JEREMIAH 30
30
A ngaingai Bahkia nading Israel le Judah Kikamciem
1 Topa kung panin Jeremiah kungah thu ang tung pen khu tami ahi hi: 2Israel’ Pasien, Vanglien Topa in tam bangin ci hi: Na kunga kang gensa thute zosie laibu khat sungah khum in. 3Azieh pen Topa in a genna-ah, ka mite ahi Israel le Judah tungah a gam uh ka piehkia nading nite ang tung valon ding a, tuale a pu a pate uh kunga ka piehsa gamah amate peipikia-in tua gam a luo ding uhi, a ci hi.
4Tam teng pen Israel le Judah tawh kisai-in Topa in a gen thute ahi hi:
5 Topa in tam bangin ci hi:
Eite in zauna, le patauna aw i za zo vua,
lungnopna aw ahi sih hi.
6Tu-in kan unlen encien vawi un.
Pasal in nau a pai thei amah?
Tua ahile bang ziehin
pasal zosie in
numei nausuoh nat banga
a khut utawh a tai uh a hum mu ka hei?
Bang dingin a maite uh
kangdang ahei?
7Ka nu ei! Khum ni pen a nasie sengin
tua bang ni a om ngai sih hi;
tam pen Jacob adingin
lungkham hun hi ding a,
hinanle khum panin ama
kihunkhie veve ding hi.
8Khum ni ciengin keima in ama’#30:8 Cn: Heb “nangma’ “ ngawnga hahkol kuoitawngin, ama’#30:8 Cn: Heb “nangma’ “ kihenna khaute ka bottan ding a, tuale ama pen namdangte in salin khawi nawn lo ding hi, Vanglien Topa in ci hi. 9Ahi vangin amate in Topa a Pasien uh’ na le a kumpi uh David’ na a sem ding uhi.
10Hinanle ka nasempa Jacob aw, nang na hi leh zau vawt sin,
Israel aw, lungkham sin, Topa in ci hi.
bangzieh ahei cile a gamlapi panin
note kang hundam ding a,
keima in a saltanna uh panin
na suonlehlahte ka hundam ding hi.
Jacob’ suonte ang kilekia ding a,
amate sip dide le nuomtahin omin,
koima in a zausah nawn sih ding hi.
11Azieh pen kang hutdam thei nadingin
nang tawh kang omton hi, Topa in ci hi;
amate lahah nang kang thethangna
minam zosie ka susie ding a,
ahi vangin keima in
nangma kang susie sih ding hi.
A kituoh bep khatin thu kang hil ding a,
dan pieh loin lah kang mawh koi sih ding hi.#Jer 46:27-28
12Azieh pen Topa in tam bangin ci hi:
Na liemna dam thei lo a,
na hima nasie mama hi.
13Na vai puo ding koima a om sih a,
na hima adingin zatui om loin,
na dam nading zong bangma a om sih hi.
14Na lawm it zosie in ang mangngil sieng a,
amate in nang ang don nuom ta sih uhi;
azieh pen na khielna lien luo-in
na mawna tam luo ahi ziehin,
khuotuona a nei lo galte khat dan ka pieh bang le
galte khat satin ka liemsah bangin, nang kang bawl hi.
15Na liemna ziehin bang dingin kapkap na hi ahei?
Nang natna pen damsah thei ahi sih hi.
Na khielna lien luo-in na mawna a tam seng ziehin,
keima in na tungah tam teng kang bawl ahi hi.
16Tua ziehin nangma ang valte
ken zong kivaltum ding a,
na galte zosie a unpi-un
salin kipeipi ding hi.
Nang ang bulute kibulu ding a,
galmata nangma ang mante galmatin kiman ding hi.
17Azieh pen amate in mi kipampai hing ci-in
“Koima’ don lo Zion na hi hi,”
ang ci ziehun na tungah
damna kang piekia ding a,
na liemmate ka damsah kia ding hi,
Topa in ci hi.
18 Topa in tam bangin ci hi:
Jacob suonte’ buhte
a ngaingai ka bangsah kia ding a,
amau’ tenna mun tungah lainatna ka nei ding hi.
A muol tungah khuopi kilamkia ding a,
a om ngaina mun ma-ah kumpi inn omkia ding hi.
19Khumte sung panin lungdamkona la sahna le
guolnopna awging ang pusuoh ding hi.
Amate ka pungsah ding a, a tawmtham ahi sih ding uhi;
mi zatah dingin amate ka bawl ding a, amate a kineu-et sih ding hi.
20A tate uh pen hun lui lai bang ding a,
a mihonpite uh ka mai-ah kiphutdet ding hi.
Amate a gawt mi zosie
dan ka pie ding hi.
21A kumpi ding uh pen amate khat ma hi ding a,
a vaihawm lamkai ding uh
amate sung pan ma-in ang pieng ding hi;
Keima in a nai ah ama ka kai ding a,
ama in ka kung ei zuon ding hi.
Tua hi sihle koi in ka kung
ei zuon ngam ding ahei, Topa in ci hi.
22Tuale note ka mite na hi ding vua,
kei na Pasien uh ka hi ding hi.
23En un,
Topa’ khuopi huipi khu!
Thangpaina ang pusuoh ta a,
pumpei kihiapi#30:23 Ms Khat: MT ah a khietna kicien lo hi. in migilo pa’ lutung mutgawp ding hi.
24Ama’ lungtup teng semin, a tangtun masangsie,
a giinhuoi Topa’ lungthahna a kilekia sih ding hi.
Ang tung ding nite-ah note in
tami na telsiem ding uhi.
Currently Selected:
JEREMIAH 30: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
