛ̀ e tààsùùŋ tìyèe e nɛɛnɛuŋ nɛ̀ diɛŋ. 18Kɛɛ wo ɓɔìjɔ̀àa naŋ wa yɛ̀mɛ̀ e tààsùùŋ guùŋ nɛ wɔ̀, naŋ kɔ̀ yèè wò naŋ tòmò ko dììnaŋ yèè wò nao nyɛ̀ɛ̀nɛ̀ŋ e nɛ̀ɛ̀nɛ̀ŋ kààmɔɔuŋ nɔɔ̀ŋ.

19“Kpeiŋ e teenga bà naŋ mààŋ, yèè wo kààmɔ̀ɔ̀ŋ aŋ ɓɔìjɔ̀à nyiiŋ naŋ kɛ̀ɛ̀ maŋjɛ̀wɛ. Wò naŋ nyiŋ nyààŋ yèè wò naŋ nyiŋ dawè sèè mààŋ kiìŋ àŋ naŋ nyìnìè e nɛɛnɛuŋ nɛ̀. 20Wo ɓɔìjɔ̀àa àŋ naŋ wa kìɛ̀ŋ e pàtaà tààsùùŋ nɔɔnɔɛ̀ŋ wɔ, naŋ niŋ hiɛ̀ŋ e hààwè e tààsùùŋ nɔɔnɔɛ̀ŋ wò naŋ yɛmɛ̀ e geenìŋ sùà lɛ. Yèè wò naŋ woò wààŋ, ‘Kààmɔɔŋ, mùŋ naim mɛ̀iŋ kìɛ̀ŋ e pàtaà tààsùùŋ nɔɔnɔŋ, kɛɛ mìŋ naŋ yɛ̀mɛ̀ e gèènìŋ e tààsùùŋ nɔɔnɔŋ ɓɛìŋ.’ 21Yèè wo kààmɔɔuŋ nɔɔ̀ŋ naŋ woò wààŋ, ‘Mùŋ naŋ nyɛ̀nɛ̀ŋ tɛ̀ɛ̀. Mùŋ yaà wo ɓɔìjɔ̀à siaŋ yèè e tɔ̀ɔ̀nyaàŋ. Mìŋ naum mɛ̀iŋ jùùyè e nɛɛnɛŋ jɔa, kɛɛ mìŋ doum naàŋ nàŋ kìɛ̀ŋ e gbee niŋ. Hnàaàŋ yèè muŋ nɔ̀ŋ wo bàumbà e zɔlɔ̀ gèe mɛ̀ sùà.’ 22Kpeiŋ, wo ɓɔìjɔ̀àa àŋ naŋ wa kìɛ̀ŋ e pàtaà tààsùùŋ tìyèeɛ̀ wɔ naŋ niŋ hiɛ̀ŋ e hààwè e tààsùùŋ tìyèeɛ̀ wò naŋ yɛmɛ̀ e geenìŋ sùà lɛ. Yèè wò naŋ woò wààŋ, ‘Kààmɔɔŋ, mùŋ naim mɛ̀iŋ kìɛ̀ŋ e pàtaà tààsùùŋ tìyèe, kɛɛ mìŋ naŋ yɛ̀mɛ̀ e gèènìŋ e tààsùùŋ tìyèe ɓɛìŋ.’ 23Yèè wo kààmɔɔuŋ nɔɔ̀ŋ naŋ woò wààŋ, ‘Mùŋ naŋ nyɛ̀nɛ̀ŋ tɛ̀ɛ̀. Mùŋ yaà wo ɓɔìjɔ̀à siaŋ yèè e tɔ̀ɔ̀nyaàŋ. Mìŋ naum mɛ̀iŋ jùùyè e nɛɛnɛŋ jɔa, kɛɛ mìŋ doum naàŋ nàŋ kìɛ̀ŋ e gbee niŋ. Hnàaàŋ yèè muŋ nɔ̀ŋ wo bàumbà e zɔlɔ̀ gèe mɛ̀ sùà.’ 24Kpeiŋ, wo ɓɔìjɔ̀àa àŋ naŋ wa kìɛ̀ŋ e pàtaà tààsùùŋ guùŋ nɛ wɔ̀ naŋ hnè yèè wò naŋ woò wààŋ, ‘Kààmɔɔŋ, kà nyìmàŋ kɛ̀ e tùwo mɔ̀ɛ̀ è naŋ nyìngè. Mùŋ kpaa manɛ̀ŋ komaŋ màŋ yè maŋ muŋ gò nyùàŋ maŋ, yèè mùŋ gbonàŋ manɛ̀ŋ komaŋ e yìwìà ko ɓùi muŋ gò vààì mànɛ̀ŋ komaŋ lɛ̀. 25E jùùɛ yààìm mɛ̀iŋ, kpeiŋ mìŋ naŋ kɔ̀ mìŋ naŋ tòmò e dììɛ yèè mìŋ nao nyɛ̀ɛ̀nɛ̀ŋ e pàtaà tààsùùŋ guùŋ nɛ mùŋ naim mɛ̀iŋ kiɛ̀ŋ lɛ. Weètii e yèɛ naum sɔ̀ dèè lɛ tɛɛ̀.’ 26Yèè wo kààmɔ̀ɔ̀ŋ wo ɓɔìjɔ̀àa nauŋ woò wààŋ, ‘Mùŋ naŋ jɛkɛ̀ yèè mùŋ siaŋ nɔŋ wèè foo! Màŋ nyìmàŋ kɛ̀ mìŋ kpaa manɛ̀ŋ komaŋ màŋ yè maŋ miŋ gò nyùàŋ maŋ, yèè mìŋ gbonàŋ manɛ̀ŋ komaŋ e yìwìà ko ɓùi miŋ gò vààì mànɛ̀ŋ komaŋ lɛ̀. 27Sèè è nɔ̀ŋ yɛi, mùŋ he mɛ̀iŋ weè nàŋ gbìɛ̀ŋ e nɛɛnɛŋ mɛ̀ ko bɛnkìi, wèè kɛ̀ mìŋ naŋ weè ɓɛ̀nɛ̀ŋ yɛ̀mɛ̀ e geenìŋ e hàwè nɛɛnɛŋ mɛ̀ diɛŋ.’ 28Kpeiŋ wo kààmɔɔɔ̀ŋ naŋ wòò aŋ ɓɔìjɔ̀à gbànaŋ nyàŋ wààŋ, ‘Ge nùuŋ e pàtaà tààsùùŋ guùŋ nɛ sìwè, niŋ kiɛ̀ŋ niŋ koɓɛ̀ wo ɓɔìjɔ̀àa kuwa e pàtaà tààsùùŋ zììyàa wɔ̀! 29Esaɓù kɛ̀ wo nyùnɔ̀ɔŋ gbiŋ kuwa e nɛ̀ŋ bà wɔ, wo Dayà douŋ ɓɛìŋ nàŋ tooyè, wèè kɛ̀ wo kɛɛnɛ̀ŋ niŋ zimgbe e nìàŋ e yèɛ wò kuwa lɛ̀. Kɛɛ wo nyùnɔ̀ɔŋ kuwà è nɛ̀ŋ bà gbiŋ wɔ̀, e tòloòɛ pɛɛ wò kuwa lɛ̀, wò douŋ niŋ nàŋ gè sìwè. 30Mùŋ yaà wo ɓɔìjɔ̀à kpàna foo, yèè àŋ doum nàŋ gbìɛ̀ŋ ke nyiwì gènaŋ sùà, ko yèi mùŋ do nàŋ gòlò yèè maŋ gbìlà le sìaŋ mɔ̀ɛ̀ e keì nyìnga dìì.’ ”

Ke ɗɔ̀ɔ̀ gbài dìàmaàŋ

31Yèè wo Jisɛ̀ naŋ nyiŋ ɓɛìŋ woò wààŋ, “Sèè miàim wo Jɔ̀àfèlàà Nyuùŋ Kpùnɔɔ̀ŋ hnàŋ wa nàwèè e jòòwo gbee mɛ̀ sùà, yèè aŋ màikà nyaŋ gbiŋ àŋ yààìm kɔɔ, mìŋ do nàŋ jɛ̀ì ke kpùà Kana miɛ̀ŋ diɛŋ. 32Anyùùŋ nyaŋ gbiŋ maŋ fuɔŋ màŋ sùà doim nàŋ gbònò ko fɛɛ̀feìŋ, yèè mìŋ do nyiŋ nàŋ gòònò tɛɛ sùà tìyèe màànààŋ nɔŋ wo nyuùŋ tùnìàŋ ɓaawaa nyàŋ gè aŋ ɓaawaa nyàŋ aŋ diì nyaŋ tɛɛ lɛ̀. 33Mìŋ do nàŋ mɛ̀ɛ̀nyɛ̀ŋ aŋ ɓaawaa nyàŋ, anyùùŋ tɔ̀ɔ̀nyaàŋ nyaŋ nyiiŋ, wɔŋ kùàŋ jìka, yèè aŋ diì nyaŋ wɔŋ kùàŋ gbɔnɔŋ miɔ̀ŋ. 34Kpeiŋ kɛ̀ miàim wo Kanaà kà wòò anyùùŋ nyaŋ wɔŋ kùàŋ jìka miɔ̀ŋ mìàŋ, ‘Hnàaìŋ, nyɛ̀iŋ nyàŋ wo Dèda miɔ̀ŋ naŋ haayà nyaŋ! Hnàaìŋ niŋ ɓemè e Kànà Dayàa naŋ wa nɔ̀ŋ bàne niŋ weèiŋ lɛ paŋgàà e ɗuunyaàŋ naŋ wa nɔ̀ŋ bàne niŋ lɛ̀. 35E jìè yààìm wa yèè mùŋ naim kìɛ̀ŋ e nɛ̀ŋje mìŋ naŋ jè, ke jòòmàì yààìm wa yèè mùŋ naim kìɛ̀ŋ e wùìyè mìŋ naŋ tìyè. Mìŋ yaà wa wo nyùùnèènyɛiŋ yèè mùŋ naim wa jàà kùàŋ dìì ko gboo moo. 36Mìŋ yaà wa ke kpanja yèè mùŋ naim kìɛ̀ŋ maŋ dèè, mìŋ yaà wa siinyɛŋ, yèè mùŋ naim jaamè, mìŋ yaà wa ko sààŋ nyìwì yèè mùŋ naim jaamè.’ 37Kpeiŋ kɛ̀ anyùùŋ tɔ̀ɔ̀nyaàŋ nyaŋ do nàŋ fasàì nyààŋ, ‘Kanaà, kiìŋ è teenga è naum wa yɛmɛ̀ e jìè yààùm yèè è naum kìɛ̀ŋ e nɛ̀ŋje, ɔ̀ɔ̀ mùŋ yaà ke jòòmàì sùà yèè è naum kìɛ̀ŋ e wùìyè mùŋ naŋ tìè? 38Kiìŋ è teenga è naum yɛmɛ̀ mùŋ yaà wo nyùùnèènyɛiŋ yèè è naum kɔ̀ɔ̀ maŋ gboo wi màŋ sùà, ɔ̀ɔ̀ mùŋ yaà ke kpanja yèè è naum kìɛ̀ŋ maŋ dèè? 39Kiìŋ è teenga è naum yɛmɛ̀ mùŋ yaà siinyɛŋ yèè è naum jaamè, ɔ̀ɔ̀ mùŋ yaà ko sààŋ nyìwì yèè è naum jaamè?’ 40Miàim wo Kanaà do nàŋ fasaì mìàŋ, ‘Miŋ woòiŋ e tɔɔɓaaà, sèè mùŋ naŋ niŋ wa nyɛ̀nɛ̀ŋ wèè wo wùìya miɔ̀ŋ bà guùŋ, miŋ gò kpɛɛ̀ŋ kɛ̀ dièsɔa è nɔ̀ŋ kiiuŋ nɛ̀ è yaà, kɛ̀ màŋ niŋ nyɛ̀nɛ̀ŋ e weèim.’

41“Kpeiŋ mìŋ do nàŋ wòò aŋ yè nyaŋ sìàìm wɔŋ kùàŋ gbɔnɔŋ nyàŋ mìàŋ, ‘Yèwa nìim feìŋ, nìŋ yaà e gbòònò Dayàa dìì. Kɔ̀àaìŋ niŋ sɛɛ̀ e hmɔ̀ɔ̀ɛŋ e yèɛ fè nyime wèè julɔfɔ lɛ̀ sùà, e yèɛ àŋ naŋ banebànè wèè wo Sɛ̀tanàaŋ yaà aŋ màikàuŋ nyàŋ lɛ. 42E jìè yààìm wa kɛɛ niŋ gòim wa kìɛ̀ŋ è nɛ̀ŋje wèè ka jè, ke jòòmàì yààìm wa kɛɛ niŋ gòim wa kìɛ̀ŋ è wùìyè mìŋ do tìà. 43Mìŋ yaà wa wo nyùùnèènyɛiŋ yèè niŋ gòim wa jàà kùàŋ dìì kò gbooiŋ màŋ sùa. Mìŋ yaà wa ke kpanja kɛɛ niŋ gòim wa kìɛ̀ŋ màŋ dèè, mìŋ yaà wa siinyɛŋ, yèè ko sààŋ nyìwì kɛɛ niŋ gòim wa jaamè.’ 44Kpeiŋ àŋ do nàŋ fasàì nyààŋ, ‘Kanaà, kiìŋ è teenga è naum wa yɛmɛ̀ e jìè yààùm, ɔ̀ɔ̀ ke jòòmàì yààùm, ɔ̀ɔ̀ mùŋ yaà wo nyùùnèènyɛiŋ, ɔ̀ɔ̀ mùŋ yaà ke kpanja, ɔ̀ɔ̀ mùŋ yaà siinyɛŋ ɔ̀ɔ̀ ko sààŋ nyìwì yèè e gòum kpuumàŋ?’ 45Miàim Kanaà mìŋ do nàŋ fasaì mìàŋ, ‘Miŋ woòiŋ e tɔɔɓaaà, sèè nìŋ naŋ wa gè maŋhɛɛ wèè naŋ niŋ nyɛ̀nɛ̀ŋ wèè wo wùìyaà bà guùŋ, miŋ gò kpɛɛ̀ŋ kɛ̀ dièsɔa è nɔ̀ŋ kiiuŋ nɛ̀ è yaà, kɛ̀ nìŋ naŋ wa gè maŋhɛɛ wèè naŋ niŋ nyɛ̀nɛ̀ŋ e weèim.’ 46Yèè wo Jisɛ̀ naŋ woò wààŋ, àŋ do nàŋ tùɔ̀ŋ anyùùŋ nyɛɛ̀ŋ koɓɛ̀ e keì nyìnga gò jùà, kɛɛ anyùùŋ tɔ̀ɔ̀nyaàŋ nyaŋ do nàŋ kɔ̀ koɓɛ̀ wɔŋ nyiiŋ gèe gò jùà.”

Currently Selected:

Maafiù 25: WFESD

Highlight

Copy