လံာ်တၢ်သးဝံၣ်တဖၣ်အတၢ်သးဝံၣ် 5
5
ပိာ်ခွါ
1ယတၢ်အဲၣ်သးဘိ, ယတလးမူးပိာ်မုၣ်ဧၢ, ယဟဲနုာ်လံလၢယတၤသၣ်ကရၢၢ်ပူၤလံန့ၣ်လီၤ.
ယထၢဖှိၣ်ယသ့ၣ်နၢမူအထုးအစီတဖၣ်ဒီးမူရၣ်,
ယအီၣ်ယကနဲစီဒီးကနဲခိၣ်ထံ,
ယအီယစပံးထံဒီးတၢ်နုၢ်ထံန့ၣ်လီၤ.
ပိာ်မုၣ်တဖၣ်
ပှၤလၢအအဲၣ်လိာ်အသးသ့ၣ်ဧၢ, အီၣ်တၢ်ဒီးအီတၢ်
တုၤလီၤလၢသုမူၤလၢတၢ်အဲၣ်အဃိတက့ၢ်.
တၢ်သးဝံၣ်လွံၢ်ယုၢ်တယုၢ်
ပိာ်မုၣ်
2ဖဲယမံအခါဒၣ်လဲာ်, ယသးအိၣ်လၢခိလီၤ.
ယမံမီၢ်လၢယတၢ်အဲၣ်ဒိတကျိာ်ပဲတြီန့ၣ်လီၤ.
ပိာ်ခွါ
ယတၢ်အဲၣ်, ယပှၤသးဘိ, ယထိၣ်လွံၢ်ဧၢ, ပျဲယဟဲနုာ်တက့ၢ်.
ယခိၣ်ဘၣ်စီၣ်ဒီးပစီၤထံ,
ဒီးယခိၣ်သူဘၣ်စီၣ်ဒီးဘှ့ၣ်န့ၣ်လီၤ.
ပိာ်မုၣ်
3ယဘ့ၣ်လီၤကွံာ်လံယတၢ်ကူတၢ်ကၤလံ,
ဘၣ်မနုၤယဘၣ်ကူထီၣ်ကၤထီၣ်က့ၤကဒီးလဲၣ်.
ယသ့ယခီၣ်ဝံၤလံ,
ဘၣ်မနုၤယဘၣ်မၤဘၣ်အၢကဒီးအီၤလဲၣ်.
4ယတၢ်အဲၣ်ဂိာ်နုာ်အစုလၢကအိးထီၣ်, ပဲတြီအဂီၢ်,
ဒီးယသးခုသးကနိးလၢအဝဲအိၣ်ဘူးဒီးယၤအဃိလီၤ.
5ယအိၣ်ကတဲာ်ကတီၤယသးလၢယကပျဲနုာ် အီၤန့ၣ်လီၤ.
ယစုတဖၣ်ဖှူဃာ်အသးဒီးမူရၣ်,
ဒီးယစုမုၢ်တဖၣ်ဘၣ်စီၣ်လၢမူရၣ်အထံ,
ဖဲယစှီၤဃာ်ပဲတြီအစုဟံးအခါန့ၣ်လီၤ.
6ယအိးထီၣ်ပဲတြီလၢယတၢ်အဲၣ်အဂီၢ်,
ဘၣ်ဆၣ်အဝဲဟးထီၣ်ကွံာ်လံ.
ယအဲၣ်ဒိးနၢ်ဟူအကလုၢ်ဆံးဒိၣ်လဲၣ်.
ယဃုအီၤဘၣ်ဆၣ်ယတထံၣ်န့ၢ်အီၤဘၣ်.
ယကိးအီၤဘၣ်ဆၣ်, ယတနၢ်ဟူတၢ်စံးဆၢဘၣ်.
7ပှၤခိးတၢ်ဖိလၢဝ့ၢ်ပူၤတဖၣ်ထံၣ်န့ၢ်ယၤ,
အဝဲသ့ၣ်တီၢ်ယၤဒီးမၤဘၣ်ဒိယၤလီၤ.
ပှၤပၢၤတၢ်ဖိလၢဝ့ၢ်ခိၣ်ဒူတဖၣ်ဖှီညာ်ကွံာ်ယဆ့ကၤကျၢၢ်ဘၢ မဲာ်လီၤ.
8ဝ့ၢ်ယရူၤၡလ့ၣ်အဖိမုၣ်သ့ၣ်ဧၢ, အၢၣ်လီၤတၢ်ဒီးယၤလၢ
သုမ့ၢ်ထံၣ်ဘၣ်ယတၢ်အဲၣ်န့ၣ်,
သုကဘၣ်တဲဘၣ်အီၤလၢယဂံၢ်ယဘါလီၤစၢ်လၢတၢ်အဲၣ်အဃိတက့ၢ်.
ပိာ်မုၣ်တဖၣ်
9ပှၤဃံလၤကတၢၢ်လၢပိာ်မုၣ်တဖၣ်အကျါတဂၤဧၢ,
မ့ၢ်ပှၤလၢနအဲၣ်တဂၤလီၤဆီဒီးပှၤအဂၤန့ၣ်ဧါ.
လၢပကဘၣ်ဟ့ၣ်နၤပတၢ်အၢၣ်လီၤအဂီၢ်န့ၣ်, တၢ်လၢအမၤလီၤဆီအဝဲဒီးပှၤအဂၤမ့ၢ်တၢ်မနုၤလဲၣ်.
ပိာ်မုၣ်
10ယတၢ်အဲၣ်မ့ၢ်ပှၤလၢအက့ၢ်ဘၣ်ဂီၤဂ့ၤဒီးဒုၣ်ဂ့ၤဒ့ဘၣ်လီၤ.
လၢပှၤအကလးအကျါန့ၣ်အဝဲမ့ၢ်ပှၤထဲတဂၤဧိၤလီၤ.
11အမဲာ်သၣ်ဘျ့ဒီးဘီဝဲဒ်ထူစီအသိး,
အခိၣ်သူက့ၣ်ဒ်လပီဟဲထီၣ်
ဒီးသူဝဲဒ်စိးဝၣ်ဃးအသိးန့ၣ်လီၤ.
12အမဲာ်ချံတဖၣ်ဃံလၤဝဲဒ်ထိၣ်လွံၢ်တဖၣ်လၢအအိၣ်လၢထံကျိ ဖိလၢအယွၤလီၤတကျိအနံၤ,
ထိၣ်လွံၢ်တဖၣ်လၢအသ့စီ အသးလၢတၢ်နုၢ်ထံ, ဒီးဆၢထၢၣ်လၢထံဖိကျိအနံၤအသိးန့ၣ်လီၤ.
13အဘိးပၤလီၤအဲၣ်ဝဲဒ်တၤသၣ်လီၢ်တလီၢ်အသိး,
လၢအပှဲၤဝဲဒီးသ့ၣ်ဖိဒီးသ့ၣ်အစီနၢမူတဖၣ်န့ၣ်လီၤ.
အနိးဖံးတဖၣ်မၤအသးဒ်ဖီဒ့ၣ်ညါတဖၣ်,
လၢအဘၣ်စီၣ်ဝဲဒီးမူရၣ်အထံအသိးန့ၣ်လီၤ.
14အစုတဖၣ်အက့ၢ်အဂီၤဂ့ၤဒိၣ်မး
ဒီးအဝဲသိးပသံးတဖၣ်လၢအအိၣ်ဒီးလၢၢ်လုၢ်ဒိၣ်ပှ့ၤဒိၣ်တဖၣ် လီၤ.
အနီၢ်ခိလီၤဂာ်ဒ်ကဆီမဲအဘျ့လၢအဘၣ်တၢ်ကယၢကယဲအီၤ
ဒီးတၢ်မျၢ်နံၤလါန့ၣ်လီၤ.
15အကံၣ်ဒုၣ်တဖၣ်မၤအသးဒ်လၢၢ်ဝါအထူၣ်တဖၣ်,
လၢတၢ်ပာ်လီၤအီၤလၢထူအပူၤတဖၣ်အသိးန့ၣ်လီၤ.
အဝဲလီၤကဟုကညီၢ်, ဒ်လဘၤနိၣ်အကစၢၢ်တဖၣ်,
လၢအပှဲၤဒီးသ့ၣ်ဆှိးအ့ရ့းဖးထီတဖၣ်အသိးန့ၣ်လီၤ.
16အထးခိၣ်ဆၢဝဲလၢတၢ်ကနၢမူအီၤအဂီၢ်,
တၢ်လၢအဘၣ်ဃးဒီးအီၤကိးမံၤဒဲးရဲၢ်န့ၢ်ယၤလီၤ.
ပှၤလၢယအဲၣ်အီၤလီၤဂာ်ဒ်န့ၣ်အသိးလီၤ,
ဝ့ၢ်ယရူၤၡလ့ၣ်အဖိမုၣ်သ့ၣ်ဧၢ.
Currently Selected:
လံာ်တၢ်သးဝံၣ်တဖၣ်အတၢ်သးဝံၣ် 5: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
