ĠENESI 8
8
Kapitlu 8
Il-ħruġ mill-arka
1Imma Alla ftakar f’Noè, fl-annimali selvaġġi u l-bhejjem kollha miegħu fl-arka; u Alla qajjem riħ fuq l-art, u l-ilmijiet bdew jonqsu. 2U ngħalqu l-għejun tal-qiegħ u bwieb is-smewwiet, u waqfet ix-xita mis-smewwiet. 3U l-ilmijiet bdew rieġgħa lura minn fuq l-art, u baqgħu sejrin lura sakemm naqsu għalkollox wara mija u ħamsin jum. 4U waqfet l-arka fis-seba’ xahar, fis-sbatax-il jum tax-xahar, fuq il-muntanja ta’ Ararat. 5U l-ilmijiet baqgħu sejrin lura u jonqsu sal-għaxar xahar; u fl-għaxar xahar, fl-ewwel tax-xahar, dehru l-qċaċet tal-muntanji.
6U wara erbgħin jum Noè fetaħ it-tieqa tal-arka li kien għamel. 7U telaq iċ-ċawlun, u dan ħareġ u baqa’ ġej u sejjer sakemm nixef l-ilma minn fuq l-art. 8U Noè bagħat il-ħamiema minn ħdejh biex jara jekk naqasx l-ilma minn fuq wiċċ l-art. 9U l-ħamiema ma sabitx fejn isserraħ qiegħ riġilha, u reġgħet lura għal għandu fl-arka, għax l-ilma kien għadu fuq wiċċ l-art kollha. U Noè ħareġ idu u qabadha u daħħalha miegħu fl-arka. 10U stenna sebat ijiem oħra u reġa’ bagħat il-ħamiema mill-arka. 11U l-ħamiema reġgħet lura filgħaxija b’werqa friska taż-żebbuġ f’munqarha. U Noè ntebaħ li l-ilmijiet kienu naqsu minn fuq wiċċ l-art. 12U stenna sebat ijiem oħra, u bagħat il-ħamiema, u din ma reġgħetx lura iżjed għandu. 13Fis-sena sitt mija u wieħed, fl-ewwel xahar, fl-ewwel jum tax-xahar, nixef għalkollox l-ilma minn fuq wiċċ l-art. U Noè bexxaq l-għatu tal-arka, u ħares, u ra li wiċċ l-art kien nixef.
14U fit-tieni xahar, fis-sbatax-il jum tax-xahar, nixfet l-art. 15U Alla kellem lil Noè u qallu: 16“Oħroġ mill-arka, int u martek, uliedek u n-nisa tagħhom miegħek. 17U kull ħliqa ħajja li hemm miegħek, minn kull ġens, tjur u bhejjem, u kulma jitkaxkar fuq l-art; oħroġhom miegħek ħalli jixterdu mal-art, u jnisslu u joktru fl-art.”#Ġen 1,22-28. 18U Noè ħareġ b’uliedu u martu, u n-nisa ta’ wliedu miegħu. 19Ħarġu wkoll mill-arka l-bhejjem kollha, il-ħniex, it-tjur u kulma jitkaxkar fl-art, skont in-nisel tagħhom.
Il-wegħda ta’ Alla
20U Noè bena artal lill-Mulej, u ħa minn kull annimal safi u mit-tajr safi, u offra sagrifiċċju tal-ħruq fuq l-artal. 21U l-Mulej xamm ir-riħa ħelwa u għoġbitu; u l-Mulej qal f’qalbu: “Ma nerġax iżjed nisħet l-art minħabba l-bniedem, għax qalb il-bniedem miġbuda għall-ħażen sa minn ċkunitu, u ma nerġax iżjed naħbat għall-ħlejjaq ħajjin kollha bħalma għamilt.#Sir 44,18; Is 54,9; Rum 7,18.
22Sakemm iddum l-art,
żrigħ u ħsad,
bard u għomma,
sajf u xitwa,
lejl u nhar,
ma jonqsu qatt.”#Ġer 33,20-25.
Currently Selected:
ĠENESI 8: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.
Videos for ĠENESI 8
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Episode 29: Did a Meteor Really Trigger Noah’s Flood?
Under The Hood
Ep 32. Genesis 6-7: The Flood: A Heartbroken God Brings Justice and Mercy
The Bible Show