လံာ်တၢ်ကူၣ်သ့အတၢ်ကတိၤ 22
22
1နမ့ၢ်ဘၣ်ဃုထၢတၢ်လၢတၢ်မံၤဂ့ၤသၣ်ဂ့ၤဒီးတၢ်ထူးဒိၣ် တၢ်တီၤအါအဘၢၣ်စၢၤန့ၣ်ဃုထၢတၢ်မံၤဂ့ၤသၣ်ဂ့ၤတက့ၢ်. ဒီးတၢ်လီၤယူးယီၣ်ပာ်ကဲန့ၣ်ဂ့ၤန့ၢ်ကျိၣ်ဧိၤစ့ဧိၤဒီးထူ ဧိၤလွဲဧိၤတက့ၢ်လီၤ.
2ပှၤထူးပှၤတီၤဒီးပှၤဖှီၣ်ဖိယာ်ဖိအိၣ်ဒီးတၢ်အံၤတမံၤဃီ န့ၣ်လီၤ. ယွၤတ့လီၤအဝဲသ့ၣ်ခံဖုလိာ်လီၤ.
3ပှၤသူၣ်ထံသးဆးတဖၣ်န့ၣ်ကထံၣ်တၢ်ကီတၢ်ခဲဟဲဝဲဒီးကပဒ့ၣ်အသး လီၤ. ဘၣ်ဆၣ်ဒီး, ပှၤလၢအတဆိကမိၣ်တၢ်တဂၤန့ၣ်ကလဲၤနုာ်လိၤလိၤ ဆူတၢ်ကီတၢ်ခဲအပူၤဒီးသးအုးက့ၤလၢခံလီၤ.
4အိၣ်ဒီးတၢ်ယူးယီၣ်ပာ်ကဲယွၤဒီးဆီၣ်လီၤနသးတက့ၢ်. ဒီးနကန့ၢ်ဘၣ်တၢ်ထူးတၢ်တီၤတဖၣ်, တၢ်လၤကပီၤ, ဒီးတၢ်အိၣ်မူအါနံၣ်အါလါန့ၣ်လီၤ.
5နမ့ၢ်အဲၣ်နသးသမူဒီး, အိၣ်ယံၤဒီးပျံၤသကွီၤတဖၣ်လၢအဖီၣ်န့ၢ် ပှၤတတီတလိၤလၢကျဲဒီဘိန့ၣ်တက့ၢ်.
6သိၣ်လိဖိသၣ်တဂၤလၢအကဘၣ်အိၣ်မူဒ်လဲၣ်ဒ်လဲၣ်န့ၣ်တက့ၢ်. ဒီးအဝဲကသ့ၣ်နီၣ်ထီၣ်က့ၤဝဲလၢအတၢ်အိၣ်မူတစိၤသးလီၤ.
7ပှၤဖှီၣ်ဖိယာ်ဖိတဖၣ်န့ၣ်မ့ၢ်ပှၤထူးပှၤတီၤအကုၢ်အပှၤလီၤ. ဟံးန့ၢ်လိၢ်န့ၢ်စ့တက့ၢ်. ဒီးနကဲထီၣ်ပှၤဟ့ၣ်လိၢ်တၢ်အကုၢ်လီၤ.
8နမ့ၢ်သူၣ်လီၤဖျးလီၤတၢ်စံၣ်ညီၣ်တတီအချံတဖၣ်ဒီးတၢ်နးတၢ် ဖှီၣ်ကမဲထီၣ်ဒိးထီၣ်ဝဲ, ဒီးနတၢ်မၤနးမၤဖှီၣ်ပှၤအဂၤတဖၣ်ကလီၤဘၣ်က့ၤလၢနဖီခိၣ်လီၤ.
9ဟ့ၣ်ညီတၢ်လၢတၢ်သူၣ်အိၣ်သးအိၣ်အပူၤဒီးနီၤဟ့ၣ်နတၢ်အီၣ်ဒီး ပှၤဖှီၣ်ဖိယာ်ဖိတက့ၢ်. နကဘၣ်ဆိၣ်ဂ့ၤလၢတၢ်န့ၣ်အဃိလီၤ.
10ဟီထီၣ်ကွံာ်ပှၤပာ်ထီၣ်ထီအသးတဂၤတက့ၢ်. အန့ၣ်ဒီး, တၢ်ကတိၤဂ့ၢ်လိာ်ဘှီလိာ်တဖၣ်မ့ၢ်ဂ့ၤ, တၢ်အ့ၣ်လိာ်ဆိးက့လိာ်မ့ၢ်ဂ့ၤ, ဒီးတၢ်ကတိၤဒုၣ်ဒွဲၣ်တအိၣ်လၢၤဘၣ်.
11နမ့ၢ်အဲၣ်တၢ်သးကဆှီဒီးတၢ်ကတိၤလၢအဘျုးဒိၣ်ဖှိၣ်အါန့ၣ်, စီၤပၤကကဲထီၣ်နတံၤသကိးလီၤ.
12ယွၤအံးထွဲကွၢ်ထွဲတၢ်ဒ်သိးတၢ်မ့ၢ်တၢ်တီအံၤကဘၣ်တၢ်ပၢၤဃာ် အီၤဂ့ၤဂ့ၤဘၣ်ဘၣ်, ခီဖျိတၢ်ပာ်ဖျါထီၣ်ပှၤလီတၢ်တဖၣ်အတၢ်ကတိၤန့ၣ်, တဘၣ်ဘၣ်အဂ့ၢ်လီၤ.
13ပှၤအကၢၣ်တဂၤအိၣ်ဒၣ်လၢဟံၣ်ပူၤဒီးစံးဝဲ, ယမ့ၢ်ဟးထီၣ်ဆူတၢ်ချၢဒီးခ့ယုၢ်တဒုကမၤသံဘၣ်ဖုးယၤလီၤ.
14တၢ်အဲၣ်ဘၢမါအဲၣ်ဘၢဝၤန့ၣ်မ့ၢ်ပျံၤသကွီၤတခါလၢအဖီၣ်န့ၢ်ပှၤ တဖၣ်လၢယွၤသးဒိၣ်ဘၣ်အီၤန့ၣ်လီၤ.
15ဖိလံၤတဖၣ်ညီနူၢ်လိာ်မၢးအသးဒီးမၤတၢ်နါစံၢ်နါစိၤတဖၣ်လီၤ. ဘၣ်ဆၣ်ဒီးတၢ်သိၣ်ဃီၣ်အနီၣ်တီၢ်တဘိကသိၣ်လိအဝဲသ့ၣ်လၢကဘၣ်အိၣ် မူပာ်သူၣ်ပာ်သးဒ်လဲၣ်ဒ်လဲၣ်န့ၣ်လီၤ.
16နမ့ၢ်ဟ့ၣ်တၢ်ဟ့ၣ်တဖၣ်ဆူပှၤထူးပှၤတီၤတဖၣ်မ့ၢ်ဂ့ၤ, နမ့ၢ်မၤနးမၤဖှီၣ်ပှၤဖှီၣ်ဖိယာ်ဖိလၢနကထူးထီၣ်တီၤထီၣ်ဒၣ် နဲအဂီၢ်မ့ၢ်ဂ့ၤဒီး, နကစၢ်ဒၣ်နဲနကဖှီၣ်လီၤယာ်လီၤန့ၣ်လီၤ.
တၢ်ကူၣ်သ့အတၢ်စံးတၢ်ကတိၤ အထံၣ်သၢဆံ
17ဒိးနနၢ်, ဒီးယကသိၣ်လိနၤတၢ်လၢပှၤကူၣ်သ့တဖၣ်ကတိၤတ့ၢ်ဝဲလီၤ. မၤလိအဝဲသ့ၣ်အတၢ်သိၣ်လိတဖၣ်, 18ဒီးနသ့ၣ်နီၣ်ထီၣ်အီၤဒီးယၢၤထီၣ်က့ၤအီၤမ့ၢ်သ့ဒီး, နကသးခုနဲလီၤ. 19ယသးအိၣ်လၢနကပာ်နတၢ်နာ်လၢယွၤအပူၤလီၤ. လၢတၢ်န့ၣ်အဃိဒီး, ယကစံးဘၣ်တဲဘၣ်နၤလၢတၢ်သ့ၣ်တဖၣ်ခဲအံၤ န့ၣ်လီၤ. 20ယကွဲးလီၤတ့ၢ်တၢ်စံးတၢ်ကတိၤအထံၣ်သၢဆံလၢနဂီၢ်လီၤ. အိၣ်ဝဲဒီးတၢ်သ့ၣ်ညါဒီးတၢ်ဟ့ၣ်ကူၣ်အဂ့ၤတဖၣ်လီၤ. 21ဒီးကသိၣ်လိနၤလၢတၢ်မ့ၢ်တၢ်တီနီၢ်နီၢ်မ့ၢ်တၢ်မနုၤလဲၣ်န့ၣ် လီၤ. အန့ၣ်ဝံၤဒီးဖဲတၢ်မၢလီၤနၤလၢနကဃုထံၣ်န့ၢ်အီၤဒီး, နကဟဲက့ၤစိာ်ကဒါက့ၤတၢ်စံးဆၢအဘၣ်န့ၣ်လီၤ.
-၁-
22မ့ၢ်လၢနမၤသ့အဃိဒီး, ဃုမၤဘျုးနသးလၢပှၤဖှီၣ်ဖိယာ်ဖိ တဖၣ်အဖီခိၣ်တဂ့ၤ. ပှၤလၢအဆၢထၢၣ်လၢကွီၢ်ဘျီၣ်ဒီးမၤစၢၤလီၤ က့ၤအသးတသ့တဖၣ်န့ၣ်, ဃုမၤဘျုးနသးလၢအဖီခိၣ်တဂ့ၤ. 23ယွၤကလိာ်ကွီၢ်တၢ်လၢအဝဲသ့ၣ်အဂီၢ်ဒီးပှၤတဂၤလၢ်လၢ်လၢ အမၤပျံၤမၤဖုးအဝဲသ့ၣ်တဖၣ်အသးသမူန့ၣ်, ယွၤကမၤပျံၤမၤဖုးက့ၤအသးသမူလီၤ.
-၂-
24မၤတံၤမၤသကိးဒီးပှၤတဖၣ်လၢအသးဒိၣ်ထီၣ်ကဲၤထီၣ်ချ့ဒီးမၤ တပျုာ်တပျီၤတၢ်တဖၣ်န့ၣ်တဂ့ၤ. 25နကမၤလိန့ၢ်ဘၣ်ဖုးအလုၢ်အလၢ်တဖၣ်ဒီးလဲလိာ်က့ၤနသးတန့ၢ်ဘၣ် ဖုးန့ၣ်လီၤ.
-၃-
26အၢၣ်လီၤဟံးန့ၢ်မူဒါလၢပှၤအဂၤတဂၤအဒ့ၣ်ကမၢ်တဖၣ်အဂီၢ်တဂ့ၤ. 27နဟ့ၣ်က့ၤမ့ၢ်တန့ၢ်ဘၣ်ဖုးဒီး, အဝဲသ့ၣ်ကဟံးန့ၢ်ကွံာ်ဒၣ်လဲာ် နလီၢ်မံခးန့ၣ်လီၤ.
-၄-
28ဟီၣ်ခိၣ်အဆၢအပနီၣ်လီၢ်လံၤတဖၣ်လၢနမိၢ်ပၢ်ဖံဖုလၢပျၢၤတဖၣ် ပာ်လီၤတ့ၢ်ဝဲန့ၣ်, သုးကွံာ်အီၤနီတဘျီတဂ့ၤ.
-၅-
29ဒုးနဲၣ်ယၤပှၤတဂၤလၢအမၤတၢ်မၤအဂ့ၤတမံၤန့ၣ်တက့ၢ်. ဒီးယကဒုးနဲၣ်နၤပှၤတဂၤလၢအဂ့ၤန့ၢ်ဒံးပှၤအါတက့ၢ်ဒီးကြၢး ဒီးစီၤပၤတဖၣ်အတၢ်ရ့လိာ်မုာ်လိာ်န့ၣ်လီၤ.
Currently Selected:
လံာ်တၢ်ကူၣ်သ့အတၢ်ကတိၤ 22: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
