ABEFESO 1

1PAULO omukwenda wa Kristo Yesu, nka Ruhanga okuyagondeze, hali abarukwera abali omu Efeso, na hali abokuikiriza abali omu Kristo Yesu: 2embabazi zibe halinywe nobusinge, okuruga hali Ruhanga Isitwe na Mukama waitu Yesu Kristo.

3Ayebazibwe Ruhanga, kandi Ise Mukama waitu Yesu Kristo, ayatuhaire omugisa gwona Ogwomwoyo omu biikaro ebyomu iguru omu Kristo:

4Nkokuyatukomeremu omuluwe, ensi zona zitakabaireho, itwe tufoke abarukwera, abataloho kamogo omu maisoge omu kugonza: 5obuyatusoroiremu ira, tufoke abana namberali habwa Yesu Kristo, 6nkokuyagondeze nasima ati, ekitinisa kyembabazize kikkugizibwe, eziyatuherire busa omwogu arukugonzebwa: 7ayatuhaisize okucungurwa kwaitu obwesagamaye, nukwo kuihibwaho ebyokusisa byaitu, nkobuguda obwembabazize okubuli, 8eziyasigisize namberetuli omu magezi gona nokwetegereza kwona, 9obuyatumanyisize ensita zebi ebiyagondeze, nkokuyasimire wenka, nkokuyamalirire ira omuluwe, obwobuketo o bwempiko zebiro, 10okuteraniza byona hamu omu Kristo, ebinyakuli omu iguru nebinyakuli hansi;

11Omuli ogu, naitwe outwafokiremu abagwetwa, obutwasoroirwemu ira, omu kumali’ra kwogu anyakukoza byona nkokwagonza omu kuhanurakwe; 12itwe tukugizise ekitinisakye, itwe abanihire ira omu Kristo: 13kandi nainywe omuluwe obumwahulire ekigambo ekyamazima, niyo enjiri eyokujunwa kwanyu, kandi ogu obumwaikirize oumwaterirweho akokuro’raho Nomwoyo Ogurukwera owomurago, 14kandi ogu nuwe mukwatirizo ogwobugwetwa bwaitu okuhikya Ruhanga abiyaguzire obubalikacungurwa, ekitinisakye nukwo kikugizibwe kiti.

15Nanyowe obunahulire okuikiriza Mukama waitu Yesu okuli omulinywe, kandi okumwoleka abarukwera bona, 16nikyo ntalekera okusima habwanyu, nimbaijuka omu kusaba kwange: 17Ruhanga wa Mukama waitu Yesu Kristo, Isitwe owekitinisa, abahe omwoyo ogwamagezi nogwokusuku’rwa omu kumanya uwe: 18inywe obumumulikirwa amaiso agomutima gwanyu, mumanye ounihira okwokwetakwe okukuli, nobuguda obwekitinisa ekyobugwetwa omuli abarukwera, 19kandi nobukuru obukira muno obwamanige halitwe abarukuikiriza okubuli, nkobusobozi obwamanige okubukora, 20agayakoleze omu Kristo, obuyamuhumbuire omu bafu, kandi obuyamuikilize ha mukonogwe ogwobulyo omu biikaro ebyomu iguru, haiguru muno, 21okukira okulema kwona, nobusobozi, namani, nobukama, nibara lyona erinyakugambwa, tihali omu businge bunu bwonka, baitu nomuli obu oburukugenda kuija: 22kandi akata byona hansi yebigerebye, kandi yamutaho okuba omutwe gwa byona hali ekanisa, 23nugwo mubirigwe, okuhiki’ra kwogu arukuhikiriza byona omu byona.

Currently Selected:

ABEFESO 1: BRR64

Highlight

Copy