Luù 1

Ke jii gbài koɓɛ̀ Tìɔ̀felɔ̀i

1Dàa Tìɔ̀felɔ̀, anyuùŋ zimgbe naŋ yɛ̀mɛ̀ maŋ keì maŋ wo Jisɛ̀ naŋ nyɛ̀nɛ̀ŋ maŋ e teengaà wò yaà wì wa e tɛɛ, e yìwìà e teengaà wò naŋ wa tɔ̀ɔ̀tù e tòmouŋ nɛ̀ lɛ. 2Aŋ ɓɔìjɔ̀à bi naŋ wa tomo wèè wo Dayà, nààŋ àŋ naŋ wa kàà anyùùŋ ke miè gbìaàŋ e nyaàiŋ dè wo Kanaà Jisɛ̀. Anyùùŋ nyaŋ zimgbe nyiŋ naŋ wa kòmò e nɛ̀ɛŋ àŋ naŋ nyiŋ wa kaà lɛ, naŋ sìngè maŋ keì maŋ wo Jisɛ̀ naŋ nyɛ̀nɛ̀ŋ weè wi e yìwìà e teengaà wò naŋ wa tɔ̀ɔ̀tù e tòmouŋ nɛ̀ lɛ. 3Miàŋ bi kà nyɛ̀nɛ̀ŋ maŋ nɔnɔŋ tùaŋ wèè maŋ keì mɛɛ̀ŋ gbiŋ tɛ̀ɛ̀ e yìwìà ko tɔɔtuì, weètii mìŋ naŋ ɗewè wèè ka sìngà maŋ keì mɛɛ̀ŋ guùŋ guùŋ, màànààŋ màŋ naŋ kaaìŋ lɛ. Dàa Tìɔ̀felɔ̀, 4mìŋ naŋ tɛɛ̀ nyɛ̀nɛ̀ŋ wèè muŋ nyìmàŋ e tɔɔɓaaà e nyaàiŋ dè e yèɛ gbiŋ anyùùŋ naum wa kaà lɛ.

Wo màikàa naŋ wòò wo Zakalayà kɛ̀ wo jawèuŋ Ìlesebɛ̀ɛ̀ do nàŋ kòmò wo jɔ̀àfelaa auŋ nyààŋ wo Jɔ̀ɔŋ

5E teengaà wo Hɛɛlɔ̀ yaà wa wo kana wɔŋ fùɔ̀ŋ Jùdiàa diɛŋ lɛ̀, wo sìèfèìŋ zòòlo bà yaào wa àŋ nyaaŋ wo Zakalayà. Wò yaà wa ke gbòò aŋ sìèfèìŋ zòòlo nyàŋ sùà àŋ nyaaŋ nyààŋ Àbijà. Wo Zakalayà yaà wo jawèuŋ nɔɔ̀ŋ Ìlesebɛ̀ɛ̀ naŋ wa fòlò ke kpòò wo sìèfèìŋ zòòlo jiɛ̀jiɛ̀ɔ Elɔ̀ùŋ sùà. 6Wo Dayà naŋ wa nyimèè kɛ̀ nyiŋ tìyèe naŋ wa nyìnìè wɔŋ nyiiŋ gèe nyiŋ nɔɔ̀ŋ e tɔ̀ɔ̀nyaàŋ sùà, esaɓù kɛ̀ àŋ naŋ wa jɔ̀ɔ̀lɔ̀ maŋ Sàwà Dayà maŋ gbiŋ dìì. 7Kɛɛ nyiiŋ tìyèe aŋ gò wa kòmàŋ àŋ jɔ̀à, esaɓù kɛ̀ wo Ìlesebɛ̀ɛ̀ fè wa wò jɔùŋ kòmaŋ. Eɓìèmàŋjɛ̀wɛ̀ tii, wuŋ yaà wo fanuuŋ nɔɔ̀ŋ Zakalayà àŋ wa naàŋ tiiyè.

8Ke ɗɔ̀ɔ̀ guùŋ ke gbòòɛ wo Zakalayà yaà wa sùà lɛ, yaà nyìnìè e tòmo nyiŋ nɛ̀ ko Saaŋ Zòòlò Dayài ko Jùlusɛ̀làm, yèè wò yaà wa nyìnìè e tòmò wo sìèfèìŋ zòòlo ko fɛ̀ɛ̀fèìŋ Dayài. 9Kè gbòò aŋ sìèfèìŋ zòòlo nyàŋ kuwa wa e langi e tòmo kii nyiŋ nɛ̀ sùà, e yèɛ àŋ naŋ nyɛ̀nɛ̀ŋ lɛ. Àŋ naŋ dàà ke kpɔlɔ, yèè kè naŋ kùwò wo Zakalayà wèè wo sùàŋ wɔŋ kùùkɔ̀ɔ̀ dò siaàŋ ko Saaŋ Zòòlò Dayài, 10nààŋ anyùùŋ nyaŋ gbiŋ sia wa zoolo ko jɔɔlèe e tèèngà wɔŋ kùùkɔ̀ɔ̀ dò siaàŋ sùaŋ. 11Ko fɛɛ̀feìŋ wo màìkà Kanaà Dayà naŋ fòlò wo Zakalayà feìŋ koɓɛ̀i wò suuàŋ wɔŋ kùùkɔ̀ɔ̀ dò siaàŋ lɛ wɔŋ gbɛ̀gbɛ̀ zòòloɔ̀ kɔɔ wɔŋ kùàŋ jìka. 12Ke jìì Zakalayàa naŋ wa tawe yèè e jùù nauŋ nyɛ̀nɛ̀ŋ e teengaà wò naŋ yɛ̀mɛ̀ wo màikàa lɛ̀. 13Kɛɛ wo màikàa nauŋ woò wààŋ, “E jùù ɓɔ̀ è nyɛ̀nɛ̀um Zakalayà! Wo Dayà jàà e zòòlo mɔ̀ɛ̀ kùàŋ dìì, yèè wo jawè mɔɔ̀ŋ Ìlesebɛ̀ɛ̀ do nàŋ kòmò wo jɔ̀àfelaa weèum. Mùŋ kuwa mauŋ jàà e dèèɛ Jɔ̀ɔŋ. 14E kòmauŋ nɛ̀ do nàŋ hìɛ̀ŋ e zɔlɔ̀ ko nɛ̀ɛ̀ŋ muìŋ, yèè ke jii fàa do nàŋ nɔ̀ŋ anyuùŋ zimgbe. 15Wo Jɔ̀ɔŋ do nàŋ nɔ̀ŋ wo ɓɔ̀ìjɔ̀à nɛɛmaŋ wèè wo Kanaà Dayà. Julɔfɔ ɓɔ̀ wò tìà màŋ tala muaŋ ɔ̀ɔ̀ è biyà, yèè e gààŋ wo Jìnàŋ Nɛɛmaàŋ douŋ nàŋ nɔ̀ŋ diɛŋ e yìwìà ke ɗɔɔɛ̀ àŋ douŋ nàŋ kòmò lɛ. 16Yèè wo Jɔ̀ɔŋ do nàŋ nyɛ̀nɛ̀ŋ anyùùŋ Ezɔ̀ɛ̀ nyaŋ zimgbe nyiŋ aŋ kìlà koɓɛ̀ wo Dayà nyiŋ nɔɔ̀ŋ. 17Wò do nàŋ kɔ̀ wo Kanaà ko feìŋ e yìwìà e gààŋ guùŋ nɛ yèè wo jìnàŋ gunɔ̀ɔŋ wo Ìlaajà kuwa wa wɔ. Yèè esàɓù wo Jɔ̀ɔŋ sùà, anyuùŋ kòmaŋ nyàŋ do nàŋ kɛ̀ɛ̀nɛ̀ŋ e gòngo wèè aŋ jɔ̀à nyiŋ nyàŋ. E kìlà anyùùŋ nyaŋ naŋ gììyè wo Dayà maŋhɛɛ nyàŋ do naàŋ nàŋ kɛ̀ɛ̀nɛ̀ŋ maŋ jìì e gòngo siaŋ, yèè aŋ dè ke dòmàŋ anyùùŋ tɔ̀ɔ̀nyaàŋ nyaŋ diɛŋ. E ɗeweɛ̀ lɛɛ̀ wo Jɔ̀ɔŋ do nàŋ nyɛ̀nɛ̀ŋ anyùùŋ aŋ nɔ̀ŋ bànèbane nyiŋ wèè wo Kanaà Dayà.”

18Wo Zakalayà naŋ wòò wo màikàa wààŋ, “Diè mìŋ do nàŋ nyìmè kɛ̀ tɛɛ̀ do nàŋ kaaìŋ? Tiŋ zà yàwi jawè miɔ̀ŋ è naàŋ tiiyè.”

19Wo màikàa naŋ fasàì wààŋ, “Miàŋ nàŋ yaà wo Geeɓulɛ̀, mìŋ sia ko fɛ̀ɛ̀fèìŋ Dayài, wo yèɔ naim tùɔ̀ŋ ko nɛ̀ɛ̀ŋ muìŋ wèè kaum wòò ebò siaŋ lɛɛ̀. 20Kɛɛ muŋ gò hààwè kè miè gbìaŋ miɛ̀ŋ, ke yèɛ do nàŋ hɛɛnɛ̀ŋ e teenga niŋ nɛ̀ diɛŋ lɛ̀. Nààŋ muŋ gò hààwè è yèɛ mìŋ naum woò lɛ, muŋ naàŋ ɓɛ̀nɛ̀ŋ gbòa, yɛi mùŋ do nàŋ nɔ̀ŋ e jèèsùà e yèɛ mìŋ naum woò lɛ e hɛɛnɛ̀ŋ.”

21E tèèngà guùŋ bi sùà, anyùùŋ nyaŋ yaà wa fùlìè wo Zakalayà, kɛɛ è naŋ nyiŋ wa foonò wèè e ɗewe kiiɛ̀ wò yaà wa kòlà sùà ko Saaŋ Zòòlò Dayài lɛ̀. 22Nààŋ wò naŋ wa fòlò ko Saaŋ Zòòlò Dayài, wo gò wa ɓɛ̀nɛ̀ŋ gbòà kò nɛ̀ɛ̀ŋ nyiŋ niìŋ. Yèè àŋ naŋ nyìmè kɛ̀ wò gò e gɔ̀à gò ke jɛ̀ì. Wò naŋ nyiŋ gbùùyè maŋ kùàŋ, kɛɛ wo gò wa wòò è keì gbiŋ.

23Nààŋ e tèèngà e tòmouŋ nɛ̀ ko Saaŋ Zòòlò Dayài naŋ wa jùò, wo Zakalayà naŋ kɛ̀ɛ̀ maŋjɛ̀wɛ ko gboouŋ noo. 24E teenga bà naŋ mààŋ wo jawèuŋ nɔɔ̀ŋ Ìlesebɛ̀ɛ̀ naŋ nɔ̀ŋ le sùà, yèè wèè maŋ wàà nɔɔnɔŋ wo gò wa fòlà kò saaìŋ. 25Wo Ìlesebɛ̀ɛ̀ naŋ wòò koɓɛ̀ wuŋ biì wààŋ, “E nɛ̀ɛŋ wo Kanaà Dayà naŋ nyɛ̀nɛ̀ŋ weèim lɛ̀, è do nàŋ nyɛ̀nɛ̀ŋ anyùùŋ aŋ naàim ɓɛìŋ nììngè fɛ̀ɛ̀ kò ɓài.”

Wo màikàa Geeɓulɛ̀ dàànè ebò e kòmàŋ Jisɛ̀ɛ

26Nààŋ wo Ìlesebɛ̀ɛ̀ yaà wa naàŋ e sùà maŋ wàà nɔɔnɔŋ diè gunùuŋ, wo Dayà naŋ tùɔ̀ŋ wo màikàa àŋ nyaaŋ Geeɓulɛ̀ wɔ, ko jawaì àŋ nyaaŋ Naazɔ̀ɛ̀ wɔŋ fùɔ̀ŋ Galaliìɔ sùà. 27Wò naŋ wa kɔ̀ɔ̀ ke miè gbiàŋ koɓɛ̀ wo jɔ̀ùŋ jɔ̀à bɛ̀ɛ̀ bà àŋ nyaaŋ wo Mèèle. Wo Jòòsɛ e yìwìà ke kpòò Kanaà Dèèweɛ̀ sùà, naŋ wa dìkìè wo Mèèle e jèe kpɔ̀nɔ̀ŋ wèè wo nɔ̀ŋ wo jawèuŋ. 28Wo màikàa naŋ zùùmò wo Mèèle wààŋ, “Tɔɔɓaa e zòòlo yààùm maŋjɛ̀wɛ! E kìlà wo Kanaà Dayà wòum jàà kùàŋ dìì.”

29Ke jìì Mèèleɛ̀ naŋ wa tawe nààŋ wò naŋ kòmò ke miè gbìaàŋ wo màikàa naŋ woò lɛ, yèè wò naŋ kùùnò gòngo sèè mààŋ kiìŋ e zùùmò màikàa naŋ fasàì. 30Kpeiŋ wo màikàa naŋ wòò wo Mèèle wààŋ, “E jùù ɓɔ̀ è nyɛ̀nɛ̀um! Esaɓù kɛ̀ ke jii naŋ fɔ̀ wo Dayà e weèum. 31Mùŋ do nàŋ nɔ̀ŋ le sùà e kìlà maŋ kòmàŋ wo jɔ̀àfelaa. Mùŋ douŋ nàŋ jàà e dèèɛ Jisɛ̀. 32Wò do nàŋ kɛ̀ɛ̀nɛ̀ŋ e gààŋ, yèè àŋ douŋ nàŋ nyààŋ wo Jɔ̀àfèlàà Dàyà Gaàŋ Gbeeɔ̀. Wo Kanaà Dayà douŋ nàŋ nyɛ̀nɛ̀ŋ wo kana, e kìlà wouŋ kìɛ̀ŋ ke kpùà kànà wo nèwàènèweuŋ nɔɔ̀ŋ Dèèwe. 33Wò do nàŋ nɔ̀ŋ ke sààŋ Jègɔɛ̀ diɛŋ ko Ezɔ̀ɛ̀ wèè Julɔfɔ, yèè e kanauŋ nɛ̀ naàŋ wa nàwèè kɛ̀ɛ̀nɛ̀ŋ kò dìa.”

34Wo Mèèle naŋ dàwè wo màikàa wààŋ, “Mìŋ yaà wo jɔ̀ùŋ jɔ̀à bɛ̀ɛ̀, dièsɔa tɛɛ̀ do nàŋ kaaìŋ?”

35Wo màikàa naŋ fasàì wààŋ, “Wo Jìnàŋ Nɛɛmaàŋ doum nàŋ dèyè diɛŋ, yèè e gààŋ Dayà Gaàŋ Gbeeɔ̀ doum nàŋ ɓùwò. Weètii mùŋ do nàŋ nyààŋ wo jɔ̀à nɛɛmaŋ wɛɛ̀ wo Jɔ̀àfèlàà Dayàa. 36Wo wùìya mɔɔ̀ŋ Ìlesebɛ̀ɛ̀ wuŋ pɛɛ wò yaà hinie wo kòmàŋ wo jɔ̀àfelaa, jòòpɛɛ wò naàŋ tiiyè. Wo nyùùŋ gbiŋ fè wa goongo kɛ̀ wò do nàŋ kɛ̀ɛ̀nɛ̀ŋ wò jɔ̀à, kɛɛ wuŋ bi kòò wò yaà naàŋ e sùà maŋ wàà nɔɔnɔŋ dièguùŋ. 37Ɓɔ̀ è foonòum wèè è yèɛ mìŋ naum woò lɛ, esaɓù kɛ̀ e nɛ̀ŋ gbiŋ fè è yèɛ wo Dayà fè ɓɛ̀nɛ̀ŋ nyɛ̀nɛŋ lɛ̀.”

38Wo Mèèle naŋ woò wààŋ, “Miàŋ nàŋ yaà wo jɔùŋ ɓɔìjɔ̀àa wèè wo Kanaà Dayà. Tɔ̀ e hɛɛnɛ̀ŋ yɛi ko nɛ̀ɛ̀ŋ miìŋ màànààŋ mùŋ naŋ woò lɛ.” Yèè wo màikàa nauŋ jòò wò naŋ kɔ̀.

Wo Mèèle jààmè wo Ìlesebɛ̀ɛ̀

39E teenga kpuu naŋ mààŋ yèè wo Mèèle naŋ banebànè fiò fiò, wò naŋ kɔ̀ ko jawa bà wɔŋ fùɔ̀ŋ Juɗàa sùà wɔŋ fàà maŋ toò maŋ. 40Wò naŋ kɔ̀ ko gbòò Zakalayà, yèè wò naŋ zùùmò wo Ìlesebɛ̀ɛ̀. 41Nààŋ wo Ìlesebɛ̀ɛ̀ naŋ kòmò ke mìè zùùmò Mèèleɛ̀, wo jɔ̀àa ko suàuŋ niìŋ naŋ mɛɛmɛ̀ɛ̀ŋ. Yèè wo Jìnàŋ Nɛɛmaàŋ naŋ dèyè wo Ìlesebɛ̀ɛ̀ diɛŋ. 42Kpeiŋ ke miè gbeeo sùà, wo Ìlesebɛ̀ɛ̀ naŋ wòò wo Mèèle wààŋ, “Wo Dayà wòum gbìàŋ e zòòlo maŋjɛ̀wɛ è nìàŋ wo jɔùŋ ɗewe gbiŋ, yèè e zòòlo yaà wo jɔ̀àa mùŋ do nàŋ kòmò wɔ maŋjɛ̀wɛ. 43Wèè kiìŋ wo yèyè Kana miɔ̀ŋ naŋ ɓɛ̀nɛ̀ŋ hnàŋ ko nɛ̀ɛ̀ŋ miìŋ wèè woim jaamè? 44Mìŋ naŋ nɔŋ kòmò ke mìè zùùmo mɔɛ̀ŋ fa, wo jɔ̀àa ko suà miìŋ naŋ gè zɔlɔ̀ yèè wò naŋ mɛɛmɛ̀ɛ̀ŋ. 45Wo Kanaà Dayà naum gbìɛ̀ŋ e zòòlo maŋjɛ̀wɛ esaɓù kɛ̀, mùŋ naŋ haawè kɛ̀ wò do nàŋ nyɛ̀nɛ̀ŋ e yèɛ wò nàŋ woò lɛ.”

Wo Mèèle naŋ tɛ̀nɛ̀ŋ wo Dayà wɔŋ nùŋ sùà

46Wo Mèèle wààŋ,

“Mìŋ naŋ tɛ̀nɛ̀ŋ wo Kanaà Dayà e yìwìà ke jii miɛ̀ŋ gbiŋ sùà.

47Wɔŋ nyììŋ jinàŋ miɔ̀ŋ yaà e zɔlɔ̀ sùà esàɓù Dayà, wo Nyuùŋ Jòèye miɔ̀ŋ.

48Wo tɔ̀ɔ̀ e mànaŋ ko nɛ̀ɛ̀ŋ miìŋ, miàim wo jɔùŋ ɓɔìjɔ̀à jɔ̀ɔ̀lɔuŋ nɔɔ̀ŋ.

E yìwìà nàaŋ, anyùùŋ nyaŋ gbiŋ doim nàŋ nyààŋ wo nyuùŋ kɛ̀ɛ̀nɛ̀ŋ zɔlɔ̀,

49esaɓù wo Dàyà Gaàŋ Gbeeɔ̀ nyɛ̀nɛ̀ŋ maŋ keì gbeegbèè e weèim.

E deèuŋ nɛ̀ yaà e dèè nɛɛmaŋ.

50E yìwìà koɓɛ̀ anyùùŋ nyaŋ gbiŋ e ɗuunyaàŋ,

wò tɔɔ̀ ke nyowo koɓɛ̀ anyùùŋ nyaŋ zoolàuŋ nyaŋ.

51Wò vùlɔ̀ŋ wɔŋ kùàŋ gaàuŋ nɔɔ̀ŋ

wèè wo ɓààyè anyùùŋ nyaŋ ɓemàŋ nyiŋ bi gbee nyàŋ e kpùlìà maŋ gòngo nyiŋ màŋ maŋ jii nyiŋ màŋ sùà.

52Wo Dayà deeyà aŋ kana kùwìè gààŋ nyaŋ e yìwìà maŋ kpùà kana nyiŋ màŋ diɛŋ,

yèè wò nyɛ̀nɛ̀ŋ anyùùŋ nyaŋ naŋ dèèyè nyiŋ bi nyàŋ, àŋ miŋ jɛ̀ì diɛŋ.

53Wò kiɛ̀ŋ e nɛ̀ŋje siaŋ koɓɛ̀ anyùùŋ nyaŋ e jìè yaà nyaŋ,

yèè wò nyɛnɛŋ anyuùŋ bàne nyàŋ àŋ kòà le siwè foo.

54Wò kpuumàŋ wo ɓɔìjɔ̀àuŋ nɔɔ̀ŋ Ezɔ̀ɛ̀,

wò tɔɔ̀ anyunùuŋ nyàŋ ke nyowo e teenga gbiŋ.

55Wo Kanaà Dayà naŋ jɔ̀ɔ̀ e ɗààhiì wèè wo tɔ̀ɔ̀ ke nyowo koɓɛ̀ wo nèwàènèwe wiɔ̀ Eɓulɔhɛɛ̀ŋ, yèè koɓɛ̀ ke kpoouŋ nɛɛ̀ŋ gbiŋ wèè julɔfɔ!”

56Wo Mèèle naŋ wa nɔ̀ŋ koɓɛ̀ Ìlesebɛ̀ɛ̀i wèè maŋ wàà taai, paŋgàà wò naŋ wa kɛ̀ɛ̀ maŋjɛ̀wɛ ko jawauŋ noo.

Wo Ìlesebɛ̀ɛ̀ kòmàŋ wo jɔ̀àuŋ nɔɔ̀ŋ Jɔ̀ɔŋ

57E teengaà wèè wo Ìlesebɛ̀ɛ̀ kòmàŋ wo jɔ̀àuŋ nɔɔ̀ŋ naŋ haì, yèè wò naŋ kòmò wo jɔ̀àfelaa. 58Anyuùŋ jɛ̀i dàwiuŋ nyàŋ maŋ gboo kuaŋ màŋ sùà, yaà aŋ wùìyauŋ nyàŋ naŋ kòmò e ɗeweɛ̀ wo Kanaà Dayà nauŋ tɔ̀ɔ̀ ke nyowo gbee lɛ̀, yèè nyiŋ gbiŋ naŋ gè e zɔlɔ̀ weèuŋ.

59Nààŋ maŋ ɗɔ̀ɔ̀ nɔɔnɔŋ le taai naŋ haì, àŋ nauŋ jàà kpùa nààŋ maŋ Sàwà Mòòze màŋ naŋ woò lɛ. Àŋ manaŋ wa auŋ jàà e dèè dèdauŋ nɔɔ̀ŋ Zakalayà. 60Kɛɛ wo Ìlesebɛ̀ɛ̀ naŋ wa woò wààŋ, “Kpele! E deèuŋ nɛ̀ nàŋ yaà Jɔ̀ɔŋ.”

61Anyùùŋ nyaŋ nauŋ woò nyààŋ, “Wo nyùùŋ gbiŋ fè kè kpooiŋ nɛɛ̀ŋ sùà wèè wo kɛ̀ɛ̀nɛ̀ŋ è dèè Jɔ̀ɔŋ.” 62Kpeiŋ anyùùŋ nyaŋ naŋ gbùùyè maŋ kùàŋ koɓɛ̀ dèdauŋ nɔɔ̀ŋ Zakalayà, àŋ nauŋ dawè sèè mààŋ kiìŋ è dèè wò manaŋ wo jàà wo jɔ̀àfelaauŋ nɔɔ̀ŋ.

63Wo Zakalayà naŋ dawè wèè wɔŋ kuùfàà sìngìà diɛŋ. Yèè wò naŋ sìngè wò naŋ woò wààŋ, “E deèuŋ nɛ̀ nàŋ yaà wo Jɔ̀ɔŋ.” Tɛɛ̀ naŋ wa fòònò anyùùŋ nyaŋ gbiŋ. 64Ko fɛɛ̀feìŋ wo Zakalayà naŋ ɓɛìŋ gbòò, yèè wò naŋ tɔ̀ɔ̀tù wo Dayà tɛ̀nɛŋ. 65E jùù naŋ wa nyɛ̀nɛ̀ŋ anyuùŋ jɛ̀i dàwiuŋ nyàŋ maŋ gboo kuaŋ maŋ sùa, e nyaàiŋ dè e yèɛ naŋ kaàiŋ lɛ. Anyùùŋ nyaŋ gbiŋ wɔŋ fàà maŋ toò maŋ ko Jùdià naŋ ɓèmè e keì lɛɛ̀ wèè e nɔ̀ŋ e keì wòo. 66Anyùùŋ nyaŋ gbiŋ naŋ niŋ wa kòmò nyaŋ, naŋ wòò maŋ jii nyiŋ màŋ sùà nyààŋ, “Ɓòò wo jɔ̀à wɛɛ̀ do nàŋ nɔ̀ŋ?” Esaɓù kɛ̀ è naŋ wa tɔɔ̀ janjai kɛ̀ e gààŋ Kanaà Dayà yàaùŋ wa maŋjɛ̀wɛ.

E yèɛ wo Zakalayà naŋ wa woò wààŋ è dò nàŋ kaaìŋ lɛ

67Wo Jìnàŋ Nɛɛmaàŋ naŋ wa dèyè wo dèdà Jɔ̀ɔɔ̀ŋ Zakalayà diɛŋ, yèè wò naŋ gbòò ke mìè Dayàa wààŋ,

68“Tɛ̀nɛ̀ŋ wiìŋ wo Kanaà, wo Dàyà anyùùŋ Ezɔ̀ɛ̀ nyaŋ!

Wò hnàŋ wèè wo joeyè anyunùuŋ nyàŋ.

69Wò wi kìɛ̀ŋ wo nyuùŋ kùwìè e gaàŋ gbee wèè wo nɔ̀ŋ wo Nyuùŋ Jòèye wiɔ̀,

e yìwìà ke kpòò wo ɓɔìjɔ̀àuŋ nɔɔ̀ŋ Dèèwe sùà.

70E teenga gɔuo sùà, wo Kanaà Dayà naŋ wa gbòò e yìwìà aŋ kèèlà nɛɛmauŋ nyàŋ sùà kɛ̀,

71wò do wi wa nàŋ joeyè e yìwìà aŋ joo wi nyàŋ sìwè,

yèè wo wi joeyè e yìwìà anyùùŋ nyaŋ gbiŋ naŋ wi wùɔ̀ŋ nyaŋ sìwè.

72Wo Dayà wààŋ wò do nàŋ tɔ̀ɔ̀ ke nyowo koɓɛ̀ anyuùŋ wi nyàŋ,

e kìlà wo jàà e ɗààhìì e mìèsùàgùùŋ nɛɛmauŋ nɛ̀ jii.

73-74Wò naŋ gboonò koɓɛ̀ Eɓulɔhɛɛ̀iŋ kɛ̀,

wò do wi naŋ joeyè e yìwìà aŋ joo wi nyàŋ sìwè.

Kpeiŋ wò do wi nàŋ gè e jùù sùà wèè euŋ zoolò,

75wèè kɛ̀ e nɔ̀iŋ e nɛɛmaŋ yèè anyùùŋ tɔ̀ɔ̀nyaàŋ ko fɛɛ̀fenùuŋ

maŋ ɗɔɔ màŋ gbiŋ maŋ nyiiŋ gèe wi màŋ sùà.

76“Yèè muàŋ jɔ̀à miɔ̀ŋ, àŋ doum nàŋ nyààŋ wo kèèlà Dàyà Gaàŋ Gbeeɔ̀.

Esaɓù kɛ̀ mùŋ do nàŋ kɔ̀ wo Kanaà ko feìŋ,

wèè maŋ bànèbànè ke dòmaàŋ weèuŋ,

77wèè maŋ wòò anyunùuŋ nyàŋ kɛ̀ àŋ dò nàŋ jòèyè,

esaɓù kɛ̀ wò do nàŋ jùùyè maŋ jùumù nyiŋ màŋ hakɛ̀.

78E mànàŋ Dayàa yèè e tɛ̀ɛ̀tɛ̀ɛ̀uŋ nɛ̀,

do wi nàŋ mɛ̀ɛ̀ŋ diɛŋ

mààŋ e gɔɛɛ̀ e yèɛ folo ke nyiliɛ̀ lɛ.

79Yèè yàwi nààŋ nyùùŋ nyaŋ joàìŋ ke nyìwì e fàa sùà nyaŋ, e gbolòùŋ lɛɛ̀ do wi nàŋ mɛ̀ɛ̀ŋ diɛŋ wèè e wi

tɔ̀ɔ̀ ke dòmaàŋ kɔ̀à koɓɛ̀ wɔŋ nyììŋ gè ke jii fàa sùà yɛ̀.”

80Wo Jɔ̀àa naŋ wa dɛɛ̀ ke kpùnaŋ yèè wo jinàaŋ sùà. Wo Jìnàŋ Kanaà Dayà nauŋ wa kìɛ̀ŋ e gaàŋ gbee. Wò naŋ wa jèè ke fòùngà e diì wòaà diɛŋ e jèèsùà e hàì ke ɗɔɔɛ̀ wò naŋ wa fòlò ko ɓài koɓɛ̀ anyùùŋ nyaŋ ko Ezɔ̀ɛ̀ lɛ.

Currently Selected:

Luù 1: WFESD

Highlight

Copy