JEREMIAH 23
23
Saltan Nua-in a ngaingai Bangkia
1Ka gantatna munah tuuhonte a susie, a kithezahsah tuucingte in gimna thuoh ding uhi! Topa in ci hi. 2Tua ahi ziehin Topa, Israel’ Pasien in ka mite a kem tuucingte tungtang thu tam bangin gen hi: Note in ka tuuhonte thezahin na delmang vua, amate na cing sih uhi. Tuaci’n na gitlo gamtatnate ziehun keima in note kang cing ding hi, Topa in ci hi. 3Tua ciengin kei mama in amate ka delmangna gam zosie panin a omlai ka tuuhon teng ka kaikhawm ding a, a huong sung vuah amate peipikia-in amate pungin a khang ding uhi. 4Amate a cing dingin tuucingte ka koi ding a, zau nawn lo, lungkham nawn loin khat beh zong mang nawn lo ding hi, Topa in ci hi.
A Thudih David’ Bazam
5 Topa in kang ci-in, keima in David adingin a thudih a bazam khat ka tundawh ding hun ang tung valon ding a, ama kumpi bangin maang ding a, pilvang tahin vai hawmin gam sungah thudih thutang tawh thu a khen ding hi. 6Ama’ hun sungin Judah kihundam ding a, Israel lungmuong tahin a teng ding hi. Ama a kihlat nading min in: “Topa eite’ Dihtanna,” ahi hi.#Jer 33:14-16
7Tua ahi ziehin Topa in kang ci-in, “Egypt gam pana Israel mite a peipi Topa a hing ahi ma bangin,” ci-in kiciem nawn loin, 8“Ama#23:8 Gk: Heb “Keima” in a delmangna leilu lam gam le gam zosie panin Israel innkuon’ suonte a mapui Topa a hing ahi ma bangin,” ci-in a kiciemzaw ta ding uhi,” a ci hi. Tua ciengin a gam ciet vuah amate a teng ding uhi.
Zuouthei Kamsangte Kimawsah
9Kamsangte tawh kisai-in:
Topa zieh le
a kammal siengthote ziehin
keima sungah ka lungsim zanciim a,
ka gu ka tang zosie a kithing hi;
kei pen zu in a zawgawp
zu kham pa tawh ka kibang hi.
10Bangzieh ahei cile
gam sungah angkawmte a dim hi;
samsietna ziehin gam sung kap a,
gamlah lonona munte gawta sieng hi.
Amau’ lampi a hoi sih a,
amau’ thahatna zong maan lo hi.
11Kamsangte le siempute in
a ni gelin Pasien a zatah sih uhi;
ka biehinn sung nangawnah
a gitlona uh ka mu hi, Topa in ci hi.
12Tua ziehin amau’ lampi pen
khuomiel lamnal bang hi ding a,
khumnah kidelmangin
amate a pua ding uhi;
azieh pen amau’ gimthuoh ding hun a tun ciengin
amate tungah gimna ka tungsah ding hi, Topa in ci hi.
13Samaria kamsangte lahah
a muthadahuoi khat ka mu hi:
Amate in Baal minin thu a hil vua,
ka mi Israel-te a puikhiel uhi.
14Hinanle Jerusalem kamsangte sungah
a mulkinhuoizaw lai na khat ka mu zo hi:
Amate in angkawmin zuouthu a gen uhi;
a gitlona uh panin koima a kilekia lo nadingin
amate in na hoi lo a bawl mite’ khut a khausah uhi.
Kei adingin amate a unpi-un
Sodom a bang sieng ta vua,
a sunga teng mi zosie zong
Gomorrah a bang ta uhi.#Pien 18:20; Ezk 16:46
15Tua ahi ziehin kamsangte tawh kisai-in
Vanglien Topa in tam bangin gen hi:
“Keima in amate gamsai ka nesah ding a,
keima in a dawn dingun gutui ka pie ding hi;
bangzieh ahei cile
Jerusalem kamsangte panin
gamsung muncin tengah
Pasien zatah lona kizel zo hi,” a ci hi.
16Vanglien Topa in tam bangin gen hi: Na kung vuah thu hing genin note ang sol kamsangte’ thugente ngai sih un; amate in a lungsim sung vua a geltawm uh thute ang gen uh ahi bo a, Topa’ kam sung pan hi lo hi. 17Amate in Topa’ kammal a simmawte kungah, “Note adingin hing hoi na va,” a ci den mielmuol uhi; amau’ lungtang khauna banga khau taha a zui mi zosie kungah amate in, “Note tungah tuosietna ang tung sih ding hi,” a ci uhi.
18Azieh pen Topa’ kikhopna ah koi ding ngai a,
a thugente va thei ngai, va za ngai ahi ahei?
19En un, Topa’ huipi khu!
A thangpaina pumpei kihiapi ang pusuoh zo hi;
migilo pa’ lutung a mutgawp ding hi.
20A lungtup teng semin a tangtunsah masangsie,
Topa’ lungthahna a kilekia sih ding hi.
Ang tung ding nite ah note in
kicien tahin na thei ding uhi.
21Ka sawl lopi-in kamsangte a tai uhi;
amate kungah ka gen lopi thu a songen uhi.
22Hinanle amate ka kikhopna ah ang to uh hi leh,
amate in ka mite kungah ka kammalte a tangko thei ding vua,
a lampi hoi lote ule a gamtat hoi lote uh panin
amate kinuahei ding uhi.
23Kei pen a naina muna a om Pasien ka hi amah? A gamlapi-a zong a om Pasien hi lo ka mah? Topa in ci hi. 24Ka mu thei lo nadingin koi in phuolsel munah amate phuol thei ding ahei? Topa in ci hi. Vantung le leitung dim hi lo ka mah? Topa in ci hi. 25Keima in, “Mang man zo ing, mang man zo ing!” ci-in keima’ min tawh zuouthu a gen kamsangte’ thugente ka za zo hi. 26Zuouthute hilin a lungsim sung vua a suoh misolna po a gen kamsangte ang kiheikia nading bang tanvei sawt ding ahei? 27A pu a pate un Baal a bieh ziehun ka min a mangngil bangun khatlekhat a mang uh kigenin ka mite keima’ min a mangngilsah sawm uhi. 28Mang man kamsangpa in a mangmat gen hinlen, hizongle ka kammal a nei pa in muonhuoi tahin ka kammal gen taheh. Butu le butang bangci kibah thei ding ahei, Topa in ci hi. 29Ka kammal mei tawh kibang a, suongte a satguoi thei sehta tawh zong kibang hi lo amah, Topa in ci hi. 30Tua ahi ziehin en un, khatlekhat keima’ kammal a kiguhpieh kamsangte ka langpang hi, Topa in ci hi. 31En un, a phuotawm uh thu gen hi napi, “Topa in ci hi,” a ci kamsangte ka langpang hi,” Topa in ci hi. 32En un, Topa in kang ci-in, ka sawl lopi le thu ka pieh lopi-in zuou mang genin amate thu hil a, a zuouna ule khawhsah ci a nei lona uh ziehin ka mite lam a puikhiel kamsangte ka langpang hi; tuaci’n tam mite in amate a phattuompi vawt sih uhi, Topa in ci hi.
33Tam mite, ahi sihle kamsang khat, ahi sihle siempu khat in, “Topa’ vangih#23:33 Gk Vg: Heb “Bang vangih” bang ahei?” ci-in nang ang dawh uh ciengin nang in amate kungah, “Tua vangih nangma na hi a, nang kang paimang ding hi, Topa in ci hi,” na ci ding hi. 34Kamsang, siempu, ahi sihle ka mite khatpo in, “Topa’ vangih,” a ci leh ama le a innkuonpite gim ka pie ding hi. 35Note lahah, “Topa in bangin ang dawng ei? “ahi sihle, “Topa in bang ang gen ei?” khatlekhat na kici ding uhi. 36Ahi vangin, “Topa’ vangih,” ci-in na gen nawn poma sih ding uhi. Bangzieh ahei cile Topa’ vangih na ci uh pen note’ thugen ahi bo a, tuaci’n note in eite’ Pasien ahi a hing zing Pasien, Vanglien Topa’ kammalte na leheipieh ta uhi. 37Note in kamsangpa kungah, “Topa in bangin ang dawng ei?” ahi sihle, “Topa in bang ang gen ei?” ci-in tua bangin na dong ding uhi. 38Ahi vangin, “Topa’ vangih” na ci uleh Topa in tam bangin ci hi: “Topa’ vangih,” na ci sih ding uhi, ci-in kang sawl vangin note in “Topa’ vangih,” ci kammalte gen zo ta na hi ziehun, 39tuaci’n note hing domto-in#23:39 Heb Mss Gk Vg: MT “note kang mangngil ding hi” note le na pu na pate uh tunga ka piehsa khuopi pen ka opna panin ka paimang valon ding hi. 40Kumtawn simmawna le maizumna kang thuohsah ding vua, tua khu bangma cih hunin a kimangngil ngai nawn sih ding hi.
Currently Selected:
JEREMIAH 23: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
