Luù 2

E kòmàŋ kìì Jisɛ̀ Kulaìɛ

(Maafiù 1.18-25)

1E teenga lii sùà wo Siisɔ̀ Àgɔsɔ̀, wo Kànà Gbèè wɔŋ fùɔ̀ŋ anyùùŋ ko Luùm nyaŋ naŋ wa hèè ke sàwà wààŋ kɛ̀, aŋ sìngà maŋ dèè anyùùŋ nyaŋ gbiŋ wɔŋ fɛi diɛŋ wɔŋ fuɔŋ bi sùà. 2E kpɛ̀nɛ̀ŋ anyuùŋ jiɛ̀jiɛ̀ɛ lɛɛ̀ wa, e teenga bi zà wo Kɔ̀liniɔ̀ nàŋ yaà wa wo kanaà wèè wɔŋ fùɔ̀ŋ Siilìàa. 3Wo nyùùŋ gbiŋ e teenga bi sùà, naŋ wa kɔ̀ ko jàwà wuŋ biì, wèè wo sìngà e deèuŋ nɛ̀ wɔŋ fɛi diɛŋ.

4Wo Jòòsɛ naŋ wa yèwè ko Naazɔ̀ɛ̀ wɔŋ fùɔ̀ŋ Galaliìɔ sùà, yèè wò naŋ kɔ̀ ko Bɛfilehɛɛ̀ŋ wɔŋ fùɔ̀ŋ Jùdiàa sùà, ko jàwà kùmìàŋ wo Kanaà Dèèweì. Kuŋ wo Jòòsɛ naŋ wa kɔ̀, esaɓù kɛ̀ wò yewe wa ke kpòò Dèèweɛ̀ sùà. 5Wo Jòòsɛ yaà Mèèle, wo jawè dìkìà jèì kpɔ̀nɔ̀uŋ nɔɔ̀ŋ wo yèɔ yaà wa le sùà wɔ, naŋ wa kɔ̀ wèè aŋ sìngà maŋ deè nyiŋ màŋ wɔŋ fɛi diɛŋ, 6e teengaà àŋ yaà wa ko Bɛfilehɛɛ̀ŋ lɛ, e teengaà naŋ haì wèè wo Mèèle wo kòmàŋ wo jɔ̀àuŋ nɔɔ̀ŋ. 7Nààŋ aŋ gò wa yɛ̀mɛ̀ kò hàwe kò sààŋ nyùùnèènyɛiŋ nyàŋ, wo Mèèle naŋ wa kùmìè wo jɔ̀àfelaa jiɛ̀ jiɛ̀uŋ nɔɔ̀ŋ ko kùlò aŋ nyìlì nyaŋ, yèè wò nauŋ kpènèkpènè maŋ dèè wouŋ hàà maŋ dɛɛ màŋ diɛŋ wɔŋ gbòlàa sùà koɓɛ̀i aŋ nyìlì nyaŋ gbilià lɛ.

Anyuùŋ tùnìàŋ ɓaawaa nyàŋ yaà aŋ màikà nyaŋ

8Anyuùŋ tùnìàŋ ɓaawaa bà yaà wa wɔŋ fuɔɔ̀ŋ fàà wiiŋ ke fòùngà e diì wòaà diɛŋ ko yɛ̀ɛ̀mɛ̀ ke gbòò aŋ ɓaawaa nyiŋ nyàŋ diɛŋ. 9Ko fɛɛ̀feìŋ wo màìkà Kanaà naŋ dèyè ko nɛ̀ɛ̀ŋ nyiŋ niìŋ, yèè e gbòlòùŋ mɛ̀ɛ̀ŋ Kanaà naŋ nyiŋ dè e nyiŋ gbàì e kɔɔ. E jùù naŋ wa nyɛ̀nɛ̀ŋ anyuùŋ tùnìàŋ aŋ ɓaawaa nyàŋ. 10Kɛɛ wo màikàa naŋ nyiŋ woò wààŋ, “E jùù ɓɔ̀ è nyɛ̀nɛ̀iŋ! Mìŋ kuwa ebò siaŋ wèè kaiŋ woò, e yèɛ do naŋ nyɛ̀nɛ̀ŋ anyùùŋ nyaŋ gbiŋ aŋ gè zɔlɔ̀. 11Nàaŋ ke ɗɔɔ yɛɛ̀ ko jàwà Dèèweì, àŋ kòmàŋ wo Nyuùŋ Jòèyeiŋ nɔɔ̀ŋ, wuŋ nàŋ yaà wo Jisɛ̀ Kulaì wo Kanaà. 12Yèè e ɗeweɛ̀ lɛɛ̀ nìŋ douŋ nàŋ nyìmè, nìŋ do nàŋ mɛ̀ɛ̀ŋ wo jɔaa àŋ nauŋ kpènèkpènè maŋ dèè wò hawa maŋ dɛɛ màŋ diɛŋ koɓɛ̀i aŋ nyìlì nyaŋ gbilià lɛ wɔŋ gbòlàa sùà ko kùlò aŋ nyìlì nyaŋ.”

13Ko fɛɛ̀feìŋ ke gbòò aŋ màikà zimgbe naŋ dèyè e yìwìà ko àìjɛnɛ̀ŋ aŋ gbònò wo màikà wɛɛ̀ kɔɔ yèè àŋ naŋ tɔ̀ɔ̀tù tɛ̀nɛ̀ŋ wo Dayà nyààŋ,

14“E jòòwo gbee yaà wèè Dayà ko àìjɛnɛ̀ŋ,

yèè ke jii fàa nɔ̀ŋ koɓɛ̀ anyuùŋ kpùuŋ nyàŋ e ɗuunyaàŋ aŋ yè nyaŋ nauŋ fɔ̀ɔ̀yɛ̀ ke jii nyàŋ.”

15Nààŋ aŋ màikà nyaŋ naŋ kɛ̀ɛ̀ maŋjɛ̀wɛ̀ ko àìjɛnɛ̀ŋ, anyuùŋ tùnìàŋ ɓaawaa nyàŋ naŋ wòò nyiŋ bi e fèemàŋ nyààŋ, “Kàwiìŋ ko Bɛfilehɛɛ̀ŋ wèè e yɛmɛ̀iŋ e yèɛ wo Kanaà Dayà naŋ nyɛ̀nɛ̀ŋ yèè wò naŋ wi yaà woò lɛ̀.”

16Àŋ naŋ kɔ̀ maŋ dùaŋ dùaŋ aŋ mɛ̀ɛ̀ŋ wo Mèèle yaà wo Jòòsɛ, yèè àŋ naŋ yɛ̀mɛ̀ wo jɔaà wò hawa maŋ dɛɛ màŋ diɛŋ koɓɛ̀i aŋ nyìlì nyaŋ gbilià lɛ wɔŋ gbòlàa sùà. 17Nààŋ anyuùŋ tùnìàŋ ɓaawaa nyàŋ naŋ yɛ̀mɛ̀ wo Jisɛ̀, àŋ naŋ wòò anyuùŋ kòmauŋ nyàŋ e mìè nyààŋ wo màikàa naŋ nyiŋ fòlò feìŋ wɔ e nyaàiŋ dè wo jɔ̀àa. 18È naŋ wa fòònò anyùùŋ nyaŋ gbiŋ naŋ wa kòmò e yèɛ anyuùŋ tùnìàŋ ɓaawaa nyàŋ naŋ woò lɛ. 19Kɛɛ wo Mèèle naŋ wa jàà maŋ keì mɛɛ̀ŋ gbiŋ jii yèè wò naŋ miŋ nɔ̀ŋ goongo kɛ̀ kiìŋ maŋ mìè gbòa mɛɛ̀ŋ naŋ fasàì. 20Nààŋ anyuùŋ tùnìàŋ ɓaawaa nyàŋ yaà wa kɛ̀ɛ̀ sùà maŋjɛ̀wɛ, àŋ yaà wa tɛ̀nɛ̀ŋ sùà wo Dayà àŋ yaà wòò maŋ keì sìàŋ e weèuŋ. Esaɓù kɛ̀ e yèɛ gbiŋ àŋ naŋ wa kòmò yèè àŋ naŋ yɛmɛ̀ lɛ naŋ wa nɔ̀ŋ e tɔ̀ɔ̀nyaàŋ màànààŋ nɔŋ wo màikàa naŋ nyiŋ wa woò lɛ.

Àŋ jàà wo Jisɛ̀ e dèè

21Nààŋ maŋ ɗɔ̀ɔ̀ nɔɔnɔŋ le taai naŋ haì, anyùùŋ kòmàŋ Jisɛ̀ nyaŋ naŋ nyɛ̀nɛ̀ŋ e yèɛ maŋ Sàwà Mòòze màŋ naŋ woò wèè aŋ nyɛ̀nɛ̀ŋ lɛ, àŋ nauŋ jàà kpùa, yèè àŋ nauŋ jàà e dèèɛ Jisɛ̀, màànààŋ nɔŋ wo màikàa naŋ wa wòò wo Mèèle lɛ̀.

Àŋ kìɛ̀ŋ wo Jisɛ̀ koɓɛ̀ Kanaà Dayà ko Saaŋ Zòòlò Dayài

22E teengaà naŋ wa haì wèè wo Jòòsɛ yaà Mèèle aŋ nyɛ̀nɛ̀ŋ e langiɛ̀ maŋ Sàwà Mòòze màŋ naŋ woò wèè anyuùŋ kòmaŋ aŋ nyɛ̀nɛ̀ŋ lɛ, wèè aŋ nɔ̀ŋ e zɛ̀nɛŋ nyiŋ sèè àŋ komo wo jɔ̀à nyiŋ nɔɔ̀ŋ. Àŋ naŋ kɔ̀ɔ̀ wo Jisɛ̀ ko Saaŋ Zòòlò Dayài ko Jùlusɛ̀làm yèè àŋ nauŋ kìɛ̀ŋ wo Kanaà Dayà, 23nààŋ è yaà sìnga niŋ maŋ Sàwà Mòòze màŋ sùà lɛ, “Wo jɔ̀àfelaa kòmaŋ jiɛ̀jiɛ̀ gbiŋ wèè ko sùà yèyeuŋ nɔɔ̀ŋ, wo nɔ̀ŋ kìɛuŋ e nɛɛmaŋ sùà koɓɛ̀ wo Kanaà Dayà.” 24Àŋ naŋ wa kɔ̀ wèè aŋ gììyà aŋ pòòpòò tìyèe ɔ̀ɔ̀ aŋ bòòùm tìyèe saaà, nààŋ ke Sàwà Kanaà Dayàa naŋ woò lɛ.

25E teenga lii sùà wo kenàŋ bà àŋ nyaaŋ wa wo Simiɔ̀ŋ hewa jòò ko Jùlusɛ̀làm. Wò yaà wa wo nyùùŋ tɔ̀ɔ̀nyaàŋ yèè wò duɔŋ wa wo Dayà, e kìlà wò yaà wa fùlìè wo Dayà wèè wo joeyè e kìlà wo kiɛ̀ŋ anyùùŋ Ezɔ̀ɛ̀ nyaŋ ke jii nyingè, nààŋ wò hewa nàŋ tùɔ̀ŋ wo yèɔ wò naŋ tàeɗùù wèè wo joeyè anyùùŋ nyaŋ e ɗuunyaàŋ. E kìlà nààŋ wo Jìnàŋ Nɛɛmaàŋ yàaùŋ wa maŋjɛ̀wɛ, 26wo Dayà nauŋ wa woò e yìwìà wo Jìnàŋ Nɛɛmaàŋ sùà wààŋ kɛ̀, wo naàŋ fɔ̀ e jèèsùà wo yɛ̀mɛ̀ wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, wo Kulaìɔ. 27Nààŋ wo Mèèle yaà wo Jòòsɛ naŋ wa kɔ̀ɔ̀ Jisɛ̀ ko Saaŋ Zòòlò Dayài wèè aŋ nyɛ̀nɛ̀ŋ e langiɛ̀ ke Sàwà Mòòzeɛ̀ naŋ woò wèè wo jɔ̀à kòmaŋ jɛi lɛ̀, wo Jìnàŋ Kanaà Dayà naŋ wa wòò wo Simiɔ̀ŋ wèè wo ka ko Saaŋ Zòòlò Dayài. 28Wo Simiɔ̀ŋ naŋ wa ɓèmè wo Jisɛ̀ wouŋ hàà ko kùàŋ sùà yèè wò naŋ zòòlò Dayà. Wò naŋ woò wààŋ,

29“Kanaà, màŋ nyɛ̀nɛ̀ŋ e yèɛ mùŋ naŋ wa woò lɛ,

tɔ̀ wo ɓɔìjɔ̀à mɔɔ̀ŋ wo fɔɔyɛ̀ naàŋ ke jii fàa sùà.

30Esaɓù kɛ̀ e fɛɛ̀ kòmàŋ mɛ̀ è yɛ̀mɛ̀ e jòèye mɔ̀ɛ̀,

31e yèɛ anyùùŋ nyaŋ gbiŋ maŋ fuɔŋ màŋ sùà àŋ dò nàŋ yɛmɛ̀ lɛ,

32e gbolòùŋ wèè e tɔ̀ɔ̀ ke kpèè mɔɛ̀ŋ koɓɛ̀ anyùùŋ nyaŋ fè àŋ Juùù nyaŋ,

yèè wèè e jòòwo mɔ̀ɛ̀ koɓɛ̀ anyùùŋ nyàŋ ko Ezɔ̀ɛ̀.”

33È naŋ wa fòònò anyùùŋ kòmàŋ Jisɛ̀ nyaŋ wèè e yèɛ àŋ naŋ wa kòmò wo Simiɔ̀ŋ naŋ woò lɛ e nyaàiŋ dè wo jɔ̀àa. 34Wo Simiɔ̀ŋ naŋ nyiŋ zòòlò diɛŋ yèè wò naŋ wòò wo Mèèle, wo nààŋ jɔ̀àa wààŋ, “Wo Dayà naŋ tà wo jɔ̀à wɛɛ̀ ɗùù wèè wo nyɛ̀nɛ̀ŋ anyuùŋ zimgbe ko Ezɔ̀ɛ̀ aŋ sɔ̀àà, yèè aŋ bà nyiŋ aŋ yèwà e fàa dìì aŋ sie. Wò do naŋ nɔ̀ŋ e tɔ̀ɔ̀màŋsèì e keì, yèè anyuùŋ zimgbe naàuŋ jàà kùàŋ dìì. 35Wò do nàŋ ɓàà ke gbùnù maŋ gòngo nyiŋ maŋ. E kìlà ke nyowo doum naŋ kpɛ̀lɛ̀ ke jiio sùà mààŋ e kòyà ɗùà naŋ jùwò wɔŋ nyììŋ jinàŋ mɔɔ̀ŋ.”

36Wò wɛ̀ìjì Dayà gɔu bà yaào wa àŋ nyaaŋ wo Anàŋ, wo jɔ̀àjɔ̀ùŋ Faanùɔŋ e yìwìà ke kpòò Asɔ̀ɛ sùà. Wò naŋ wa nɔ̀ŋ ke yɛ̀ɛ̀ wɔŋ nyiiŋ gèeuŋ nɔɔ̀ŋ sùà wèè maŋ dòà nɔɔnɔŋ le tìyèe, yèè wo fanuuŋ nɔɔ̀ŋ naŋ fɔ̀. 37Kɛɛ wò yaà wa naàŋ maŋ doa kpɛ̀ùŋ tiinàŋ jɛ̀wɛ̀ tiinàŋ. E dùùm yèè maŋ gɔɛɛ wò hewa jòò ko Saaŋ Zòòlò Dayài wò yaà zòòlò Dayà wò kuwo ke tɔùŋ. 38E tèèngà guùŋ bi sùà wo Anàŋ naŋ hnè ko Saaŋ Zòòlò Dayài, nààŋ wò naŋ yɛ̀mɛ̀ wo jɔ̀àa, wò naŋ gè Dayà ke sɛ̀ yèè wò naŋ wòò e kèè wo jɔ̀àa koɓɛ̀ anyùùŋ nyaŋ gbiŋ yaà wa yɛ̀ɛ̀mɛ̀ dòmaŋ wèè wo Dayà jòèyè anyùùŋ nyaŋ ko Jùlusɛ̀làm.

E kɛ̀ɛ nyiŋ nɛ̀ maŋjɛ̀wɛ ko Naazɔ̀ɛ̀

39Nààŋ àŋ naŋ wa kpɛ̀ɛ̀yɛ̀ nyɛ̀nɛ̀ŋ e langiɛ̀ ke Sàwà Kanaà naŋ woò lɛ, àŋ naŋ kɛ̀ɛ̀ maŋjɛ̀wɛ ko Galaliì, ko jawa nyiŋ niìŋ Naazɔ̀ɛ̀. 40Wo jɔ̀àa naŋ dɛɛ̀ wo kamàìŋ e gààŋ yaà e jiikɛ̀ɛ sùà, e kìlà e mànàŋ Dayàa yàaùŋ wa maŋjɛ̀wɛ.

Wo felaajɔaà Jisɛ̀ ko Saaŋ Zòòlò Dayài

41Wɔŋ doa gbiŋ anyùùŋ kòmàŋ Jisɛ̀ nyaŋ hewa kà ko Jùlusɛ̀làm wèè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ.#2.41 Ɗaa Gèe Hɔ̀ɛ̀ɛ̀ŋ Diɛɔ̀ŋ Wɔŋ ɗàà zɔ̀lɔ̀ gè aŋ Hiɓulù nyaŋ e nyaàiŋ dè ke ɗɔɔɛ̀ wo màikàa naŋ wa nììnyè maŋ saaŋ màŋ àŋ naŋ wa jìè maŋ sɛ̀ìŋ maŋ aŋ Hiɓulù nyaŋ yaà wa dìì maŋ wèè wo nyiŋ joeyè, yèè wò naŋ wa jìwè aŋ jɔ̀àfèlàà kòmàŋ jìɛ̀jìɛ̀ aŋ nyùùŋ Ijè nyaŋ maŋ saaŋ nyiŋ màŋ dìì. 42E teengaà wo Jisɛ̀ naŋ hàì maŋ dòà zììyà jɛ̀wɛ̀ tìyèe lɛ̀, wuŋ yaà anyuùŋ kòmauŋ nyàŋ naŋ kɔ̀ ko Jùlusɛ̀làm wèè wɔŋ ɗaa gèeɔ̀. 43Nààŋ wɔŋ ɗaaà naŋ wa jùò, àŋ naŋ kɛ̀ɛ̀ maŋjɛ̀wɛ, wo felaajɔaà Jisɛ̀ wuŋ naŋ wa jòò jɛ̀wɛ̀ ko Jùlusɛ̀làm, kɛɛ anyuùŋ kòmauŋ nyàŋ gò wa nyìmàŋ kɛ̀ wòo joo, 44àŋ yaà wa goongo kɛ̀ wo Jisɛ̀ yaà anyuùŋ gbànaŋ nyàŋ yaà wa kààìŋ koɓɛ̀ guùŋ, yèè àŋ naŋ kɔ̀ fauŋ ke ɗɔɔ yii paŋgàà àŋ naŋ nyìmè kɛ̀ wo gò nyiŋ dè màŋjɛ̀wɛ. 45Nààŋ aŋ gòuŋ wa yɛmɛ̀, àŋ naŋ kɛ̀ɛ̀ maŋjɛ̀wɛ ko Jùlusɛ̀làm ko kaameuŋ. 46Maŋ ɗɔ̀ɔ̀ tìyèe wɔŋ taaiɔ̀ sùà, àŋ naŋ mɛ̀ɛ̀ŋ wo Jisɛ̀ wò jaa ko Saaŋ Zòòlò Dayài yaà kààmɔ̀ɔ̀ŋ maŋ Sàwà Dayà nyaŋ, wò yaà kùmìè e yèɛ àŋ yaà woo lɛ̀ yèè wò yaà nyiìŋ gbìàŋ sùà maŋ màaŋdàwè. 47È naŋ wa fòònò anyùùŋ nyaŋ gbiŋ nauŋ wa kumiè nyaŋ wèè e ɗeweɛ̀ wo Jisɛ̀ yaà wa fàsàì sùà maŋ màaŋdàwè maŋ lɛ̀. 48È naŋ wa fòònò anyuùŋ kòmauŋ nyàŋ nààŋ àŋ nauŋ wa yɛmɛ̀, yèè wo nààŋ nauŋ dawè wààŋ, “Jɔ̀à wɛɛ̀, wèè kiìŋ mùŋ naŋ wi yɛi nyɛ̀nɛ̀ŋ? Wo dèdaum yèè miàŋ è yaà ke jii sɛ̀ɛ gbee sùà e ɗɔ̀ɔ̀ tìyèeɛ̀ ko kaameum.”

49Wo Jisɛ̀ naŋ nyiŋ fasàì wààŋ, “Wèè kiìŋ nìŋ yààìm kaame? Niŋ nyimààŋ kɛ̀ mìŋ kuwa ka nɔ̀ŋ kò sààŋ Dèda miɔ̀ŋ?” 50Kɛɛ aŋ gò wa nyìmàŋ kɛ̀ kiìŋ màŋ mìè gbòauŋ màŋ naŋ fasàì.

51Kpeiŋ wo Jisɛ̀ naŋ nyiŋ dè maŋjɛ̀wɛ àŋ naŋ kɔ̀ ko Naazɔ̀ɛ̀, yèè wò he nyiŋ wa jɔ̀ɔ̀lɔ̀ dìì. Wo Mèèle naŋ wa bànè maŋ keì wòo mɛɛ̀ŋ gbiŋ hàa ke jiiuŋ nɛɛ̀ŋ sùà. 52Wo Jisɛ̀ naŋ wa dɛɛ̀ ke kpùnaŋ yaà e jiikɛ̀ɛ sùà, e kìlà e mànàŋ Dayàa e hààwè e mànàŋ anyùùŋ nyaŋ yàaùŋ wa maŋjɛ̀wɛ.

Currently Selected:

Luù 2: WFESD

Highlight

Copy