JEREMIAH 31
31
Lungdama a Kilekia Saltangte
1Khum hun ciengin Israel innkuonte zosie’ Pasien ka hi ding a, amate ka mi ahi ding uhi, Topa in ci hi.
2 Topa in tam bangin ci hi:
Namsau-a suohtate in
senel gamah hepina mu uhi.
Israel in
toidamna a sui ciengin,
3ama#31:3 Gk: Heb “ama” kungah a gamlapi panin#31:3 Ahi sihle “ sawtlaipi panin ama kungah”
Topa kilang hi.
Keima in a tul thei lo itna tawh
nangma kang it hi;
tua ahi ziehin keima in na tungah
kang thumanna ka zomsuoh hi.
4Ngahnu siengtho Israel!
Keima in kang lamkia ding a,
nang na kilampha ding hi.
Nangma in na tawmte na la#31:4 Ahi sihle “tua tawh nangma na kivon ding a” ding a,
a guolnuomte’ lamna-ah
na va pei ta ding hi.
5Samaria muoltung tengah
lenggui na suonkia ding a,
um bawlte in suonin,
a ga ne-in a nuomsa ding uhi.
6Bang ding ahei cile
Ephraim muoltung panin galvilte in,
“Hing pei un, Topa i Pasien uh kung
Zion ah peito vai,”
ci-in a hlat nading uh ni khat
ang tung ding hi,” a ci hi.
7Azieh pen Topa in
tam bangin ci hi:
Jacob ading kipahna tawh
a gingin la sa unlen,
minamte lahah
a lienpente adingin kiko-in awng un;
“A omlai na mi Israel-te hundam in,
Topa aw,” ci-in kiko-in phat un.
8En un, leilu lam gam panin
amate ka peipi ding a,
leitung a gamla pen mun panin
ka kaikhawm ding hi.
Amate lahah mittaw,
khelbai, numei gaite le
nausuoh natna a nei numeite,
mihon tampite tawh a kilekia ding uhi.
9A kaa kawmun amate ang pei ding a,
keima in henepna#31:9 Vg Tg tawh a kitekah Gk: Heb “thungetna” tawh
amate ka puikia ding hi.
Tui a opna lui gei-ah amate peisahin
lamzang ka zawtpi ding a, a pua sih ding uhi.
Bangzieh ahei cile kei pen
Israel’ pa ka hi a, Ephraim, ka tapa ta pen ahi hi.
10Minamte aw, Topa’ thu ngai un.
A gamla tuipi panglamah va gen ta un.
“Israel a thezah pa in
ama kaikhawm ding a,
tuucingpa in a tuute a cin bangin
ama a cing ding hi,” va ci ta un.
11Bangzieh ahei cile
Topa in Jacob tan zo a,
ama dinga a hat mama khutte panin
ama hunkhie zo hi.
12Amate ang pei ding vua,
Zion muolsang tungah nahpi-in la sa-in,
Topa’ hoina ahi, an,
lenggazu, sathau,
tuuno honte le ganta note ziehin
a mai uh a tang ding hi.
A hinkhuo uh tui kibuoh um bang ding a,
a lunggim nawn sih ding uhi.
13Tua ciengin ngahnute lamin a kipah ding vua,
tangvalte le papite zong guolnuom ding uhi.
Keima in a kaanate uh
kipahna-in ka heipieh ding a,
amate henemin a danate uh
lungdamna ka suohsah ding hi.
14Antui pen tawh siempute
niengtahin ka va ding a,
keima’ hauna ziehin
ka mite lungtai ding uhi,
Topa in ci hi.
15 Topa in tam bangin ci hi:
Ramah ah nahpi kaana le mauna awging kiza hi.
Rachel, a tate adingin kap hi;
amate a op tah lo ziehin kihlai zo lo hi.#Pien 35:16-19; Mat 2:18
16 Topa in tam bangin ci hi:
Kapkap nawn sin len, na hlitui sia dawh in;
azieh pen na sepna ziehin
thaman na nga hi, Topa in ci hi.
A galte uh’ gam panin amate
ang peikia ding uhi.
17Na mailam adingin lametna a om hi.
Topa in ci hi:
Ama in na tate zong amau’ gam ma-ah
ang peikia ding uhi,
18Ephraim’ thumna ka za tahtah ta a:
“A kisin lo bawngno thu nei
hil a, nei thuhilna ka mang hi.
Ei puikia inlen ei peisahkia in.
Azieh pen nang Topa ka Pasien na hi hi.
19Bang ding ahei cile
ka peizaw ciengin ka kisiakia hi;
keima ka kitheitel zaw ciengin
ka phei ka beng hi;
ka neu lai-a ka minsietna teng
ka puoh den ziehin maizumin ka lung amgawp hi,” a ci hi.
20Ephraim, ka it mama ka tapa ahi amah?
Ama keima’ lungkimna tapa ahi amah?
Ama langpangin thu ka gen sielin
ama ka phawh lai veve hi.
Tua ziehin ka lungsim sungah ama teng den hi;
ama ka hepi tahtah ding hi, Topa in ci hi.
21Lampi ciemtenate phut unlen,
lamlahnate bawl un;
na peina uh lamlienpi
limtahin ngaisun un,
ngahnu siengtho Israel aw,
hing kilekia unlen,
tam na khuopite vuah
hing kilekia un.
22A muonhuoi lo ka tanu aw,
bang tanvei lungkaa ding na hei?
Azieh pen leitungah Topa in a tha na khat a bawl hi:
Numei in pasal a kimvel#31:22 Heb ah a khietna kicien lo hi. hi.
23Israel’ Pasien, Topa in tam bangin ci hi: Keima in a gam uh ka piehkia ciengin Judah gam sung le a khuopite uh sungah amate in,
“A dih tenna aw, muol siengtho aw!
Topa in thupha hing pie taheh,”
ci-in tam kammalte khatvei a zangkia ding uhi.
24Judah gam le a khuopite uh sungah lohlote le a tuuhonte utawh a vah kawikawite a tengton ding uhi.
25Keima in a gimte ka tawldamsah ding a,
a baate’ tha ka dimkia ding hi.
26Tua ciengin khangloin ka khuodah leh kei adingin ka kimut a nuom mama hi.
Mimal Dan Thuohna
27Keima in Israel innkuonte le Judah innkuonte tungah mihing cihlah le ganhing’ cihlah ka tu ding ni ang tung valon ding hi, Topa in ci hi. 28Tuale amate botdawhin phelkhie a, paimangin suhsiet ding le sietna tunsah dingin ka buh ma bangin, a lamkia ding le a phutkia dingin amate ka vil ding hi, Topa in ci hi. 29Khum ni ciengin amate in:
“Pate in lengga thua a ne vua,
a tate uh’ ha a za hi,” a ci nawn sih ding uhi.#Ezk 18:2
30Ahi vangin a mawnate uh ziehin mi zosie si ding uhi; lengga thua a nete zosie a ha uh za ding hi.
Thuciemna Tha
31Keima in Israel innkuonte le Judah innkuonte tawh thuciemna tha khat ka bawl ding ni ang tung valon ding hi, Topa in ci hi.#Mat 26:28; Mrk 14:24; Luk 22:20; 1Cor 11:25; 2Cor 3:6 32Tua pen Egypt gam panin ka peipi thei nadingin amau’ khut tawh ka kaih hun lai-a a pu a pate utawh ka na bawl thuciemna tawh kibang nawn lo ding hi. Kei amau’ pasal ka hi vangin amate in tua thuciemna a palsat uhi, Topa in ci hi. 33Khum hun zaw cienga Israel innkuonte tawh ka bawl ding thuciemna tami hi zaw ta ding hi, Topa in ci hi: Amate sungah ka thukham ka koi ding a, amau’ lungtang tungah ka giel ding hi; tuale kei amau’ Pasien ka hi ding a, amate keima’ mite ahi ding uhi.#Heb 10:16 34Koima in, “Topa thei in,” ci-in amate khatlekhat kihil nawn loin, khatlekhat zong kigen nawn lo ding uhi, bangzieh ahei cile amate in a neupen panin a golpen dongin a unpi-un keima ei thei ding uhi, Topa in ci hi. Azieh pen keima in amau’ khielna ka maisah ding a, a mawna uzong phawkhahin ka nei nawn sih ding hi. #Heb 8:8-12#Heb 10:17
35Tam bangin Topa in a gen hi,
sun a vahsah dingin ni ei pie a,
zan a vahsah dingin hlapi le
aasite’ ngaina kipte ei gelpiehin,
tuihuolte a gin valuh nadingin
tuipi a lawh pa -
ama’ min pen Vanglien
Topa ahi hi, a ci hi.
36Tami ngaina kipte
ka mai-a a manthai leh,
Israel’ suonlehlahte zong
ka mai panin minam khat ahina uh
mangthai pan beh ding hi,
Topa in ci hi.
37 Topa in tam bangin ci hi:
Tung lama vante kite thei hinlen,
leinei-a leitung kitunna zungpi
mudawh thei-a a op leh,
Israel’ suonlehlahte zosie,
amau’ gamtatnasate ziehin
ka nuol pan beh ding hi,
Topa in ci hi.
Jerusalem Kigolkeh Ding
38Hananel tausang panin Kiu Tunkot dongin Topa adingin khuopi a kibawlphat ding hun ang tung valon ding hi, Topa in ci hi. 39A tena khau pen Gareb muol dongin tangtahin kikai ding a, Goah lamah kihei ding hi. 40Misi luongte le vut buohna kuom bup le Kidron Lui cieng donga a om lo teng zosie, nisuona lama Sakol Tunkot cieng dong, Topa adingin mun siengtho a suoh ding hi. Bangma cih hunin tua khuopi kiphungkal loin zong kipaimang ngai nawn lo ding hi.
Currently Selected:
JEREMIAH 31: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
