JEREMIAH 32
32
Galte’ Imtawm Laitahin Jeremiah in Lo Khat Lei
1Nebuchadnezzar kumpi a suo zaw kum sawm le kum gietna kum, Judah Kumpipa Zedekiah kumpi a suo zaw a kum sawmna kumin Topa kung panin Jeremiah kungah thu tung hi.#2Kum 25:1-7 2Khum hunin Babylon kumpipa’ galkapte in Jerusalem a imtawm laitah uh ahi a, kamsangpa Jeremiah zong Judah kumpipa’ inn huong sunga thong sungah a kikhumcip laitah ahi hi. 3Ama pen Judah kumpipa Zedekiah in tua muna a na khum cimit ahi hi. Zedekiah in, “Bang dingin nang in kamsangin: Topa in tam bangci hi: Keima in Babylon kumpipa’ khut sungah tam khuopi ka pie ding a, ama in a la ding hi; 4Chaldea-te’ khut sung panin Judah kumpipa Zedekiah suohta lo ding a, ahi vangin Babylon kumpipa’ khutah kipie tahtah ding a, tuale ama tawh kimaituo-in kiholimin a mit utawh a ki-entuoh ding uhi; 5tuale ama in Babylon ah Zedekiah peipi ding a, keima in ama ka ve masangsie khum munnah omden ding hi, Topa in ci hi; Chaldea-te do nan locin na zo sih ding uhi, ci-a thu na hil mawh ahei?” a ci hi.
6Jeremiah in, “Keima kungah Topa’ thu ang tung hi: 7Nangma kungah na pano Shallum’ tapa Hanamel ang pei ding a, ama in, “Anathoth khuo-a ka lo kilei in, azieh pen sum tawh lei-in tatkiatheina thu nei khu nangma na hi hi,” ang ci ding hi. 8Tua ciengin Topa’ ang gen dung zui-in inn huong sunga ka opna thong sungah ka innlah sanggampa ang pei-in, “Benjamin gam Anathoth khuo-a ka lo lei in, bang ding ahei cile gam neina le tatkiatheina thu na nei hi; nangma adingin kilei in,” ei ci hi. Tua ciengin keima in tam pen Topa’ thu ahi lam ka thei hi.
9Tuale keima in ka pano Hanamel kung panin Anathoth khuo-a lo ka lei a, ama adingin ngun shekel sawm le sagi ka tekhie hi. 10Keima in thukimna lai tungah min ka thu a, gip tawh matin teci ding hlanin tawi khaina-ah sum ka te hi. 11Tua ciengin ka thukimna ule a thu teng a kigielna, gip tawh a kimat ka kileina uh lai le gip tawh a kimat lo laite ka la a, 12ka innlah sanggampa Hanamel, ka kileina uh lai tunga minthu tecite, le thong huong sunga a to Judah mi zosie’ mai-ah Mahseiah’ tapa Neriah, a tapa Baruch kungah tua lai ka pie hi. 13Keima in amate mai-ah tam bangin Baruch thu ka pie a, 14Israel’ Pasien, Vanglien Topa in tam bangin ci hi: Tami kileina laite, gip tawh a kimat le gip tawh a kimat lolai tegel la inlen, kisie loin sawt veipi a op thei nadingin leibeel sung khatah koi in. 15Azieh pen Israel’ Pasien, Vanglien Topa in tam bangin ci hi: Tami gam sunga innte, lote le lengga lote ang kileikia ding hi, ci-in ka gen hi.
Jeremiah in Theitel nading Thungen
16Neriah’ tapa Baruch kungah kileina lai ka pieh zaw ciengin Topa kungah thu ka ngen hi: 17Kasai, Topa Pasien! Na khut zahin na vanglienpi tawh vanpi le leipi a bawl pa nangma na hi hi! Nang adingin a hamsa bangma khat beh om lo hi. 18Nangma in a khang tul khatna#32:18 Ahi sihle “a tultulte dongin” dongin na itna kip na lah a, hinanle pate’ khielna amau’ nua-a tate tungah na thuh hi. Vanglien Topa a kici a lien mama le a thahat mama Pasien aw, 19na thugelte hoi mama a, na sepnate thupi mama hi; nang in mihingte’ opdan zosie na musuoh a, a opdante ule a sepna gate uh dung zui-in mi zosie tungah thaman na pie hi. 20Nangma in Egypt gamah lim le na lamdangte na lah a, tuni dongin zong Israel gam le mi zosie tungah lahin, tuni cieng dongin na min a thangsah peisuoh pa na hi hi. 21Nangma in na mi Israel-te Egypt gam panin lim le na lamdangte tawh ahi a, a kizah nangma’ banhat tawh ahi a, mulkin huoitah tawh ahi zongin na ladawh hi; 22a pu a pate uh kungah pieh dinga na ciemsa, bawngnawi le khuoizu a luonna tami gam amate na pie hi; 23tuale amate lutin tam gam a luo uhi. Ahi vangin amate in na thu mang loin na thukham zong zui loin, bawl dinga na thupiehte zosie a bawl sih uhi. Tua ahi ziehin nangma in amate tungah tam gimna zosie na tungsah hi. 24En un, khuopi a kilah nadingin leiciente kicieng zo a, namsau, kielpi, le pulnatnate a thuohna ziehin amate a do Chaldea-te’ khut sungah tua khuopi a kipie ta hi. Na gensa bangin ang pieng zo hi, ci nang mama-in na mitin na mu thei ta hi. 25Ahi mawh vangin Topa Pasien aw, tam khuopi pen Chaldea-te’ khut sungah kipie zo nanle nang in kei kungah, “Na teci ding mi ciel inlen tua lo sum tawh lei in,” nei ci zo hi.
Mite Kilekia Ding Pasien’ Hlamuonna
26Jeremiah kungah Topa’ thu a tung hi: 27En in, kei pen mi zosie’ Pasien, Topa ka hi hi. 28Tua ahi ziehin Topa in tam bangin ci hi: Chaldea-te’ khut sung le Babylon Kumpi Nebuchadnezzar’ khut sungah tam khuopi ka pie ding a, ama in a la ding hi.#2Kum 25:1-11; 2Khg 36:17-21 29Tam khuopi a sim Chaldea-te pei-in mei tawh khuopi a hal ding vua, ka lungthah nadingin innkhum tung tengah Baal ading biehnate lui zo-in, pasien dangte adingin dawn thei biehnate zong a sung zo uhi. 30Azieh pen Israel mite le Judah mite in a neu lai vua kipanin ka muna-ah bangma bawl loin a sie beh a gamta uhi; Israel mite in bangma dang bawl loin, a khut utawh a bawlte uh ziehin keima ei lungthahsah uhi, Topa in ci hi. 31Tam khuopi in a kisat cila kipanin tuni cieng dongin keima ei lungthahsahin ei thangpaisah ahi ziehin ka muna panin ka hemmang ding hi. 32Israel mite le Judah mite - amate, a kumpite ule a uliente uh, a siempute ule a kamsangte uh, Judah mite le Jerusalem khuo-a a teng mite in a bawl uh sietna zosiete ziehin keima ei lungthahsah uhi. 33Amate in kei ei maingat loin ei nuangat uhi; amate thu hilhil nanleng ngai nuom loin thuhilna a sang nuom sih uhi. 34Amate in ka min kilawna biehinn sungah a kidahhuoite koi-in a buasah uhi.#2Kum 23:10; Jer 7:30-31; 19:1-6 35Amate in Molech tungah a tanute, a tapate uh a pieh nadingun Hinnom’ tapa kuomah Baal biehna munsangte a bawl uhi. Keima in Judah mite a khielsah tami a kidahhuoi a bawl dingin amate thu ka pie ngai sih a, zong ka ngaisun kha beh sih hi.#Siem 18:21; 2Kum 23:10; Jer 7:31
36Tua ahi ziehin tu-in, “Namsau, kielpi, le pulnatna ziehin Babylon kumpipa’ khut sunga kipie ahi ta hi,” na ci uh tam khuopi tawh kisai-in Israel’ Pasien, Topa in tam bangin ci hi: 37En vawi, ka lunghangin ka lungso a, ka nah thangpai seng ziehin ka delmangna gam zosie panin amate ka khawmtuo kia ding a, tam munah tutkia-in amate lungmuong tahin ka omsah ding hi. 38Amate keima’ mi hi ding a, kei zong amau’ Pasien ka hi ding hi. 39Amate hoi nading, a nua cieng vua a tate uh’ hoi nading le a lungtang vuah kum tawnin ei giin thei nadingun lungtang khat le tawndan khat amate ka pie ding hi. 40Amate tungah sil hoi bawlna ka khawl ngai lo nadingin amate tawh tawntung thuciemna khat ka bawl ding hi. Keima kung panin a kiheimang lo nadingun amau’ lungtang sungah keima giinna ka guon ding hi. 41Amate tungah na hoi ka bawl ziehin ka kipah ding a, ka lungtang zosie le ka hinna zosie tawh thuman tahin tam gamah amate ka phutdet ding hi.
42Azieh pen Topa in tam bangin ci hi: Tam mite tungah tam gimna zosie ka tunsah ma bangin, amate tungah tu-a ka ciem na hoi zosie ka tungsah ding hi. 43Tami gam pen mihingte le ganhingte a ten lona gamkhing hi a, Chaldea-te’ khut sungah kipie zo ta hi, note in na ci uh tami gamah lote kileikia ta ding hi. 44Benjamin gam sung, Jerusalem kimvela munte, le Judah gam sunga khuopite, muoltung gam sunga khuopite, Shephelah gam sunga khuopite, le Negeb gam sunga khuopite ah lote sum tawh kilei ding a, tecite tawh thukimna lai tungah letmat thu-in gip tawh kimat ding hi; azieh pen keima in a gam uh ka piekia ding hi, Topa in ci hi.
Currently Selected:
JEREMIAH 32: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
