ABAHEBURANIYA 4

1NUKWO, omurago ogwokutaha omu kuhumurakwe obugutusigirwe, tutinege, omuntu wena halinywe aleke okusisana atagukireho. 2Baitu mazimakwo naitwe tukatebezebwa enjiri, kandi nkabo: baitu ekigambo ekyokuhu'ra kitabagasire, baitu batateranizibwa omu kuikiriza hamu nabo bahulire. 3Baitu itwe abamazire okuikiriza tutaha omu kuhumura oku; nkokuyagambire ati

Nkokunarahire omu kiniga kyange,

Nti batalitaha omu kuhumura kwange;

Emirimo nobweyahoireho okuruga ha kuhangwa kwensi. 4Baitu akagamba ahandi ha kiro kyomusanju ati Kandi Ruhanga akahumura ha kiro kyomusanju emirimoye yona; 5kandi omu kiikaro eki ati

Batalitaha omu kuhumura kwange.

6Nukwo obutuboine ngu kiikaire kiti abamu okukutahamu, kandi abo ababandize okutebezebwa ebigambo ebirungi, bakalema okutahamu obwokutahu'ra, 7agaruka nasororamu ekiro ekimu, nagamba omu Daudi, ebiro bingi bihinguireho, ati Hati, nkokukyagambirwe ira,

Hati obumuraba nimuhu'ra irakalye,

Mutagumya emitima yanyu. 8Baitu kakuba Yosuha yabahaire okuhumura, tiyakugarukire hanyuma okugamba ekiro kindi. 9Nukwo hasigaireho okuhumura okwa Sabiti hali abantu ba Ruhanga. 10Baitu anyakutaha omu kuhumurakwe buli ahumuire emirimoye, nka Ruhanga okuyahumuire eye. 11Nukwo twekambege tutahe omu kuhumura oku, omuntu wena atagwa omu kutahu'ra okwomulingo ogu. 12Baitu ekigambo kya Ruhanga kyomezi, kyamani, kyobwogi bwingi okukira empirima yona eyobwogi bubiri, kandi nikiraba nikibaganizamu obwomezi nomwoyo, nengiga nomusoina, kandi nikirahuka okwetegereza ebitekerezo nokuhanura ebyomu mutima. 13Kandi busaho ekihingirwe ekitarukumanywa omu maisoge: baitu ebintu byona biri kwonka, kandi bisukulirwe omu maiso gogu outuletera ebigambo byaitu.

14Nukwo obutunyina nyakatagara omukuru arukukira, ayarabire omu iguru, nuwe Yesu Owana wa Ruhanga, tukwatire kimu okuikiriza kwaitu. 15Baitu titunyina nyakatagara omukuru atarukusobora okusali'rwa hamu naitwe obwobugara bwaitu; baitu akohebwa omu byona nkaitwe, kyonka akaba atanyina ekibi. 16Nukwo tui'rege haihi nobumanzi hali ekitebe ekyembabazi, tuhabwe okuganyirwa, tutungege embabazi ezokukonyerwa obuturatagaga bwona.

Currently Selected:

ABAHEBURANIYA 4: BRR64

Highlight

Copy