Luù 3

Ke mìè gbìàŋ Jɔ̀ɔŋ Gùà Nyùnɔ̀ɔŋ koɓɛ̀ anyùùŋ nyaŋ

(Maafiù 3.1-12; Mài 1.1-8; Jɔ̀ɔŋ 1.19-28)

1È yaà wa wɔŋ dòà zììyà jɛ̀wɛ̀ nɔɔnɔɔ̀ŋ e kànà kɛ̀ɛ̀ Tàbiliɔ̀ Siisɔ̀ɛ sùà, wo Kànà Gbèè wɔŋ fùɔ̀ŋ anyùùŋ Luùm nyaŋ. Wo Pɔuŋtiɔ̀ Paalè nàŋ yaà wa wo kana wɔŋ fùɔ̀ŋ Jùdiàa diɛŋ, wo Hɛɛlɔ̀ nàŋ yaà wa wo kana wɔŋ fùɔ̀ŋ Galaliìɔ sùà. Wo wùìyà Hɛɛlɔ̀ɔ, Felè, wuŋ pɛɛ nàŋ yaà wa wo kanaà wèè wɔŋ fùɔ̀ŋ Etuliàa yèè wɔŋ fùɔ̀ŋ Takɔnaitèɔ, wo Làsanià nàŋ yaà wa wo kanaà wèè wɔŋ fùɔ̀ŋ Abilììɔŋ. 2E teenga lii sùà wo Anàŋ yèè wo Kaifɔ̀ nàŋ yaà wa aŋ Sìèfèìŋ Zòòlo Gbee nyàŋ. E teenga bi sùà wo Dayà naŋ wa kìɛ̀ŋ ke miè gbìaŋ koɓɛ̀ wo jɔ̀àfèlàà Zakalayàa Jɔ̀ɔŋ, wo yèɔ hewa jòò e dìì ke fòùngà e diì wòaà diɛŋ wɔ̀. 3Kpeiŋ wo Jɔ̀ɔŋ naŋ kɔ̀ maŋ kpàlàùŋ kpàlàùŋ maŋ gbiŋ sùà e Wùìyè Jɔɔɗììŋ nɛ kɔɔ, wò yaà gbùùyè ke mìè Dayàa koɓɛ̀ anyùùŋ nyaŋ wààŋ, “Sèè nìŋ mɔnɔŋ wo Dayà woiŋ jùùyà hakɛ̀ wèè maŋ jùumùiŋ màŋ, kɛ̀ sɔɔ̀ naŋ fè maŋ tùwo naanààiŋ màŋ jɛwɛ naŋ kìlà koɓɛ̀ Dayài, e kìlà naŋ nɔ̀ŋ gùaiŋ.” 4Nààŋ è yaà sìnga niŋ wɔŋ fɛ̀ì wɛ̀ijìɔ Àzaayà sùà lɛ, wò naŋ woò wààŋ,

“Wo nyùùŋ bà yaà kpàaŋ sùà ke fòùngà e diì wòaà sùà wààŋ,

‘Bànèbaneìŋ ke dòmaàŋ wèè wo Kanaà,

bàneìŋ ke dòmaŋ jìlɛŋ wèè wo kaaìŋ diɛŋ.

5Sɔɔ̀ naŋ dììyà maŋ toò ɓòìɓòì maŋ gbiŋ,

yèè naŋ sèènè maŋ toò maŋ gbiŋ diɛŋ,

e kìlà naŋ nyɛ̀nɛ̀ŋ maŋ dòmaŋ kpàànè kpaane màŋ gbiŋ maŋ jilɛ̀ŋ,

yèè naŋ nyɛ̀nɛ̀ŋ maŋ dòmàŋ kpogoo màŋ gbiŋ maŋ nɔ̀ŋ nɛ̀ɛ̀lɛ̀.

6Kpeiŋ anyùùŋ nyaŋ gbiŋ do nàŋ yɛ̀mɛ̀ e ɗeweɛ̀ wo Dayà joeyà anyùùŋ lɛ.’ ”

7Anyuùŋ zimgbe naŋ wa hnè wèè aŋ nɔ̀ŋ gùa nyiŋ, yèè wo Jɔ̀ɔŋ naŋ nyiŋ woò wààŋ, “Nyɛ̀iŋ nààŋ kaì nyɛɛ̀ nyɛɛ̀ŋ, ɓòò naiŋ woò nààŋ nàŋ ɓɛ̀nɛ̀ŋ dùàŋ e nimilàa sìwè, e yèɛ wo Dayà yaà hinie woiŋ tùàŋ lɛ? 8Nyɛ̀nɛìŋ maŋ keì maŋ do nàŋ tɔɔ̀ kɛ̀ tɔɔɓaa nàŋ fè maŋ tùwo naanààiŋ màŋ jɛwɛ. Ɓɔ̀ nìŋ gongò ngèè pɛɛ kòɓɛ̀ nyɛ̀iŋ biì kɛ̀ nìŋ yewe ke kpòò Eɓulɔhɛɛ̀ɛŋ sùà. Miŋ woòiŋ e tɔɔɓaaà kɛ̀ wo Dayà ɓɛ̀nɛ̀ŋ ɓèmè le dùò lɛɛ̀ wo niŋ kìlà anyuùŋ kpùuŋ aŋ nɔ̀ŋ aŋ jɔ̀à wèè wo Eɓulɔhɛɛ̀ŋ. 9E gbuu kòò è yaà naàŋ nɛ̀wɛ niŋ tɛ wèè e kɛ̀ɛ̀kɛ̀ɛ̀ maŋ kùù maŋ e hàì koɓɛ̀ maŋ kuù gùlò maŋ. Ke kùù gbiŋ ke yèɛ gò kòmàŋ maŋ kuù kòmàŋ kɛnɛ yɛ̀, kè do nàŋ nɔ̀ŋ kɛ̀ɛ nyiŋ aŋ nyiŋ gbìàŋ ko hmɔ̀iŋ.”

10Yèè anyùùŋ nyaŋ naŋ dàwè wo Jɔ̀ɔŋ nyààŋ, “Kiìŋ è naiŋ naàŋ ɓɛ̀nɛ̀ŋ nyɛ̀nɛŋ?”

11Wo Jɔ̀ɔŋ naŋ nyiŋ woò wààŋ, “Wo nyùnɔ̀ɔŋ gbiŋ kɛɛnɛ̀ŋ maŋ kùmà tìyèe wɔ̀, wo kiɛ̀ŋ wɔ̀ŋ guùŋ koɓɛ̀ wo dàwiuŋ nɔɔ̀ŋ wo yèɔ kuwà wɔ̀ŋ bà wɔŋ, e kìlà wo nyùnɔ̀ɔŋ gbiŋ kuwa e nɛ̀ŋje wɔ̀ wo kiɛ̀ŋ e bà koɓɛ̀ wo dàwiuŋ nɔɔ̀ŋ.”

12Anyuùŋ kùwà nɛ̀ɛ̀nɛ̀ŋ fuɔŋ nyàŋ bà nyiŋ naŋ hnè wèè aŋ nɔ̀ŋ gùa nyiŋ, yèè àŋ naŋ dàwè wo Jɔ̀ɔŋ nyààŋ, “Kààmɔɔŋ, kiìŋ è naiŋ ɓɛ̀nɛ̀ŋ nyɛ̀nɛŋ?”

13Wo Jɔ̀ɔŋ naŋ nyiŋ woò wààŋ, “Ɓɔ̀ nìŋ kùwà è nɛɛnɛɛ̀ŋ è do nìàŋ è yèɛ naŋ nyiŋ sɔ̀ dèè wèè aŋ fè lɛ.”

14Aŋ kààlòòɗùà nyaŋ bà nyiŋ nauŋ dawè nyààŋ, “Yàwi pɛɛ zà, kiìŋ è kuwa wèè eiŋ nyɛ̀nɛ̀ŋ?”

Wo Jɔ̀ɔŋ naŋ nyiŋ woò wààŋ, “Ɓɔ̀ nìŋ gè wò nyùùŋ gbiŋ è nɛɛnɛŋ sìwè màŋ gàangàaŋ ɔ̀ɔ̀ ɓɔ̀ nìŋ gbùwà wò nyùùŋ gbiŋ è keì ɓòù è ɗì. Ke jii fàiŋ wèè e yèɛ àŋ paawàìŋ lɛ.”

15Nààŋ anyùùŋ nyaŋ naŋ wa kùmìè maŋ keì mɛɛ̀ŋ, àŋ naŋ wa gongò maŋ jii nyiŋ màŋ sùà sèè mààŋ wo Jɔ̀ɔŋ nàŋ yaà wa wo yèɔ wo Dayà naŋ tàeɗùù wɔ wèè wo joeyè e ɗuunyaàŋ, wo Kulaìɔ. 16Wo Jɔ̀ɔŋ naŋ nyiŋ fasàì wààŋ, “Mìŋ yààìŋ nɔŋ gùùyà sùà e wùìyè. Kɛɛ wo nyùùŋ bà do nàŋ hnè, wò kuwa e gààŋ eim nìàŋ, yèè miŋ siàŋ ngèè pɛɛ tɛ̀ɛ̀ wèè ka fìlè è jèì màŋ bauŋ màŋ. Wuŋ, wò doiŋ nàŋ gùùyè wo Jìnàŋ Nɛɛmaàŋ yèè e hmɔ̀ɔ̀ŋ. 17Wò kuwa wɔŋ sɛmɛ̀ŋ fùùnyàŋ e kpàliuŋ nɛ̀ ko sìwè wèè wo fùàŋ e kpàliuŋ nɛ̀. Wò do nàŋ gbònògbònò e kpàli kɛnɛɛ̀ wo niŋ gbìàŋ ko kɛiŋ, kpeiŋ kɛ̀ wò hàmàŋ maŋ kpàli dɛɛ màŋ wò miŋ gbìàŋ ko hmɔ̀ɔ̀ŋ, e hmɔ̀ɔ̀ŋ bi zà fè wa nàwèè nyime.”

18Wo Jɔ̀ɔŋ naŋ wa pɔ̀wɔ̀ anyùùŋ nyaŋ maŋ dòmaŋ nyaaŋ zimgbe sùà yèè wò naŋ nyiŋ wòò Ebò Siaàŋ. 19Wo Jɔ̀ɔŋ Gùà Nyùnɔ̀ɔŋ naŋ wa wòò wo Kanaà Hɛɛlɔ̀ wààŋ, “E fè tɔ̀ɔ̀nyaàŋ wèè maŋ ɓèmè wò Hɛ̀lolìà, wò jàwè wùìya mɔɔ̀ŋ wèè wò do nɔ̀ŋ wò jawèum.” Wò nauŋ wa ɓɛìŋ gbuuyè wèè maŋ tùwo naanààŋ gbànauŋ màŋ wò yaà wa nyinie màŋ. 20Wo Kanaà Hɛɛlɔ̀ naŋ wa ngèè ɓɛìŋ nyɛ̀nɛ̀ŋ e tùwo naanààaŋ, nààŋ wò naŋ gbìɛ̀ŋ wo Jɔ̀ɔŋ ko sààŋ nyìwìi lɛ̀.

E gùà kìì Jisɛ̀ɛ

(Maafiù 3.13-17; Mài 1.9-11)

21Nààŋ wo Jɔ̀ɔŋ yaà wa gùùyè anyùùŋ nyaŋ, wo Jisɛ̀ wuŋ pɛɛ naŋ wa nɔ̀ŋ gùauŋ. Kpeiŋ nààŋ wò yaà wa zoolo, ke nyiliɛ̀ naŋ yilè, 22yèè wo Jìnàŋ Nɛɛmaàŋ, wo yèɔ naŋ tèènè wo poopoò ke kpùnaŋ sùà wɔ, naŋ dèyè wo jɛ̀ì Jisɛ̀ diɛŋ. Kpeiŋ wo Dayà naŋ gbòò e yìwìà ko àìjɛnɛ̀ŋ wò naŋ woò wààŋ, “Muàŋ nàŋ yaà wo jɔ̀àfelaa miɔ̀ŋ, wo yèɔ mìŋ manaŋ wɔ̀. Ke jii naim fɔ̀ weèum.”

Aŋ nèwàènèwè Jisɛ̀ nyaŋ

(Maafiù 1.1-17)

23Wo Jisɛ̀ yaà wa maŋ doa kpɛ̀ɛ̀ùŋ guùŋ jɛ̀wɛ̀ zììyà paŋgàà wò naŋ wa tɔ̀ɔ̀tù ke mìè Dayàa gbòa. Anyùùŋ nyaŋ gbiŋ naŋ wa gongò kɛ̀ wùŋ nàŋ yaà wa wo jɔ̀àfèlàà Jòòsɛɔ̀. Wo Jòòsɛ nàŋ yaà wa wo jɔ̀àfèlàà Hilìɔ. 24Wo Hiliɔ̀ naŋ yaà wa wo jɔ̀àfèlàà Maatàa. Wo Maatà nàŋ yaà wa jɔ̀àfèlàà Livàaà. Wo Liivaà nàŋ yaà wa wo jɔ̀àfèlàà Mɛchìɔ. Wo Mɛchì nàŋ yaà wa wo jɔ̀àfèlàà Janàìɔ. Wo Janàì nàŋ yaà wa wo jɔ̀àfèlàà Jòòsɛɔ̀. 25Wo Jòòsɛ nàŋ yaà wa wo jɔ̀àfèlàà Màtatìɔ. Wo Màtatì nàŋ yaà wa wo jɔ̀àfèlàà Emɔ̀ɔŋ. Wo Emɔ̀ŋ nàŋ yaà wa wo jɔ̀àfèlàà Nahɔ̀ɔŋ. Wo Nahɔ̀ŋ nàŋ yaà wa wo jɔ̀àfèlàà Ɛsilìɔ. Wo Ɛsilì nàŋ yaà wa wo jɔ̀àfèlàà Nagaìɔ. 26Wo Nagaì nàŋ yaà wa wo jɔ̀àfèlàà Maàa. Wo Maaà nàŋ yaà wa wo jɔ̀àfèlàà Màtatiàa. Wo Màtatià nàŋ yaà wa wo jɔ̀àfèlàà Sɛmɛ̀ɔŋ. Wo Sɛmɛ̀ŋ nàŋ yaà wa wo jɔ̀àfèlàà Josɛ̀ɔ. Wo Josɛ̀ naŋ yaà wa wo jɔ̀àfèlàà Jooɗàa. 27Wo Jooɗà nàŋ yaà wa wo jɔ̀àfèlàà Jòanàaŋ, wo Jòanàŋ nàŋ yaà wa wo jɔ̀àfèlàà Liisàa. Wo Liisà nàŋ yaà wa wo jɔ̀àfèlàà Zɛ̀lùɓaɓɛ̀ɔ. Wo Zɛ̀lùɓaɓɛ̀ nàŋ yaà wa wo jɔ̀àfèlàà Sìyatìɔ. Wo Sìyatì nàŋ yaà wa wo jɔ̀àfèlàà Nɛlìɔ. 28Wo Nɛlì nàŋ yaà wa wo jɔ̀àfèlàà Mɛkìɔ. Wo Mɛkì nàŋ yaà wa wo jɔ̀àfèlàà Aɗìɔ. Wo Aɗì nàŋ yaà wa wo jɔ̀àfèlàà Kosamùɔŋ. Wo Kosamùŋ nàŋ yaà wa wo jɔ̀àfèlàà Ɛmaŋdamùɔŋ. Wo Ɛmaŋdamùŋ nàŋ yaà wa wo jɔ̀àfèlàà Ɔɔ̀ɔ̀ɔ. 29Wo Ɔɔ̀ɔ̀ nàŋ yaà wa wo jɔ̀àfelàà Jàasùàa. Wo Jàasùà nàŋ yaà wa wo jɔ̀àfèlàà Ìliezàa. Wo Ìliezà nàŋ yaà wa wo jɔ̀àfèlàà Jɔɔlimùɔŋ. Wo Jɔɔlemùŋ nàŋ yaà wa wo jɔ̀àfèlàà Maatàa. Wo Maatà nàŋ yaà wa wo jɔ̀àfèlàà Livàaà. 30Wo Liivaà nàŋ yaà wa wo jɔ̀àfèlàà Simiɔ̀ɔŋ. Wo Simiɔ̀ŋ naŋ yaà wa wo jɔ̀àfèlàà Juɗàa. Wo Juɗà nàŋ yaà wa wo jɔ̀àfèlàà Jòòsɛɔ̀. Wo Jòòsɛ nàŋ yaà wa wo jɔ̀àfèlàà Jonɛmùɔŋ. Wo Jonɛmùŋ nàŋ yaà wa wo jɔ̀àfèlàà Ìlayakìmùɔŋ. 31Wo Ìlayakìùm nàŋ yaà wa wo jɔ̀àfèlàà Milìàa. Wo Milià nàŋ yaà wa wo jɔ̀àfèlàà Mɛnàaŋ. Wo Mɛnàŋ nàŋ yaà wa wo jɔ̀àfèlàà Màtatàa. Wo Màtatà nàŋ yaà wa wo jɔ̀àfèlàà Neetàaŋ. Wo Neetààŋ nàŋ yaà wa wo jɔ̀àfèlàà Dèèweɔ̀. 32Wo Dèèwe nàŋ yaà wa wo jɔ̀àfèlàà Jɛ̀seɔ̀. Wo Jɛ̀se nàŋ yaà wa wo jɔ̀àfèlàà Oɓɛ̀ɔ. Wo Oɓɛ̀ nàŋ yaà wa wo jɔ̀àfèlàà Booàa. Wo Booà nàŋ yaà wa wo jɔ̀àfèlàà Saamɔ̀ɔŋ. Wo Saamɔ̀ŋ nàŋ yaà wa wo jɔ̀àfèlàà Nasɔ̀ɔŋ. Wo Nasɔ̀ŋ 33nàŋ yaà wa wo jɔ̀àfèlàà Àminaɗàa. Wo Àminaɗà nàŋ yaà wa wo jɔ̀àfèlàà Amìɔŋ. Wo Amìŋ nàŋ yaà wa wo jɔ̀àfèlàà Anìɔŋ. Wo Anìŋ nàŋ yaà wa wo jɔ̀àfèlàà Hɛselɔ̀ɔŋ. Wo Hɛselɔ̀ŋ nàŋ yaà wa wo jɔ̀àfèlàà Pɛlìɔ. Wo Pɛɛlɛ̀ nàŋ yaà wa wo jɔ̀àfèlàà Juɗàa. 34Wo Juɗà nàŋ yaà wa wo jɔ̀àfèlàà Jègɔɔ̀. Wo Jègɔ nàŋ yaà wa wo jɔ̀àfèlàà Ààzeɔ̀. Wo Ààze nàŋ yaà wa wo jɔ̀àfèlàà Eɓulɔhɛɛ̀ɔŋ. Wo Eɓulɔhɛɛ̀ŋ nàŋ yaà wa wo jɔ̀àfèlàà Tɛɛlàa. Wo Tɛɛlà nàŋ yaà wa wo jɔ̀àfèlàà Naahɔ̀ɔ. 35Wo Naahɔ̀ nàŋ yaà wa wo jɔ̀àfèlàà Siilùɔ. Wo Siilù nàŋ yaà wa wo jɔ̀àfèlàà Liyùɔ. Wo Liyù nàŋ yaà wa wo jɔ̀àfèlàà Pɛɛlɛ̀ɔ. Wo Pɛɛlɛ̀ nàŋ yaà wa wo jɔ̀àfèlàà Eɓɔ̀ɔ. Wo Eɓɔ̀ nàŋ yaà wa wo jɔ̀àfèlàà Silàa. 36Wo Silà nàŋ yaà wa wo jɔ̀àfèlàà Kiinàaŋ. Wo Kiinàŋ nàŋ yaà wa wo jɔ̀àfèlàà Afasɛ̀ɔ. Wo Afasɛ̀ nàŋ yaà wa wo jɔ̀àfèlàà Samùɔŋ. Wo Samùŋ nàŋ yaà wa wo jɔ̀àfèlàà Nòaà. Wo Nòa nàŋ yaà wa wo jɔ̀àfèlàà Lamìɔ. 37Wo Lamì nàŋ yaà wa wo jɔ̀àfèlàà Mɛ̀tusìlàa. Wo Mɛ̀tusìlà naŋ yaà wa wo jɔ̀àfèlàà Inɔ̀ɔ. Wo Inɔ̀ nàŋ yaà wa wo jɔ̀àfèlàà Jalɛ̀ɔ. Wo Jalɛ̀ nàŋ yaà wa wo jɔ̀àfèlàà Màŋhelalìɔ. Wo Màŋhelalì nàŋ yaà wa wo jɔ̀àfèlàà Kenàaŋ. 38Wo Kenàŋ nàŋ yaà wa wo jɔ̀àfèlàà Inɔ̀ɔŋ. Wo Inɔ̀ŋ nàŋ yaà wa wo jɔ̀àfèlàà Sɛiɔ̀. Wo Sɛi nàŋ yaà wa wo jɔ̀àfèlàà Adamàaŋ. Wo Adamàŋ nàŋ yaà wa wo jɔ̀àfèlàà Dayàa.

Currently Selected:

Luù 3: WFESD

Highlight

Copy