MATTHEW 7

Midangte tunga Thukhenna

(Luk 6:37-38, 41-42)

1“Note tunga thu ang kikhen lo nadingin midangte tungah thu khen sih un. 2Azieh pen midangte tungah thu na khen ma bangin note tungah thu ang kikhen ding a, midangte na pieh zaza ma uh na ngakia ding uhi.#Mrk 4:24 3Nangma’ mit sunga singluong om thei lopi-in na vengpa’#7:3 Gk “sanggampa’” mit sunga buathah om bang dinga na muthaw sese ahei? 4Ahi sihle nangma’ mit sunga singluong om kimlai na vengpa#7:4 Gk “sanggampa’” kungah, ‘Na mit sunga buathah nang lahpieh vang,’ bangci ci thei ding na hei? 5No mi kineitawmte aw, na mit sung vua singluong la masa phot un, tua zaw ciengin na vengpa’#7:5 Gk “sanggampa’” mit sunga na lah ding uh buathah cientahin na mu thei pan ding uhi.

A Siengtho Nate Buasahna

6“A siengtho nate ui pie sih un; vohte mai-ah kep manphate pai sih un, na pai uleh a keng utawh sia gawpin, kihei-in ang hapkia lel ding hi.

Ngen, Sui, Kiu

(Luk 11:9-13; 6:31)

7“ Ngen un, ang kipie ding hi; sui un, na mu ding uhi; kiu un, kot ang kihon ding hi. 8Azieh pen a ngen zosie in nga a, a sui zosie in mu-in, a kiu zosie kot kihon ding hi. 9Note lahah a tapa in anlum ngen leh suong pie ding koi na om uh ahei? 10Ahi sihle a tapa in nga ngen leh gul pie ding koi na om uh ahei? 11No migilote bawn in na tate uh tungah sil hoi pieh dan ding thei na hi uleh, vantunga om na Pa un ama kunga a ngente tungah sil hoi tampitah pie zaw kan lai lo ding amah!

A Thupi Sep Dingte

12“Na tung vua ang kibawl ding na dei bangun midangte tungah bawl un; azieh pen tami khu Moses’ thukham le kamsangte thugen bulpi ahi hi.#Luk 6:31

Kot Kawcih

(Luk 13:24)

13“Kot kawcih ah lut un; sietna mun zotna kot golin a lampi a bai#7:13 Adang tang laibute ah “azieh pen tua lampi golin a bai hi,” kici hi. ziehin mi tampi in a zui uhi. 14Hinna tun nading kot kawcihin a lampi a hamsat ziehin mi tawmno khat beh in a mu uhi.

Singkung le a Ga

(Luk 6:43-44)

15“A sungtawng ah ngie gongsan bang napi, tuu vun silin na kung vua ang pei zuouthei kamsangte lahah na pilvang un. 16Amate a ga tawh na thei pai lien ding uhi. Lingkung panin lengga kilo ngai-in thangling kung panin theiga a kilo ngai amah? 17Tua ma bangin singkung hoi zosie in ga hoi ga a, ahi vangin singkung hoi lo zosie in ga hoi lo ga uhi. 18Singkung hoi ah ga hoi lo a ga thei sih a, singkung hoi lo ah zong ga hoi a ga thei sih hi. 19Ga hoi a ga lo singkung zosie kiphua-in mei sungah kipai ding hi.#Mat 3:10; Luk 3:9 20Tua bangin amate a ga panun na thei pai ding uhi.#Mat 12:33

Ei le Ei Kisolna tawh Kisai

(Luk 13:25-27)

21“Keima kungah, ‘Topa, Topa, ei ci zosie vantung gam sungah a lut kim sih ding a, vantunga om ka Pa’ deina banga a gamtate beh a lut ding uhi. 22Khum ni ciengin mi tampi in keima kungah, ‘Topa, Topa, na min tawh thu ka hil vua, na min tawh dawite hawlkhie-in, na min ma tawh sil thupi tampitah bawl hi lo uh ka mah?’ ei ci ding uhi. 23Tua ciengin keima in amate kungah, ‘Note kang thei ngai vawt sih hi; sietna a bawl mite aw, ka kung panin pei dawh ta un,’ ka ci ding hi.#Late 6:8

A Zate le a Semte

(Luk 6:47-49)

24“Tua ciengin tam ka thugente za-in a zui zosiete suong tunga inn lam mipil pa tawh kibang ding hi. 25Guo zu-in tui khang a, hui langin tua inn a nawh gawp vangin suong tunga kilam ahi ziehin a pua sih hi. 26Tuale ka thugente za napi a zui nuom lo zosiete pen senel tunga inn lam mimaw pa tawh a kibang ding uhi. 27Guo zu-in tui khang a, hui langin tua inn a nawh gawp ciengin, senel tunga kilam ahi ziehin tua inn a pua ta hi, tua inn pua nasie sam e izaw!” a ci hi.

28Tu-in Jesu in tam thute a gen zaw ciengin mipite in ama’ thuhilna lamdang a sa uhi. 29Bangzieh ahei cile ama in thukham hil siete bangin thuhil loin aana nei khat bangin amate thu a hil hi.#Mrk 1:22; Luk 4:32

Currently Selected:

MATTHEW 7: ZBOTF01

Highlight

Copy