စံးထီၣ်ပတြၢၤ 86
86
တၢ်ထုကဖၣ်လၢတၢ်မၤစၢၤအဂီၢ်
1ယွၤဧၢ, ဒိးနနၢ်ဒီးစံးဆၢလၢ်ယၤတက့ၢ်.
အဂ့ၢ်ဒ်အံၤ, ယမ့ၢ်ပှၤအဖှီၣ်အယာ်ဒီး
ပှၤလိၣ်ဘၣ်တၢ်မၤစၢၤန့ၣ်လီၤ.
2အုၣ်က့ၤခီၣ်က့ၤယၤလၢ တၢ်သံတက့ၢ်.
အဂ့ၢ်ဒ်အံၤ, ယမ့ၢ်ပှၤလၢအတီဒီးနၤလီၤ.
အုၣ်က့ၤခီၣ်က့ၤယၤတက့ၢ်. အဂ့ၢ်ဒ်အံၤ,
ယမ့ၢ်ဒၣ်နခ့နပှၤ ဒီးယသန့ၤယသးလၢနၤလီၤ.
3နမ့ၢ်ဒၣ်ယကစၢ်ယွၤလီၤ.
အဃိသူၣ်ကညီၤသးကညီၤလၢ်ယၤတက့ၢ်.
အဂ့ၢ်ဒ်အံၤ, ယကိးထီၣ်နၤကိးမုၢ်နံၤမုၢ်နၤဒဲးလီၤ.
4ယွၤဧၢ, မၤသးခုနခ့နပှၤတက့ၢ်.
အဂ့ၢ်ဒ်အံၤ,
ယတၢ်ထုကဖၣ်တဖၣ်လဲၤထီၣ်ဆူနအိၣ်လီၤ.
5ယွၤဧၢ, နဲဒၣ်အံၤနမ့ၢ်တၢ်ဂ့ၤ, ဒီးနပျၢ်ကွံာ်ပတၢ်ကမၣ်,
ဒီးနတၢ်အဲၣ်ဂၢၢ်ကျၢၤအိၣ်အါဝဲလၢ
ကယဲၢ်ပှၤလၢအကိးထီၣ်နၤခဲလၢာ်အဂီၢ်လီၤ.
6ယွၤဧၢ, ဒိကနၣ်ယတၢ်ထုကဖၣ်တက့ၢ်. ဒိကနၣ်
ယတၢ်ကိးထီၣ်လၢတၢ်မၤစၢၤအဂီၢ်တက့ၢ်.
7လၢယဘၣ်တၢ်ကိၢ်တၢ်ဂီၤအမုၢ်တနံၤန့ၣ်
ယကိးထီၣ်နၤလီၤ. အဂ့ၢ်ဒ်အံၤ,
နစံးဆၢယၤလီၤ.
8ယွၤဧၢ, လၢကစၢ်တဖၣ်အကျါန့ၣ်
ပှၤဒ်သိးဒီးနၤတအိၣ်နီတဂၤဘၣ်.
ပှၤတမၤတ့ၢ်တၢ်ဒ်နမၤတ့ၢ်အသိးနီတဂၤဘၣ်.
9ယွၤဧၢ, ကယဲၢ်ပှၤကလုာ်တဖၣ်လၢနတ့လီၤအီၤ
ခဲလၢာ်ကဟဲဒီးတီၤလီၤလၢနမဲာ်ညါ
ဒီးကမၤလၤကပီၤနမံၤလီၤ.
10အဂ့ၢ်ဒ်အံၤ,
နမ့ၢ်တၢ်အဒိၣ်, ဒီးမၤတၢ်လီၤလးတဖၣ်လီၤ.
ထဲနၤတဂၤဧိၤန့ၣ် မ့ၢ်ကစၢ်ယွၤလီၤ.
11ယွၤဧၢ, နဲၣ်လိယၤလၢနကျဲဒ်သိး
ယကလဲၤတၢ်လၢနတၢ်မ့ၢ်တၢ်တီအပူၤ,
ဒီးဟ့ၣ်ယၤတၢ်သးစၢၢ်ဆၢပံၢ်ကလာ် လၢယကပျံၤနမံၤအဂီၢ်တက့ၢ်.
12ယွၤယကစၢ်ယွၤဧၢ, ယစံးဘျုးနၤလၢယသးဒီဖျၢၣ်
ဒီးယကမၤလၤကပီၤနမံၤလီၤထူလီၤယိာ်လီၤ.
13နတၢ်အဲၣ်ဂၢၢ်ကျၢၤလၢယဂီၢ်အံၤဒိၣ်ဝဲဆံးဒိၣ်လဲၣ်.
နအုၣ်က့ၤခီၣ်က့ၤတ့ၢ်လံယၤလၢ
ပျုၤယိာ်အပူၤန့ၣ်လံ.
14ကစၢ်ယွၤဧၢ, ပှၤပာ်ထီၣ်ထီအသးသ့ၣ်တဖၣ်ဟဲထီဒါယၤ,
ပှၤအၢပှၤသီတဖုဃုယသးသမူဒီး
အဝဲသ့ၣ်တပာ်ကဲနၤဘၣ်.
15ဘၣ်ဆၣ်ဒီး, နဲဒၣ်ကစၢ်ယွၤဧၢ, နမ့ၢ်ကစၢ်တဂၤလၢ
အသးကညီၤတၢ်ဒီးသးအိၣ်တၢ်,
သးထီၣ်ကီဒီးအိၣ်ဒီးတၢ်အဲၣ်ဂၢၢ်ကျၢၤလၢအအါ,
ဒီးအသူၣ်တီသးလိၤန့ၣ်လီၤ.
16ဃၣ်နသးဆူယအိၣ်, ဒီးသးကညီၤယၤတက့ၢ်.
ဒုးဆူၣ်ထီၣ်ယၤဒီး အုၣ်က့ၤခီၣ်က့ၤယၤတက့ၢ်.
အဂ့ၢ်ဒ်အံၤ, ယမၤနတၢ်ဒ်သိးဒၣ်ယမိၢ်မၤတ့ၢ်ဝဲန့ၣ်လီၤ.
17ယွၤဧၢ, ဒုးနဲၣ်နတၢ်ဂ့ၤအတၢ်ပနီၣ်လၢယၤ
ဒ်သိးပှၤလၢအသးဟ့ယၤတဖၣ်ကထံၣ်ဝဲ
ဒီးကဘၣ်တၢ်မၤမဲာ်ဆှးအီၤ,
မ့ၢ်လၢနမၤစၢၤတ့ၢ်လံယၤဒီး
မၤမုာ်ထီၣ်က့ၤယၤအဃိန့ၣ်တက့ၢ်.
Currently Selected:
စံးထီၣ်ပတြၢၤ 86: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
