YOBU 36
36
1KANDI Erihu yayeyongera nagamba ati
2Ongumisirize kake, nanyowe ndakusobo’ra;
Baitu nkinyina ebigambo ebindagamba habwa ruhanga.
3Ndaiha hara okumanya kwange,
Kandi ndamutaho okuhiki’ra
Omuhangi wange.
4Baitu mazimakwo ebigambo byange tibiri byebisuba;
Ahakirire omu kumanya ali hamu naiwe.
5Dora, Ruhanga wamani, kunu tarukugaya nomu:
Wobusobozi omu mani agokwetegereza.
6Talinda obwomezi obwababi:
Baitu aha ababonabonesebwa obulyo bwabu.
7Taihaho abaikaliza ha kitebe
Hamu nabakama ebiro byona, kandi banyumizibwa.
8Kandi obubabohwa namasamba,
Nibakwatwa nemiguha eyobujune;
9Nubwo aboleka omulimo gwabu,
Nebyokusisa byabu, okubakozire nemyehembo.
10Kandi aigura okutu kwabu begesebwe,
Abaragira bagaruke okuruga omu kutahiki’ra.
11Obubahu’ra nibamuko’ra,
Balimara ebiro byabu nomugisa,
nemyaka yabu omu kusemererwa.
12Baitu obubatalihu’ra balihwereke’ra habwa busitama.
Kandi balifa hataroho okumanya.
13Baitu abo abatarukutina Ruhnaga omu mutima gwabu nibahura ekiniga:
Tibami’rta okukonyerwa obwababoha.
14Bafa omu busigazi,
Kandi obwomezi bwabu buhwereke’ra hamu nabatasemire.
15Akiza ogu arukubonabonesebwa habwokubonabonesebwakwe,
Aigura okutu kwabu obubenderezebwa.
16Ego, yakukuihire omu muhito
Okukutahya omu kiikaro ekigalihire nambere hataroho okufunda;
kandi eki ekitebwa ha meza yawe kyakubaire kyebisajwa.
17Baitu iwe oijuire omusango gwababi:
Omusango nokucwa omusango nibikukwata.
18Baitu haroho ekiniga, nukwo oyerinde oleke okuhabisibwa obuguda bwawe;
Kunu okucungurwa okwingi kutakukuhindura ha rubaju.
19Obuguda bwawe bulimara iwe otabona obujune,
Rundi obusobozi bwona obwamani gawe?
20Otegomba ekiro,
Amahanga obugahwerekerezebwa omu kiikaro kyago.
21Werinde oleke okurora ha kutahiki’ra:
Baitu nukwo wayegomboize okukira omuhito.
22Dora, Ruhanga nakora ebinyumizibwa omu busobozibwe:
Noha omwegesa nkauwe?
23Noha aramuragire omuhandagwe?
Rundi noha asobora okugamba ngu Okozire ebyokutahiki’ra?
24Ijuka omyumizege omulimogwe,
Abantu ogubazinireho.
25Abantu bona bagurozireho;
Omuntu agurora nayema hara.
26Dora, Ruhanga mukuru, kandi itwe titurukumanya;
Omuhendo ogwemyakaye tigurukuse’rwa.
27Baitu acunda haiguru obutonya bwamaizi,
Obugwa nkenjura obweruga omu kihokye:
28Iguru eyirinaga hansi,
Kandi egwa muno ha bantu.
29Ego, haroho nomu asobora okwetegereza okubambwa kwebicu,
Okuhinda okuruga omu hemaye?
30Dora, asasanura omusanagwe okumwehinguliza;
Kandi asweka enyanja hansi.
31Baitu nibyo alemesa amahanga;
Agaha ebyokulya bingi muno.
32Asweka engaroze nenkuba;
Agiragira okutera etataisa.
33Okuhinda kwayo kutebeza ebye,
Kandi kuhabura ebisoro ha bwekiyaga ekirukuija.
Currently Selected:
YOBU 36: BRR64
Highlight
Share
Copy
Want to have your highlights saved across all your devices? Sign up or sign in
Bible in Runyoro-Rutooro 1964 Version © Bible Society of Uganda, 1964.
