လံာ်တၢ်ကူၣ်သ့အတၢ်ကတိၤ 24

-၁၉-

1သူၣ်က့ၣ်သးကါပှၤအၢပှၤသီတဖၣ်တဂ့ၤ. ဒီးကျဲးစၢးဒီတံၤဒီသကိးဒီးအဝဲသ့ၣ်တဂ့ၤ. 2အဝဲသ့ၣ်ခဲလၢာ်ဆိကမိၣ်ဒၣ်ထဲကဒုးအိၣ်ထီၣ်တၢ်ကီတၢ်ခဲလီၤ. ဖဲအဝဲသ့ၣ်ကတိၤတၢ်တဘျီလၢ်လၢ်န့ၣ်, ပှၤတဂၤဂၤကဘၣ်ဒိဘၣ်ထံး ဝဲန့ၣ်လီၤ.

-၂၀-

3ဟံၣ်တဖၣ်ဘၣ်တၢ်သူၣ်ထီၣ်အီၤလၢတၢ်အခီၣ်ထံးလၢအမ့ၢ်ဝဲ တၢ်ကူၣ်သ့ဒီးတၢ်သ့ၣ်ညါနၢ်ပၢၢ်အဖီခိၣ်န့ၣ်လီၤ. 4ဖဲတၢ်သ့ၣ်ညါအိၣ်ဝဲန့ၣ်, ဒၢးတဖၣ်ကဘၣ်တၢ်မၤပှဲၤအီၤဒီး တၢ်လုၢ်ဒိၣ်ပှ့ၤဒိၣ်ဒီးတၢ်အဃံအလၤတဖၣ်န့ၣ်လီၤ.

-၂၁-

5တၢ်မ့ၢ်ပှၤကူၣ်သ့န့ၣ်ဂ့ၤဒိၣ်န့ၢ်ဒံးတၢ်မ့ၢ်ပှၤဂံၢ်ဆူၣ်ဘါ ဆူၣ်တက့ၢ်လီၤ. မ့ၢ်လီၤ, တၢ်သ့ၣ်ညါန့ၣ်အကါဒိၣ်န့ၢ်ဒံးတၢ်ဂံၢ် တၢ်ဘါတက့ၢ်လီၤ. 6ဒ်ပစံးတၢ်အသိးန့ၣ်, တချုးလၢနဒုးတၢ်ဒံးဘၣ်ဒီး, နကဘၣ်ကူၣ်ကျဲၤတၢ်လီၤတံၢ်လီၤဆဲးလီၤ. နမၤန့ၢ်တၢ်ဟ့ၣ်ကူၣ်ဒံးအါနကမၤနၢၤတၢ်ဒံးလီၤတံၢ်လီၤ.

-၂၂-

7တၢ်ကူၣ်သ့အတၢ်ကတိၤတဖၣ်ယိာ်ကဲၣ်ဆိးလၢပှၤဟးဂီၤဖိ တဂၤကနၢ်ပၢၢ်ဝဲအဂီၢ်လီၤ. ဖဲတၢ်ဂ့ၢ်အကါဒိၣ်တဖၣ်ဘၣ်တၢ်ကတိၤ သကိးအီၤန့ၣ်, အဝဲစံးကတိၤတၢ်တသ့နီတမံၤဘၣ်.

-၂၃-

8နမ့ၢ်ကူၣ်ကျဲၤတၢ်အၢတၢ်သီထီဘိဒီး, နမံၤကဟူထီၣ်သါလီၤလၢ နမ့ၢ်ပှၤမၤကီမၤခဲတၢ်တဂၤလီၤ. 9ပှၤဟးဂီၤဖိတဂၤအတၢ်ဆိကမိၣ်ထီၣ်တၢ်ကူၣ်ကျဲၤတမံၤဂ့ၤတမံၤ ဂ့ၤန့ၣ်မ့ၢ်တၢ်ဒဲးဘးလီၤ. ပှၤဂီၢ်မုၢ်သးဟ့ပှၤတဂၤလၢအအိၣ်ဒၣ်ထဲ တၢ်သးဘၣ်အၢဒီးတၢ်တပာ်ကဲပှၤဂၤတဖၣ်ဘၣ်န့ၣ်လီၤ.

-၂၄-

10နမ့ၢ်ဂံၢ်စၢ်ဘါစၢ်ဖဲတၢ်ကီတၢ်ခဲဖးဒိၣ်အကတီၢ်ဒီး, နဂံၢ်စၢ်ဘါစၢ်နီၢ်နီၢ်လီၤ.

-၂၅-

11ယုာ်နသးလၢနကမၤပူၤဖျဲးပှၤတဂၤလၢကဘၣ်တၢ်မၤသံအီၤလၢတၢ် စံၣ်ညီၣ်တတီဘၣ်အပူၤန့ၣ်တဂ့ၤ. 12ဘၣ်သ့ၣ်သ့ၣ်နကစံးလၢတၢ်အံၤတဘၣ်ဃးဒီးနၤဒီးတမ့ၢ်နတၢ်မၤဘၣ်, ဘၣ်ဆၣ်ယွၤသ့ၣ်ညါဒီးစံၣ်ညီၣ်နတၢ်ပာ်သူၣ်ပာ်သးတဖၣ်န့ၣ်လီၤ. အဝဲအိၣ်ခိးကွၢ်နၤဒီးသ့ၣ်ညါဝဲလီၤ. ဒီးဒ်တၢ်လၢနမၤအီၤအသိးန့ၣ်, အဝဲကဟ့ၣ်ဘျုးနၤန့ၣ်လီၤ.

-၂၆-

13ဖိခွါဧၢ, အီၣ်ကနဲစီတက့ၢ်. မ့ၢ်တၢ်ဂ့ၤလီၤ. ဒီးဒ်ကနဲစီလၢကနဲအခိၣ်ထံဆၢဝဲလၢနထးခိၣ်အသိးန့ၣ်, 14နမၤလီၤတံၢ်သ့ဝဲလၢတၢ်ကူၣ်သ့န့ၣ်ဂ့ၤဝဲလၢသးသမူအဂီၢ် လီၤ. မၤန့ၢ်တၢ်ကူၣ်သ့တက့ၢ်. ဒီးနအိၣ်ဒီးတၢ်မုၢ်လၢ်လၢခါဆူညါအဂီၢ်န့ၣ်လီၤ.

-၂၇-

15လီၤဂာ်ဒီးပှၤတတီတလိၤလၢအကူၣ်ထီၣ်တၢ်လၢကဂုာ်န့ၢ်ပှၤတီ ပှၤလိၤအတၢ်, မ့တမ့ၢ်, ကဟံးန့ၢ်ကွံာ်အဟံၣ်န့ၣ်တဂ့ၤ. 16အဂ့ၢ်ဒ်အံၤ, ပှၤတီပှၤလိၤတဂၤလီၤဃံၤဝဲအဘျီတဖၣ်အဘျီ သနာ်က့, တမ့ၢ်တၢ်အကါဒိၣ်ဘၣ်. ထီဘိအဝဲဂဲၤဆၢထၢၣ်ကဒါက့ၤဝဲ လီၤ. မ့မ့ၢ်တၢ်တတၢးတနါမၤဟးဂီၤကွံာ်ပှၤတတီတလိၤလီၤ.

-၂၈-

17သးခုဖဲနဒုၣ်နဒါကွၢ်ဆၢၣ်မဲာ်တၢ်တတၢးတနါ, ဒီးသူၣ်ဖှံသးညီဖဲအဝဲအခီၣ်ဘၣ်တိၢ်အခါန့ၣ်တဂ့ၤ. 18ယွၤကသ့ၣ်ညါလၢနသးခုခူသူၣ်, ဒီးတမ့ၢ်အဝဲကဘၣ်အသးဘၣ်. အန့ၣ်ဒီး, ဘၣ်သ့ၣ်သ့ၣ်အဝဲတစံၣ်ညီၣ်လၢၤအီၤဘၣ်န့ၣ်လီၤ.

-၂၉-

19ပျဲပှၤအအၢအသီတဖၣ်မၤကိၢ်မၤဂီၤနၤတဂ့ၤ. သူၣ်က့ၣ်သးကါအဝဲသ့ၣ်တဂ့ၤ. 20ပှၤအၢပှၤသီတဂၤအတၢ်မုၢ်လၢ်လၢခါဆူညါအဂီၢ်တအိၣ်ဘၣ်. ကကွၢ်စိဃီၤတၢ်ဆူညါအဂီၢ်, တၢ်တအိၣ်ဘၣ်နီတမံၤဘၣ်.

-၃၀-

21ယဖိခွါဧၢ, ယူးယီၣ်ယွၤတက့ၢ်. ဒီးပာ်ကဲစီၤပၤတက့ၢ်. မၤဃါဃုာ်နသးဒီးပှၤလၢအပူထီၣ်ထီဒါအဝဲသ့ၣ်တဂ့ၤ. 22ပှၤဒ်န့ၣ်သိးတဖၣ်ကဟးဂီၤဝဲလၢတစိၢ်ဖိအတီၢ်ပူၤလီၤ. တၢ်တတၢးတနါလၢကစၢ်ယွၤ, မ့တမ့ၢ်, စီၤပၤဒုးအိၣ်ထီၣ်ဝဲသ့န့ၣ်, မ့ၢ်နသ့ၣ်ညါနၢ်ပၢၢ်စ့ၢ်ကီးဧါ.

တၢ်ကူၣ်သ့အတၢ်စံးကတိၤအါထီၣ်တဖၣ်

23ပှၤကူၣ်သ့တဖၣ်ကတိၤတ့ၢ်စ့ၢ်ကီးတၢ်သ့ၣ်တဖၣ်အံၤလီၤ. စံၣ်ညီၣ်ကွီၢ်တဂၤလၢအဆိကမိၣ်ပာ်စၢၤတၢ်လၢတၢ်ထံၣ်တဆှံဘၣ် အပူၤန့ၣ်, မ့ၢ်တၢ်လၢအကမၣ်လီၤ. 24အဝဲမ့ၢ်စံၣ်ညီၣ်ဝဲလၢပှၤမၤကမၣ်တၢ်တဂၤအတၢ်ကမၣ်တအိၣ်ဘၣ်န့ၣ်, အဝဲကဘၣ်တၢ်ဆိၣ်အၢအီၤဒီးပှၤကိးဂၤဒဲးကသးဟ့အီၤလီၤ. 25စံၣ်ညီၣ်ကွီၢ်တဖၣ်လၢအစံၣ်ညီၣ်ပှၤအတၢ်ကမၣ်အိၣ်တဖၣ်န့ၣ်, ကဘီၣ်ထီၣ်ညီထီၣ်ဝဲဒီးမုာ်လၤသးခုဝဲလၢအမံၤဂ့ၤသၣ်ဂ့ၤ အပူၤန့ၣ်လီၤ.

26တၢ်စံးဆၢတီတီလိၤလိၤန့ၣ်, မ့ၢ်တံၤသကိးလၢအတီအပနီၣ်တမံၤ န့ၣ်လီၤ.

27တချုးလၢနစံာ်ပျီတဖၣ်အိၣ်ကတဲာ်ကတီၤအသးဒီးနသ့ၣ်ညါလီၤတံၢ် လၢနတၢ်အိၣ်လၢအိၣ်လီၣ်ဒံးဘၣ်န့ၣ်, သူၣ်ထီၣ်နဟံၣ်ဒီးဒုးအိၣ်ထီၣ်နဟံၣ်ဖိဃီဖိတဂ့ၤ.

28တၢ်အဂ့ၢ်အခၢးလၢအဂ့ၤအဘၣ်မ့ၢ်တအိၣ်ဘၣ်ဒီး, အုၣ်နသးထီဒါပှၤအဂၤတဂၤ, ဒီးကတိၤတၢ်လၢအကဆှၢ ကမၣ်တၢ်ဘၣ်ဃးဒီးအီၤတဂ့ၤ. 29“ယကမၤအီၤဒ်တၢ်လၢအဝဲမၤတ့ၢ်ယၤအသိး, ယကဟ့ၣ်ကၣ်အီၤဒ်အမၤယၤအသိးလီၤ” န့ၣ်စံးတဂ့ၤ.

30ယလဲၤခီဖျိပှၤအကၢၣ်ဒီးပှၤအမၢးတဂၤအစံာ်ပျီပူၤဒီးအစပံး လီၢ်တဖၣ်လီၤ. 31တၢ်ခဲလၢာ်ခဲဘၢအသးဒီးတၤဆှုၣ် သပှီာ်တဖၣ်, ဒီးနီၣ်ဧိၤမံၤဧိၤဒိၣ်ဘၢကွံာ်တၢ်ခဲလၢာ်, ဒီးကရၢၢ်လၢၢ်ဝးတရံးအီၤတဖၣ်လီၤပှီၢ်တ့ၢ်ဝဲန့ၣ်လီၤ. 32ယကွၢ်တ့ၢ်တၢ်အံၤ, ဒီးဆိကမိၣ်တၢ်ဘၣ်ဃးတၢ်အံၤ, ဒီးမၤလိန့ၢ်တၢ်မၤလိတမံၤလၢတၢ်အံၤန့ၣ်လီၤ. 33မံတစဲးစဲး, မံခ့တစဲးစဲးတက့ၢ်. တဝံနစုတဖၣ်ဒီးအိၣ်ဘှံး အိၣ်သါတစိၢ်ဖိတက့ၢ်. 34ဘၣ်ဆၣ်ဒီးဖဲနမံအခါန့ၣ်, တၢ်ဖှီၣ်တၢ်ယာ်ကတုၤအိၣ်နၤဒ်တမျိၤ တမျာ်လၢအစိာ်စုကဝဲၤအသိးန့ၣ်လီၤ.

Currently Selected:

လံာ်တၢ်ကူၣ်သ့အတၢ်ကတိၤ 24: KSWC

Highlight

Copy