यूहन्ना 13
13
येसुए उसिसराए याखँर हुर्द ओरायो
1निस्तार पर्बए ओङ़ादा येसुए, ‘आव मानुवानी पुलुस्द परमेस्वर ङाबाबुए ल्योदा बान्या बेला ताके’ लिन्या सैंक्यो। ओमासिवा पै आव मानुवाताव ओल उमींरालाई मया दाव ज़ ओरानैज़्याव।
2हो छ्याम ऱिमक येसु उसिसरास ज़्यावर याज़्युज़्यावकिन ङ़ादा ज़ सिमोनए ओज़ा यहूदा इस्करियोतए उयुँल सैतानए येसुलाई धोका यान्या युँ जैद नैद ओएज़्याव। 3हाःत ज़ येसुए उयुँल, ‘परमेस्वर ङाबाबुए प़ाइँ ङाकुइत ज़ याद नैनाव, ओल्योनी ज़ ङाहुके, फरी ओल्योदा ज़ ङाबारिज़्या’ है लिन्या ओसैंज़्यावए, 4उसिसराए याङ़ाक नो ज़्यान्यार याज़्युज़्याव बेलाक ज़ याखार्नी च्याँःसिद ओबर्की हाइद रूमाल भिरिसिद, 5तोबो जाल ऱी झाःद, उसिसराए याखँर हुर्द्याद नो उभिरिसिउ रूमालए ज़ याखँर सीद ओराएज़्याव। 6है जैद याखँर हुरे हुरे सिमोन पत्रुसए ल्योक उहुवत पत्रुसए, “प्रभु, नँ कै जैद इतावए ङाखँ हुर्द्याव नपैंज़्याव?” है ओदोक ते, 7येसुए, “आव ङादोज़्याव य़ेन आख ते नमासैंए, छींनी नसैंया,” है ओदोक ते, 8फरी ब पत्रुसए, “नँ ङाखँ खर्क ज़ हुर्द्यान्या माताए,” है ओदोक ते, येसुए, “नँ नखँ हुर्द्याव भैंःद नमायाँकिन नँ ङासकाव तान्या नमाले,” है दोक्यो। 9हाःत ज़ सिमोन पत्रुसए, “हो ची ताकिन्दा प्रभु, ङाखँ वाज़ माःक, ङाकुइर ङाङ़ैर ब हुर्द्याव ताके,” है ओदोक ते, 10येसुए, “हुर्सिउ मिँ ओक्याँ भरी छैंव ओतावए उखँ वाज़ हुर्द्याकिन ताए। जे भरी प़ाइँ छैंवर ज़ जेलिज़्या। हैदी ब जेखार्ल तोबो ते माछैंव लिज़्या।” 11येसुए ओललाई धोका याव पैंज़्याव मिँलाई ङ़ादाकिन ज़ सरेस्द ओनैज़्यावए नो माछैंवए उजूँनी ज़ पाँके।
12येसुए याखँ हुर्द्याद ङ़ादाङाव ओहाइव ओक्वार जासिद फरी यास ज़ ज़्यान्याल च़ुसिद है यादोक्यो, “आव जेखँ हुर्द ङायाचिउ य़ेनए ओअर्थ जेमासैंज़्याखेहो। 13जे ङालाई ‘गुर्बा’ स़ोनो ‘प्रभु’ है जेदाँज़्याव, नो ते थिक ज़। है जेलिज़्याव मिताव ङा हो ज़। 14खाली ङा जेप्रभु जेगुर्बा ताद जेखँ हुर्द ङायाचिज़्या ल्यो ताकिन जे मनी तोबोए तोबोलाई उखँ हुर्द्याव ताके। 15ङा ङादोज़्याव मिताव य़ेन जे मनी ‘जेदोया’ लिद नो य़ेन जेङ़ाक सतैंद नैद ङायाचिए। 16ङा जेलाई साचो है ङादाचिज़्या, छुतए ओय़ेन दाज़्याव मिँ ओसाहुकिन घ्योःव माताए। हिताव ज़ य़ेनदा परींसिउ मिँ परींज़्यावकिन घ्योःव माताए। 17है जैद जे आव ङापाँर तीद ननी ज़ जेदोकिन असिक दैवर तान्या जेले।
18“खाली आव पाँ प़ाइँए जेजूँनी ते माःक। हैदी ब ङाछाँतिचिउ भरिलाई ते ङा ज़ ङासरेस्चिज़्या। आव पाँ धर्मसास्त्रलाव सर्सिउ पाँ सयो·न्याए जूँनी लिज़्या। नलाव सर्सिउ आव ज़,
‘ङास सिप ज़्युज़्याव ज़ ङाकिन तँदा जैसिरिज़्या।’#भज ४१:९
19आव पाँ भरी ओमाहुद ङ़ादा ज़ है दाद ङानैचिज़्या। हो ताकिन ची नो पाँ भरी ओतावत ङालाई ‘हो ज़ ची ओल्यो’ लिद सरेस्न्या जेले। 20ङा जेलाई साचो है ङादाचिज़्या, जोए ङापरींव मिँलाई ओल्योक हुव एज़्याव, होए ङालाई मनी हुव याँज़्याव। ङालाई वाज़ माःक, ङालाई परींज़्यावलाई ब हुव एज़्याव।”
येसुलाई धोका याज़्याव मिँ
21नाः है दाद येसुए उयुँर धो थाइव ताद ओपाँ भरी काता ज़ माम़ोंद उसिसरालाई, “ङा जेलाई साचो है ङादाचिज़्या, जेनी तोबोए ङालाई धोका याँरिज़्याव,” है ओरादोक ते, 22‘काताकाव गेताव’ लिद उसिसर या याल चिऊसिकेर। 23नो बेलाक येसुए उयुँलाव मिताव तोबो उसिस ओक्याँत खदेप लिद उलिज़्याव। 24सिमोन पत्रुसए नोलाई सान दाद्याद, “नो सु है दोसाँ,” है ओदोक ते, 25नोए येसुए ओक्याँत कँ लिद, “प्रभु, नो सुकी?” है ओदोक ते, 26येसुए, “आव भरेस जोलाई चिपल छोइद ङाएज़्या, हो ज़,” है दाद नो भरेसलाई केःद छोइद सिमोन इस्करियोतए ओज़ा यहूदालाई एक्यो। 27भरेस ओक्योःव प़ाइँना ज़ सैतान उयुँल पसिके। है जैद येसुए नोलाई, “नँ दान्या नपैंज़्याव चाँदो ज़ दोके,” है दोक्यो। 28नो ज़्यान्याल च़ुसिद लिज़्यावराए, ‘काताए जूँनी नै ओल्यो?’ लिन्या मासैंकेर। 29ख्वा ख्वाराए, याखार्ताव पैसा यहूदाए ओक्याँत उलिज़्यावए, “पर्बए जूँनी कातार लँःनाव उपरींज़्याव ताक्या, सैं काता ज़ माल्योरालाई पैसार यानाव उपरींज़्याव ओताव,” लिन्या सम्जिकेर। 30यहूदा नो भरेस ज़्याद बेहार ज़ पुलुस्के। नो बेलाक री ताद उलिज़्याव।
येसुए साःरो कानुन ओरायो
31इस्करियोत उपुलुसो छींनी येसु ओल उजूँनी अइ लिद पाँके, “अब ते मिँ मिन्सिउए उमिन ब रैंःरिके, परमेस्वरए उमिन ब नोए ओक्याँनी झन ज़ रैंःन्या ले। 32परमेस्वरए उमिन नोए ओक्याँत रैंःन्या ओतावए, ओल परमेस्वरए मनी नोस उलिज़्याव सरैंःन्या ले। नो य़ेन परमेस्वरए हतप्त ज़ दान्या ले। 33अ ङाबाबुज़ार, अब ङा जेस कोसै लिन्या ङामाले। ङाबाव छींनी जे ङालाई खिम्न्या जेले। खाली यहूदीराए यास़ेररालाई है ङारादोव मिताव जेलाई मनी है ङादाचिज़्या, ङा ङाबाव पोङ जे हुधुन्या जेमाले। 34ङा जेलाई तोबो साःरो कानुन ङायाचिज़्या — जे जेल मया दासिच्यो। किताव ङा मनी जेलाई मया ङादाचिउ, हिताव ज़ जे मनी जे जेल मया दासिच्यो। 35निताव जे जेल मया जेदासिकिन, ‘ङासिसर ज़ जेल्यो’ लिन्या प़ाइँए सरेस्न्या लेर।”
पत्रुसए ओय़ेन येसुए ङ़ादा ज़ है ओदोव
(मत्ती २६:३१-३५; मर्कूस १४:२७-३१; लूका २२:३१-३४)
36हाःत ज़ सिमोन पत्रुसए, “प्रभु, नँ काना नबाज़्याव?” है ओदोक ते, येसुए, “आव बेलाक ते ङा ङाबाज़्यावदा नँ बाधुन्या नमाले, छींनी ते हुन्या ज़ नले,” है ओदोक ते, 37पत्रुसए, “कै जैद प्रभु, ङा नँस माबाधुन्या? ङा नजूँनी सिन्या ब तयार ज़ ङालिज़्या,” है ओदोक ते, 38येसुए, “हुकी, ङा ङाजूँनी नजिउ झाःद्यान्या तयार नलिज़्याव रो? ङा ते नँलाई साचो है ङादींज़्या, भाल्या ओमाकोद ज़ ङालाई स़ोंखेप ‘ङामासरेसे’ है दान्या नले,” है दोक्यो।
Currently Selected:
यूहन्ना 13: NKham
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
