လံာ်တၢ်သးဝံၣ်တဖၣ်အတၢ်သးဝံၣ် 4
4
ပိာ်ခွါ
1နဃံလၤဆံးဒိၣ်လဲၣ်, ယတၢ်အဲၣ်သးဘိဧၢ.
နမဲာ်ချံတဖၣ်ကပီၤထီၣ်ဝဲဒီးတၢ်အဲၣ်, လၢနနီၣ်ကျၢၢ်ဘၢမဲာ်အဖီလာ်မးလဲၣ်.
နခိၣ်သူဒံဝ့ၤဒံဝီၤမၤအသးဒ်မဲာ်တဲးလဲးလၢအဟဲဃ့ၢ်စံၣ် လီၤလၢကီၢ်ကံးလဧးအတၢ်လူၢ်တဖၣ်အလိၤအသိးန့ၣ်လီၤ.
2နမဲတဖၣ်ဝါဒ်သိတဖုလၢတၢ်တံာ်အဆူၣ်ဒီးတၢ်သ့စီကွံာ်အီၤအသိး န့ၣ်လီၤ.
အဝဲသ့ၣ်တဟါမၢ်ဘၣ်နီတဘ့ၣ်ဘၣ်,
ဒီးဃူလိာ်အသးကိးဘ့ၣ်ဒဲးန့ၣ်လီၤ.
3နနိးဖံးတဖၣ်မၤအသးဒ်သတိၢ်ပျံၤအဂီၤလုးတဘိအသိး,
ဒီးဃံလၤဝဲဒိၣ်မးဖဲနကတိၤတၢ်အခါန့ၣ်လီၤ.
နဘိးပၤတဖၣ်ဆဲးကပီၤထီၣ်လၢနနီၣ်ကျၢၢ်ဘၢမဲာ်အဖီလာ်, ဂီၤဝဲဒ်သ့ၣ်သလဲသၣ်လၢအသ့ၣ်ဖးတခီအသိးန့ၣ်လီၤ.
4နကိာ်န့ၣ်ဖျၢၣ်ဒီးဘျ့ဝဲအိၣ်ဒီးဖဲတပျံၤလီၤဂာ်ဒ်စီၤဒၤ ဝံးအတၢးထီခၢၣ်သနၢၣ်အသိး,
လၢကတီၤအဘ့ၣ်တကထိဘျးလီၤအသးဝးတရံးအီၤန့ၣ်လီၤ.
5နနုၢ်ခံတိၣ်မၤအသးဒ်တၤဟိစဘံသဃံာ်ခံဒုလၢအအီၣ်အဆၣ်လၢဖီ ဒ့ၣ်ညါတဖၣ်အကျါအသိးန့ၣ်လီၤ.
6ယကအိၣ်လၢမူရၣ်အတၢ်လူၢ်လၢအနၢမူဝဲအလိၤ
တုၤလၢဂီၤခီအကလံၤဆှံဟဲအူထီၣ်ဝဲ, ဒီးတၢ်ခံးလီၤမၢ်ကွံာ် ဝဲန့ၣ်လီၤ.
7နဃံလၤဆံးဒိၣ်လဲၣ်, ယတၢ်အဲၣ်ဧၢ,
မဲၣ်သူမဲၣ်ဂီၤတအိၣ်ဒီးနၤမးလဲၣ်.
8ဟဲဃုာ်ဒီးယၤလၢလဘၤနိၣ်အကစၢၢ်ကလိတဖၣ်တက့ၢ်, ယတလးမူးပိာ်မုၣ်ဧၢ,
ဟဲဃုာ်ဒီးယၤလၢကီၢ်လဘၤနိၣ်တက့ၢ်.
ဟဲလီၤလၢကစၢၢ်အမါနၤအဒီခိၣ်,
လၢကစၢၢ်စနံၣ်ဒီးကစၢၢ်ဃ့ရမိၣ်,
ဖဲခ့ယုၢ်ဒီးခ့စံၣ်ပိၣ်တဖၣ်အိၣ်ဆိးဝဲအလီၢ်တက့ၢ်.
9ယတၢ်အဲၣ်ဒီးယတလးမူးပိာ်မုၣ်ဧၢ, နမဲာ်ချံအတၢ်ကွၢ်
ဒီးဖဲလၢနလံာ်အီၤတဖၣ်န့ၣ်, ထုးန့ၢ်ယသးန့ၣ်လီၤ.
10နတၢ်အဲၣ်န့ၣ်ဒုးသးခုယၤ,
ယတၢ်အဲၣ်ဒီးယတလးမူးပိာ်မုၣ်ဧၢ.
နတၢ်အဲၣ်န့ၣ်ဂ့ၤန့ၢ်စပံးထံ,
နထံနၢမူတဖၣ်နၢမူဒိၣ်န့ၢ်ဒံးတၢ်နၢမူအဂၤတဖၣ်တက့ၢ်န့ၣ် လီၤ.
11ယတၢ်အဲၣ်သးဘိဧၢ, နနိးဖံးတဖၣ်ဆၢဒ်ကနဲစီအသိး,
တၢ်နုၢ်ထံဒီးကနဲစီအိၣ်ဝဲလၢနပျ့ၤအလိၤလီၤ.
နတၢ်ကူတၢ်သိးတဖၣ်အိၣ်ဒီးကီၢ်လဘၤနိၣ်အတၢ်နၢမူ ခဲလၢာ်န့ၣ်လီၤ.
12ယတၢ်အဲၣ်ဒီးယတလးမူးပိာ်မုၣ်မ့ၢ်တၤသၣ်လီၢ်ခူသူၣ်တလီၢ်,
တၤသၣ်လီၢ်လၢတၢ်ကရၢၢ်တံၢ်ဃာ်အီၤ, ဒီးထံမူထီၣ်ပၢၢ်တပူၤလၢအကစၢ်အိၣ်ဝဲ,
13ဖဲန့ၣ်တၢ်မုၢ်တၢ်ဘိတဖၣ်မဲထီၣ်ဝဲန့ၣ်လီၤ.
အဝဲသ့ၣ်ဘၣ်တၢ်သူၣ်လီၤအီၤဒ်တၤသၣ်လီၢ်တပူၤအသိး, ဖဲသ့ၣ်သလဲအထူၣ်တဖၣ်မဲထီၣ်ဒီးသၣ်ထီၣ်တၤသၣ်အဂ့ၤကတၢၢ်တဖၣ် န့ၣ်လီၤ.
14ဖဲန့ၣ်, တၢ်နၢမူအကလုာ်ကလုာ်ဒ်, သ့ၣ်ဂီၤစုမ့ၣ်ဒီးသ့ၣ်နၢ်ဒး, သ့ၣ်နၢ်ဒးဒီးသ့ၣ်ကၢ်ကိၣ်, သ့ၣ်လီၢ်ဟ့ၣ်ဒီးသ့ၣ်ကဒါရါမ့တမ့ၢ် သ့ၣ်နၢမူအထူၣ်အဂၤတဖၣ်အိၣ်ဝဲလီၤ.
မူရၣ်ဒီးအကၠီၣ်မဲထီၣ်ဝဲဒၣ်ဖဲန့ၣ်,
အိၣ်ဒီးတၢ်နၢမူအဂ့ၤကတၢၢ်တဖၣ်န့ၣ်လီၤ.
15ထံမူထီၣ်ပၢၢ်တဖၣ်မၤဘၣ်စီၣ်တၤသၣ်လီၢ်,
ထံကျိဖိတဖၣ်ယွၤလီၤဝဲ,
ထံထီၣ်ပၢၢ်အပူၤတဖၣ်ပုာ်ထီၣ်ယွၤလီၤဟဲဝဲလၢလဘၤနိၣ်အကစၢၢ် ကလိတဖၣ်န့ၣ်လီၤ.
ပိာ်မုၣ်
16ကလံၤစိးအကလံၤဧၢ, ဖုးသံနီၣ်ထီၣ်တက့ၢ်.
ကလံၤထံးအကလံၤဧၢ, အူဘၣ်ယတၤသၣ်လီၢ်,
ဒီးမၤပှဲၤအီၤပှဲၤဒီးတၢ်နၢမူန့ၣ်တက့ၢ်.
မ်ယတၢ်အဲၣ်ဟဲဆူအတၤသၣ်လီၢ်,
ဒီးအီၣ်အတၤသၣ်အဂ့ၤကတၢၢ်တဖၣ်တက့ၢ်.
Currently Selected:
လံာ်တၢ်သးဝံၣ်တဖၣ်အတၢ်သးဝံၣ် 4: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
