JOHN 20

Jesu Thawkiana

(Mat 28:1-8; Mrk 16:1-8; Luk 24:1-12)

1Nipi kal khat sunga ni masa pen ni zingmawng khuomiel laipi-in hanah Mary Magdalene a pei leh ama in hankot sinna suongtum a kiliamangsa a mu hi. 2Tuaci’n Simon Peter le Jesu in a it a nuazui dang khat kungah tua nu tai-in, “Amate in han panin Topa a ladawh ta vua, hei-a a siel uh ahei, ci ka thei sih uhi,” a ci hi. 3Tua ciengin Peter le adang nuazui pa dingkhie-in han lamah a pei uhi. 4A ni tuohun ama gel a taiton vangun nuazui dang khat pa in Peter makhelin hanah a na matun hi. 5Ama kunsuhin a etsuh leh tua munah a kitunna puon kipha a mu a, ahi vangin a sungah ama a lut sih hi. 6Tua ciengin ama’ nua zui-in Simon Peter pei a, han a tun ciengin han sungah a lut hi. Ama in tua munah a kitunna puon kipha mu a, 7a lu tunna puon zong a luong tunna puon tawh na omton loin a tuomtuohin kizielin a om a mu hi. 8Tua ciengin hanah a na tung masa adang nuazui pa zong a sungah lut a, tuale ama in mu-in a um hi. 9Azieh pen amate in misite lah panin ama thokia ding hi, ci-a Lai Siengtho genna a theitel nai sih uhi. 10Tua ciengin nuazuite a inn ciet vuah a peikia uhi.

Mary Magdalene Kungah Jesu Kilah

(Mat 28:9-10; Mrk 16:9-11)

11Ahi vangin han pulamah Mary dingin a kap hi. A kaa kawmin hankhuh sung lam enin#20:11 Gk ah “enin” ci om lo hi. a kunsuh leh, 12tua nu in Jesu luong kisielna a lu lamah khat, a keng lamah khat, puonpah silin a to vantungmi ni a mu hi. 13Ama gel in tua nu kungah, “Numei aw, bang dinga kap na hei?” a ci uhi. Tua nu in ama gel kungah, “Amate in ka Topa a lamang ta vua, hei sunga a siel dawh uh ahei, ci ka thei ta sih hi,” a ci hi. 14Tua nu in tam thu a gen zaw ciengin a kinua hei leh khum sunga a ding Jesu mu a, ahi vangin Jesu ahi lam a thei sih hi. 15Jesu in ama kungah, “Numei aw, bang dinga kap na hei? Koi ahiei na sui?” a ci hi. Tua nu in huon bawlpa sa a, “Sie aw, nang puohdawh ahile, na koina ei gen in, a luong ka la ding hi,” a ci hi. 16Jesu in ama kungah, “Mary!” a ci leh Mary zong kinua hei-in Hebrew#20:16 “Aramaic” a cina ahi hi. hamin, Rabboni!” ci a, (tua khu Siepa a cinopna ahi hi). 17Jesu in tua nu kungah, “Ei tu sin, bangzieh ahei cile Pa kungah ka peito nai sih hi. Ahi vangin ka sanggamte kungah pei inlen, “Ka Pa le na Pa uh ahi, ka Pasien le na Pasien uh’ kungah ka kato ta ding hi,’ ci hi, ci-in va genzaw ta un,” a ci hi. 18Mary Magdalene zong pei pai-in nuazuite kungah, “Topa ka mu zo hi,” a ci hi; tua nu in tua pa thugen zosie amate kungah a gensawn hi.

Nuazuite Kungah Jesu Kilah

(Mat 28:16-20; Mrk 16:14-18; Luk 24:36-49)

19Nipi kal khat sunga ni masa pen nitahin nuazuite in Judah mite a giin ziehun inn kotkhahte a khah vua, tuale a kikhopna vuah Jesu pei-in amate lahah ding a, “Nopna note tawh ang om taheh,” a ci hi. 20Ama in tam thu a gen zaw ciengin amate kungah a khutte le a pang zong a lah hi. Nuazuite in Topa a mu ciengun a nuom mama uhi. 21Jesu in amate kungah, “Note tawh nopna om taheh. Pa in kei ei sawl bangin note kang sawl hi,” a cikia hi. 22Tam a ci zaw ciengin amate tungah a hu sang a, “Hlagau Siengtho na sang un. 23Note in mi khatpo’ mawnate na maisah uleh, tua mawnate kimaisah ding a, mi khatpo’ mawnate na opsah suoh uleh tua mawnate a om suoh ding hi,” a ci hi.#Mat 16:19; 18:18

Jesu le Thomas

24Jesu a pei laitahin amate lahah sawm le nite lahah khat Thomas (a kopsuo#20:24 Gk “Didymus” kici hi. kici pa) om lo hi. 25Tuaci’n nuazui dangte in tua pa kungah, “Topa ka mu ta uhi,” a ci uhi. Ahi vangin ama in amate kungah, “A khut sunga siakil kikhetna pawn mu-in, siakil kikhetna ma vangah ka khutme ka va khum tehteh sih a, a pang zong ka khut tawh ka va tham tehteh sih leh ka um sih ding hi,” a ci hi.

26Tua zaw nipi kal khat ciengin inn sungah a nuazuite a na omkia vua, Thomas zong amate tawh a omton hi. Kotkhahte a kikha vangin Jesu pei-in amate lahah ding a, “Note tawh nopna om taheh,” a ci hi. 27Tua ciengin ama in Thomas kungah, “Na khutme tawh tamtah tham inlen ka khutte en in. Na khut zah inlen ka pang zong tham in. Umla sinlen muong lenlon in,” a ci hi. 28Thomas in, “Ka Topa le ka Pasien!” ci-in a dawng hi. 29Jesu in ama kungah, “Kei nei mu zieha ei um pan na hi bo amah? Kei ei mu lopi-a ei umte mi hampha ahi uhi,” a ci hi.

Tami Laibu’ Deina

30Jesu in a nuazuite’ muna-ah tami laibu sunga a kigiel kha lo na lamdang tampitah zong a bawl hi. 31Ahi vangin Jesu in Messiah#20:31 Ahi sihle “Khris” hi a, Pasien’ Tapa ahina thu na up#20:31 Adang tang laibute ah “na up peisuoh nading uh” ci-in kigiel hi. thei nading ule tua banga na upna uh tungtawnin ama’ min tawh hinna na nei thei nading vua tam thute kigiel ahi hi.

Currently Selected:

JOHN 20: ZBOTF01

Highlight

Copy