JOHN 19

1Tua ciengin Pilat in Jesu kai-in a satsah hi. 2Tuale galkapte in ling tawh kumpi lukhu khat phanin a lu tungah a khusah vua, puontuol ausan khat a silsah uhi. 3Ama kungah amate pei den mielmuolin, “Jew mite kumpipa na khan sau taheh,” ci-in a mai a beng uhi. 4Pilat pusuoh kia-in amate kungah, “En un, ama mawsah thei nading bangma thu ka mu lo lam na thei nadingun na kung vuah ama kang peisah hi,” a ci hi. 5Tuaci’n ling lukhu khukawm le puontuol ausan silkawmin Jesu a pusuoh hi. Pilat in amate kungah, “En un, mipa tanah om hi!” a ci hi. 6Siempu liente le palihte in ama a mu ciengun, “Singlamte tungah khailia un! Singlamte tungah khailia un!” ci-in a awng uhi. Pilat in amate kungah, “Noma ma in la unlen singlamte tungah kikhailia ta un; kei ka hile ama tungah mawmat ding ka mu sih hi,” a ci hi. 7Jew mite in ama kungah, “Kote in thukham khat ka nei vua, ama Pasien’ Tapa a kici ziehin thukham dung zui-in a si dinga kilawm ahi hi,” a ci uhi.

8Pilat in tami thu a zah ciengin nidang sangin a zauzaw hi. 9A kumpi inn ah#19:9 Gk “preatorium” ama lutkia-in Jesu kungah, “Nang hei pana hing pei na hiei?,” ci-in a dong hi. Hinanle Jesu in kam khat beh dawng lo hi. 10Tua ahi ziehin Pilat in ama kungah, “Kei ei hopi lo ding na hi amah? Nang hla thei nading le tha thei nading thu ka nei lam tah na thei sih amah?” a ci hi. 11Jesu in ama kungah, “Tunglam pana ang kipieh sih leh kei tungah thu na nei thei sih ding hi; tua ahi ziehin nang tunga kei ei piekhie pa in mawna lienzaw a bawl hi,” ci-in a dawng hi. 12Khum hun a kipanin Pilat in ama hla thei nading sui a, ahi vangin Jew mite in, “Tam pa na hla poma leh Caesar’ lawm na hi sih hi. Ama le ama kumpi a kibawl popo Ceasar langpang ahi hi,” a ci uhi.

13Pilat in tam thute a zah ciengin a pulamah Jesu peipi a, Hebrew#19:13 Aramaic ham a ci na ahi hi. hamin Gabbatha a kici Suongpha muna a om thukhenna topha tungah a to hi. 14Khum ni pen Peisan pawi dinga Kigin ni hi a, sunkim pawl ahi hi. Ama in Jew mite kungah, “Na kumpipa uh tanah om ei!” a ci hi. 15Amate in, “Ama that in! Ama that in! Singlamte tungah khailia in!” ci-in a kiko uhi. Pilat in amate kungah, “Na Kumpipa uh ka khailia ta diei mah?” ci-in a dong hi. Siempu liente in, “Caesar simlo kumpi dang ka nei sih uhi,” ci-in a dawng uhi. 16Tua ciengin Pilat in khailia dingin amate khutah Jesu a pie hi.

Singlamte Tunga Jesu Kikhaina

(Mat 27:32-44; Mrk 15:21-32; Luk 23:26-43)

17Tuaci’n amate in Jesu peipi-in ama’ singlamte ding ama in puo a, Hebrew#19:17 Tua khu Aramaic ham ahi hi. hamin Golgotha a kici Lutang Gu Mun-ah a pusuoh hi. 18Amate in singlamte tungah Jesu le adang mi nite tua munah a khailia uhi. Ama langtuoh ah adang nite kikhai-in a lai-ah Jesu kikhai hi. 19Pilat in zong lai khat gielsahin, “Nazareth khuomi Jesu, Judah Kumpipa,” cisah a, singlamte tungah a suongsah hi. 20Jew mite tampitah in tua lai kigiel a sim uhi. Bangzieh ahei cile Jesu kikhaina mun pen khuopi tawh kinai hi; tuami lai pen Hebrew lai, Latin lai, le Greek laite tawh kigiel ahi hi. 21Tua ciengin Judah siempu lien pente in Pilat kungah, ‘Judah-te Kumpipa’, ci-in giel sinlen, “ Tam pa in kei Judah kumpipa ka hi hi,’ a ci hi, ci-in gielzaw in,” a ci uhi. 22Pilat in, “Ka gielsa, ka gielsa ahi hi,” ci-in a dawng hi. 23Singlamte tungah Jesu a khailia zaw ciengun galkapte in a puonsilte la-in phal li a suo vua, phal khat cietin a tang uhi. Amate in a puon tungsil zong a la uhi; tua pen a lu panin a taw donga khui lo-a kigan ahi hi. 24Tuaci’n amate in, “Tami balkeh sih vai, koi pen in i nga ei aisan vai,” khatlekhat a kici uhi. Tam pen Lai Siengtho in,

“Amate in ka puonte a hawm vua,

ka puon-ah nga nadingin ai a san uhi,”

a ci thu a tangtun nading ahi hi.#Late 22:18

25Galkapte in tam bangin a bawl uhi.

Tua laitahin Jesu’ singlamte gei-ah a nu, a nu’ sanggamnu, Clopas’ zi Mary, le Mary Magdalene-te a ding uhi. 26Jesu in a nu panga a ding a it mama nuazuipa a mu ciengin ama in a nu kungah, “Numei aw, tanah na tapa om hi,” a ci hi. 27Tua ciengin ama in nuazuipa kungah, “Tanah na nu om hi,” a ci hi. Khum hun a kipanin a nuazui pa in a inn ah ama a peipi hi.

Jesu Sina

(Mat 27:45-56; Mrk 15:33-41; Luk 23:44-49)

28Tua zaw ciengin Jesu in vai zosie mansieng zo ci a thei ciengin (Lai Siengtho a tangtun nadingin), “Ka dang a ta hi,” a ci hi.#Late 69:21; 22:15 29Tua munah lenggazu thua a dim bel khat kitung hi. Tuaci’n amate in tua sungah tuihup a die vua, hyssop ba dawnah taa-in Jesu’ kam tawh a tuo uhi. 30Jesu in tua lenggazu a dawn zaw ciengin, “Kizo zo hi,” ci-in lukunin a si hi.

Jesu’ Pang Kidawt

31Tua ni pen Kigin ni ahi ziehin Jew mite in sabbath hun sungin singlamte tungah a luongte nuasie ding a dei sih uhi. Bangzieh ahei cile tua sabbath pen a diehdiehin a lipkhap huoi ni thupi ni ahi hi. Tuaci’n amate in a kikhailum pa’ kengte sattanin a luongte a hepkhiet thei nadingin Pilat kungah a ngen uhi. 32Tua ciengin galkapte pei-in a masa pa’ keng sattan piehin ama tawh a kikhaiton adang khat pa-a’ zong a sattanpieh uhi. 33Ahi vangin Jesu kung a tun ciengun ama a sisa-in a mu vua, a kengte a sattan pieh ta sih uhi. 34Tua tangin galkapte khat in teipi tawh a pang a sun leh thakhatin sisan le tui a luongkhie hi. 35(Note in zong tam thu na up thei nadingun tami thu a mu pa in teci a pang hi. Ama’ teci panna thuman ahi a, ama thuman gen ahi lam a kithei hi.) 36Lai Siengtho in, “A gu khat zong kitawngsah lo ding hi,” ci-in a genna thu a tangtun thei nadinga tam thute ang pieng ahi hi.#Pei 12:46; Gam 9:12; Late 34:20 37Lai Siengtho mundang khat ah, “Amate in a sut pa uh a en ding uhi,” na ci lai hi.#Zech 12:10; Kln 1:7

Jesu Kivuina

(Mat 27:57-61; Mrk 15:33-41; Luk 23:44-49)

38Tam thu teng zaw ciengin Jesu’ nuazui khat, Jew mite a giin ziehin a langtanga a zui ngam lo, Arimathea khuomi Joseph in Jesu’ luong a lah thei nadingin Pilat kungah ngen hi. Pilat in zong ama phalna a pie hi; tuaci’n ama pei-in Jesu’ luong a la hi. 39Jesu kungah a zan haw ngai pa Nicodemus zong myrrh le aloes kihal pong za bang a gih ding panamtuite tawi-in a pei hi.#Jhn 3:1-2 40Amate in Jesu’ luong la-in Judah-te’ kivuina ngaina bangin diel sungah panamtui tawh a tun uhi. 41Singlamte tungah a kikhailiana mun gei-ah um khat om a, tua um-ah koima a kivui ngai nai lona han tha khat a om hi. 42Jew mite’ Kigin ni ahi zieh leh tua kima han nai pen ahi ziehin tua hanah Jesu a vui uhi.

Currently Selected:

JOHN 19: ZBOTF01

Highlight

Copy