လံာ်တၢ်ကူၣ်သ့အတၢ်ကတိၤ 21
21
1ယွၤပၢၤဃာ်စီၤပၤတဂၤအတၢ်ကူၣ်တၢ်ဆိကမိၣ်ညီထဲသိးသိး အဝဲနဲၣ်ထံကျိဖိအကျိၤအသိးန့ၣ်လီၤ.
2နကဆိကမိၣ်လၢတၢ်လၢနမၤနဲကိးမံၤဒဲးန့ၣ်ဘၣ်လီၤ. ဘၣ်ဆၣ်ဒီးသ့ၣ်နီၣ်ထီၣ်က့ၤလၢယွၤစံၣ်ညီၣ်နတၢ်တိာ်သူၣ်ပာ်သး လၢအမၢန့ၢ်ဆီၣ်ခံနၤတဖၣ်တက့ၢ်.
3မၤတၢ်လၢအဘၣ်ဒီးတဖုၣ်ထံၣ်ဖုၣ်ထီဘၣ်န့ၣ်တက့ၢ်. တၢ်န့ၣ်မ့ၢ်တၢ်လၢအဘၣ်ယွၤအသးဒိၣ်န့ၢ်အါန့ၢ်ဒံးတၢ်ဟဲ စိာ်န့ၢ်အီၤတၢ်လုၢ်တၢ်ပာ်တဖၣ်န့ၣ်လီၤ.
4ပှၤတတီတလိၤတဖၣ်န့ၣ်ဘၣ်တၢ်ပၢအီၤလၢအတၢ်ပာ်ထီၣ်ထီအသးဒီးပာ် ကဖၢလၢအသး, ဒီးတၢ်န့ၣ်မ့ၢ်တၢ်ဒဲးဘးလီၤ.
5ကူၣ်လီၤကျဲၤလီၤတၢ်, လီၤတံၢ်လီၤဆဲးတက့ၢ်. ဒီးနကအိၣ်ဒီးတၢ်လၢတၢ်ပှဲၤလီၤ. နမ့ၢ်မၤတၢ်ချ့ချ့န့ၣ်, နတအိၣ်ဘၣ်ဒီးတၢ်လၢတၢ်ပှဲၤနီတဘျီဘၣ်.
6တၢ်ထူးတၢ်တီၤတဖၣ်လၢနမၤန့ၢ်အီၤလၢတၢ်တတီတလိၤအပူၤန့ၣ် ကဆှၢနၤဆူတၢ်သံအကိာ်ပူၤဒီးတစိၢ်ဖိအတီၢ်ပူၤန့ၣ်အဝဲသ့ၣ် ကလီၤပံာ်ကွံာ်ဝဲလီၤ.
7ပှၤတတီတလိၤတဖၣ်န့ၣ်ဘၣ်တၢ်စံၣ်ညီၣ်ဃါမနၤလၢ အတၢ်မၤဆူၣ်မၤစိးဒၣ်ဝဲအဃိလီၤ. အဝဲသ့ၣ်ဂ့ၢ်လိာ်လၢ ကမၤတၢ်အဘၣ်လီၤ.
8ပှၤလၢအတၢ်ကမၣ်အိၣ်တဖၣ်ပိာ်ကျဲလၢအက့ၣ်လီၤ. မ့မ့ၢ်, ပှၤလၢအတၢ်ကမၣ်တအိၣ်တဖၣ်မၤတၢ်လၢအဘၣ်လီၤ.
9တၢ်အိၣ်လၢဟံၣ်ခိၣ်ဒုးအဖီခိၣ်န့ၣ်ဂ့ၤဒိၣ်န့ၢ်ဒံးတၢ်အိၣ် သကိးဃုာ်ဒီးမါလၢအအ့န့ပှိၤပှီၢ်တဂၤလၢဟံၣ်ပူၤန့ၣ်လီၤ.
10ပှၤတတီတလိၤတဖၣ်သူၣ်ဝံၤသၣ်စ့ၤတၢ်အၢတၢ်သီထီဘိလီၤ. အဝဲသ့ၣ်တအိၣ်ဒီးတၢ်သးကညီၤလၢပှၤနီတဂၤအဖီခိၣ်ဘၣ်.
11ဖဲပှၤပာ်ထီၣ်ထီသးတဂၤဂၤဒိးန့ၢ်ဘၣ်အတၢ်စံၣ်ညီၣ်န့ၣ်, ပှၤလၢအတဆိကမိၣ်တၢ်တဂၤဒၣ်လဲာ်မၤလိန့ၢ်တၢ်မၤလိတမံၤလီၤ. ပှၤတဂၤလၢအကူၣ်သ့န့ၣ်ကမၤလိန့ၢ်တၢ်လၢ, တၢ်လၢအဘၣ်တၢ်သိၣ်လိတ့ၢ်အီၤန့ၣ်လီၤ.
12ကစၢ်ယွၤ, တၢ်တီတၢ်လိၤတဂၤန့ၣ်သ့ၣ်ညါဝဲတၢ်မနုၤမၤအသးလၢပှၤ တတီတလိၤအဟံၣ်တဖၣ်အပူၤလီၤ. ဒီးအဝဲကတ့ၢ်လီၤပှၤတတီတလိၤဆူတၢ်ဟးဂီၤအပူၤလီၤ.
13နမ့ၢ်ဂ့ၢ်လိာ်လၢနကဒိကနၣ်ပှၤအဖှီၣ်အယာ်အတၢ်ကိးထီၣ်ဒီး, နတၢ်ကိးထီၣ်ဒၣ်နဲလၢတၢ်မၤစၢၤအဂီၢ်စ့ၢ်ကီးတၢ်တနၢ်ဟူ ဘၣ်အီၤဘၣ်န့ၣ်လီၤ.
14ပှၤတဂၤဂၤမ့ၢ်သးဒိၣ်ဘၣ်နၤဒီး, တၢ်ဟ့ၣ်ဖိတမံၤလၢတၢ်ခူသူၣ် အပူၤန့ၣ်, ကမၤသးခုၣ်လီၤအသးန့ၣ်လီၤ.
15ဖဲတၢ်စံၣ်ညီၣ်တီမၤအသးန့ၣ်, ပှၤအဂ့ၤတဖၣ်သးခုဝဲလီၤ. မ့မ့ၢ်, ပှၤအအၢအသီတဖၣ်အသးဟးဂီၤဝဲလီၤ.
16တၢ်သံအိၣ်ခိးပှၤတဂၤလၢ်လၢ်လၢအဟးဝ့ၤဝီၤယံၤဒီးတၢ်သူၣ်ထံ သးဆးအဂ့ၤအဘၣ်န့ၣ်လီၤ.
17တၢ်လူၤဘၣ်ပသးလၢဟီၣ်ခိၣ်အတၢ်မုာ်တၢ်လၤတဖၣ်, သံးဧိၤဂာ်ဧိၤ, စပံးထံ, ဒီးတၢ်အီၣ်ဝံၣ်သိဝံၣ်ဘဲးတဖၣ်အပူၤန့ၣ်, တဒုးထူးတီၤထီၣ်သုနီတစုဘၣ်.
18ပှၤတတီတလိၤတဖၣ်ဒုးလီၤဘၣ်က့ၤတၢ်နးတၢ်ဖှီၣ်, လၢအဝဲ သ့ၣ်ကျဲးစၢးဒ်သိးကဒုးလီၤဘၣ်ပှၤအဂ့ၤတဖၣ်န့ၣ်, လၢအကစၢ်ဒၣ်ဝဲအလိၤလီၤ.
19တၢ်လဲၤအိၣ်လၢပှၢ်မုၢ်ကနၢအပူၤန့ၣ်ဂ့ၤဒိၣ်န့ၢ်ဒံး, တၢ်အိၣ်သကိးဒီးမါလၢအအ့န့ပှိၤပှီၢ်ဒီးကဒူးကဒ့ၣ်တၢ်တဂၤ တက့ၢ်န့ၣ်လီၤ.
20ပှၤကူၣ်သ့တဖၣ်န့ၣ်အိၣ်မူလၢတၢ်ထူးတၢ်တီၤဒီးဟီၣ်ခိၣ်အတၢ် မုာ်တၢ်လၤအပူၤလီၤ. မ့မ့ၢ်, ပှၤလၢအမၢးတဖၣ်သူလၢာ်ကွံာ်အစ့ထဲသိးသိးအမၤန့ၢ် အီၤန့ၣ်လီၤ.
21အိၣ်ဒီးတၢ်သူၣ်ကညီၤသးကညီၤဒီးတၢ်သူၣ်လိၤသးဘျၢတက့ၢ်. ဒီးနသးသမူအမုၢ်နံၤကထီဝဲလီၤ. ပှၤဂုၤပှၤဂၤတဖၣ်ကပာ်ကဲ နၤဒီးမၤဘၣ်နၤဂ့ၤဂ့ၤဘၣ်ဘၣ်လီၤ.
22သုးခိၣ်ကျၢၢ်လၢအမ့ၢ်ပှၤအဘူအသးဒူတဂၤန့ၣ်, ဒုးန့ၢ်ဝ့ၢ်တဖျၢၣ်လၢအဘၣ်တၢ်ပၢၤဃာ်အီၤလၢပှၤအဂံၢ်ဆူၣ်အဘါ ဆူၣ်တဖၣ်ဒီးမၤဟးဂီၤကွံာ်ဝ့ၢ်အခိၣ်ဒူတဖၣ်လၢအဝဲသ့ၣ်သန့ၤ ထီၣ်အသးန့ၣ်, သ့ဝဲလီၤ.
23နမ့ၢ်အဲၣ်ဒိးပူၤဖျဲးဒီးတၢ်ကီတၢ်ခဲန့ၣ်, ပလီၢ်နသးလၢတၢ်လၢနကတိၤအီၤတက့ၢ်.
24ဒုးနဲၣ်ယၤပှၤလၢအပာ်ထီၣ်ထီအသးတဂၤန့ၣ်တက့ၢ်, ဒီးယကဒုးနဲၣ်နၤပှၤတဂၤလၢအပာ်အသးကဖိလိ, ပာ်ထီၣ်ထီအသးဒီးတကွၢ်ဆိကမိၣ်တၢ်လၢပှၤဂၤနီတဂၤအဂီၢ်န့ၣ် လီၤ.
25ပှၤလၢအကၢၣ်တဂၤလၢအဂ့ၢ်လိာ်ကဖံးတၢ်မၤတၢ်န့ၣ်, မ့ၢ်အမၤသံလီၤက့ၤအသးဒၣ်ဝဲန့ၣ်လီၤ.
26ကယဲၢ်တၢ်လၢအမၤဝဲခဲလၢာ်န့ၣ်, မ့ၢ်တၢ်ဆိကမိၣ်ထီၣ်တၢ်လၢအဝဲသးအိၣ်မၤန့ၢ်ဝဲတဖၣ်န့ၣ်လီၤ. မ့မ့ၢ်ပှၤအတီအလိၤတဂၤန့ၣ်, ဟ့ၣ်တၢ်သ့, ဒီးကဟ့ၣ်ဝဲလၢတၢ်သူၣ်အိၣ်သးအိၣ်အပူၤန့ၣ်လီၤ.
27ယွၤသးဘၣ်အၢပှၤတတီတလိၤတဖၣ်အတၢ်လုၢ်ထီၣ်အီၤတၢ်လုၢ်တၢ်ပာ်တ ဖၣ်, ဒီးလီၤဆီဒၣ်တၢ်ဖဲအဝဲသ့ၣ်မၤအီၤလၢလၢတၢ်တိာ်သူၣ်ပာ်သး အအၢအသီလၢအမၢန့ၢ်ဆီၣ်ခံအီၤတဖၣ်အပူၤအခါန့ၣ်လီၤ.
28ပှၤလီတၢ်တဂၤအတၢ်အုၣ်အသးန့ၣ်တဘၣ်တၢ်နာ်အီၤဘၣ်. ဘၣ်ဆၣ်ပှၤတဂၤလၢအဆိကမိၣ်ထံတၢ်ဂ့ၤတဖၣ်အတၢ်ကတိၤန့ၣ်, ဘၣ်တၢ်တူၢ်လိာ်အီၤလီၤ.
29ပှၤတီပှၤလိၤတဖၣ်နာ်လီၤအသးကျၢၤမူဆှုလီၤ. မ့မ့ၢ်, ပှၤတတီတလိၤတဖၣ်ကဘၣ်ပာ်မၤအသးအဂ့ၤကတၢၢ်တသ့ဖဲအသ့ န့ၣ်လီၤ.
30ယွၤမ့ၢ်ထီဒါနၤဒီး, ပှၤကညီအတၢ်ကူၣ်သ့, အတၢ်သ့တုာ်, အတၢ်ထံၣ်တၢ်လၢသးတဖၣ်ကဲထီၣ်တၢ်မၤစၢၤတသ့ဘၣ်နီ တမံၤဘၣ်.
31နကတဲာ်ကတီၤကသ့ၣ်တဖၣ်လၢတၢ်ဒုးသုးအဂီၢ်သ့လီၤ. ဘၣ်ဆၣ်ဒီးပှၤလၢအဟ့ၣ်တၢ်မၤနၢၤန့ၣ်မ့ၢ်ဒၣ်ယွၤလီၤ.
Currently Selected:
လံာ်တၢ်ကူၣ်သ့အတၢ်ကတိၤ 21: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
