यूहन्ना 12
12
मरियमए येसुए उखँत म़ास थीद ओयो
(मत्ती २६:६-१३; मर्कूस १४:३-९)
1येसु निस्तार पर्बकिन छ दिन ओङ़ाल बेथानियाल बाके। नल नो सिउनी ओसोचोइव लाजरसए ओल्योक ज़ लिनाके। 2नोराए येसुए उजूँनी ऱिमकाव ज़्यावर थिक थाक जैद मार्थाए ज़्यावर भाःद ओराएज़्याव। लाजरस फरी येसुस ज़्यान्याए जूँनी च़ुसिद उलिज़्याव। 3हाः बेलाक मरियमए बनै ओएः ल्यो चाव सी ङरो जतामसीए म़ास तर्या·वा रैद येसुए उखँत थीद्याद ओचेमए सीदिक्यो। झ़िम भरी ज़ बनै चाव सी फाँ फाँ ङर्के। 4नाःत ज़ छींनी येसुलाई धोका याज़्याव उसिस यहूदा इस्करियोतए, 5“बुरू आव म़ास स़ोंसय चाँदीए सिक्काल यो·द काता ज़ माल्योरालाई भाःद ओराएकिन तान्या ओल्यो,” है लिके। 6खाली नोए माल्योराए जूँनी उयुँ नाद है उलिज़्याव ते माःक, ओल कुन्याए जूँनी है उलिज़्याव ची। याखार्ताव पैसा ओल ज़ ओनैज़्याव, ननी कुव य़ेन ओदोज़्याव। 7हाःत ज़ येसुए, “घदोज़्यावक। ङालाई गादैन्या छ्यामकावए जूँनी सामा दाद ओनैव ची। 8काता ज़ माल्योर ते जेस एकतार ज़ लिज़्यार, ङा ते जेस एकतार लिन्या ङामाले,” है यादोक्यो।#ब्य १५:११
9येसु नक लिज़्या दी लिन्या थैद नजीलाव यहूदीर कुधु ज़ ओल्योक हुकेर। नोर येसुए उजूँनी वाज़ याहुव माःक, नो सिउनी ओसोचोइव लाजरसलाई चिऊन्याए जूँनी ब हुद यालिज़्याव। 10है जैद ज़ मुख्या पुजारीराए लाजरसलाई ब सैःव पैंकेर। 11काराव ल्यो ताकिन येसुए नोए ओक्याँताव ओदोव य़ेननी ज़ यहूदीर कुधु ज़ मुख्या पुजारीरालाई ऱास्द येसुलाई यायुँ हुप्नाके।
येसुलाई परमेस्वरए उमिनताव राजा याजैव
(मत्ती २१:१-११; मर्कूस ११:१-११; लूका १९:२८-४०)
12हो पराःती नो पर्बत हुव माहोल्यार ‘येसु यरूसलेमल हुज़्या दी’ लिन्या थैद, 13नोराए खजुर सींए ओस्यावलार रैद येसुस दैसिनाद,
“होसन्ना! परमेस्वरए उमिनत हुव इस्राएलीराए याराजा धन्याकाव ओताक,”#भज ११८:२५-२६
है लिद क़िकेर। 14येसु तोबो गधाहाए ओबछेरा चेप्द उहुज़्याव। नोए उजूँनी धर्मसास्त्रल इताव सर्सिउ उलिज़्याव,
15“ताछे·नी सियोनए ओज़ा,#12:15 छुत बुझिन्या — यरूसलेमलाव मिँर।
नराजा गधाहाए ओबछेरा चेप्द हुज़्या।”#जक ९:९
16नो बेलाक येसुए उसिसराए नो पाँर माबुझिधुकेर। येसु स्वर्गत ओल्द ओबाव छींनी वाज़ नो धर्मसास्त्रलाव सर्सिउ पाँर चेतैद ‘नो पाँ गेसयो·धुव ची ओल्यो’ लिन्या सैंकेर।
17नो माहोल्यारानी जो जोराए येसुए लाजरसलाई खादरनी क़िद सिउनी ओसोचोइव रँःद नैर, होराए प़ाइँलाई ज़ है यारादोज़्याव। 18होए उजूँनी ज़ येसुए नाःल्दिउ य़ेन ओदोव ओल्यो लिन्या थैद निताव ल्यो माल्यो मिँर ओलस दैसिहुकेर। 19निताव रँःद फरिसीर या याल, “आव मानुवाताव मिँ भरी ओपो·स ज़ नोए ओपाँत बाज़्यार, गे ते अबकिन नोस कातानी ज़ गेमाधुके ब,” है लिकेर।
येसु उसिन्याए जूँनी ङ़ादा ज़ ओपाँव
20नो पर्ब मानिना हुवर ख्वार ग्रीक यारादोज़्यावर मनी याल्यो। 21नोर गालीललाव बेथसेदा नाखारलाव फिलिपए ल्योक बाद, “अ स़ेर, गे येसुस तखेप दैसिउ गेपैंज़्या,” है यादोक ते, 22फिलिपए नो पाँ फरी अन्द्रियासलाई मनी है दोक्यो। है जैद नोनी ऩेब्लो ज़ येसुए ल्योक बाद नो पाँ है दोकिनी। 23नाःत ज़ येसुए नक लिज़्यावरालाई, “अब ते परमेस्वरए ङा मिँ मिन्सिउए ङामिनलाई सघ्योःद्यान्या बेला हुके। 24ङा जेलाई साचो है ङादाचिज़्या, तोबो तामए ओसै गमल बाद ओमासिवा पै हाःकाव ज़ लिज़्या। गमल बाद उसिउत वाज़ कुधु ओसै झाःज़्याव। 25हिताव ज़ जोए उजिउए मया दोज़्याव, होए उजुनीलाई सम़ैज़्याव। फरी जोए आव जुनील उजिउए मया मादोव, होए उजिउलाई अजम्बरी जुनीए जूँनी जोगोइद नैज़्याव। 26जोए ङासेवा दोव पैंज़्याव, हो ङाछींत उहुक। हो ताकिन ची ङा जोङ जोङ ङाताज़्या, नो ङासेवा दोज़्याव ब होङ ङास ज़ तान्या ले। जोए ङासेवा दोज़्याव, होलाई परमेस्वर ङाबाबुए मनी ओमान नैद्यान्या ले,” है यादोक्यो।
27हाःत ज़ फरी, “ङा आख बनै धो थाइव ताद ङाले। ङा कै लिन्या? सैं ङाबाबुलाई, ‘अ बाबु, आव ङाक्याँत हुरिज़्याव दुखरानी जोगोइनाके,’ है दान्या ओताव? हिताव ते माता, ङा नो दुखर सहिद सयो·ना ङाहुव ची,” है लिद, 28“अ बाबु, अब ते घ्योःव नमिन सरैंःके,” है लिद ओपोंखारिउ प़ाइँना नमतिन तोबो गाए, “ङामिन ते ङासरैंःधुके, फरी झन ज़ सरैंःन्या ङाले,” है उलिज़्याव थास्के। 29नक लिज़्याव माहोल्याराए नो गा थैद ख्वाराए ‘नम गर्जिज़्या’ है लिकेर, ख्वाराए फरी ‘येसु परमेस्वरए ओचाकर्यास ओपाँज़्याव ची’ है लिकेर। 30हाःत ज़ येसुए, “आव जेथैव गा ङा ङाजूँनी माःक, जे ङालाई सरेस्न्याए जूँनी ची। 31अबकिन आव मानुवाताव मिँर फाल्सिरिज़्यार, यास़ेर सैतान मनी ख्यासिद उमिन म़ारिज़्या। 32स़ोनो ङा आव नामनी छींसिद ङातङ्गैसिउत प़ाइँ मिँरालाई ङाल्योदा ङारारैरिज़्या,” है यादोक्यो। 33नो है ओल्यो भरी ओल उसिरिज़्यावए जूँनी ज़ ओपाँव।
34नो माहोल्याराए, “धर्मसास्त्रल गेचिऊक नो बाँचैना हुरिज़्या है यालिज़्याव ख्रीस खर्क ज़ सिन्या माले लिन्या लिज़्या। नँ कै जैद मिँ मिन्सिउ तङ्गैसिद सिरिज़्या है नलिज़्याव? नो मिँ मिन्सिउ सु?” है यादोक ते,#भज ११०:४; यसै ९:७; इज ३७:२५; दान ७:१४ 35येसुए, “अझ छ्यावा पै वाज़ ङाज़गै जेखार्ल रहिरिज़्या। नो ज़गै जेखार्ल ओलेवा भरी नो बेला ताचुकैच्यो, म़ानी चुम चुमोल जेपरिया। नल जेपरिकिन ‘आदा ङाबाज़्या’ लिन्या ब सैंन्या जेमाले। 36है जैद नो ज़गै उलिज़्याक ज़ ज़गैवलाई जेयुँ उहुप्क। हो ताकिन ची ज़गैवए ओथोर जेतारिज़्या,” है दाद येसु ननी पुलुस्द सम़ैसिनाके।
यायुँ माहुप्ज़्याव यहूदीर
37येसुए मिँराए ङ़ाक अचम्ब अचम्बलाव य़ेनर दाद ब नोराए यायुँ ज़ माहुप्के। 38ननी ज़ यसैया अगमबक्ताए ओसरो यो·के। नोए ओसरो आव ज़,
“प्रभु, गेरासथैव पाँत सुए यायुँ ज़ माहुप्के।
परमेस्वरए सतैंद ओरायो ओसक्तीलाव य़ेनर ब सुलाई ज़ माताके।”#यसै ५३:१
39नितावनी ज़ नोराए यायुँ माहुप्के। यसैयाए फरी ब तोथोल अइ लिद सर्द नैव,
40“परमेस्वरए नोरालाई मुन्दुक्यासो जैद यानैव,
यायुँ ब बनै खाव जैद नैद यायो।
है जैद ज़ यामी लिज़्यावत ब मारँःधुर,
थैद ब यायुँल मातीधुर।
ननी ज़ नोर ङाल्योदा यायुँ फर्कैद सगराँसिना माहुर।”#यसै ६:१०
41यसैयाए ङ़ादा ज़ ख्रीसए ओज़गै रँःद आव पाँ भरी ख्रीसए उजूँनी ज़ सर्द ओनैज़्याव। 42हैदी ब यहूदीराए यास़ेरर कुधुए यायुँ हुप्के। खाली ‘धर्मसास्त्र झ़िमनी फरिसीराए पले·सिर्या’#12:42 यूह ९:२२ चिऊन्या। लिद याछ्याचेए पाखात मापाँधुकेर। 43नोराए परमेस्वरनिकाव दैन्या स्याबासकिन मिँनिकाव दैन्या स्याबास घ्योःव रँःकेर।
44हाःत ज़ येसुए बनै चोइस अइ लिद यासथैक्यो, “जोए ङालाई उयुँ हुप्ज़्या, होए ङालाई वाज़ माःक, ङालाई परींज़्यावलाई मनी उयुँ हुप्ज़्या। 45हिताव ज़ फरी ङालाई रँःज़्यावए ङालाई परींज़्यावलाई ब रँःज़्याव। 46ङा आव मानुवाताव ज़गै ताद ङाहुके। ङालाई यायुँ हुप्न्यार चुम चुमोल तान्या मालेर। 47फरी ङापाँ थैद माभैंःज़्यावरालाई ङा याखत पले·द्याव मापरिए। ङा आव मानुवाताव मिँरालाई याखत पले·द्याद सजा याना ङाहुव माःक, बाँचैना ङाहुव ची। 48हैदी ब ङालाई सोद ङापाँ माभैंःज़्यावरालाई याखत सतैंद्यान्या ङापाँ ज़। नो ङापाँ ओमाभैंःवए, फाल्सिन्या छ्याम ननी ज़ फाल्सिरिज़्या। 49नो ङापाँ ङानी सिर्जैद ङापाँव माःक, ङालाई परींज़्याव ङाबाबुए ‘आव पाँनिके’ है ओदाँव ची। 50ओल ङालाई पाँव उपरींनाव भरी अजम्बरी जुनी यान्या लिज़्या। है जैद ङापाँज़्याव भरी परमेस्वर ङाबाबुए है ओदाँव वाज़ ङापाँज़्या।”
Currently Selected:
यूहन्ना 12: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
