यूहन्ना 11
11
लाजरस उसिउ
1नाः बेलाक बेथानिया नाखारल तोबो लाजरस यादोज़्याव मिँ ओजोरो हुद थलिद उलिज़्याव। नो मिँ मरियम स़ोनो मार्थानी निभाइ ज़। 2नो मरियम ज़ छींनी येसुलाई उखँत म़ास थीद्याद ओचेमए सीद्याज़्याव। नो ओजोरो हुव लाजरस नोए ओभाइ ज़। 3नोए ओनानानी येसुलाई, “प्रभु, नयुँलाव लाजरस ओजोरो हुद थलिद ले,” है लिद तोबो सोर परींकिनी। 4येसुए नो सोर थैद, “आव जोरोए लाजरसलाई सिउका सिउ जैन्या माले, परमेस्वर ङाबाबुए उमिन झन ज़ सघ्योःन्याए जूँनी ची। ङा ओज़ाए ङामिन मनी झन ज़ घ्योःन्या ले,” है लिके।
5येसुए मार्था, मरियम स़ोनो लाजरसरालाई बनै मया ओरादोज़्याव। 6निताव ओजोरो उहुज़्याव सोर थैद ब हतप्त ज़ माबाद नो उलिज़्याव पोक ज़ अझ ऩेला लिके। 7नकिन येसुए उसिसरालाई, “गे फरी यहूदियादा गेबा,” है ओरादोक ते, 8उसिसराए, “गुर्बा, ताला नलाव यहूदीराए नँलाई लुँए झेःव यापैंज़्यावत ब काराव फरी नदा ज़ बाव नपैंज़्याव?” है यादोक ते, 9येसुए, “तछात बाह्र घन्ता पलाँ ताज़्या। लाक बाज़्याव मिँ आव मानुवाताव ज़गै ओलस ओतावए कान्त ज़ मात़ुमे। 10रील बाज़्याव ते, ओलस ज़गै ओमातावए त़ुम्द पाज़्या,” है यादोक्यो। 11नकिन फरी, “गेनैं लाजरस घेप्पा ङ़लत बाद ले, ङा नोलाई ङासोचोइनारिज़्या,” है ओरादोक ते, 12उसिसराए, “प्रभु, अइज़ घेप्पा ङ़लत उलिज़्याव ताकिन ते, जुनी ब गराँया ज़,” है लिकेर। 13खास येसुए ते लाजरस उसिधुवए उजूँनी ज़ ओपाँज़्याव, उसिसराए माबुझिद साचो ङ़ल्द उलिज़्याव ज़ याजैज़्याव। 14है जैद येसुए छर्लङ्ग ज़ है यादोक्यो, “लाजरस सिधुके। 15खाली जे जेयुँ झन ज़ सुहुप्द्यान्याए जूँनी हतप्त ङामाबाव चाव ज़ ताके। अब ते हुचिके, लाजरसए ल्योदा गेबा,” है ओरादोक ते, 16दिदुमस यादोज़्याव थोमाए ओलसकाव येसुए उसिसरालाई, “दे च्याँःसिचिके, गेबा। गेलाई मनी ओलस ज़ यासैःसिकिन्दा सैःसिकेर ब!” है यादोक्यो।
येसु लाजरसए ओनाखारल ओबाव
17येसु उसिसरास लाजरसए ओनाखारल याकेस्नाक, लाजरसलाई खादरल याझाःव चार दिन ताके है लिन्या थैकेर। 18लाजरस ओनाखार बेथानिया यरूसलेमकिन स़ोंकिलोमितरवा उलिज़्याव। 19निभाइ उसिउए मार्था स़ोनो मरियमनिलाई यहूदीराए कुधुए याराचिऊहुज़्याव। 20मार्थाए, ‘येसु हुज़्या दी’ लिन्या थैद मरियमलाई झ़िमक ज़ ख्यानैद येमङ ज़ दैसिनाद, 21येसुलाई, “प्रभु, नँ नल्यो ताकिन ते ङाभाइ सिन्या ओमाल्यो। 22हैदी ब आख मनी नँ परमेस्वरस जो नऩिज़्या हो ज़ यान्या ले लिन्या ङासैंज़्या,” है ओदोक ते, 23येसुए, “नभाइ फरी ब सोन्या ले,” है ओदोक ते, 24मार्थाए, “हैज़ प्रभु, परमेस्वरए मिँरालाई अजम्बरी जुनील ओरासोचोइव छ्याम नो मनी सैंसिद सोन्या ले,” है दोक्यो। 25हाःत ज़ येसुए, “सिउरालाई सोचोइज़्याव ब ङा ज़, अजम्बरी जुनी याज़्याव ब ङा ज़। है जैद जोए ङालाई उयुँ हुप्ज़्या, हो उसिदी ब फरी सैंसिन्या ले। 26ङालाई यायुँ हुप्द बाँचिन्यार ते खर्क ज़ सिन्या मालेर। आव ङापाँत नयुँ माहुप्ज़्या?” है ओदोक ते, 27मार्थाए, “हैज़ प्रभु, नँ आव मानुवात हुरिज़्या है यालिज़्याव परमेस्वरए ओज़ा ख्रीस ज़ लिद ङायुँ हुबो ज़ लिज़्या,” है दाद, 28उझ़िमदा बाद ओबैंनी मरियमलाई अलगज़ा खुल्द, “गुर्बा आल हुद ले, नँलाई साप्निज़्याव,” है ओदोव प़ाइँना, 29मरियम हतप्त ज़ च्याँःसिद दैसिनाके।
येसुए सिउ लाजरसलाई ओजागैव
30हाःपै येसु नाखारल ओमाहुताव, मार्थाए ओख्यानैव पोक ज़ उलिज़्याव। 31नो झ़िमक लिज़्याव चिऊना हुव यहूदीर मरियम थर च्याँःसिद ओबाज़्याव रँःद, ‘फरी खादरक ओघर्नाज़्याव ताक्या’ लिद उछीं उछीं बाकेर। 32मरियम येसुए ल्योक केस्द उखँत फुलुप्सिद, “प्रभु, नँ नल्यो ताकिन ङाभाइ सिन्या ओमाल्यो,” है दाद, 33घर्के। उछीं उछीं हुव यहूदीर मनी ओलस ज़ याघर्ज़्याव। येसुए निताव रँःद उयुँ बनै माचाव दाद, 34“नोलाई काङ्क झाःद जेनैज़्याव?” है ओरादोक ते, “हुद चिऊके, प्रभु,” है दोकेर। 35हाःत ज़ येसु मनी घर्के। 36नो रँःद नलाव यहूदीराए, “लाजरस बनै उयुँलाव मिताव मिँ ओल्यो,” है लिकेर। 37ख्वाराए फरी, “आव मिँ मारँःधुन्यालाई रँःधुन्या जैज़्यावए लाजरसलाई ओमाबाँचैधुव रो?” है लिकेर।
38हाःत ज़ येसु उयुँर धो थाइव ताद खादरक बाके। नो खादर तोबो पुप ओल्यो, ओयाःत बनै घ्योःव लुँ कसिउ उलिज़्याव। 39येसुए, “नो कसिउ लुँ हाइचिके,” है ओरादोक ते, लाजरसए ओनाना मार्थाए, “आवलाई गेगादैव चार दिन ताधुके, प्रभु। गेफैकिन उसी ङर्न्या ले,” है ओदोक ते, 40येसुए, “नँलाई नयुँ उहुप्किन परमेस्वरए ओज़गै रँःन्या नले है ङादींव माःक रो?” है ओदोव प़ाइँना, 41उपुर्कावराए नो कसिउ लुँ हाइकेर। हाःत ज़ येसुए नमदा परमेस्वरए ल्योदा भाल्सिद, “अ परमेस्वर ङाबाबु, नँलाई धन्याबाद लिज़्या, आव ङाबिन्ती नथैधुके। 42ङापाँ भरी थैव ज़ ननैज़्या लिन्या ङासैंज़्या। खाली आक लिज़्याव मिँराए आव ङापाँ थैद नँ ज़ नपरींनाव घथ·रैनारक लिद है ङादींज़्या,” है दाद, 43येसु बनै चोइस क़िद, “लाजरस, ननी पुलुस्द हुन्के,” है ओदोव प़ाइँना, 44नो सिउ लाजरस ओङ़ैनी उखँङ पै लुम्बैसिउ क्वारास पुलुस्के। हाःत ज़ येसुए नक लिज़्यावरालाई, “ओक्वार पला·द्याद बाव एचिके,” है यादोक्यो।
45निताव रँःद नो मरियमलाई चिऊना हुव यहूदीराए मनी कुधुए ज़ येसुलाई यायुँ हुप्के। 46ख्वाराए फरी येसुए ओदोव य़ेन भरी रँःद फरिसीरालाई है यारादोनाकेर।
येसुलाई सैःन्या गुमुस्ता
(मत्ती २६:१-५; मर्कूस १४:१-२; लूका २२:१-२)
47नो फरिसीर स़ोनो मुख्या पुजारीराए घ्योःव कचरी जैद, “गे कै लिन्या ओताव? आवए ते कुधु अचम्बलाव य़ेनर दोज़्याव। 48नोलाई मावैंद दोव गेएकिन, मिँ भरी ओपो·स ज़ नोलाई यायुँ हुप्द ओल्योदा बान्या लेर। नदा याबाकिन रोमी सरकारए उसिपाईंर हुद गेध्यान झ़िमलाई तैःद्याद गे यहूदीरालाई मनी खेम्न्या ओछ्यास लिज़्या,” है लिकेर। 49हाःत ज़ कैयाफा यादोज़्याव हो साललाव प्रधान पुजारीए, “जे काता ज़ मासैंन्यार जेलिज़्या। 50गेदेस भरी उमिन ओम़ाज़्याव देखा बुरू प़ाइँए जूँनी तोबो मिँ सिन्या लेखा लिज़्या लिन्या जेमासैंए रो?” है लिके। 51नोए निताव ओपाँव ओलनी ते माःक। येसुए यहूदी जातलाव मिँराए जूँनी उजिउ झाःद याएरिज़्याव लिन्या परमेस्वरए ङ़ादा ज़ नो प्रधान पुजारीए ओयाःत झाःद ओयोनी ज़ ओपाँव ची। 52येसुए उजिउ ओझाःरिज़्याव यहूदीराए जूँनी वाज़ माःक, संसार भरिलाव काना कुनीङ लिज़्याव परमेस्वरए उमिनतावरालाई तोबो ज़ जैन्याए जूँनी ब ओल्यो। 53हो छ्यामकिन ज़ येसुलाई कातानी सैःन्या लिद गुमुस्ता दोनाकेर।
54है जैद हाःकिन येसु यहूदियाल मासरैंःसिद ननी पुलुस्द उसिसरास बन छ्योकाव एफ्राइम यादोज़्याव नाखारल लिनाकेर। 55हाः बेलाक यहूदीराए यामानिज़्याव निस्तार पर्ब हुनाद उलिज़्याव। है जैद नो पर्बए जूँनी मिँर ङ़ादा ज़ नाखार नाखारनी यरूसलेमल बाद हुर्सिद याचोखोइसिनाज़्याव। 56नोर ध्यान झ़िमल याहुवत येसुलाई मारँःद या याल ज़, “जे कै जेलिज़्या, नो मिँ आव पर्बल जाँ ओमाहुरिज़्याव सा,” है लिकेर। 57फरिसीर स़ोनो मुख्या पुजारीराए येसुलाई क्योःन्याए जूँनी ङ़ादा ज़ नल हुवरालाई, “येसुलाई जेरँःकिन गेलाई है दासिच्यो,” है दाद यारानैज़्याव।
Currently Selected:
यूहन्ना 11: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
