လံာ်တၢ်ကူၣ်သ့အတၢ်ကတိၤ 23

-၆-

1တုၤနဆ့ၣ်နီၤအီၣ်တၢ်ဒီးပှၤအကါဒိၣ်တဂၤဒီး, တၢ်မနုၤအိၣ်လၢနမဲာ်ညါန့ၣ်ပာ်သူၣ်ပာ်သးတက့ၢ်. 2နမ့မ့ၢ်ပှၤလၢအီၣ်တၢ်ဆူၣ်ဒီး, ပၢၤနသးတက့ၢ်. 3သးကွံတၢ်အီၣ်လၢအပာ်လီၤန့ၢ်နၤန့ၣ်တဂ့ၤ. ဘၣ်သ့ၣ်သ့ၣ်ကမ့ၢ်တၢ်အီၣ်လၢကူၣ်လီန့ၢ်နၤအဂီၢ်လီၤ.

-၇-

4အိၣ်ဒီးတၢ်ကူၣ်သ့အလၢအပှဲၤ, ဒ်သိးနသုတမၤတၢ်တုၤနစုလၢာ် ခီၣ်လၢာ်လၢနကထူးထီၣ်တီၤထီၣ်အဂီၢ်တဂ့ၤန့ၣ်တက့ၢ်. 5နကျိၣ်ဧိၤစ့ဧိၤကလီၤမၢ်ကွံာ်လၢတဖျးမဲာ်အတီၢ်ပူၤ, ဒီးကမၤအသးဒ်အဒံးတဖၣ်အိၣ်ထီၣ်ဝဲဒီးယူၤထီၣ်ကွံာ်ဝဲဒ်လံာ် ကြီကြာ်တဘ့ၣ်အသိးန့ၣ်လီၤ.

-၈-

6အီၣ်တၢ်လၢပှၤအပံာ်အကီအစီၢ်နီၤခိၣ်မ့ၢ်ဂ့ၤ, သးကွံအတၢ်အီၣ်ဝံၣ်အီဆၢလၢအပာ်လီၤဝဲမ့ၢ်ဂ့ၤန့ၣ်တဂ့ၤ. 7အဝဲစံးဝဲ, “ဟဲဒီးအီၣ်အါထီၣ်တက့ၢ်,” ဘၣ်ဆၣ်လၢအသးအကံၢ်အလဲန့ၣ်, တမ့ၢ်ဒ်န့ၣ်ဘၣ်. အနီၢ်ကစၢ်ဒၣ်ဝဲမ့ၢ်ဒ်တၢ်လၢအဆိကမိၣ်ဝဲအသိးန့ၣ်လီၤ. 8နကဘှိးထီၣ်ကွံာ်တၢ်လၢနအီၣ်တ့ၢ်အီၤ, ဒီးနတၢ်ကတိၤပတြၢၤအီၤန့ၣ်ကကဲထီၣ်တၢ်ကလီကလီလီၤ.

-၉-

9ကျဲးစၢးကတိၤတၢ်ကူၣ်တၢ်ဆးဆူပှၤဟးဂီၤဖိတဂၤအအိၣ်တဂ့ၤ. အဝဲပာ်လုၢ်ပာ်ပှ့ၤတၢ်န့ၣ်တသ့ဘၣ်.

-၁၀-

10သုးကွံာ်ဟီၣ်ခိၣ်အဆၢအပနီၣ်လီၢ်လံၤနီတဘျီတဂ့ၤ. ဟံးန့ၢ်ဆူၣ်ပှၤဖိၣ်ဃဲတဖၣ်အဟီၣ်ခိၣ်တဂ့ၤ. 11ယွၤမ့ၢ်အဝဲသ့ၣ်အပှၤဒီဒၣ်တၢ်လၢအစိကမီၤဒိၣ်ဝဲ, ဒီးကကတိၤဂ့ၢ်လိာ်တၢ်လၢအဝဲသ့ၣ်အကွီၢ်အဂီၢ်ထီဒါနၤလီၤ.

-၁၁-

12ပာ်သူၣ်ပာ်သးသပှၢ်ပှၢ်ဆူနသရၣ်လၢအသိၣ်လိနၤဒီးမၤလိ တၢ်ခဲလၢာ်လၢနမၤလိသ့န့ၣ်တက့ၢ်.

-၁၂-

13ယုာ်နသးလၢတၢ်ကသိၣ်ဃီၣ်ဖိသၣ်န့ၣ်တဂ့ၤ. တၢ်တီၢ်အီၤလၢနီၣ်ဖျ့န့ၣ်တမၤသံအီၤဘၣ်. 14နီၢ်နီၢ်တခီန့ၣ်, နီၣ်တီၢ်ကမၤပူၤဖျဲးအသးသမူလၢတၢ်သံအကီၢ် လီၤ.

-၁၃-

15ဖိခွါဧၢ, နမ့ၢ်ကဲထီၣ်ပှၤကူၣ်သ့ဒီး, ယကသးခုဒိၣ်မးလီၤ. 16ယကပာ်ကဖၢလၢယသးဖဲယနၢ်ဟူနကတိၤတၢ်ကူၣ်သ့ အတၢ်ကတိၤတဖၣ်န့ၣ်လီၤ.

-၁၄-

17သူၣ်က့ၣ်သးကါပှၤတၢ်ဒဲးဘးဖိတဖၣ်တဂ့ၤ. တၢ်ယူးယီၣ်ယွၤန့ၣ်မ်အကမ့ၢ်တၢ်လၢနသးစၢၢ်ဆၢ, လၢနတၢ်အိၣ်မူအပူၤန့ၣ်တက့ၢ်. 18မ့မ့ၢ်ဒ်န့ၣ်ဒီး, နအိၣ်ဒီးခါဆူညါအတၢ်အိၣ်မူလၢအကပီၤက ပြုၢ်ဝဲန့ၣ်လီၤ.

-၁၅-

19ဒိးနနၢ်, ယဖိခွါဧၢ, ကဲထီၣ်ပှၤကူၣ်သ့ဒီးနတၢ်အိၣ်မူကျဲ န့ၣ်, ကွၢ်ထံဆိကမိၣ်အီၤဒိၣ်ဒိၣ်ယိာ်ယိာ်တက့ၢ်. 20မၤဃုာ်ဒီးပှၤအီမူၤသံးတဖၣ်ဒီး, ပှၤအီၣ်လုၣ်ကိတၢ်အီၣ်တ ဖၣ်န့ၣ်တဂ့ၤ. 21အဂ့ၢ်ဒ်အံၤ, ပှၤအီမူၤသံးတဖၣ်ဒီးပှၤအီၣ်လုၣ်ကိတၢ်တဖၣ်က ဖှီၣ်လီၤယာ်လီၤဝဲလီၤ. ကယဲၢ်တၢ်လၢနမၤအီၤခဲလၢာ်န့ၣ်မ့မ့ၢ် ဒၣ်တၢ်အီၣ်ဒီးတၢ်မံန့ၣ်, တယံာ်ဘၣ်ဒီးနကကူကၤဒၣ်တၢ် ယာ်မုာ်ယာ်ဖျ့န့ၣ်လီၤ.

-၁၆-

22ကနၣ်နပၢ်အကလုၢ်တက့ၢ်. မ့တမ့ၢ်ဘၣ်လၢအီၤဒီး, နကဲထီၣ်ပှၤကညီတသ့ဘၣ်. ဖဲနမိၢ်အသးပှၢ်ထီၣ်ဒီး, ဒုးနဲၣ်အီၤနတၢ်သ့ၣ်ညါတၢ်ဘျုးတၢ်ဖှိၣ်န့ၣ်တက့ၢ်. 23တၢ်မ့ၢ်တၢ်တီ, တၢ်ကူၣ်သ့, တၢ်မၤလိမၤဒိး, တၢ်သ့ၣ်ညါတၢ်ဂ့ၤ, တၢ်သ့ၣ်တဖၣ်အံၤကၢကီၣ်ဝဲလၢတၢ်ကဟ့ၣ် အပှ့ၤလၢတၢ်မၤန့ၢ်အီၤအဂီၢ်လီၤ. ဘၣ်ဆၣ်လုၢ်ဒိၣ်ပှ့ၤဒိၣ်ကဲၣ်ဆိးလၢနကဆါကွံာ်အီၤန့ၣ်လီၤ. 24ပှၤအတီအလိၤတဂၤအပၢ်အိၣ်ဒီးတၢ်အဂ့ၢ်အခၢးအဂ့ၤလၢကသးခုဝဲ အဂီၢ်လီၤ. နပာ်ကဖၢလၢနသးလၢဖိခွါလၢအကူၣ်တၢ်သ့တဂၤအဃိသ့လီၤ. 25မ်နမိၢ်ဒီးနပၢ်ပာ်ကဖၢလၢအသးလၢနဃိန့ၣ်တက့ၢ်. ဟ့ၣ်နမိၢ်တၢ်သးခုအဝဲန့ၣ်တက့ၢ်.

-၁၇-

26ဖိခွါဧၢ, ပာ်သူၣ်ပာ်သးတံၢ်တံၢ်နီၢ်နီၢ်သပှၢ်ပှၢ်, ဒီးပျဲယတၢ်အိၣ်မူကဲဒိကဲတဲာ်လၢနဂီၢ်တက့ၢ်. 27ဃဲသဲမုၣ်တဖၣ်ဒီးပိာ်မုၣ်ဟးဂီၤတဖၣ်န့ၣ်မ့ၢ်တၢ်သံအပျံၤ သကွီၤလီၤ. 28အဝဲသ့ၣ်အိၣ်ခိးနၤဒ်တမျိၤတမျာ်တဖၣ်အသိးဒီးဒုးကဲထီၣ်ပှၤ အါဂၤလၢပှၤအသးတတီန့ၣ်လီၤ.

-၁၈-

29ဒုးနဲၣ်ယၤပှၤတဂၤလၢအအီမူၤသံး, လၢအဘၣ်ကျဲးစၢးမၤကွၢ်တၢ် အီအသီန့ၣ်တက့ၢ်. ဒီးယကဒုးနဲၣ်နၤပှၤတဂၤလၢအဘၣ်ကိၢ်ဘၣ်ဂီၤဒီးသူၣ်အုးသးအုး လၢအနီၢ်ကစၢ်ဒၣ်ဝဲအဂီၢ်န့ၣ်လီၤ. ထီဘိအဝဲမၤကီမၤခဲတၢ်ဒီးကဒူးကဒ့ၣ်တၢ်န့ၣ်လီၤ. 30အမဲာ်ချံတဖၣ်ဂီၤထီၣ်ဝဲဒီးအဝဲအိၣ်ဒီးတၢ်ဘၣ်ဒိဘၣ်ထံးအပူၤ လီၢ်တဖၣ်လၢကြၢးပဒ့ၣ်ဟးဆှဲးဝဲသ့ကစီဒီန့ၣ်လီၤ. 31တုၤစပံးထံဂီၤဆှုၣ်ထီၣ်, သဘှဲထီၣ်ဝဲလၢလီခီပူၤ, ဒီးနယူၢ်လီၤအီၤန့ၢ်ညီကဒၣ်, ဒၣ်လဲာ်န့ၣ်, ပျဲအကဲထီၣ်တၢ်လ့ပစီလၢနဂီၢ်တဂ့ၤ. 32လၢခံတဂီၤန့ၣ်, နကမၤနသးဒ်ပှၤတဂၤလၢဂုၢ်တဘိလၢအအိၣ်ဒီး အစုၣ်အ့ၣ်ဘၣ်အီၤအသိးန့ၣ်လီၤ. 33နမဲာ်ချံကထံၣ်နါမုၢ်နါစိၤတၢ်ဒီးနဆိကမိၣ်တၢ်မ့ၢ်ဂ့ၤ, နကတိၤတၢ်ထံထံဆးဆးမ့ၢ်ဂ့ၤ, တသ့ဘၣ်န့ၣ်လီၤ. 34နကမၤနသးဒ်နအိၣ်လၢပီၣ်လဲၣ်အဖီခိၣ်, မူၤသံဘှီးသံ, ဒီးအိၣ်ဝးယီာ်ယုၤလၢကဘီလၢအစံၣ်စုးအသးတဘ့ၣ် အပူၤအသိးန့ၣ်လီၤ. 35နကစံး, “ယဘၣ်ဒိတ့ၢ်လၢတၢ်တမံၤမံၤလံ. ယဘၣ်တၢ်တီၢ်တ့ၢ်ယၤလံ. ဘၣ်ဆၣ်ယတသ့ၣ်နီၣ်ထီၣ်အီၤဘၣ်. ယပၢၢ်ထီၣ်က့ၤတသ့န့ၣ်မ့ၢ်အဘၣ်မနုၤလဲၣ်. ယအဲၣ်ဒိးအီအသီတလီခီလီၤ.”

Currently Selected:

လံာ်တၢ်ကူၣ်သ့အတၢ်ကတိၤ 23: KSWC

Highlight

Copy