လံာ်တၢ်သးဝံၣ်တဖၣ်အတၢ်သးဝံၣ် 6
6
ပိာ်မုၣ်တဖၣ်
1ပှၤအဃံလၤကတၢၢ်လၢပိာ်မုၣ်တဖၣ်အကျါတဂၤဧၢ,
ပှၤလၢနအဲၣ်အီၤတဂၤလဲၤဖဲလဲၣ်.
တဲပှၤလၢအဝဲလဲၤကျဲဖဲလဲၣ်တဘိလဲၣ်,
ဒ်သိးပကဃုထံၣ်စၢၤနၤကသ့အဂီၢ်တက့ၢ်.
ပိာ်မုၣ်
2ပှၤလၢယအဲၣ်အီၤတဂၤလဲၤဆူအတၤသၣ်လီၢ်,
ဖဲကသံၣ်ဖှူအသ့ၣ်တဖၣ်မဲထီၣ်ဝဲန့ၣ်လီၤ.
အဝဲဒုးအီၣ်အဆၣ်ဖိကီၢ်ဖိတဖုအဆၣ်လၢတၤသၣ်လီၢ်ပူၤ,
ဒီးထၢဖှိၣ်ဖီဒ့ၣ်ညါတဖၣ်လီၤ.
3ပှၤလၢယအဲၣ်မ့ၢ်ယတၢ်ဒီးယမ့ၢ်အတၢ်
အဝဲဒုးအီၣ်အဆၣ်ဖိကီၢ်ဖိတဖၣ်အဆၣ်လၢဖီဒ့ၣ်ညါတဖၣ်အကျါန့ၣ် လီၤ.
တၢ်သးဝံၣ်ယဲၢ်ယုၢ်တယုၢ်
ပိာ်ခွါ
4ယတၢ်အဲၣ်ဧၢ, နဃံနလၤဒ်သိးဝ့ၢ်ယရူၤၡလ့ၣ်,
ဒီးနလီၤအဲၣ်လီၤကွံဒ်ဝ့ၢ်တံးရစၣ်အသိး,
ဒီးနဒုးလီၤကတုၤယသးဒ်ဝ့ၢ်ဖးဒိၣ်တဖၣ်အံၤအသိးန့ၣ်လီၤ.
5ဃၣ်ကွံာ်နမဲာ်ချံတဖၣ်လၢယအိၣ်တက့ၢ်,
မ့ၢ်လၢအဝဲသ့ၣ်ဖီၣ်ဃးယၤဒ်ပှၤဘၣ်တၢ်စၢဃာ်အသိးအဃိလီၤ.
နခိၣ်သူဒံဝ့ၤဝီၤမၤအသးဒ်မဲာ်တဲးလဲးတဖု
လၢအဟဲဃ့ၢ်စံၣ်လီၤလၢကီၢ်ကံးလဧးအတၢ်လူၢ်တဖၣ်အလိၤအသိးန့ၣ် လီၤ.
6နမဲတဖၣ်ဝါဝဲဒ်သိတဖု,
လၢတၢ်သ့စီကွံာ်အီၤဝံၤသီသီအသိးန့ၣ်လီၤ.
အဝဲသ့ၣ်တဟါမၢ်ဘၣ်နီတဘ့ၣ်ဘၣ်.
ဒီးဃူလိာ်အသးကိးဘ့ၣ်ဒဲးန့ၣ်လီၤ.
7နဘိးပၤတဖၣ်ဆဲးကပြုၢ်ထီၣ်လၢနနီၣ်ကျၢၢ်ဘၢမဲာ် အဖီလာ်လီၤ.
8မ်စီၤပၤအိၣ်ဒီးအနီၢ်ပၤမုၣ်အဂၤဃုဆံ, အသံၣ်မါဃိးဆံ,
ဒီးမုၣ်လိၤဘိလၢပဂံၢ်တသ့ဘၣ်န့ၣ်တက့ၢ်.
9မ့မ့ၢ်ယအဲၣ်ပှၤထဲနၤဧိၤ,
ဒီးအဝဲဒၣ်လီၤအဲၣ်လီၤကွံဒ် ထိၣ်လွံၢ်တဘ့ၣ်အသိးလီၤ.
အဝဲမ့ၢ်အမိၢ်အဖိမုၣ်ထဲတဂၤဧိၤ,
လၢအမိၢ်အဲၣ်အီၤဒိၣ်ကတၢၢ်န့ၣ်လီၤ.
ပှၤပိာ်မုၣ်ခဲလၢာ်ကွၢ်အီၤဒီးစံးထီၣ်ပတြၢၤအီၤ,
နီၢ်ပၤမုၣ်တဖၣ်ဒီးသံၣ်မါတဖၣ်သးဝံၣ်စံးထီၣ်ပတြၢၤအီၤလီၤ.
10ပှၤလၢအကွၢ်တကျ့တၢ်လီၤဂာ်ဒ်မုၢ်ဆ့ၣ်ထီၣ်သီအသိးတဂၤမ့ၢ်မတၤ လဲၣ်.
အဝဲဃံလၤဒီးကပြုၢ်ကပြီၤ,
ဆှုၣ်မဲာ်ဆှုၣ်နါဒ်မုၢ်မ့တမ့ၢ်လါအသိးန့ၣ်လီၤ. လီၤပျံၤဝဲဒ်သုးမုၢ်တဖုလၢအအိၣ်ဒီးနီၣ်တယၢ်တဖၣ်အသိးန့ၣ် လီၤ.
11ယဟဲလီၤလၢတၤသၣ်လီၢ်, ဖဲၡီးက့းအထူၣ်တဖၣ်အိၣ်အကျါ,
ဒ်သိးယကထံၣ်ဘၣ်တၢ်မုၢ်သးစၢ်တဖၣ်မဲထီၣ်လၢ တၢ်တြီၤပူၤ,
ဒ်သိးယကထံၣ်ဘၣ်စပံးမုၢ်အလၣ်အသီတဖၣ် ဟဲဒိးထီၣ်,
ဒီးသ့ၣ်သလဲအထူၣ်တဖၣ်ဘိၣ်ထီၣ်ဖးထီၣ်န့ၣ်လီၤ.
12ဒီးယကနိးကစုာ်ယဲလီၤ. အဂ့ၢ်ဒ်အံၤ, ယထံၣ်နၤဒီးနထိၣ်ဟူးထိၣ်ဂဲၤထီၣ်ယတၢ်အဲၣ်,
ဒ်ပှၤနီၣ်လ့ၣ်ကဟၣ်တဂၤလၢကလဲၤဒုးတၢ်အသိးန့ၣ်လီၤ.
ပိာ်မုၣ်တဖၣ်
13ပှၤၡူလမးမုၣ်ဧၢ, ဂဲၤကလံၣ်, ဂဲၤကလံၣ်တက့ၢ်.
ပျဲပကွၢ်နဂဲၤကလံၣ်တက့ၢ်.
ပိာ်မုၣ်
ဘၣ်မနုၤသုအဲၣ်ဒိးကွၢ်ယၤ,
ဖဲယဂဲၤကလံၣ်လၢပှၤကွၢ်တၢ်ဖိတဖၣ်အဘၢၣ်စၢၤန့ၣ်လဲၣ်.
Currently Selected:
လံာ်တၢ်သးဝံၣ်တဖၣ်အတၢ်သးဝံၣ် 6: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
