JEREMIAH 33
33
Danpiehna zaw cienga Damsahna
1Thong huong sungah a kikhumcip laitahin Jeremiah kungah Topa’ thu a ni veina a tung hi: 2Leitung#33:2 Gk: Heb “tua” bawlin a kipsah Topa, a min Topa a kici Topa in tam bangin ci hi: 3Keima ei hlan un, kang dawng ding a, na thei ngai lo uh phuolsel thulienpite kang gen ding hi. 4Azieh pen galte’ leicien cienna zieh le gal dona ziehin namsau mai-ah a kisusie ding ahi tami khuopi sunga innte le Judah kumpite’ innte tawh kisai-in, Israel-te’ Pasien, Topa in tam bangin ci hi:#33:4 : Heb ah a khietna kicien lo hi. 5Ka lungthahna le ka thangpaina ziehin keima in ka thalia ding misi luongte tawh a kidimsah dingin gal sim#33:5 Cn: Heb “Chaldea-te sim dingin amate ang pei uhi” dingin Chaldea-te ang pei ding hi, azieh pen a gitlona zosiete ziehin tami khuopi panin ka mai ka phuol zo ta hi. 6Tami khuopi tungah noptuomna le cidamna tungsahin amate ka damsah ding a, amate tungah a kicing hauna le lungmuonna ka lah ding hi. 7Keima in a saltanna panun Judah le Israel ka lakia ding a, a op masah lai bangun ka omsah kia ding hi. 8Keima tunga ang bawl uh a mawna uh zosie panin amate ka siengsah ding a, ka tunga ang mawnate ule ei langpanna zosiete uh ka maisah ding hi. 9Tuale keima in tami khuopi#33:9 Heb “Tuale tua” pen amate adinga ka bawl na hoi zosie a za ding ahi leitung minam zosie’ mai-ah lungdamna, patawina, le vanglietna hi ding hi; ama adinga ka pieh hoina le nopsahna zosie ziehin amate zau-in a citun ding uhi.
10 Topa in tam bangin ci hi: Note in, “Tam munah mi lah om lo, ganhing lah om lo, a hawmpi-a om hi bo, na ci ma bangun, Judah khuopite le Jerusalem gawlzingte hawmsuoh a, mihing ganhing koima teng ta sih, ci-a na genna mun vuah awging ang kizakia ding a, 11kipah thanopna awging, zinei pa le motha nu’ awging le Topa’ biehinn sunga lungdamko biehna awging ahi,
Vanglien Topa tungah
lungdamna ko un,
azieh pen Topa hoi a,
ama’ itna kip tawntung hi!”
ci-a lasahna awgingte
a kizakia ding hi.
Bangzieh ahei cile keima in a masa lai bangin a gam uh hamphatna ka piekia ding hi, Topa in ci hi.#1Khg 16:34; 2Khg 5:13; 7:3; Ezr 3:11; Late 100:5; 106:1; 107:1; 118:1; 136:1
12Vanglien Topa in tam bangin ci hi: Mihing le ganhing om lo a hawmsuoh ahi tami mun le a khuopi zosie ah tuucingte ading lonona mun le a tuuhonte toi om nading mun omkia ding hi. 13Muoltung khuopite, Shephalah khuopite le Negeb gam khuopite, Benjamin gam, Jerusalem khuo kimvel munte le Judah gam khuopite ah tuuhon phaza a sim pa’ khut sungah tuuhonte a vah kawi kawi ding uhi, Topa in ci hi.
A Dihtat Bazam le David tawh Thuciemna
14Israel innkuonte le Judah innkuonte kungah ka kamciem ka tangtunsah ding ni ang tung valon ding hi, Topa in ci hi. 15Khum ni le khum hun ciengin David adingin a dihtat Bazam khat ka zamsah ding a, ama in gam sungah thutang le thudih tawh thu a khen ding hi. 16Khum ni ciengin Judah khu a kihundam ta ding a, Jerusalem lungmuong tahin a teng ding hi. Tuale ama a kihlat nading a min: “Topa, Eite’ Dihtatna,” kici ding hi.#Jer 23:5-6
17Bangzieh ahei cile Topa in tam bangin ci hi: David’ suon sung panin Israel innkuonte’ kumpi topha tungah a to ding mi kitasam ngai lo ding hi.#2Sam 7:12-16; 1Kum 2:4; 1Khg 17:11-14 18Levi siempute zong ka mai-a meihal biehna a lui ding, an tawh biehna a tawi ding, le biehpiehnate a bawl zing ding mi a kitasam ngai sih ding uhi.#Gam 3:5-10
19Jeremiah kungah Topa’ thu a tung hi: 20Topa in tam bangin ci hi: Note khatpo in a hun kiciengtan banga sun le zan a tun lo nadingin sun tawh ka thuciemna le zan tawh ka thuciemna na phel thei vua ahile, 21tua cieng behin ka nasempa David tawh ka thuciemna a kisie hi pan ding a, tuaci’n David in ama’ kumpi topha tungah a to ding tapa nei loin, ka nasem Levi mite tawh ka thuciemna zong a kisie ahi pan ding hi. 22Van mihonte a kisim zo lo le tuipi gei-a senelte a kite zo lo bangin keima in ka nasempa David’ suonte le ka nasem Levi-te ka pungsah ding hi.
23Jeremiah kungah Topa’ thu a tung hi: 24Tam mite in, “Topa in a teelsa innkuon nite nuol zo ta hi, ci-in a gen uh na phawh kha ta sih amah? Tuale amate in ka mite tua bangin simmaw-in minam khat a zong a sim tah lo uh amah? 25Topa in tam bangin ci hi: Sun le zan tawh ka thuciemna kipsah nai loin, van le lei tawh ngaina kipte a bawl zo nai lo khat hi poma leng, 26Jacob’ suonte le ka nasempa David’ suonte ka nuol ding a, Abraham, Isaac, le Jacob’ suonte tungah a uh dingin ama’ suonlehlahte lahah khat zong ka teel sih ding hi. Azieh pen tu-in tua bang hi loin a gam uh ka piekia ding a, amate tungah hepina ka nei ding hi,” a ci hi.
Currently Selected:
JEREMIAH 33: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
