Luù Ke jii gbài e nyaàiŋ dè wɔŋ fɛi wɛɛ̀ŋ
Ke jii gbài e nyaàiŋ dè wɔŋ fɛi wɛɛ̀ŋ
Wɔŋ Fɛ̀ì Ebò Siaàŋ nààŋ wo Luù naŋ sìngè lɛ, naŋ wi wòò è Ebò Siaàŋ kɛ̀ wo Jisɛ̀ nàŋ yaà wo Nyùnɔ̀ɔŋ wo Dayà naŋ tàeɗùù wèè wo nɔ̀ŋ wo Nyuùŋ Jòèyeɔ̀ wèè anyùùŋ nyaŋ ko Ezɔ̀ɛ̀ yèè wo Nyuùŋ Jòèyeɔ̀ wèè anyùùŋ nyaŋ gbiŋ e ɗuunyaàŋ. Wo Luù naŋ sìngè wò naŋ woò wààŋ kɛ̀, wo Jìnàŋ Nɛɛmaàŋ naŋ wa nyààŋ wo Jisɛ̀ wèè wo “hiàŋ ebò siaŋ koɓɛ̀ anyuùŋ pɔ̀ɔ nyàŋ,” yèè wɔŋ fɛ̀ì Ebò Siaŋ wɛɛ̀ŋ naŋ dìè maŋ keì wòo wèè anyùùŋ nyaŋ e nyaàiŋ dè manɛ̀ŋ maŋ kinɛiŋ naŋ nyiŋ sɔ̀ dèè maŋ nyiiŋ gèe nyiŋ màŋ sùà. Wɔŋ fɛ̀ì sìngà zɔlɔ̀ wɛɛ̀ŋ wɔ̀ŋ kuwa sɛmɛmaŋ wuŋ pɛɛ, ɓɔɔɓɔɔ ko tɔ̀ɔ̀tù maŋ kàɓanè maŋ yè maŋ daanàŋ ebò hnàŋ Jisɛ̀ɛ lɛ̀, yèè ɓɛìŋ ko dìèmè maŋ keì wòo màŋ, nààŋ wo Jisɛ̀ naŋ jowo ko àìjɛnɛ̀ŋ. Ke kàɓanèɛ e nyaàiŋ dè e ɗewe kiiɛ̀ anyuùŋ hààwe nyàŋ naŋ wa dɛ̀kɛ̀o sùà yèè e hààweɛ̀ naŋ ɓaayè nààŋ wo Jisɛ̀ naŋ wa jòwò ko àìjɛnɛ̀ŋ lɛ, kè naŋ nɔ̀ŋ wòo nyiŋ e yìwìà wo nyùùŋ gunɔ̀ɔŋ naŋ sìngè wɔŋ fɛ̀ì Maŋ Nyɛ̀nɛ̀ŋ Aŋ Keela Tàèɗùù nyaŋ wɔ̀.
Ko gbààgbàà tìyèeì yèè ko jè nɔɔnɔŋ diè gunìiŋ (yɛ̀mɛ̀ maŋ keì wòo titi màŋ yaà miìŋ dìì maŋ) kuwa maŋ keì wòo zimgbe maŋ yè maŋ yaà nɔŋ sìnga miŋ wɔŋ fɛ̀ì Ebò Siaŋ wɛɛ̀ŋ sùà. Maŋ kàɓanè bi nàŋ yaà, wɔŋ nùŋ aŋ màikà nyaŋ yèè e jààmeɛ̀ anyuùŋ tùnìàŋ ɓaawaa nyàŋ naŋ wa kɔɔ̀ e teengaà wo Jisɛ̀ naŋ wa nɔ̀ŋ e kòmauŋ nɛ̀, e nɔ̀ŋ Jisɛ̀ɛ ko Saaŋ Zòòlò Dayài e teengaà wò yaà wa wo felaajɔa lɛ̀ (tɔɔɓaa mɛɛ̀ŋ naŋ wa kaaìŋ). Maŋ kàɓànè tìyèe gbànaŋ màŋ yaào wèè maŋ nɔŋ tɔ̀ɔ̀ e tɔ̀ɔ̀màŋsèì keì e nyaàiŋ dè, wo felaa kùwìè tùwo siaàŋ e yìwìà wɔŋ fùɔ̀ŋ Sàmiliàa yèè wo jɔ̀àfelaaà naŋ wa go wɔ̀. Wɔŋ fɛ̀ì Ebò Siaàŋ gbiŋ sùà, e keì hììyà nyààŋ dìì gbeeɛ̀ naŋ nɔ̀ŋ wòo niŋ lɛ̀ e nyaàiŋ dè e zòòlo, wo Jìnàŋ Nɛɛmaàŋ, e nɛ̀ɛŋ aŋ jɔùŋ nyaŋ kuwa aŋ nyɛ̀nɛ̀ŋ e tòmò Jisɛ̀ɛ sùà lɛ, yèè e hàkɛ̀ jùùyà Dayàa wèè maŋ jùumù.
E ɗewe kiiɛ̀ àŋ naŋ gòònò maŋ keì wòo titi màŋ lɛ
Ke jii gbài (1.1-4)
E tèèngà e kòmàŋ yèè e jɔ̀àkàìŋ jɔ̀à Jɔ̀ɔŋ Gùà Nyùnɔ̀ɔŋ yaà Jisɛ̀ (1.5–2.52)
E tòmò Jɔ̀ɔŋ Gùà Nyùnɔ̀ɔŋ (3.1-20)
E gùà Jisɛ̀ɛ yèè e wàaà wò naŋ kɔ̀ dìì lɛ (3.21–4.13)
E tòmò Jisɛ̀ɛ ko ɓài ko Galaliì (4.14–9.50)
E yìwìà ko Galaliì e kà ko Jùlusɛ̀làm (9.51–19.27)
Ke wikì dìàmaàŋ ko yèè e gbɛ̀ɛ̀ ko Jùlusɛ̀làm (19.28–23.56)
E diì yèwauŋ nɛ̀ e fàaà dìì, e fòlauŋ nɛ̀ anyùùŋ feìŋ, yèè e jòwà kìì wo Kanaà ko àìjɛnɛ̀ŋ (24.1-53)
Currently Selected:
Luù Ke jii gbài e nyaàiŋ dè wɔŋ fɛi wɛɛ̀ŋ: WFESD
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.