ABAHEBURANIYA 6

1NUKWO tuleke okugamba ebyokubandizaho ebya Kristo, tuhingurane okuhika ebyobukuru; okutasimba obwakabiri emiganda eyokwegarukamu omu ngeso ezifire, neyokuikiriza Ruhanga namberali, 2neyokwegesa okubatiza, neyokutaho emikono, neyokuhumbuka okwabafu, neyomusango ogwebiro nebiro. 3Kandi nukwo tulikora Ruhanga obwaligonza. 4Baitu abo abamazire ira okujwerwa omusana nibaroza ha kisembo ekyomu iguru, nibafoka abokuterana omu Mwoyo Ogurukwera, 5nibaroza ha kigambo ekirungi ekya Ruhanga, namani agobusinge oburukugenda okuija, obubagwa okubirugamu; 6baitu bo benyini bagaruka okubamba ha muti Omwana wa Ruhanga, nibamukwasa ensoni bwa. 7Baitu ensi obwenywa enjura enyajugigwera emirundi mingi, neyana omububi ogusemerire abo abagirimirwa, ehabwa omugisa hali Ruhanga: 8baitu obweyana amahwa namatojo eyangwa, kandi eri haihi nokukyenwa: empero yayo nukwo kwokebwa.

9Baitu inywe abarukugonzebwa tubatekerizeho ebigambo ebirukukira oburungi, kandi ebiri haihi nokujunwa, nobuturaba ntugamba tutu: 10baitu Ruhanga tali atahikirire okwebwa emirimo yanyu, nokugonza okumwayolekere hali ibaralye, obumwaherize abarukwera, kandi nimukyahereza. 11Naitwe ntugoza muno inywe inywena mwolekege okwekamba oku hali okwetegereza kimu okunihira okuhika ha mpero: 12mutaturumuka, baitu mukuratirege omulingo gwabo abagwetwa emirago obwokuikiriza nokuguma.

13Baitu Ruhanga obuyaraganize Iburahimu, obwakaba atarukusobora okurahi'ra wena anyakumukira obukuru, 14nikyo yayerahirire wenka, nagamba ati Mazimakwo okukuha ndikuha omugisa, nokukanyisa ndikukanyisa. 15Nukwo obuyamazire okugumisiriza yahabwa omurago. 16Baitu abantu barahi'ra arukukira obukuru: kandi omu mpaka zabu zona ekirahiro nikyo kigumiza kimu. 17Kandi Ruhanga obwakaba nayenda okwokekera kimu hali abagwetwa abomurago okuhanurakwe nkokutasobora okutabatabana, nukwo yataireho hagati ekirahiro: 18obwebigambo bibiri ebitarukusobora okutabatabana, Ruhanga ebyatasobora okubihiramu ebisuba, itwe tutunge ekigambo ekyokugumiraho, itwe abayebingire okukwata okunihira okututairweho omu maiso gaitu; 19okutunyinakwo nkekyokusibika omutima, okunihira okwamazima okutatengeta tengeta, kandi okurukutaha omuhanda yenyigamo; 20nambere Yesu yatahiremu Omwebembezi habwaitu, obuyafokere nyakatagara omukuru owebiro nebiro, nkomulingo gwa Merekizedeka okuguli.

Currently Selected:

ABAHEBURANIYA 6: BRR64

Highlight

Copy